13- 7- 2008 (日) Day 7
宇治‧京都站鴛鴦兩味之旅

朝早起身, 開始時都係囡囡左 ... "D D" ^^" ~ 9點左右先正式起身
我地食埋尋日買既牛奶同精選蛋糕 , 佢得番一件蛋糕, 我仲有兩件~
都係朱古力果款最好味~~~ 我地再食埋尋晚仲未食完既蕉蕉, d 蕉蕉再唔食就變黑了

首先, 想講下題外話 , 我一開始唔知咩係 "源氏" , "源氏物語" , "紫式部" etc.
所以 "宇治" 0係我看來, 初時都只係一個 "綠茶之鄉"
"紫式部" 初時以為係一部書既名 , 再聽到 "紫式部" 原來係作者名時, 以為佢係男人
更加想像唔到 "源氏物語" 係部愛情故事 , 仲要咁出名, 但講緊既竟然係d 風流事
所以去完宇治, 知多好多野

我地今次搭 JR 去宇治 , 講起 JR , 不得不提, JR 每個車站都有個共通點的 !
就係有 印仔 !~
唔知係咪 JR 既車貴 D , 所以想整D 野吸引下人呢, JR 每個車站都會諗 D 果個站特有既景點, 將佢整成印仔, 等人可以印幾張番屋企留念, 真係好有心思 !
既然佢整得咁特別, 我當然唔會錯過, 嗱嗱聲印番兩個, JR 宇治站既印仔係關於源氏物語的, 特別特別 !

題外話: 未出發執行李時, 咁諗住帶D 紙筆去寫下野, 最後搵到本四四方方丶細細本既簿仔, 岩曬旅行用 ,
嘿, 點知真係咁岩, 原來日本關西 (唔知其他地方係唔係啦) d 主要景點丶JR 車站 , 都有印仔俾人印, 個印仔既 SIZE 都唔細嫁, 圓頭大大地的!
但就竟然同我本簿仔差唔多大細 ! 真係好驚喜 ! 我本簿仔大派用場 !~
有D 景點有派 d 專用紙俾人印 , 但有時會俾人拎曬 ; 有d 景點亦有專用咭賣俾人去收集印仔;
呵~ 依家如果果個景點有專用紙派既, 我地就用專用紙印, 另外再印多兩個落簿仔; 如果果度無專用紙既, 我地就直接印去簿度 ,
相當方便 , 絕對唔會 miss 左 / 無紙印, 我係聰明仔 !~

一出 JR 宇治站, 隔離就放左個 ...... 唔係好似我心目中既茶壺既 "茶壼型既郵筒"
個形似中國古代裝酒果D 酒瓶多 D 囉 ...... 同埋如果係紀念「宇治市制施行 50 年」而設置既, 佢都幾細舊, 幾唔顯眼喎, 大舊D 可能有氣勢 D ! 唔通方便 D 人影相 ?

我地用 JR 站入面既 "宇治 散策‧‧‧" , 應該就係話如果0係宇治行, 有咩好行+點行既
跟住個地圖同 d 幾清楚既路牌行左十幾分鐘 , 開始時見到靜靜地既平民街道, 唔知係咪去到時仲早 , 無咩舖頭開左, 仲諗個宇治唔係咁靜嘛 ... 行到咁上下, 開始熱鬧番, 見到應該係宇治最旺既街道, 有好多專做遊客生意既手信舖開左 , 主要當然係賣茶 同 茶既副產品e.g.抹茶蛋糕, 抹茶菓子... 咁又無咁快買住, 行完先買, 好重的 ^^"

過左果條手信街, 我地就到左第一站 -- "平等院" !
唔知點解叫 "平等" 院 , 真係好難記, 搞到我成日都記唔起宇治果間院叫咩名! .....
總之每位盛惠 600円 , 可惜既係, 果日既平等院大門口重修緊, 用左d 野圍住曬, 咩都睇唔到, 無得影門口 tim ! 個售票嬸嬸簡單介紹完, 我地又扮聽得明, 就正式行入去喇 !~

