11- 7- 2008 (五) Day 5
親親鹿鹿 ! 京都特別遊‧奈良鹿仔我來了 !
今朝都少少早起啦 , 因為都諗住早d 搭車去奈良, 車程都耐耐地ga
大約 9點幾去到車站, 搭 9:30am 既近鐵奈良線急行 向奈良出發 !
嘿, 同佢一樣, 原本以為我地搭果架車好新好靚, 點知之後來丶我地真正搭果架..... 個樣望落唔似新款 wor, 嘿, 失望, 仲諗住d 飛彈樣既列車嘛 ^^"

大約 10點半去到近鐵奈良站
出左站之後, 就諗究竟行唔行去呢 ? ....... 其實都有0係車上面傾,
最後, 我地都係行過去既 , 為豬仔既勇氣鼓掌 : > !

由車站向前行行行, 第一個景到既景點係 "奈良公園" !
驚喜既唔單止係個奈良公園咁快見到, 最重要既係, 咁快見到鹿仔 !~
0係奈良公園入面, 有好多隻鹿仔0係度食草,
心情真係好興奮, 可以咁快見到佢地, 而且係可以咁零距離同d 鹿仔玩 !~~~

d 鹿仔個身有班點 ga , 真係 小鹿班比 來的 !~~~
佢地條尾白白地, 細細條, 擺下擺下, 又眼仔碌碌, 真係好得意 XD !~~~
一開始未行到去堆鹿仔前, 都好驚嫁 ! 有 d 鹿仔既果對角 ... 一d 都唔 "仔" 嫁 !
雖然 d 鹿仔據說好溫馴, 但話曬平時都只係0係籠入面先見到 d 鹿仔 , 我同隻鹿仔都要d 時間適應既 !
其實行都埋去, 都仲係好驚, d 鹿仔郁一郁, 我都即刻退後 ^^"
過左陣, 襯有人0係鹿堆中玩 , 混水摸魚咁攝入人堆+鹿堆中 , 成功 "潛入" !~

呵呵, 慢慢, 慢慢行近一隻鹿仔隔離, 再偷偷地伸隻手埋去隻鹿仔到 .....
唏~~~ 來到奈良後, 第一次成功摸到鹿仔 !~~~
d 鹿仔毛原來都唔軟林林既 , 硬硬地, 睇黎要用多 d "護髮素" ‧‧‧
仲有個身熱熱地, 唔知有冇發燒 . . .
不過 d 鹿仔都唔係好企得定, 唔知係咪我地噴左蚊怕水, 佢地唔太鐘意聞呢, 我地一行近去想同佢影相, 佢地就一步兩步咁慢慢行開, 試左幾次都係咁! 都幾難同佢地影到張好靚既相!
嘿嘿, 我同佢都有摸到鹿鹿, 而摸完之後做既第一件事, 係即刻搵水喉洗手 !

本來我仲想同d 鹿仔玩多陣, 不過佢話去左之後果 d 春日大社吖, 東大寺果d 先, 行完再番來, 而且果度會仲多鹿, 所以就同奈良公園既鹿鹿講再見了

繼續向前行, 就見到有指示牌, 其中一個就係第二景點 --- 春日大社 ! "春日" 呢個名真係幾靚~
我地跟住前面幾個似好熟路既路人甲乙丙行, 行果條 "春日大社表参道" , 呢條路老實說, 如果唔係朝早 + 前面有好幾個路人行, 都幾陰深僻靜路, 兩邊都有d 好高好高+歷史悠久既樹種左, 再行多陣, 兩邊仲多左一排 石燈籠 tim, 夜晚行肯定好有氣氛 !
再行多段路, 終於見到春日大社 ! 春日大社個門面又係新得有點過分 , 可能定時補番d 油, 間大社既外觀望落真係新過我家啊 !
不過都有樣好, 新 = 乾淨 , 感覺上都幾乾淨的 , 起碼除左d 樹葉 & 沙粒, 唔會無啦啦見到d 汽水樽, 紙巾類物體

間大社既前半部係免費, 後半部就要收費喇 ,
前半部一邊賣 d 御守符, 繪馬等等, 不得不提, 日本獨家既繪馬, 屋形既設計, 真係做得好靚好特別, 間間大社, 寺etc. 都有賣, 絕對係手信佳品 !
呢間春日大社既繪馬都好靚, 仲有迷你版 , 手工都唔錯, 不過我地0係呢度最後買左 3個御守符 ~
而後半部主要都係俾人入去參拜, 仲有結婚儀式用既場地, 呢日去到都見到有人入左去參拜
我地最後淨係行左前半部唧, 睇完前半部, 就離開呢個春日大社

