今年聖誕, 都可以用 "平靜" 來形容, 不過平靜有平靜好既, 我地都唔係果d 要大起大落既人來,
& 其實我都唔係想要日日都要有咩特別既節目, 只係想見多豬幾面唧,
總結如下 :


慶祝活動 -
12月26日 (六)
這該死的經理, 聖誕 24, 25號都要番工, (不過我見到有人比我更"悽慘", 24,25都係番 P, 26番早...) 終於等到 26號呢日番完N 所以唔駛番, 26號果日訓左咁上下, 晏晝就同抵錫豬0係CWB 既 Burger king 食晏仔, 呵~豬遲到~
以為係一齊食, 原來豬已經食左, 出來只係俾面陪食的, 0係席上, 唔知點解, 傾下傾下, 傾到去報紙上既請假潮, 再傾到去豬做得岩唔岩, 再再傾到去撐唔撐既問題,
其實呢, 我真係覺得係兩件事來的, e.g.其他人受牽連既程度, 嚴重程度, 背後既動機, 上頭既衰格程度, 主角問題
最重要係, 主角係豬嘛, 我一路都聽住事態既發展, 亦知豬咁做有佢既原因, 所以我一定會支持, 支持到底, 亦因為豬先係當事人, 我都唔想因為我既幾句說話影響到佢既心情,決定, 所以我淨係想支持佢, 支持佢做任何佢認為對佢來說係最好, 最快樂既決定
總之最緊要係豬日日都快樂,自在,同心情輕鬆
講番果日, 食到尾聲, 就 "討論" 到爭持不下, 好彩之後氣氛又好番d , 唔係真係提早開年, 同聖誕講拜拜了
之後我地行左反斗城,宜家, sogo, 差唔多時間就 mtr 去灣仔買新堡聖誕大餐, 呢間第一次食, 吃西餐的, 格局較 "old school", 不過都清楚乾淨既, 叫左個二人餐, 再加多個三文魚刺身 (都唔知點解西餐有刺身食~) , d 味道都ok , 都岩食喎, 同埋佢無0係聖誕 "lion open big mouth" , 算有良心, 唔錯唔錯
唏~ 臨走前仲有驚喜, 多謝新堡, 我好滿意, 笑住行番出來~
之後專程去左金鐘買左條鏈仔, 再之後去左中環睇聖誕裝飾
唔知係咪我地來遲左, 定佢真係縮左水, 期望既聖誕裝飾唔乜出現, 個皇后像廣場都仲有聖誕裝飾, 不過就唔多, 影左相, 就離開了
原來諗住過海睇燈飾, 不過最後轉戰 ifc , 因為未行過
買左件野飲, 再轉番落 cwb 食木糠布丁先番屋企
多謝豬陪左我咁耐 !~

12月29日 (二)
今日係聖誕第二波, 訂左飛睇 12:45 imax 既 "阿凡達" , 原本諗住早d 同豬仔吃麥仔早餐, 點知 ....... 我竟然唔知醒 ! 我明明都教左 3個時間, 8am, 8:30am 同 9am 了, 諗住無死啦, 一個未醒到都仲有第二個, 第三個, 朝早 8am 果轉都仲醒到, 點知 8:30am 同 9am 果轉既鬧鐘真係唔知醒, 連起都無起過身, 真係誇張, 到豬打來時, 先醒+知大件事了, 唉 . . .
miss 左早餐, 唯有直接搭mtr 去尖咀, 原來 imax 0係 isquare 呢個商場入面, isquare 好新, 聽都未聽過, 靚就真係好靚, 不過真係嫌有好多唔同既小唔方便, e.g. d lift 真係飛站得好勁, 指示牌唔清楚, 入埸要大排長龍, 真誇張, 仲要搭扶手電梯上, d 人又塞住塞住, 如果條人龍散得唔夠快, 真係好危險
"阿凡達" 都好睇喎 ! 呢個係 3D版, 如果係打鬥場面時, 3D版真係好刺激, 睇得我好肉緊, 唔係打緊時就睇唔出有咩大分別, 視野都無阻擋, 很好 ,
我少睇戲, 所以呢個 "阿凡達" 我覺得都OK , 不過情感上覺得哈利仔好睇D , 可能睇左咁多年, 加左好多情感分
睇完 3:30PM, 搵左山頭火吃晏仔 , 麵豉汁拉麵麻麻, 唔鐘意麵豉D 酸味~
之後行左 isquare , 再之後去左行海港城, 又有新舖頭開左了, 得閒又要試試
再之後好口渴, 最後去番 cwb 大腳板飲野, 雙料古古力雪葩好飲~
之後原來諗住去買多對暖笠笠既襪仔, 點知竟然無曬了, 最後失望而回