一入到去, 已經見到主角 -- 鳳凰堂 既側面 !
就行近 d , 真係唔講得笑, 真係靚 ! ! !
可能佢既隔離無其他建築物, 所以望埋去, 除左鳳凰堂, 就係個天, 而果日既天真係好靚, 好藍, 仲有一兩舊雲, 成個景真係好好好靚 !~
我地都影左多多鳳凰堂既相 , 真係靚 , 不過當然係豬仔影得多d 靚d 啦 , 專家嘛

唯一美中不足係, 真係好曬 , 曬就梗係會熱, 但開住遮又難影相, 搞到我地開遮又唔係, 唔開遮又曬, 都幾濕滯 唯有一時又開遮, 一時又曬住咁影相
不過好開心吖, 我地0係鳳凰堂影到合照 : > !~~~

個鳳凰堂其實仲有得俾人行入去參觀既, 不過要另收 300円, 而且見d 人都係0係地下果度行個圈又出番來, 果度望既景又唔夠我地望過去既靚, 所以無再 "深入參觀"

佢旁邊係荷花池, 但可能未係時候, 無荷花的, 得荷葉 = ="
佢都放左兩三盆一支過丶未開曬既荷花出來既, 豬仔都好認真咁幫 d 花影左相

影到夠後, 就行去佢另一個主角 鳳翔館 , 佢係間 95%博物館+ 5%禮品部
入面基本上放左好多唔同既佛像, 全部都擺放得好靚 , 而且有孚多尊 tim, 記得入面仲有佢既地標-兩隻鳳凰 , 即係屋頂果兩隻, 睇真 d , 原來兩隻係唔同樣的 , 咁耐之前都造得好精細耶 !~
當然仲有好多書畫, 屋企d 磚瓦原物 etc. 都有好多野睇, 不能盡錄 , 不過裡而因為唔影得相, 所以無影到相

行到鳳翔館既最尾, 就係 禮品部 喇 , 入面d 野全部都好特別+靚喎, 出面肯定買唔到, 睇左好耐, 豬仔決定買 folder, 書簽, 明信片 , 我就淨係要左匙扣同明信片
行出左鳳翔館 , 就見到有好雅致既地方俾人坐低休息, 我地都當然坐低抖抖啦, 嘿, 真係好熱, 勁出汗, 佢件衫都有兩條背囊印, 睇怕佢好耐無都試過了, 真係辛苦曬豬仔 !

整頓一下後, 就離開平等院了
行到出來, 兩點幾, 本來諗住0係番頭先最旺果條手信街出名既食店食, 點知 ........
d 食店已經關門了! 手打蕎麥麵專門店「ながの」仲竟然「本日終了」?!? 有冇咁快就賺夠, 可以唔駛再做關門呀? 真係好誇張, 未入平等院時仲開住的 ...

唯有搵第二間啦, 咁岩又俾我地望到間位於街口既 料理旅館 -- "宇治川"
呢個第二站, 竟然有驚喜 ! 食野果層係上 2定 3樓既, 一上到去, 好有日本味道耶 ! 大家都係坐0係塌塌米上面, 前面放左張矮木抬, 窗口係好日本既窗框, 望出去係條河, 仲有好多矮矮既小屋, 總之成個環境都好 "日本" ! 我鐘意呢間食店 !~
我地叫左兩份 天婦羅綠茶冷麵，再加埋冰綠茶，再加埋有強冷既冷氣，真係爽過 Dee Dee XD ~~~ 所以0係呢度都好疏乎咁影左 D 相~

食完, 為免D 手信店又好似「ながの」一樣來個「本日終了」 , 都係快快手買左 D 手信先
去左出名既 「伊藤久右衛門」 買 D 宇治特產中既特產 - 綠茶製品, 佢買佢既茶葉, 我買我既茶粉。不過由於天氣炎熱、再加上我地還有幾日先返香港，所以好多野都唔敢買，例如蛋糕、福餅、Cheese Cake、布甸咁。佢買左個綠茶蛋糕 , 唔係咒佢變壞, 係關心個蛋糕頂唔頂得住唧 , 熱咁咁樣, 人都出汗啦, 何況件蛋糕 ...

