12- 7- 2008 (六) Day 6
市巴之 一日乘車劵之旅

題外話: 尋晚我地就已經食左奈良買來既白桃, 用問酒店 reception 借來既刀切開,
吖, 借既時候, 佢都入左去 ok 耐先拎把刀出來 , 嘿, 唔通把刀係佢地員工房借來既刀 ? ...
印象中都係第一次食 新鮮白桃 , 地們罐頭桃就食過唔少...
果兩個白桃聞落真係好香, 食落好甜, 好多汁喎! d 水多到可以一路食一路漏出來 , 犀利!
對白桃有非常好既評價 !~
反而 d 蕉就飽飽無食, 再等遲 d d 再食
到今朝還刀時, 個叔叔問我地 room number, 豬仔好順口咁話 402 (因為上一間富士屋係 402房) , 其實我地係 403 , 個叔叔幾驚訝咁話 "402?" ......
哈哈, 無人入住的, 實嚇親佢了 ~ 我地即刻更正番無事了~~~

嘿, 今日都係無點早好多起身既 ^^" 無計啦, 太好訓了~
一出酒店, 我地就去附近既地鐵站 - 烏丸御池站 , 買左兩張市巴士一日乘車劵 , 每張 500円, 0係指定範圍內一日無限次使用
咁就展開我地既市巴一日乘車劵之旅 !~

不過買完乘車劵, 我地都仲係要行那條長直路 "烏丸通" 落大馬路四条烏丸, 因為 "烏丸通" 無巴士去到我地要去既目的地, 係大馬路先有, 唉~
亦都係呢個時候, 本京都旅遊書附加既巴士地圖就大派用場喇 !
首先睇目的地有咩車號去到, 然後搵附近有冇呢個車號既巴士站, 就大功告成
一開始其實唔係好識睇呢張地圖, 主要搵唔到依家企緊咩方位, 邊個行車方向, 同前面係向住地圖邊度行緊咁
又係摸索左一段時間, 終於搵到個車站 , 望去車站既對面, 又係先幾日仲係 "光脫脫" 既「鉾」，依家已經裝扮左唔少, 應該係師傅們趕工既成果!~
等緊車時, 又見到樣新奇物, 就係 曉"郁" 既巴士站顯示牌 !
佢會將架車行左既路, 同 依家個車站 中間既隔離分成 3段, 每行完一段路, 個顯示版就會跳一下, 等人知道依家架車去到邊度喇 , 好貼心吖
真係好犀利 丶 好 "堅" 嫁 ! 當個牌 "顯示" 架巴士就快到站後, 無幾耐架巴士真係駛到來了! ~

我地第一個既目的地係 金閣寺 !
搭唔記得係 12 定 101號 bus 0係 "金閣寺前" 站落車 , 一落車, 其實好易搵, 睇邊條路最多遊人行去就是 ~
哈, 金閣寺既入場卷係張 "御守護" 來的, 好特別! 嘿, 張 "守護" 保 "開運招福, 家內安全" , 咩都保曬, 咁0係呢度唔駛另外買 繪馬 , 符 etc. 了 ^^" !~

一入到去, 其實都有d 似行緊個靚版既公園 , 因為差唔多全程都無冷氣 ^^"
除左0係入口度見到個有梵鐘既 "鐘樓" , 一入到去其實已經見到0係湖旁邊丶 金光閃閃 既 金閣舍利殿
真係好閃 !~~~ 點解一座室外既建築物可以咁閃嫁 ! 真係好似真金咁, 好犀利 ...
佢既屋頂仲有佢既標誌- 金鳳凰 , 一樣係咁金 !~
仲有巨型版盤景 - "陸舟の松" , 明明d 松好細盤嫁嘛, 佢種左成棵樹出來, 都似有六百年, 仲整左個盤景咁既樣 , 真有心機, 至於個意境... 都似隻船既, 再深層 d 既意思暫時未領略到 ^^"

吖, 唔同角度睇金閣寺都係好新好靚, 靚得好唔真實果隻, 又係加埋周圍既樹 同 藍天 , 真係 影相佳品 !~
唔知依家裡面仲係咪住人既呢, 咁果 d 人都幾開心喎, 住0係金光閃閃既屋... 唔知入面咩樣既呢, 會唔會都有廚房既呢, 咁 d 油煙又點算呢 ...

