話咁快已經到咗行程嘅尾聲，今日都講不出有甚麼行程。朝早都晏晏地起身，去不到牧志市場吃早餐，都係食返尋昨食剩嘅蛋糕、飲剩嘅午後之紅茶。如是者就去沖繩其中一間較大型嘅 AEON 行下買下嘢，首先比我地見到有間精品店，係裡面就行得耐了，當然都買咗堆精品。至堅就係朋友仔買咗好多美少女戰士嘅產品，絕對係重拾返童年回憶。以為咁就完？錯了，又咁啱比我地見到另一間鋪頭有好多小黃雞嘅產品賣，呢度就真係行得耐了，一樣買咗多好多。轉輾見到有夾公仔機，又比錢去夾，時間如是者就無晒。重想話去 Blue Seal 吃多杯雪糕先走，時間根本唔夠用。由於當天是週日再加上是黃金週，AEON 裡都有啲重頭戲節目，有這個幪面超人嘅 Live Show，睇下幾多人睇 ↓



呢個角度睇就更加清楚，呢個情景真係好日式百貨公司。至有趣係假設係當超人想叫啲小朋友嗌幾聲比啲力量佢嘅時候，啲小朋友又真係好齊心咁樣嗌，氣紛非常熱鬧 ↓



影咗幾張相就走了，原先諗住退稅，點知無得退。比我地咁啱見到 Gindaco，當然買來食下啦 ↓



自從之前香港 Gindaco 執剩太古城 UNY 嗰間之後都好少食到，呢個品牌嘅章魚燒真係堅好吃，個皮係脆、內裡都有大大粒嘅章魚而唔係一團粉 ↓



時間不多不多，吃完就返酒店拎行李走人，呢間就係我地入住嗰間酒店，都幾靚仔 ↓



撘 Mono-Rail 往機場去，那霸空港站 係日本最西端嘅站，而空港站隔離嘅 赤嶺站 就係日本最南嘅車站，搞笑 ↓



Check-In 過後係客運大樓行下，買咗啲麵包作午餐，基本上機場係無乜野好行的。國內線嗰邊好過國際線嗰邊多少，但都無乜嘢睇的。預正過關高峰期，都等咗一小陣，前面嘅外國客因為 Hand Carry 內有大量壓縮氣體、液體嘅關係搞得勁耐，小小一個透明膠袋比佢地擠到爆晒 ...

如是者就他他條咁等上機，上機前再吃多 Blue Seal，正 ↓



再見，沖繩 ↓




整個旅程就此完結，又要想想下次嘅遊記怎樣打。


That’s All.

話咁快就嚟到第四日，其實第三日都有啲唔如意嘅事情發生咗 ... 尋日去水族館影多超多相，之不過係撘巴士回市中心嘅途中想話睇下相，點知發現每張相都有一點黑點。即係話部單反唔知邊個位入咗粒塵 ... 心情失望極了，但都要想辦法整走嗰粒塵。係架車到整咗勁耐，好在最後都整走咗，不過全日影嘅相都係中間部份嘅位置有黑點，唉 ...

今朝一日起身就行去 第一牧志公設市場 吃早餐，基本上都唔太關我事，我都唔吃生嘢。國際通早上非常冷清，有昨晚光顧過的 波照間 和著名嘅 黑糖屋 ↓



御菓子御殿 国際通り松尾店。不同分店有不同建築設計，這間是以琉球王朝建築風為本 ↓



如是者就到了市場，個感覺就係「街市」。有濕貨、乾貨，係乾貨個邊買多咗盒金楚糕，小本經營服務親切啲，送多咗兩塊餅，哈哈。濕貨就堅啦，大量新鮮海產，朋友仔就買咗成呎長嘅中とろ 拎走吃，價錢都非常相宜，好似百零蚊左右！至有趣嘅係有一檔嘅店員竟然識講廣東話，太厲害了！可惜我地無幫襯佢。相中間個隻叫夜光貝，勁大隻！二樓有食肆可代為烹調，不過時間不多而且早，如果唔係都揀隻龍蝦燒一燒 ↓