買完, 就繼續我地既行程
我地沿住 宇治橋 行去對面岸 , 呢條橋個造型都有d 似嵐山既渡月橋 ... 嘿, 不過其實日本既橋來來去去都係果兩三款既唧~ 0係橋既隔離, 有個 "紫式部像" , 嘿嘿~ 原來 "紫式部" 係個女人來的 !
行到去對面岸, 我地再沿住宇治川呢條河行行行, 再見到另一個像 - "源氏十帖" , 都係描述緊書裡面既情節 , 真係估唔到 , 一部小說, 可以0係宇治度咁出名, 仲勁到整兩個像出來, 真係估唔到 。

都熱辣辣咁行左陣, 先到第三站 - 宇治神社
雖然個神社門前都有好正正式式既烏居 , 但行到入去, 原來細細地, 無乜特別地方再行
行番出來, 好快就到第四站 - 宇治上神社 , 多個 "上" 好似又唔同 d 喎, 裡面好似再大 d , 再多d d 野睇 , 有烏居, 前面有堆沙既拝殿, 無開放俾人參觀既本殿, 一潭死水 "桐原水" , 都唔好睇少佢嫁, 佢都有名堂有背景, 果日都有唔少人去參觀嫁 ! 而且宇治神社同宇治上神社 入場都係 "無料" 的, 所以唔緊要啦, 當行下, 睇下野啦~~~~

參觀完呢兩個神社, 我地就跟住地圖, 搵下搵下去下一站 - "源氏物語博物館"
沿途見到好多棵 "有好多尖尖角既葉" 既樹 , d 葉仔真係好靚好得意 , 0係香港好似未見過喎 !~ 就因為0係香港好似未見過, 每次見到 d 葉仔時, 成個感覺都好 "日本" ~ 嘿嘿, 對d 葉仔有興趣, 流口水 tim !~
不過見到d 葉好似唔算乾淨, 所以都淨係 "眼看手勿動" , 無多手 ^^"

行到身水身汗 , 去到博物館都即刻去一去洗手間整理下
無俾入場費入博物館深入研究源氏物語 , 一來怕悶, 二來感覺上都唔平的
我地又入左博物館既咖啡禮品部盪, 呢個禮品部唔駛入場費 ^^"
呢個咖啡禮品部分開三部分, 第一部分係資訊部, 放左好多部電腦 , 每次俾人揀來聽 早就儲存0係電腦既錄像, 唔同電腦, 所聽既都有D 唔同的 ; 第二部分就真係禮品部, 賣好多關於源氏物語既野, e.g. 源氏既書籤 , 明信片 , 咭 , 我地都有買左少少野, 我買左書籤仔, 豬仔買左明信片 (可能只係一張咭) , 都幾靚的~ 第三部分就真係咖啡閣既樣 , 俾人坐得飲下食下 , 都絕對唔平的 !

睇飽抖飽, 就離開了, 行到出門口 , 又見到日本限定既樹葉仔 ,
今次見 d 樹葉乾乾淨淨, 終於, 出手喇 ! 拎左 3塊得意樹葉仔走, 唏唏, 成功 !~~~

慢慢行番出去宇治川 , 0係某間店食綠茶雪糕 , 究竟, 我地係 share 食, 定一人一支呢 , 真係值得商榷 !~ 個 綠茶雪糕 甜中又帶 d 甘, 都幾特別, 我好少食到 !~

發生一段小插曲， 當見到另一個宇治車站 - 電鐵宇治站 , 我就 "質疑" 我地來既車程係咪最快既車程，會唔會依家搭電鐵又會快d 呢 , 咁有質疑就自然會對話啦。 "咁無他既，點樣來就點樣去，唔洗諗係咪 Very Good 先。" "如果新方法快既 , 都可以試試喎~" 大家 "商討商討" , 最後都係原路離開既 , 我無唔高興啊 , 係未諗得清佢既說法嘛, 諗得明就無問題了 !