然後, 又見到差唔多每個寺必備既 "小型禮品部" , 表面上佢係間簡樸既茅屋 , 實際上裡面係有冷氣滲出來的 , 所以我每次見到呢D "小型禮品部" , 都會行過去, 一來睇下有冇岩心水既禮品, 二來可以涼冷氣 , 冷氣真係我既好朋友~
再行上 d , 就見到一個湖仔 .... 吖, 唔係, 係叫 "安民澤" , 用途係安民, 仲有 ... 養蚊...

吖 , 原來, 太陽係我既天敵 !
每次0係 "烈日當空, 太陽底下" 行, 就覺得, 原來我既心情, 係同個太陽既曬+熱力成反比的,
當個太陽高高掛, 無遮無擋咁曬落我度, 我D 興致吖, 幹勁吖, 精神 etc. 都蒸發曬,
但一去番 d 陰涼d , 無太陽曬住既地方呢 , d 心情又番番來咯 , 又 "精靈" 番曬, 做咩都有幹勁 d ! 真係好神奇 !~ 萬試萬靈 !
所以呢, 冷氣係我既朋友 , 太陽唔係我既朋友~

所以0係金閣寺呢度 , 除左 "痴" 實0係佢既遮底下 XD , 就係搵陰涼既地方企 , 個人真係會爽d , 疏乎 d ~
又可能因為曬既關係 , 除左係咁影金閣舍利殿既相外 , 其他小型建築物都係影左少少相而已 ^^"

題外話: 第二個日本限定常用詞係 --- "大樹好遮陰" !
凡係去 d 寺吖, 社吖果堆度參觀 , 大大部分時間都會0係室外+太陽底下逗留 , 咁好自自然然就會 "呢" 去 d 有陰遮既地方抖涼喇 , 咁邊度有陰遮呢 ? 就係0係大樹底下喇 ~ 所以真係 "大樹好遮陰" 的 !~
順理成章 , 第三個日本限定常用詞係 --- "開遮" !
0係香港就少 D 機會要不停咁0係太陽底下行, 0係日本, 我既 "勵精圖治" 下 , 成日都有機會行 , 呢度又行, 果度又行 ,
仲要行去好多景點之前既路, 甚至係景點果度, 都無陰遮 , 如果唔開把遮遮住個大太陽 , 真係中暑都似 ! 仲要日日中幾多次都得! 所以, 我地一去到室外 , 豬仔或者我就會講 , "開遮" !~
p.s.: 同埋豬仔話 , 樹底下都最好開住把遮, 因為 d 樹唔知幾時會跌條蟲仔落來, 好得人驚的 ! 所以我記得, 0係奈良既春日大社 , 宇治既平等院 etc. 有陰遮既地方, 我地都有開住把遮, 把遮真係好有用 !~

哈~ 雖然金閣寺張入場卷本身已經自稱係 "御守" , 可以 "開運招福"
但0係小禮品部竟然見到有 300円一塊既 繪馬 (好多都係賣 500円一塊的) , 呵~ 繪馬係日本 "特產" 來喎 , 第二度買唔到既, 所以我地就一人搬左一塊番屋企 ~
D 繪馬幾得意嫁 ! 屋形的, 原本俾人寫 d 願望上去掛0係個寺度
我地既繪馬依家保 " 家內安全 , 交通安全 " ~

周圍閒逛左 ok 耐, 再見到個大型好多既禮品店, 裡面既冷氣簡直吸左我入去 !
都賣 ok 多野嫁 ! 本來佢想買對公仔番屋企 , but 最後諗住出面應該都有好多同類型賣, 所以都係再睇定的
比較特別既禮品包括 好多以金光閃閃既金閣寺為造型既匙扣 , 錢箱, 擺設 etc.
唏唏~ 入面某d 位真係好涼吖~ 特登停0係出風位附近好耐先走 ^^"

金閣寺竟然又有坐低食野同自動售賣機既地方, 不過都唔出奇既 .....
不過我地又係 "運吉" 的 , 搵左張櫈坐低 "補給" + 抖抖就走了 ~
離開時仲經過另一座寺，叫 "不動堂" , 據說內裡放有重要文化財產之一的「木造不動明王立像」 , 我就無乜留意呢間係咩來, 不過就見到佢擺0係度既兩個籤筒, 一路行一路望個籤筒就繼續我地既旅程 ~

離開金閣寺時 , 都有傾過0係邊度食晏仔 , 因為呢度附近都有地方食野,
我形住形住下一個景點 -- "嵐山" 就只係一座山 , 一座有美麗景觀既山咁簡單 ,
佢就話果度應該唔係得一座山, 有野食的 , 所以我地就決定搭車去左果度先再搵晏仔

本來原定路線係搭地鐵去嵐山 , 不過既然我地買左乘車卷, 所以決定今日全部都用巴士
而且咁岩又俾我地搵到點搭巴士去嵐山 , 首先我地搭 59號去山越中町站 , 呢個所謂既總站都幾荒涼, 好在都有幾個人又係等車去嵐山 , 等左ok 耐, 我地再轉搭 11號往嵐山天龍寺前站

來到 嵐山 , 我地0係電鐵嵐山站既下層-- 地面坐低, 研究一陣既路線圖 + "方便下"
呢日仲有郵局既 "臨時出張所" , 佢地都幾熱下 , 亦無乜人幫襯 , 慘慘 ...