呢座係市政廳，都幾有 Style ↓



帶著外賣魚生回到酒店吃，可惜無豉油，朋友仔話好似生吞條魚咁（事實上的確都係生架喎！）。眼闊肚窄嘅佢都吃不晒，開頭買嗰陣佢重驚唔夠飽，幾難先阻止到佢。話分兩頭，呢間酒店嘅鎖卡都幾型，是咁的 ↓



Check-Out 之後就撘 Mono-Rail 往首里城，由於節省用電，車廂內係無開燈的，好在有開冷氣 ↓



話咁快就到了首里，這是 弁財天堂 和 円鑑池，前者是用來供奉水之女神 弁財天，起初收納了由朝鮮送贈的 方冊蔵経。個池係人工池，水深唔係太深，三米夠沒頂 ↓



世界文化遺產 園比屋武御嶽石門，原本係當國王外出時用來祈求佢平安嘅地方↓





首次到沖繩嘅必去景點，守禮門。2000 yen 上的就是這度守禮門 ↓



歡會門，入城嘅第一度門，門如其名，歡迎外國（中國）使者 ↓



龍樋，是王宮嘅飲用水，可惜比人當許願池擲錢許願 ↓



漏刻門，用來作時鐘用，大家記唔記得古時中國咪用漏刻來計時嘅，呢座門上方就有個咁嘅裝置計時 ↓



由城垣上看回首里，左邊紅色屋頂是一所藝術學校 ↓



広福門，經過這度門就會行到去門票售賣處 ↓



由於買咗 Mono-Rail Pass，買入場卷有折扣 ↓



奉神門就係入口處，入御庭前最後一度門。有三個出入口，中間比國王同中國使者（和遊客）用，普通人就用左右兩側的門。一睇就知翻新完，靚幾多 ↓



係廣場上有啲小手工比遊人玩，有啲要比錢、有啲就唔洗，主要都係上色或者填色 ↓



正殿，內裡連地面個層有三層 ↓



兩條龍柱，哞形 和 阿形↓





入正殿前先經過南殿、番所，內有一些古典收藏，不准拍攝。行多幾行就會行到去大殿，牌匾是康熙所贈送 ↓



呢頂係國王戴嘅帽，上面鑲有金、銀、水晶、珊瑚、碧玉和玻璃作裝飾。係咪無乜霸氣呢？國王都只係戴呢類東西，可想而知國力不會怎樣強 ↓



正殿嘅模型，以一個小國來說都幾厲害 ↓



首里城曾經被戰火燒毀，係原址上有不同修復。話分兩頭，見唔見到我地無著鞋呢？整個殿都不准穿鞋，行到我腳勁痛 … ↓



不記得這是冊封還是甚麼，總之都係啲大單嘢。國王就坐係二樓到遠眺著，除咗射箭之外都幾難刺殺國王 ↓





呢個就係祈福儀式嗎？國王就落返來御庭 ↓



參觀完正殿就在 右掖門 離開↓



久慶門，原先呢度門係女性為主的用門，也作國王、官員外出觀訪之用。由於順路，依家就變成出口處，有看更把守 ↓



行咗整個中午，到了遊客中心的 首里社 吃 Lunch ↓



剛好唔洗等位，就叫了兩碗麵，一麵是咖哩雞肉沖繩麵、另一款是極普通無任何特別的沖繩麵 ↓





天氣炎熱，剛巧有 Dessert Set 就點了一個，味道都 OK 嘅。原先諗住佢有甜品有杯嘢飲都幾盞鬼。點知佢地唔會先上飲品後上甜品，係整個 Set 上，失了多少本意 ↓