聖誕禮物:
聖誕咭年年都有, 今年都唔例外, 一樣咁精美, 閃令令好靚, 而禮物都有一份, 解說如下:
1. 其實呢份禮物買左好耐了, 0係豬生日時已經買左, 原定諗住豬生日時送俾佢, 但諗多兩諗, 覺得佢生日送呢樣好似唔太適合, 生日嘛, 送份咁 "情意綿綿", "浪漫" 既野好似有d 怪, 唔太關生日事咁, 所以唔送住, 依家聖誕, 本身就好浪漫了, 再送埋呢份禮就 goodest !
2. 其實我買禮物, 好多時都係企0係我自己角度諗, 如果我收到呢份時, 會唔會好開心好感動呢, 如果感動就買啦, 所以我買左呢份禮物, 我自己就非常鐘意的, 而如果再知道呢份禮物既背景, 仲更加喜歡, 所以我0係度講多d , 等豬感受多d 我份心意~
3. 呢份係0係SOGO 7樓既 "海鳴樓" 買既, 0係佢果度, 由歌仔既選擇, 音樂盒既大小丶形狀 , 駛唔駛加公仔擺設, 駛唔駛加石仔, 點擺放d 飾物 , etc. 全部都係自己決定的, 我當日就係因為見到可以整一個獨特, 完全按自己喜好而製造既音樂盒, 所以買, 因為可以完全表達到我既心意~
4. 揀歌時, 其實有最後兩強, 另一個 "對手" 就係 "崖上的波兒" , 掙扎係因為波兒我都有同佢一齊睇, & 首歌都好輕鬆愉快, 抵錫豬聽完都會好歡樂的
而揀依家呢首呢, 當然係因為豬好鐘意, 而佢既歌詞都好岩, & 我都鐘意, & 個歌名都係我既心聲, 係我地既夢想圖, 所以最後都係揀左佢
5. 佢原本可以揀加/ 唔加公仔, 我見d 公仔堆入面, 有款係有兩隻牛仔, 兩個中間拎住一封信, 真係好岩駛! 我買呢個音樂盒就係想傳達我既一份心意俾豬仔 !
6. &佢都可以揀加/ 唔加 d "石仔" , 咁我見加左會有更多既色彩, 所以加, 不過又俾我唔覺意見到有個貼閃石既野, 上面整左個星形0係度, 我靈機一觸, 加兩個心心都好喎! &為左令件禮物唔咁老土, 所以個心心唔係實心紅的, 清清地又表演到個意思, 而心心既擺位上都花左心思, 我仲畫埋圖俾師傅睇, 驚佢整錯/擺錯位
7. 0係包裝上, 其實由頭到尾我都無諗住要包裝, 諗住就咁送, 番工嘛, 邊有時間諗, 不過呢, 見 28號番早, 29 又放假, 好似有d 時間, 有時間既我都想盡量整好d , 唔好等佢以為拍左咁耐, 我依家就唔會再好似以前咁花心思0係包裝上, 以前我包裝好令我沾沾自喜的~ 咁我又諗到少少今年禮物既包法, 所以就嗱嗱林0係 28號果日番完工去香港仔揀+買
8. 拆完最面果層後, 仲有多一層, 唔係多餘的, 因為張包裝紙太透, 驚睇到入面既"玄機", 所以包多一層,
9. 我原本諗住整個白鴿花紙層, 揀白鴿因為白鴿既寓意都唔錯, 和和平平, & 又無 d 星星心心圖形咁普通, 帶出我既白鴿陣係有深度既 !
& d 白鴿係我自己親手設計, 親手畫, 親手剪, 親手拼出來, 剪白鴿原來好繁複的, 尤其 d 翼位, 少份毅力都唔得
10. d 白鴿真係搞左我好耐, d 雙面膠貼香鴿貼得唔好睇, 原本我打算個白鴿陣唔係貼實個盒的, 點知 d 香鴿真係完全唔貼, 最後都係貼0係個盒出面
11. GG 整整, 份禮終於初步完成了可, 可惜就 ............