我地整理下後, 就再周圍行下 , 主要係搵晏仔, 竟然見番 "ちりめん細工館" ! 個舖面同祗園果間一樣 , 都係裝飾得好別緻好靚, 即時入去睇睇 !
賣既野都係差唔多 , 不過, 祗園果間就有 以十二個月份為主題 既公仔 , 而嵐山呢間就有大型既 布壽司 拼盤 , 好靚靚吖 ! ~ ~ ~

之後見到既係 "大本山天龍寺" , 不過呢間我地淨係0係大門口影左相唧
周圍打左個圈 , 就0係一間家庭式經營既食店食晏仔, 佢叫咖哩飯, 我叫炸豬排烏冬
竟然0係牆上面見到 阿B ....... 吖, 唔係, 係 "日日是好日"
食到尾時再有幾個年青人坐低食野 , 佢地有個識講廣東話的, "他鄉遇同鄉" !

食完, 我地再去吃甜品 , 我地去番車站度, 果度有間店賣雪糕&飲品, 佢叫左綠茶雪糕 , 我既就係幾樣生果加埋既凍飲 , 酸酸甜甜 , 都唔錯~

之後 , 就行嵐山浪漫景點 -- 渡月橋 ~
呢條橋本身望落就唔算好特別 , 特別既係加埋周圍既景 , 佢底下既 "大堰川" 都幾靚嫁 !
D 流水唔算好急, 慢慢流, D 水由山群果邊流來, 近山果邊有太陽曬落條川度, 金光閃閃, 靚! 仲有人0係度玩艇仔, 加埋呢條渡月橋 , 成個景望落好舒服 !~

happy holiday mood 滿瀉 ~ 我地就0係 嵐山公園 慢慢享受旅行 ~
0係公園慢慢坐 , 慢慢嘆 , 慢慢影景 , 慢慢影人 , 慢慢傾計, 慢慢感受呢個悠閒既環境 ~
唏~ 0係呢個靚景, 因為有對男人搵我地幫手影相 (兩個... 男人 ?!?) , 所以我地0係呢度有 合照 了, 開心開心 : D !~~~

係囉~ 明明閃咭書介紹嵐山 , 都係話嵐山裡面有咩行, 我咪形住形住只係一座山來囉~ 由於我地又熱又懶 , 又唔係咩花期, 所以就無來個 "自然深度行" 喇
& 本來晏晝時都計畫過, 行完渡月橋可以搭車出番去睇京都御所 etc. , 不過可能我地0係嵐山公園嘆耐左 , 研究過 , 果時 4點幾 , 出番去都要差唔多 45mins , d 寺類又 5點關門 , 好似趕唔切 , 所以都決定取消撲出去計劃 , 繼續嘆 ~ ~ ~

行番出去時, 見到 d "古銅‧猛男‧人力車" 都差唔多收工 , 佢地都幾敬業喎 , 收工時會好高興咁同人地同遊客講 "我收工喇" (<-- 我估佢地係咁既意思)

我地再次去番車站 , 嘿, 途中都係入去d 店入面吸冷氣 ~
去到車站, 搵左個位坐低等車, 0係我地前面, 仲有個 "猛男" 未收工 , 佢好似好陰公啊 , 佢企個位無野遮住, 個太陽係咁曬落去 , 滴汗唔止 , 間唔中先飲幾啖水 , 仲要我地等車咁耐 , 佢都未有生意 .....
搵食艱難 ‧‧‧

終於有車 , 更好彩有連住兩個位坐 ~ 都坐左好耐 , 由 pass 覆蓋唔到既嵐山去番 pass 覆蓋到既京都中心 , 估唔到 , 有 pass 我地呢程每人都要補番 240円 , 張 pass 削削 ^^"

