~~ 旅行補記 ‧ 後記 ~~
~~ 旅行補記 ‧ 後記 ~~
來個 "向心底話出發"
估唔到, 自己真係去左日本 , 個人覺得自己諗既野好簡單, 0係中學時期, 幻想自己第日係做野, 儲夠錢就唔撈, 收拾行裝就自己一個去旅行 , 玩夠, 又番來做野, 循環又循環 , 自己依家諗番都幾搞笑, 字都唔識多隻就話周圍去, 真係俾人食左都未天光 ...
又話說, 以前聽到人地去日本旅行, 總覺得人地好 "犀利" , 好 "富貴" , 因為日本0係我一直以來既眼中, 好 "遙不可及" & "高高在上" 的 , 但今次, 真係有機會去, 仲一去可以去 12日, 真係好難得 , 我相信第日都好難有咁既機會, 去一次旅行可以去到咁多日, (早知再去耐 D , 再睇多 D 野添啦 !~) 多謝曬豬仔 : > !
日本真係好靚, 舊既有舊既靚, d 古跡 e.g. 寺吖, 城吖, 全部都好古色古香, 一望就感受到日本既味道, 企0係大坂城前面, 簡直唔敢相信, 我竟然可以親眼見到好耐好耐之前, 確確實實出現過的城池, 城堡, 我好似可以親身感受一段歷史咁 !
新既又有佢既特色, d 新建既觀光塔, 佢既設計別處見唔到, 踏上觀光塔後, 望出去所有的景色, 矮矮既屋子, 密密麻麻既地市, 間中慢慢地穿梭城市既鐵路, 精心設計既大橋, 好大好藍既天空, 這一切全部都屬於日本這個地方的.
而且真係好乾淨, 垃圾埇雖然唔多, 但都唔見 d 垃圾周圍扔, 抵讚抵讚 !
仲有, 都幾太平 , 我地十幾日裡面, 其實都行左好多路 , 當中不乏一d 小路橫街 , 夜晚時都行過唔少路, 而且, 我呢個衰衰, 拉開拉鍊拎野後, 都由得佢開住, 方便下次再拎, 又好多時, 個銀包都放0係袋前面果格, 有時都無拉拉鍊, 好幸運咩事都無 ^^”
酒店呢~ 講特式既始終都係大阪既大和屋本店 , 和室喎 ! 就算第二度有得住, 都唔係果回事 , 係要0係日本住既和室先有果種味道 !~ 如果大和屋睇落更乾淨就更好喇~ 和室真係好得意 ! 盞燈又得意, 窗又得意, 訓既地方都好得意... 第日同豬仔來日本, 我都要住和室, 日日住都得
!~~~
其他酒店呢, 富士屋就好似豬仔講咁樣, 其他酒店差唔多, 無咩特別, 無咩特別出色既地方, 不過, 都唔係話差既~
Kyoto Garden Hotel 就樣樣都做得幾好~ 可能京都呢個地方本身已經加左唔少分 ~ 同埋 D 野好似新D 乾淨 D 咁 , 間酒店既外觀都靚靚地, 有設計過下, 唔 hea 的 !~
而殿堂級既 Hotel Nikko Kansai Airport , 當然係五星級既享受啦, 窗外係望唔到樓, 淨係有一大個天空既景觀 , 房內 .... 佈置得好悠閒 ~~~ 亦都好靚靚 ! 尤其個厠所, 真係好 "華麗" !
有樣野好想講 ,
我真係好驚, 自己會忘記, 呢十二日入面既畫面 。。。
平時成日都跌呢樣漏果樣, 真係好驚... 希望每次望到 d 相 , 都諗番起所有畫面
好 ! 我又跟豬仔一樣, 逐日都講少少總結先 ~
Day 1 : 估唔到, 第一日已經有 "火花" ... 真係好好彩, 無事無事, 大家果時應該係一到埗, 真係要開始自由行, 心情緊張唧 ^^"
Day 2 : 動物園 ... 個模式都有d 似香港動植物園 , 外形唔算好新, 入面都住左幾多動物既~ 不過落雨衰衰, 唔係應該會行耐d !