吃飽飽之後就離開了，路過一間 Blue Seal 店，多人到呢 … 無他，都有多少熱↓



呢間就係先前講過的藝術大學，原先係小學 ↓



不得不提的就是這頂農夫大草帽，特登係香港買，諗住沖繩會曬到傻，戴帽會方便過擔遮。可惜每天不是無太陽就是留在室內，差啲都想扔咗佢。好在今日都總算用得著 ↓



撘返 Mono-Rail 返市中心，留意咗一陣，啲車長出發前會用手指指前方一下，應該無任何實際作用，是行內傳統吧 ↓



再一次返到來國際通，今次到了著名的 鹽屋 買鹽，同時都試下可以落鹽吃嘅軟雪糕。個人覺得係 Gimmick 多，係咪好特別？其實都唔係好特別 ↓





係街上繼續購物，見到大大條魚放係餐廳門口 ↓



係新開嘅水旅館專門店買咗少少嘢，竟然我地係頭 5000 名顧客，拎到個靚靚 Folder 和環保袋 ↓



除些以外，都有去激安殿堂買了些心宜的東西，買得勁開心。還有到藥房行（遊客就是要行藥房吧），這就是日版強力無比膏 ↓



消費完一輪之後返酒店拎行李再往另一間酒店 Check-In。心水清嘅都會留意到我地嚟沖繩短短幾日轉三次酒店。其實係因為臨走嗰一兩日剛巧日本係連續幾日假期嘅黃金週，好多酒店都滿又或者貴咗一兩倍。我地原先諗住最尾尾嗰日先享受陽光與海灘，可惜一來房價貴咗一倍、二來選擇少好多，好似得一間定兩間咁上下，所以行程上就調去第一日享受無陽光嘅陽光與海灘。之不過市中心嘅酒店都搶得好緊要，先兩晚住嘅 Daiwa 滿晒，被迫住另一間酒店。呢間酒店附近係比較靜、出入都要靠 Mono-Rail，唔似得之前可以行去國際通咁。

我地今晚即將入住嘅係 Mercure Okinawa Naha，間房係靚過 Daiwa 的，但價錢反而差不多 ↓



Amentities、Welcome Drinks 都好咗，至少有兩樽水 ↓





另一有趣嘅係每間房都有落地玻璃，可以唔知幾多度嘅角度望到 Expo，格調都真係不錯 ↓



係酒店抖咗一小陣就坐 Mono-Rail 返去國際通搵食。今日朋友仔 __ __ 歲生日，晏晝特登食少啲留返個肚係夜晚大拆特拆，千揀萬揀避過晒街上所有兜客嘅食肆來到這間 燒肉國際 吃 ↓



入到去都係咁易望下 Menu，點都會叫石垣牛和 Agu 豬。石垣牛食落好重牛味，無黑毛牛咁入口即溶，個感覺係有多少唔同 ↓





另外再加多份 Agu 豬餃子，但都係第一次係波照間吃個次最好味，可能係個種未試過嘅感覺好新鮮，個種味道未必最好，但一定最驚喜 ↓



話分兩頭，呢隻爐不是平時用開個啲款，開頭都難掌握火候！我好傻仔咁試不鏽鋼啲位熱唔熱，點知原來好熱 ... ↓



剩係嗰兩碟肉和餃子點夠吃，另外加了一份特價牛肋肉，肉味濃但都幾羶！吃到咁上下就拎住呢個牌仔埋單走人，價錢當然平過香港，雖然呢間食肆嘅名有啲伏伏地，不過勁多本地人吃，誤打誤撞又搵到好嘢！不過當地嘅燒肉好少好似香港咁預先醃定，個人覺得係唔同食法的 ↓