行去搭 JR 時 , 見到個天有隻 "巨型小強" 呢 , 有舊雲好似隻小強耶 ^^" !

咁我地就離開宇治, 搭番 JR 落下一個目的地 - 京都車站
離開個車站前, 不忘 JR 指定動作 - 印印仔 ~
吖, 日本D 地鐵站入面, 成日都放左 "雜誌架" - 放左好多唔同既單張 , e.g. 地圖, 購物推介, 景點推介, 玩樂推介, 各類優惠單張, 真係個個站都有, 爭多定少唧
而呢個京都車站 , 就放左一大排旅遊推介 , 真係多到唔講得笑 , 即刻影番張留念 ~
不過個個站都有咁多單張, 真唔環保 ^^"
p.s.: 除左有單張, 好多時仲有 搵工, 商場優惠既野, 一本本, 又係一堆堆的, 真誇張 。

上到車站地面, 就見到京都站對面, 有座好高既 京都塔
呢座京都塔就犀利囉 , 我地未日落前影左佢丶日落途中影左佢丶入黑之後都有影到佢 ,
應該爭 中午烈日當空未影 丶 落雨未影 同 落雪未影 而已 ^^"

影完京都塔, 我地就即即搵搵我地既第六站 - 手塚治虫 World , 點解去呢度先呢, 因為都驚呢間會好早關門, 真係試過好幾次 , d 舖頭好出奇丶好早就"本日終了" , 實在要把握機會 !
搵到果度, 都無我地諗得咁大 , 只係一間大 d d 既舖頭 , 特別既係, 一入門口就有幅全家福既相, ^^" 原來淨係我同個板影左相, 豬仔無影 ^^" & 佢舖頭出面, 擺左好多人咁高既角色大公仔， e.g. 小飛俠 , 秦博士 , 呢 d 公仔我同佢都有揀左d 來影相~
p.s.: 原來呢間真係早收的, 好彩我地及時去左唧~~~

0係呢間手塚 World , 我地無買到野, 不過就竟然俾我見到部貼紙相機 !~~~
當然唔放過部機, 即刻搵豬仔影 , 雖然無閃但可能係賣公仔樣, 所以貴少少, 盛惠 500円~ 呵, 又同豬仔0係日本影 貼紙相 , 開心開心 : > ~~~

見開始入黑, 我地就落去地下商店街「The Cube」同「Porta」, 一來係想睇下有咩岩食 + 想食 , 二來就係想睇下有冇咩比較京都限定既手信 ,
我地0係 "京名菓" 買左d 比較得意既糖果 , 我買左個木屐樣既盒仔, 裡面裝住左幾粒糖 , 佢就買左盒個樣整到好得意既糖仔 ~
再行第二間舖 , 買精品手信的 , 我竟然見番0係清水寺果條手信街附近買既細布免仔匙扣, 見到唔緊要 , 最緊要係我買貴左 ! 無理由的, 無理由0係 京都呢個咁大既車站 + 專賣手信專賺遊客錢 + 睇凖d 人趕住0係車站"補飛"買手信 既地方 , 竟然賣得平過一個小小既清手寺 , "un相信able" !