而空中展望台呢 , 真係唔錯, 影相果景真係幾好 , 真係望到好遠既地方, 旁邊無高樓大廈遮住 ~ 仲有人幫我地影相~~~
嘿, 不過最搞笑 , 都係我叫豬仔影相, 諗住影我同我指住既咸蛋黃, 但見到渠小豬個鏡頭擺得好近, 近到 ....... 好似淨係影到我隻手指咁......... 我有d 遲疑咁問渠小豬 "影唔影到吖?" , 佢都好肯定咁話 "影到!~" 點知睇番張相, 果然 ........ 得我前臂丶手指同個咸蛋黃 ! 嘿, 渠小豬聽番都覺得好笑 , 唯有再影過 !
Day 3 : 今日當然係好 "疏乾" 啦 , 因為好多行程都係0係室內進行 , 周圍都係冷氣, 真係幾岩我 !
好鐘意條鯨鯊 , 好大好大條好得意 , d 紋好靚, 鯊魚類來說, 佢真係好可愛 ~ 而且海遊館仲將條鯨鯊既形象塑造到 "好可愛" , 有好多佢既可愛精品 , 不過我地最後都係買左一對企鵝電話繩 ~~~
後半晝去番道頓堀 , 首先係 "開運健康幸福百貨店" , 真係呃人去的, 除左個招牌大同特別 d 外 , 有時閃咭書都不能盡信 ...... 之後係 "道頓堀極樂商店街" , 其實呢度真係唔應該收入場費的, 雖然女士免費, 不過都係唧 , 入面又唔係比出面特別平 ! 不過都幾有特色, 整成舊日本咁 (雖然都似舊中國) 都值得影相既 ~
Day 4 : 今日轉戰京都, 成日行左超特多路 , 我覺得我地可以用自己對腳由清水寺行去祗園, 晚上再由祗園行番酒店 , 真係好犀利 !
今日睇到好多野 , 仲見到D 祗園祭既前奏 , 冬天來呢度旅行就見唔到了 ~
P.S.: 今日睇到既京都 , 清水寺, Kyouen , etc. 都好靚 ! 仲有今日買既靚靚布公仔 !~~~
Day 5 : 今日係特別日no.1 , 奈良濃縮一天遊 。 奈良小鹿 , 可愛 !~~~ 今日真係好正 , 玩鹿鹿既感覺好奇妙 , 香港真係見唔到 "真" 鹿 , 玩唔到, 餵唔到鹿鹿 , 同埋d 鹿鹿多數都好乖 , 抵讚 ! ~ 今日玩鹿其實未玩夠的 , 真係好開心 (雖然都好熱) !~
睇曬我影既相, 先發覺原來 DAY 5 奈良無影相 , 我太失策了 ! 點可以無影相嫁… 太嘥了 ! (扁咀 =3= ……….)
Day 6 : 今日算係行少好多路 , 因為今日有乘車卷 ! 金閣寺真係好金 ! 0係嵐山果度就好 hea , 唔知係咪成日都0係室外 , & 今日既景點唔夠多, 分散唔到注意力呢, 今日好熱 ! 今日其實應該行下入山, 咁先算來過嵐山嘛 , 不過我地就一定會熱死中暑+餵蚊, 未行入山都覺得熱了 ...... 呢個真係個魚與熊掌既抉擇!
呢一日我自己影既相好少啊, 點解會咁嫁….. 唔通熱同曬既威力真係咁大 …….