生日大日子，都要找個蛋糕切餅。回酒店的路上見到有 Italian Tomato，即刻碌入去買蛋糕，不過無細磅裝蛋糕，咁就買咗兩件切餅先。朋友仔當然唔高興，話寧願食唔晒都要花幾千 Yen 買一磅裝蛋糕。又係好難先阻先到佢，誰不知道我地係去撘 Mono-Rail 嘅期間見到 Ryobo（即係之前講過嘅一間百貨公司）未關門，入去行個轉睇下，係地下嗰陣嘅麵包店已經清場，都已經打定輸數。點知上地面嗰陣重見到有間西式餅店未關門，拿拿聲就買咗個細嘅朱古力蛋糕，職員重幫我地吱名牌！雖然臨近收鋪，但佢地都無初四咁嘅樣，重好花心思咁裝飾個餅。好難想像係香港會發生啲咁嘅事情，日本人嘅服務的確是一流！朋友仔當然勁開心！我見到有咁嘅 Size 嘅蛋糕都好高興 ↓



聽住 Bruno Mars 嘅歌食蛋糕，一樂也！係 Italian Tomato 買嘅蛋糕點算？都無問題，食埋佢，飽到我呢 ... ↓



以下就係今天的戰利品，見唔見到右下方有張藍色嘅卡，係 PSN JP 1000 Yen 嘅卡，咁都係激安殿堂買到，勁高興！唔洗係香港比人抬高價錢買，正 ↓



總括來說，今天都真的幾好！


That’s All.

說時遲那時快，已經係第三日。今日嘅天氣真係 Wonderful，陽光普照！一早就由那霸市中心撘 やんばる急行バス 往海洋博公園，單人單程 1900 yen，都咪話唔貴。勝在唔洗到名護轉車，慳返不少時間，都唔錯。但直到依現在有件事我都係唔明白，睇官方網站話明係要預先買車票，咁我地臨離開香港前就買咗車票以防萬一。但係撘巴士落車個陣又見人可以用現金嘅？咁究竟係要買定唔要買呢？不過買定先就無壞嘅 … 撘咗近三小時車終於來到沖繩非去不可嘅海洋博公園，都咪話唔大 ↓



天氣炎熱，少不免有個噴水池消下暑 ↓



行多幾步就見到海洋博公園嘅明星：鯨鯊 ↓



見到鯨鯊就差不多行到園內最觸目嘅 沖縄美ら海水族館 ↓



記住唔係好水族館門口買入場卷，係市中心便利店、酒店買係平多少的 ↓



真係好靚 ↓



由於實在太靚，決定襯有靚靚陽光嘅時候係戶外行下，從另一角度睇水族館 ↓



另一條鯨鯊，今次有顏色的 ↓



先去海象館逛下 ↓



真係好難想像以前有人會將海象睇到變一條美人魚，個條美人魚真係肥到呢 …↓



海象館隔離有個小灘頭，見有人落去我地都無執輸落去睇下，潮漲加陽光等如靚 ↓



啲水清到呢 … 不過沙係唔幼嘅 ↓





係個灘頭影咗好耐相，之後上返去睇海龜館。日本人嘅設計，就係咁精美，這是地上的一些裝飾 ↓



去到海龜館嘅時候有職員係度餵緊龜 ↓



啲龜真識食，是大蝦來的 ↓



移動期間見到有學校帶學生來參觀，指定服式：同顏色的小帽子，都真係幾得意↓



食飯前探探海豚，睇下幾大個氣孔 ↓



其實呢類水族館、動物園都會有個食堂之類嘅地方比人食下嘢。一講起呢類食堂就自自然讓大家諗起貴得嚟唔好食嘅印象，咁事實都的確比起出面貴少少、味道又爭少少咁，但又未至於好呃嘅，其實都 OK。不過啲中文翻譯就搞笑啲了，平實檸檬汁 … ↓