0係四条河原町落車 , 唔知點解 , 河邊既食肆已經坐左好多人 , 唔通d 人已經收工咁爽 ? ... 街上面又有人着和服, 豬仔話一陣可能有d 咩祗園祭慶祝活動, 所以咁多人着和服, 好有日本氣氛耶, 真開心~ 我地行左去附近既百貨公司 - "高島屋" (sogo 果類) 逛 , 連佢都擺左好多着和服既公仔, 我即時影番張相留念 ~

我地先0係最底賣各項食品果層逛 , 見到有好多野食 !~ 有蛋糕, 甜點, 炸物, 漬物, 新鮮蔬果, 海鮮, 魚生, 炒麵, 膠兜裝便當 etc.
之後我地再上食店雲集果層, 再次 "他鄉遇同鄉" , 見到來自香港既 "淺水灣" 同 "糖朝" ! 0係呢度香港既地道食品 e.g. 芒果布丁 就貴了 , 仲有各國食品, 不過我地最後都係落番去最底果層買晚餐,
我地買左兩串炸野, 兩串燒野 , 加埋...... 一個 8件 雜錦蛋糕 !~ 本來都想買一整個蛋糕番去慢慢切既, 不過一整個果d 又唔岩口味, 所以都係揀左呢個, 呢個睇落都幾好味~
p.s.: 買蛋糕時俾錢時, 個店員同我地講左幾句野, 不過我地聽唔明, 見我地一面呆滯 , 就有位先生同我講左堆野 , 初時唔知佢講緊咩, 到後來先 "感覺到" 佢講緊英文, 話咩聽日前... 應該係話個蛋糕最好要0係聽日前食左佢, 真係唔該曬 !

買完野, 本來諗住好豪咁拎住張 pass 搭車番去, 點知送車尾, 下一架又有排, 唯有繼續行
行番去時, 再0係 "羅仔" 買左個 微型年輪蛋糕 同 牛乳 , 豬仔話呢隻蛋糕幾好食的~
0係行番去酒店既一條小橫街中, 又見到隻仲整緊既 "鉾"

番到去, 開始我地既晚餐 , 頭盤竟然係 杯麵 !!!
就係0係奈良超市 "OKest" 度買丶仲未食既 日清鐵板炒麵 (<-佢) & 日清麵職人 (<-我)
再開埋頭先0係高島屋買既炸物同燒物做餸
豬仔見悶悶地, 開個電影看看 , 竟然見到佢偶像- 涼子 ! 原來佢有套日劇《ヤスコとケンジ》首播, 真係好好彩, 咁都見到 ! 齣劇我估係兄妹親情劇啦 , 睇左一集, ok 既, 係個小妹妹女主角唔夠吸引 ^^"
如是者，有涼子0係度, 我當然靠邊站, 無定企啦, 唯有 "默默" 食杯麵

食完杯麵炸野 , 抖左陣, 今晚既主角出場 !~
佢就係熊仔嘜頭做牌子既 4款 8件既精選蛋糕 ~ 我同豬仔每款一人一件~ 有栗子, 朱古力, 芝士, 杏仁蛋糕
豬仔呢晚食左 3件 , 我就食 2件 , 留番兩件聽朝做早餐, 將快樂延長~~~
如果有得一整個蛋糕自己切就更好 : > ~ 我地好少機會 切蛋糕 呢 , 最主要係無地方俾我地切完蛋糕食, 二來得我地兩個好難買個大蛋糕番來切 , 真可惜, 一齊切蛋糕好開心耶 , 因為多數切蛋糕都有事慶祝嘛~

食完蛋糕, 又係時候做晚上指定活動 --- 洗衫 , 今晚洗既衫無之前咁多~
p.s.: 唏唏~ 晚上0係酒店洗衫其實幾 sweet 的 ~~~ 因為我地兩個人, 一個會負責洗衫, 另一個一時會幫手洗, 一時又會幫手搵位擺吹乾d 衫 , 係咪好似對夫婦仔呢 ~~~
好 sweet sweet , 所以日日洗都唔拘~~~

題外話 : 點解 day 6 會用綠色既呢 ? 當然唔係因為我鐘意綠色啦
係覺得綠色同今日既主題幾似, e.g. 金閣寺, 嵐山 , 都係好大自然 。

今日既一日乘車劵之旅順利完結 , 今日真係除巴士以外, 無再搭其他交通工具 , 張 pass 照數字計就無賺無蝕, 行程多d 就應該着數 d既 , 不過唔緊要, 我地有張乘車卷做紀念吖, 賺左喇 ~
行程相對之前較少, 疏乎 d 輕鬆 d , 有好有唔好啦, 不過有得同豬仔一齊, 就已經好好了 : > !~
多謝豬仔