之後又繼續行, 又見到其他賣菓子手信既店 , 都係睇多 , 因為睇落靚靚地的都淨係可以擺幾日 , 幾日我地未番到去吖, 買來無用 ; 唔算好靚的, 就唔駛急住依家買, 之後番番去大阪時再買未遲
不過豬仔臨尾都有收穫既 , 又係捧一盒走!~ 我本來想買番 去台灣旅行時0係 "五角船板" 食過丶有d d 似草餅丶裡面軟軟地涼涼地丶外面灑左d 粉既糕 , 真係好好味, 一試難忘! 本來呢個 "目標人物" 已經出現了 , 可惜問清楚佢既 "賞味期限" .... 噢 , 佢既期限太短了 , 留唔到番香港, 可惜可惜 !
p.s.: 番到香港, 豬仔搵過, 原來呢種咁好味既東東叫 "蕨餅" , 我認住你了 !

行多兩間, 真係真係, 搵地方落腳食晚餐了
我地沿住 West Zone 果條露天既長樓梯慢慢行行行 , 一路行一路望番落去影相
個人覺得呢個京都車站其實設計得好靚好特別 , 個車站咁大, 中間都係空心的, 所以0係車站既一邊, 可以望到好遠既另一邊, 感覺幾特別~

上下一層, 上下又一層, 我地最後行左去 10 樓 ! 目標 : 拉麵小路 !
0係呢條"小路"逛左個圈, 最後揀左食大阪既鐵板燒 & 章魚燒 & 可樂 ,
點解京都會食大阪既野 , & 點解 "拉麵小路" 會食到唔係拉麵既野呢 , 值得研究!~
都好味 , & 都唔細份, 兩個人都可以食飽飽 , 我仲0係果間食店拎左把 "大葵扇" ~ 之前0係街食日見到有人拎住潑 , 好似好涼咁, 今晚終於拎到 ! 岩曬我地之後既旅程 ~

食完, 我地上左去天台 "空中花園" 睇夜景, 無料的 , 都真係有人嫁喎 , 仲幾多人兩個兩個咁坐埋一邊"談心" , 不過果度都幾黑下, 睇唔到佢地仲有冇其他正經事做緊 ...
我地咁岩企既位, 望出去既景就一般 , 同埋塊玻璃有d 花有 d 朦 , 睇得唔係幾好 ^^"

見無咩特別野睇, 就轉移陣地 , 行番去拉麵小路果層 , 果度可以通往 空中走廊
個空中走廊 雖然都係無料, 但 一d 都唔hea 的 , 望出去既景都值得影相嫁~
唔知係咪晏左去 , 定係吸引力唔夠京都塔勁 , 我地行果時無乜人 , 不過人少少幾好, 影相又易d , 傾計都易d , 行都行得舒服 d ~~~

個空中走廊真係唔錯嫁! 差唔多成個車站由東到西都橫跨曬 , & 都幾通風的,
最特別既係 , 佢真係好似 d 旅遊景點咁 , 有個地方真係豎起個指示牌 , 對照番出面既風景 , 講俾人知好遠既呢度係咩景點, 果度又係咩景點 , 個指示牌入面, 都指左好多景點 , 最記得就係有京都御所 ,
感覺又好特別 ! 原來我地每日滴住汗咁行咁多路, 好似好遠好大咁 , 但其實都係0係眼前肉眼可見既地方中
如果朝早來, 可以親身一眼見到咁多景點, 應該更壯觀 !

0係空中走廊行到夠, 就落番車站歸家
0係我地既烏丸御池站裡面, 有個小既 "創意" 展覽, 我地終於忍唔住執筆留左幾隻字 ...
Good Try !
佢地見到肯定跑出來打我 !

題外話 : 0係日本, 如果 d 街或者 d 路叫 "小路" / 有個 "小" 字 , 絕對絕對要相信 ,
因為佢真係好誠實, 俾曬提示 , 絕對無呃人 , 千祈唔好諗住佢係嚇鬼你,
真係只係一條小路來的 , 邊個高估佢就係蠢蠢了


京都最後一晚了 , 唔捨得 ....
再見了, 古色古香既京都 , & 我一定會掛住 這個你的 ‧‧‧