點了沖繩拉麵和沖繩炒麵，還有 Agu 豬 コロッケ。個啲麵真係一般，但係個コロッケ真係唔錯，有啲肉汁 ↓



時間不多不多，拎住塊 コロッケ 就急急腳行去劇場睇 オキちゃん↓



オキちゃん 都幾大隻啊 ↓


還有其他海豚表演，今次係吹氣泡 ↓



指定表演之一：頂波 ↓



呢個係海豚表演自轉，本身件事都好正常，但係身形龐大偽虎鯨張大個口自轉起上嚟個樣超蠢，實在太搞笑了 ↓



另一指定種作，海豚頂起訓練員 ↓





今次就到偽虎鯨頂起訓練員，如果張開口分分鐘可以吞咗位訓練員 ↓





指定動作，跳到幾層樓高，開頭以為隻偽虎鯨都會跳埋一份添 … ↓



睇完劇場就入去水族館裡面，門口有個 Setting 比遊客影相，當然佢都會幫客影相再賣返比佢地啦 ↓



水族館裡面當然有好多海洋生物，都不多作介紹，其中兩款幾搞笑嘅有八瓜魚和星班 ↓





行下行下就差不多去到水族館最具吸引力嘅 黑潮之海，先嚟同隻魔鬼魚打個招呼 ↓



鯨鯊出現了！ ↓



看看鯨鯊和人嘅身形爭幾遠 ↓



缸裡面係有三條鯨鯊，都咪話唔厲害，同埋睇下幾多人影相 ↓



或許大家都有個疑問點解裡面有個人呢？其實佢係抹緊玻璃的，不過我覺得呢個係表演之一 ↓



鯨鯊 and Friends ↓



兩張健力士證書，包括全世界最大嘅水族館同埋全世界最大嘅水族館觀賞玻璃 ↓



由於錯過咗導賞團時間，咁就唯有睇其他展品。有一塊大白鯊皮，真係幾「鞋」手 ↓



魚牙展覽 ↓



呢棚就係古代巨齒鯊 Megalodon 嘅牙，又名 天狗の爪。一隻牙大約係成年男人嘅手掌咁大，專食鯨魚 ↓



還有其他教育用展品，呢個係鯊魚切片 ↓



離開水族館，附近還有一標本展覽，呢隻係巨口鯊，成七米長 ↓



還有抹香鯨的骨骼 ↓



如是者就參觀完水族館，買下精品咁就離開。去返先前嘅灘頭，潮退加無陽光 …係咪無咁靚呢 ↓





晏晝的美景不再現 … ↓



再來返今早到過的噴水池，後面有個海洋文化館，吸引力當然無水族館咁大，遊人都少啲，我地都無去 ↓



鯨鯊係無處不在的 ↓



剛巧嗰期係日本嘅黃全週，連續幾日長假，咁噴水池廣場有啲親子 Show，今次有麵包超人、幪面超人、不同嘅特攝戰隊 ↓



廣場都有啲檔攤賣下特色嘢咁 ↓



如是者 … 就離開了 ↓



坐咗個零鐘車又返到去市中心，係 Ryobo 行咗好耐，但都只係行第七樓嘅文具精品 … ↓



好多款 Haribo ↓



時間不早，到了商場地庫一間食肆吃，點了一個 Set 和一碗滑蛋豬扒飯。味道唔錯，好有驚喜！誤打誤撞搵到間好嘢，同埋有當地人去，伏極有限↓





吃完都差不多十點，本著踫運氣行去國際通買手信，好多鋪頭都臨近收鋪，不過都比我地極速買到心頭好。以下就係今日嘅戰利品，睇下隻新買嘅小黃雞幾得戚↓



作為一整日嘅結尾，少不免都要吃甜點 ↓





That’s All.

一覺醒來即刻出露台望下，呢個天色好咗少少，再加上潮漲，個沙灘即刻靚咗↓



如是者就去吃早餐，到了酒店內另一間餐廳吃，免得三餐都係同一間餐廳吃 Buffet。以下就係我嘅經典酒店 Buffet 早餐：栗米片、乳酪、牛角包。酒店早餐來說種類都唔少，當然都未算話好多，主要都係和式，西式得腸仔、煙肉、薯條等↓