不過近排都無乜時間搞, 日日都番工, 所以焗住 28號果晚先搞, 下次呢D 咁花精神既 "大工程" , 最好都係早幾日搞 !~


[b][/b]

聖誕快樂噢 !~
希望身體健康, 快快樂樂, 順順利利, 幸幸福福, 平平安安 ~




p.s.: 今年既聖誕, 尋日, 聽日, 聽晚都要番工 =3=
真係令人沮喪~
p.s.: 激死, 又話尋日 last day, 又話一定有, promise... 一拖再拖, 前前後後兩個月肯定有.....
一開始時又話聽日, 過幾日, 依家成兩個月, 有冇搞錯
拖唔緊要, 我不嬲都比較寬容, 自問條底線都比較低, 有多少空間可以商量, 我都唔係d 死硬派既人, 企硬都唔係辦法,
但都唔好咁過分呀, 唔好俾我都覺得佢耐, 覺得佢拖緊, hea 緊我呀 !
當初我都係交個心,拎個信出來, 燃眉之急, 幫得就幫 ,
我信佢, 所以都無特別摧, 但佢都應該真誠對待, 唔好一拖再拖吖
佢一而再, 再而三咁 "承諾", 又一而再破壞佢既誠信
真係好令人激氣
唔好再濫用承諾, 破壞承諾既形象, 如果做唔到/ 無諗住做, 就唔好"承諾" 吧!
一聽到佢話 "promise" , 真係想打爆佢個頭! 又想呃我! 我最討厭, 最唔開心 d 人用我對佢既信,對佢既真來呃我!
p.s.: "煮餸論": 餸就一定要煮一碟出來了, 要諗既係, 要繼續煮呢味餸, 定等我炒煨佢, 再煮另一味全新既餸, 定轉一轉個主菜, 轉煮另一味唔同,但差唔多既餸唧, 不過我最聽抵鍚豬話, 最聽佢既意見了, 對我來說就大致上差唔多, 因為同我一齊食果個都唔係豬 .

今次既主題係 -- "屋漏偏逢連夜雨"

話說今日考試, 上學期唯一一科考試
原本 request 左尋日同今日 O 溫書, 諗住兩個來個重點出擊, 將 D 好 "生" 既書煲一煲, 煲熟佢, 點知個 _ _ 淨係俾個 N O 我 , 都算都算 , 勉強都算係兩日,
番完 N 已經好攰的了
仲要 N 完之後勁打噴嚏, 流鼻水 , 周身骨痛定肉痛, 渾身無勁, 真係唔好彩
仲要來個 long time no see , 真係 ...
一諗起依家咁既身世, 再諗起個考試 . . . "淚似簾外雨" . . .

辛苦辛苦 , 今次考試真係凶險
希望成功 !
我要加油加油!


考試考完, 第一年上學期總算完了, 希望成功過到啦
成功過到的話, 下學期一月見 !

懶鬼雞發現, 原來打一大篇野前, 係要OK 多勇氣的
為免一路唔打落去, 都係打下野先 ...

今日又可以見到抵錫豬, 真係好~
不過今次無去老地方--綠野仙, 反而呢幾日見到電視機廣告, 話麥仔蝦堡番來了
所以今次比較特別, 去左麥仔, 仲竟然搵到位 !
一人叫左個蝦堡, 我叫普通蝦堡, 豬叫左珍寶蝦堡
再加雪糕, 汽水
今次個包都幾熱喎, 出煙的, 少有!
& 今次豬未吃晏仔, 我地可以一齊吃飽飽, 非常好~~~