Day 7 : 今日係特別日no.2 , 宇治濃縮一天遊 。 原本以為我0係呢度會好悶 , 主要係我對綠茶/ 其他茶產品唔係特別鐘意 , 飲茶 OK , 有茶味既精品都應該幾香, 但總覺得茶 / 用茶整出來既野食會甘/ 苦 , 所以都唔特別期待佢 D 野食 (我鐘意食既係 "甜" 品嘛 !~)
但今日都 OK 喎 ! 平等院既鳳凰堂同個景加埋真係好靚 ! 依家呢個綠葉版好靚, 秋天紅葉版應該都好靚, 落雪版都一樣好靚 ! 入面既手信都唔錯~
果 3塊0係宇治辛苦搵來丶搵左張紙巾夾住丶好得意既葉仔, 番到香港後發覺 , 夾下夾下, 夾到唔知去左邊 。。。 果 3塊葉真係好得意 , 秋天會變紅色的 !
晚上既京都塔 , 都幾疏乾既, 淨係0係室內行 , 個空中走廊朝早望出去應該都幾多野睇的 !
Day 8 : 主要得大阪城同天神橋筋 , 對比之前幾日, 今日係 hea d 既 , 但個大阪城都真係靚 ! 仲可以行埋入去, 好難得 ! 一人仲有個金幣添 !
不過今日又無影到全身既合照 , 得自拍照噢 =3=
個 "滿步狀" 真係好岩用來獎勵豬仔呢 , 佢真係好努力咁行左好多路 !
Day 9 : 今日係特別日no.3 , 神戶濃縮一天遊 。 今日好精彩 , 有熱辣辣既異人館, 疏乾既 sogo , 悠閒既海邊, 景觀開揚既神戶塔, 出奇好味既晚餐意粉
神戶都仲有好多地方可以去, e.g. 北野工房, 姬路城 , 食方面豬仔食唔到佢鐘意既牛奶雪糕 , 同神戶和牛 . . . 唯有第日再去過神戶啦 , 原來呢d 又係個 "契機" !
Day 10 : 環球影城，真係唔錯, 設施唔錯, 遊戲唔錯, 配套唔錯 , 氣氛唔錯 !~
如果佢晏d 先關門先好了, 未玩曬噢 ! 如果個快餐可以平 d 就好了, 一個餐都好貴哦 ! 如果架通去影城既地鐵既可以再冷 d 就好了 , 朝早去架車好多人 , 一d 都唔凍 , 仲有 d 焗哦 ! 今日好滿意 , 另外, 個晚餐都好 "骨致" , 都幾浪漫, & 都幾好味, 唔錯 !~
Day 11 : 今日上半朝係手信日 , 買左好多糖果小食 , 下半日就窄洗了 , 不過就多左時間0係酒店 , 可以慢慢享受下 21000 既魅力, 真係好靚, 如果一晚兩晚0係呢度住真係唔錯, 非凡享受 ; 但如果日日都0係度住, 就真係破產都唔掂, 要搵安信果對兄弟了
Day 12 : 今日一早怱怱照住尋日計劃好既路線, 買我地既心水手信 , 之後終於要走了 , 真係好唔捨得 。。。
今次我可以去到日本感受每一處美麗既地方, 真係好多謝豬仔 , 係佢好出力上網搵資料 , book 酒店 , 度行程 , 抽時間
可以同豬仔一齊行, 行路都行得好開心,吃齋蛋烏冬吃得好開心, 吃杯麵吃得好開心, 飲水飲得好開心, 曬太陽曬得好開心, 熱都熱得好開心 !
下次都可以再去京都大阪 , 唔同季節去應該又有另一番體會的 !
同埋下次去一定要同豬仔影多 d 合照 , 今次單人都有好多, 但合照就仲未夠吖 !~~~ 影多 d 合照第日可以拎番出來笑下 ~
希望下次我可以生性 d , 唔好同豬仔有嘈交既時候 , 希望我地會床頭打交床尾和番 , 希望我地會珍惜一齊時既每分每秒 , 希望以後豬仔都帶埋我去旅行
雖然旅行時成日都總有 d d 野會 "爭論" , 但我都好鐘意 丶 好想同豬仔一齊去旅行
好喜歡同豬仔一齊去看 , 去感受的日本 !
下次都要同豬仔一齊去旅行 !
再一次 , 感謝豬仔 。