食飽飽就去廣場內的朝市睇下，有啲特產賣，不過就吸引唔到我地了。另一邊有個手作仔 Corner，可以付費 DIY 啲相架、飾物，都有啲小朋友玩的 ↓



補返張泳池相，深度頗淺但係個暖水池，無暖水真係搵 __ 游↓



潮漲時的沙灘，個感覺完全唔同晒 ↓





去到沙灘個邊都係 Hea 下玩下沙、執下星沙，放晴咗一陣又陰返，個 Timing 真係錯晒。執咗十零粒星沙就準備離開酒店。跟手 Check-Out 再買埋 Shuttle 車票就係車睏住咁返去那霸市中心，之但係差啲件行李無位上，無啦啦前面有一群十個嘅遊客，個個瘋狂購物大大件行李。去到那霸巴士總站嘅時候 ... 竟然刮起風下起雨來 ... 幸好都只是雨粉，唔係都幾麻煩。好在酒店同巴士站都近，同埋都易搵，係酒店放低兩件行李 Refresh 下又再出發。

Lobby 洗手間呢個洗手盤係水龍頭、梘液、暖風機三合一，都幾有型 ↓



如是者就撘巴士往美國村。有巴士一程就到，都算方便，但就要自己留意住幾時落車，之前要做定功課，落錯咗一個站都要行幾遠。當時仍然落緊雨，同埋都唔細，都幾濕滯 ↓



美國村內有兩間酒店，其中一間叫 Vessel Hotel，就係呢間，之但係重點不在於此 ↓



重點係酒店隔離嘅 Sunset Beach，大家看到藍色圍網內有水嗎？潮汐漲退對一個沙灘嘅影響竟然可以咁大，差不多無晒水 … 或許這是一個人工沙灘的關係嗎？ ↓



時間不早，又係時候搵嘢醫肚。去咗 Depot Island 內的 Toy Kitchen 吃個快餐。個女店員操一口流利的英文，其實佢講個啲英文都錯錯地（都有可能係我自己唔識嘢），不過佢講得超有信心，就算錯都變啱。講返個餐，可能是即製嘅關係 … 等咗 OK 耐，再加上有人食煙！？時間過得更加耐 … ↓



左邊的是 OK Dog Set，餡料是牛肉；右邊的是燒汁雞堡。OK Dog 味道很好，值得推介 ↓



其實最主要來美國村的目的就是去沖繩唯一一個 SEGA Game Centre 闖盪，預咗一擲千金 ↓



係 Game Centre 都玩咗好耐，先來就係朋友仔夾小黃雞，但出師不利，都花咗一定金錢先夾到幾隻 … 反而我就用 500 Yen 夾到呢盒公仔，當刻個心絕對係紅晒，個腦充晒血 … ↓



最威水個刻轉眼即逝 ... 接下來玩過用 UFO Catcher 紙條、挑起手把等等嘅機，全部失敗而回。反而有一部係香港未見過嘅機花咗幾千 Yen 成功拉到一盒火野麗 Figure 返來，玩法係控制部機移上下和左右，前端有個凹位，卡中吊住禮物的膠珠鏈再向下扯落黎就掂。當然卡一下係無可能得，有啲貴嘅禮物條鏈係特別長，剩係眼到手到都唔夠，運氣都好緊要。係呢部機玩咗好耐，耐到有職員比咗張由 500Yen 玩六次變八次嘅卡比我地。每次用時要找職員來，入錢後職員會再加多兩次咁，到後期職員直情係企定係附近，好似等緊我地失敗再 Call 佢咁 …

同場還有好多新奇嘢，包括呢類用鮑魚刷勾住大公仔嘅機↓



還有呢部超大型嘅推零食機，簡直嘆為觀止↓



玩到四點左右差不多玩意興闌珊，去咗影貼紙相，咁啱有位男職員認得我地玩咗好耐 UFO Catcher。咁佢介紹咗部當地中學女生最熱門嘅機比我地，咁我地見佢誠意拳拳就試下，點止神奇嘅事就發生了！可能個位職員見我地失敗咗太多次，主動平 100 Yen 定 200 Yen 比我地影，太感動了！