12月2-12月3 (二, 三)
呵~~~ 今次我地又新買左迪迪尼全年通行証
有個小插曲, 上星期五六我都係 O , 見張証印住 11/12/09, 未到期, 其實都已經想去迪迪尼玩, 所以就計劃星期五去迪迪尼玩一日, 點知到左星期四臨訓, 再 "心血來潮" 睇多一次張証, 唔睇尤自可, 一睇真係唔得了, 仔細一睇, 原來佢係 "MM/DD/YY" 既方式排列 , 真係估佢唔到 !!!
一係就 "DD/MM/YY" (日月年) , 一係就 "YY/MM/DD" (年月日) 嘛 , 搞到我都混亂了
仲要巧合既係, 我都記得上年係11,12月臨近聖誕前去第一次的,
所以見到 "11/12/09", 都以為係 12月11日到期, 如果個日期係 1-10 , 都無咁易記錯, 因為都肯定唔係呢D 月份出發的, 又或者個日子係 13或打後, 都一清二楚, 一睇就知係日期嘛, 依家唔多唔少, 正正就係 11 同 12 , 咁就搞錯了 , 真係整定的, 我都知係我既 bad
p.s.: 亦因為無啦啦咁就過左期, 享用唔到佢個 5,6,7 優惠 =3= dump 心口 !

星期五 27/11/09 果日, 思前想後, 既然都過左期, 所以都唔急去, 最後轉戰 濕地 !
講左好耐好耐話第日去, 終於呢日去左 !
不過因為 g g 整整, 所以去到 濕地 時, 都已經兩點幾三點, 再吃埋燙地入面, 0係比醫院大家樂還細既大家樂, 吃左兩個 "下午茶餐" 輕巧版
同佢第一次去濕地, 個展覽館都 ok 既 ! 都好闊落, 人同d 大陸遊客都唔係好多 (可能 d 大陸遊客鐘意行 sogo 多d )
反而都見到幾多小學生, 如果想當年小學有得去濕地幾好呢~
有個館見到條 "疑似大蟒蛇" , 不過淨係見到佢個底部, 個心臟位郁下郁下, 似真又似假, 無理由淨係俾個底, 唔俾個樣我地睇既, 肯定有d 野 !
我地仲見到貝貝既 "真身" , 都幾大條喎 ! 不過成日淨係0係水入面, 都有d 難睇
到室外果 part , 就好快咁俾豬行左, 一時又話就天黑, 要番屋企 (4點半左右而已 = =") , 一時又話d 雀仔飛過時會放低幾兩 , 隨時有空襲既危險 , 一時又話風涼水冷凍到死, 一時又話雀都唔多隻, 無野睇, 總之就唔太想0係室外停留
烏屋果d 就無去, 好彩都拉左豬去果條浮橋度, 可惜我地去果時都接近黃昏, 水漲, 浸左好多泥邊既小洞, 睇唔到d 大細蟹 同 行得既魚 , 淨係見到少少洞, 可惜! 我上次同阿媽來見到蟹的 !
五點, 濕地關門 , 我地亦都搭巴士出中環, 再搭 75去灣仔, 揀左大友商場入面既 Delifrance 吃二人晚餐, 都ok 抵喎, 齊曬d 餐湯甜品, 再加多兩樣小吃, 都係百幾蚊, ok 喎!
不過有碟意粉就辣左d ! 吃飽飽就歸家.

講番 12月2-12月3 , 今次都係 book 左迪迪尼 hollywood 酒店既海景房歎
可惜園林景房 full 曬, 唔係可以平d, 依家係 9639, 好似同上次果間一樣 !
星期三 (2/12) 果晚, 就0係 hollywood 入面吃佢既 dinner buffet , $198 + 10% , 都 ok 抵的 !
叮左好多好好味既三文魚, 仲有少少蟹腳, & 其他各樣野食, 仲 "切" 左蛋糕 tim !~ 豬都叫好間接咁"切" 左蛋糕既(我無0係隔離吖) ^^" , 不過可惜既係無聖誕特別野食
星期四 (3/12) , 入迪迪尼了, 依家係聖誕 special , 有好多聖誕裝飾 , 入場後仲用全年証換左兩包聖誕掛飾 , 靚靚~
今次都係無 "幸會余沛琛" , 豬唔想入去同史迪仔互動, 而得著就有: 同唐老老同佢女友影相, & 終於睇左 "米奇金獎音樂劇" , 都 ok 仔的 !
繼續有玩既有 : 飛越太空山, 巴斯光年, 獅子王, 火車
玩完出來0係綠野仙鋸扒 ~ 之後歸家
有得同抵錫豬一齊歎, 好好好開心吖, 多謝豬 , i love you : > ~