如是者就敗走 SEGA Game Centre … 到了附近商店、藥房行下，買了些零食雜貨。點知呢個時候見到另一間 Game Centre … 卡美拉幫我地帶路↓



轉個樓梯就上到去，又咁啱比我地見到小黃雞。今次威啦，500 Yen 夾到三隻出來，執返個尾彩 ↓



同場都要其他玩法嘅 UFO Catcher 機，但都無再點玩，始終係 SEGA 玩咗好多錢。最後係呢部純運氣嘅機玩咗四次，當然唔中啦 ↓



話分兩頭，呢啲係卡拉 OK 房來的，有兩支咪，都幾搞笑↓



再見了，美國村 … 敗走 … ↓



沿路行返去巴士站，咁啱行到過去嘅時候見到有車，又要跑！時間真係 Fit 到漏，當時開始天黑，咁啱襯還有日光嘅時候上到車感覺定好多！返到去市中心就搵食，沿國際通行，差不多行足整條。沿路有好多食肆店員拎住餐牌「拉客」，但我深信一間好嘅食肆絕對唔需要咁做，都無理佢地。本身有一間食肆都好多本地人去，係餐牌睇啲嘢都，之但係去到門口職員就出來話有 Live 表演，所以要按人頭計加多 800 定 1000 Yen 到。我地都唔知唱乜所以就走咗，千揀萬揀，揀了這間「波照間」琉球料理↓



點了琉球拉麵、炸蕃薯餅、釀豆腐、Agu豬餃子、兩杯果汁，一杯係土產苦瓜汁、另一杯都係土產酸桔汁↓



真係唔係講笑，呢款Agu豬餃子真係好食到飛起，勁多肉汁，超正 ↓



其實 … 呢間食肆都有 Live … 有無收到錢我地就唔知了↓



呢間食肆啲嘢食都幾好、又唔算貴，可惜嘅係當地無食肆禁煙 / 非吸煙區。咁啱隔離比我地遲入座個檯竟然係度食煙！？兩張檯嘅距離大約一呎左右，呢鋪二手煙都算勁。好在隔離啲食物上得快，佢先整熄支煙。吃完就快快埋單走人了。個陣時間都不早，沿路行返酒店，順便吃多次 Blue Seal 雪糕。有一球係黑糖味、另一款疑似係鹽味↓



行咗成日終於返到酒店坐下，呢兩晚就係 Daiwa Roynet Hotel OKINAWA-KENCHOMAE 住，Semi-Double 房，係細啲。不過 Check-In 個陣女士會有 Amenities 送，好似係 Mask 個類；還有酒店自家品牌咖啡，都 OK 嘅↓



呢堆就係今日嘅戰利品，計返港幣應該用咗 700 蚊到夾公仔 … 我都唔識講，始終玩咗兩三款之前未玩過嘅機款，少不免都要比下學費 ↓





That’s All.

在這韜光養晦、休息生息的時候，少不免都會去下旅行散散心。今次就揀咗去沖繩自由行。現在回想返，不懂駕駛的我倆其實都幾應該跟團。雖則交通尚算方便，之但係車費頗貴，動郁都百幾銀。有很多人說租用觀光的士會平啲，不過兩個人租一架的士絕對無著數。打的去機場，入過闡後吃過麥仔早餐就正式出發 ↓



朋友仔問點解機上會有早餐吃都要特登吃個早餐先上機呢？其實都無話點解，只係怕唔啱食又或者唔夠食，係唔夠睏嘅狀態下還要餓著肚皮好似陰公啲咁唧。機程短短地夠睏一小陣，每人派了一個豬扒包作早餐，不過我地勁眼睏都無食到。好順利咁入境拎行李，時間剛剛好可以撘到班穿梭巴士！不過時間真係只是剛剛好，去到售票處還要排隊、更重要係前面幾個客好長氣、職員亦好有耐性咁講解，時間就係咁耐咗。好在我地都買到車票上到車，「好在」嘅背後係車站離售票處不遠；再加上售票嘅職員用對講機叫班車等陣咋！當然，我地都抽住件行李飛奔往車站去。趕得切車，心情特別好！如果唔係就要等兩個鐘頭 ...

撘咗個零鐘頭巴士就去到首晚入住嘅 ANA InterContinental Manza Beach Resort，呢張係之後係沙灘影埋去酒店 ↓



比預計早咗去到，未有得 Check-In 住，酒店職員問我地加唔加錢升級住可以即時 Check-In 的 Premium Floor，貴幾百蚊咁。其實有少少心動，不過反正都未吃午餐，可以等下唔急住 Check-In。咁就係酒店內嘅餐廳吃了個 Lunch Buffet，大約每人港幣百幾，其實都 OK 嘅，以 Lunch 來說。優哉游哉咁吃個午飯，Very Good。重點係唔夠睏，唔劇烈得 ↓



當地第一餐就試咗著名的 Blue Seal 雪糕，有紅薯味，好味到一個人都要吃三杯 ↓



Hea 下 Hea 下咁嘆完個 Lunch 就上房 Refresh 下換行裝。我地同尾房特別有緣，今次都係住尾房，或者叫頭房都得，因為牆嘅另一邊就係逃生通道。房間以藍白色為主調，個 Feel 幾悠閑 ↓





呢類房少不免都有塊玻璃直視浴室，應該係浴室有塊玻璃直視室外景觀。為咗偷位，洗手盤則放到浴室外，咁都幾好，感覺闊落啲 ↓



露台望出去便是 Manza Beach，為酒店客專用嘅沙灘。圍網內還有付費的水上遊樂設施，要比 3000 yen 先可以玩。聲稱是全日本最大規模的海上遊樂設施 ↓



其實，當刻都有多少失望。點解咁講呢？再望一次呢張相 ↓



呢張相無點樣執過，望唔望到個天勁多雲、而且無乜陽光，再加上潮退 ... 原先諗住係陽光普照、海水碧藍清徹的沙灘，點知實際看到的是滿是青苔、天陰陰的沙灘。現實與理想果然有好多分別！咁都不特止，仲要寒寒地、落雨。完全無諗過沖繩會係凍 … 係咁易濕濕腳都凍到呢 … 還我陽光海灘！

全日本最大規模的海上遊樂設施係呢個天氣下是零吸引力，莫講話要 3000 yen↓



有的是一張張空椅 … 話分兩頭，太陽傘的藍色好 Sharp 醒↓



救生員都無乜好做、圍埋吹水。看到嘛？有住救生員著雨褸 ↓



咁嘅天氣真令人失望，唯有係沙灘執下星沙吹下水、影下相 ↓



如果好天的話都可能會 Join 個 Cruise 遊覽下萬座毛、玩下水，無無聊的走到酒店另一邊。有人在這裡釣魚↓



被海水浸蝕的石頭，潮漲時海水會去到石頭凹落去、有啲青苔嘅位置 ↓



最後我地去咗酒店嘅暖水泳池游水 … 除咗淺水啲都 OK 嘅，因為無人游。游咗一會兒就返上房再換過行裝往大浴場沖個涼。如是者又 Hea 下 Hea 下到咗晚飯時間，睇過晒酒店內其他食肆，最啱食又唔會貴得太誇張嘅都係晏晝吃個間 Buffet，吃嘅嘢差唔多不過價錢就 Double 咗 … 其實還有間琉球料理 Buffet，不過望真啲其實唔太啱吃。題外話，係昏暗嘅環境中晚相，兩部 HTC One 有唔同嘅效果，一部偏紅一部偏綠，HTC 造工真係麻麻地 …↓



吃飽飽後係酒店內店鋪行逛、買下嘢。廣場有シーサー展，有啲造型都幾趣緻 ↓



如是者 … Hea 咗一日，返上房睏，太眼睏了 ↓





That’s All.