補番d 事先~

九月
1. 某天晚上同 ward 既同事們一齊吃晚飯 (最後的晚餐?!?) , 今次都幾多人去, 有 13個人仔, 去左 CWB 既五月花, 個名就好靚了, 係間任食既中日料理
一去到已經開始緊了, 好多野食不停咁捧上抬, 真誇張, e.g. 炸雞球, 炸豆腐, 燒雞翼, 蜆, 蝦, 牛肉粒, 壽司, etc.
不過主角都唔係d 食物, 而係佢地既話題, 佢地真係講得好搞笑好精彩, 所有唔係席上既人都差唔多講齊了,
唉, 唔知今次一別下次幾時再見呢, 影完堆相, 今次既活動都結束了

2.某日係抵錫豬既媽媽生日, 某天晚上就同抵錫豬, 世伯, 伯母一齊吃個晚飯@CWB 鴻星
9月見左 2次呢! 前幾日我上左去豬仔屋企拎月餅, 上次我贈盒月餅俾豬仔慶慶中秋, 豬仔又回番盒月餅來, 不過其實可以再上到豬屋企, 已然好好吖, 有冇月餅回禮一d 都唔重要了
呵~~~ 又見到世伯, 伯母了~~~ 雖然每次見到佢地, 我都無咩講, 唔知講咩, 但我都一樣好鐘意見到佢地, 我好珍惜呢個有得相聚既機會, 同相聚時既感覺
正如 d 班聚, 我都係聽既多, 講既少, 我唔係唔鐘意去個班聚, 而係我都係唔係好慣一大班人既傾計, 見到佢地就已經好好了
呵~ 呢晚真係開心, 伯母生日我又有份去了~~~ 下次我又要去!~~~
伯母生日快樂, 福如東海, 壽比南山, 身體健康, 快快樂樂

3.我同抵錫豬三周年了!~~~真係諗起都開心! 但真係唔經唔覺, 咁就 3年了! 第一次同抵錫豬慶生日丶去台灣丶去日本好似係無幾耐之前既事咁... 雖然都有 "討論", 扁咀, 黑面既時候, 尤其旅行時我都好似特別 "頑劣" , 佢特別勞氣, 不過再諗番起時所有野都係開心, 值得回味既! 就算俾抵錫豬鬧, 都係因為佢着緊, 掛心嘛! 知道係出於掛心, 就唔會將d 鬧人既說話放0係心上既, 好唔容易, 終於等於 3周年了, 一籃子既活動...... 就係無既, 星期日先來左個 part1, 我地好晏咁去左海港城, 吃個 late lunch, 諗左好耐, 本來想去海港城既麻布茶房, 點知一去到個舖位 ..... 唔同左既... 麻布換左另一間食店, 吃吉列炸物, 望望個餐牌, 都係去第二間, 行下行下, 最後都係0係 food court 食, 食完0係海港城行左陣, 呢個時候 d 舖頭未有 sales , 唔買野了~
之後行左去出面既糖朝食甜品, 呢間好耐之前已經話想去食, 不過一路都未有機會/ 時間, 今日終於去吃了, 兩層高, 裝潢都 ok 既 , 咁0係豬話想要 4樣時, 我地決定叫 3樣 - 楊枝甘露、混醬腸粉同生果豆腐花, 最特別就係混醬腸粉, 我初時都唔知係咩黎, 唔通真係真既腸粉? ..... 一上抬後, 哦~ 醬係士多啤梨芒果醬, 腸粉係 ... 到依家都唔知係咩做 ^^" 可能係椰漿吧~ 而最浮誇要數生果豆腐花, 個底係放乾冰, d 煙係咁飄出來的 ..... 最務實就係我既楊枝甘露了, 味道都係有水凖的, 而且 d 芒果好大舊, 仲要甜的 !~
吃完繼續逛海港城, 行下 citysuper , 抵錫豬俾我成功游說,買左本藍色空白既 schedule, 等我幫佢填好d 日子~~~
之後豬收到電話, 所以晚上我又 "有幸" 可以繼續同佢吃個晚飯~ 今次我地就揀左原本係麻布既新舖 "HIP Katsu" , 佢個格局好似 cwb 世貿果間 "xx吉" , 價錢就平佢少少, 我叫左吉列豬扒滑蛋飯, 豬就叫左吉列蝦定食,
味道都唔錯既, 豬就話 cwb 果間就好少少 ~ 不過呢間有 "甜品" , 急凍提子 !
吃完就搭船歸家, 結束今日既 "3周年 part 1" 了~

到正日果日


待續