跟據指示圖 , 原來春日大社附近仲有好多大大細細既神社 ! 我地就跟住逐個去喇
第3站 -- "夫婦大國社" ,
呵~ 我自己就好歡喜丶好期待咁去喇 ~~~ 唏唏~ 我都偷偷地咁希望自己有呢個祝福

第四站 -- 金龍神社 , 唏~ 錢錢錢錢, 都岩我既, 希望我地既錢運穩步上揚 !~

第五丶六站如下...


春日周圍真係有幾多神社, 不過有 d 又要再行遠 d + 行入d , 全部都係俾 d 樹包圍 , 所以都係作罷 , 呢日 d 神社都唔算太多人去, 有咩事都無人知嫁
離開呢度去下一站時都有個小插曲, 就係出到黎個小食小賣部時, 見到有 3隻鹿仔0係度 hea , 咁諗住又搵下佢地影相, 兼且又試試自己膽量, 睇下夠唔夠膽摸下佢地 , 話曬淨係奈良先有咁馴既鹿仔, 仲要無籠攔住佢地, 任摸唔嬲, 真係好難得的 !
點知就0係我行近去諗住影時 , 突然有個人大叫左幾個字, 雖然聽唔清佢講咩,
不過佢既手勢做得好清楚, 行埋一邊 ....
糊里糊塗唔知點解 , 呢 3隻鹿唔行近得既 ?
見到其中一隻鹿仔行 , 明白曬 , 原來呢隻鹿仔拐下拐下行, 應該受左傷了 ...
有好幾個工作人員圍住呢3隻鹿仔, 應該就係帶佢番去療療傷, 個陣勢有d 似人地捉狗 ...
我地一路離開, 一路望下佢地成唔成功 ... 最尾幾眼係見到佢地一有行動, 呢 3隻鹿仔即刻跑開左 , 唔知呢 3隻鹿仔依家點呢 ?

一路都係行住細碎石路離開, 吖, 0係日本, d 寺附近既路好多都係 細碎石路 喎 ,
係咪因為日本都有好多神社, 好多寺, 咁用碎石路成本會低好多呢 ...
不過點都好, 碎可路岩曬我地, 尤其0係奈良 !
唏唏~ 因為奈良好多鹿屎屎 , 有時真係踩左都唔知, 行碎石路就可以清一清鞋底喇

之後我地就去下一站 , 今次沿住條馬路仔行, 見到豎左好多牌 , 大概就係 "鹿出沒注意" , 請 d 司機多加小心

行左條馬路, 就來到第 7站 -- 奈良公園入面既一大片青草地, 同一小堆鹿鹿, 都有小朋友0係呢度同d 鹿鹿玩既, 不過其他鹿鹿呢 ?
因為中午時分, 烈日當空, 一堆唔想中暑既聰明鹿鹿去左大樹蔭下抖暑 ...
呢個草地上面 d 人真係唔驚中暑喎, 一係就小朋友同D 鹿鹿玩, 一係就 D 公園阿叔0係度慢行
我地0係大青草地行行行, 想搵搵下一個景點, 一大片青草地+藍天白雲 + 一堆小鹿斑比 呢個景真係靚, 雖然好熱, 但眼前既景真係好 "疏乎" ~
第八站 : 中途見到間展覽日本文物既建築物, 因為又係收入場費, 無入到去, 但就係佢樓下既櫈坐低抖抖 + 補給 , 先再前進
p.s.: 個奈良公園好大喎 , 大半個奈良幾乎都係奈良公園, 真誇張 !

題外話, 我地0係日本成日用左好多詞語 , e.g. 補給 , 我地既 "補給" 都有 2個細分
有分 補給水 同 補給蚊怕水 , 所以有時佢講 "補給" 時, 我都問下佢 "補給水定蚊怕水 ?"
其他日本專用常用詞第日再講

本來都差 d 0係中草地入面盪失路, 行下行下見唔到個出口, 最後我地係咁踩住草地, 行左 ok耐先出得番去, 差d 要原路折返
& 除左要搵路之外, 仲要對眼時刻留意住個地, 因為我地0係草地上面行, 而 d 鹿鹿都係周圍行, 當佢地一食野, 條腸就郁得特別勁, 即食即屙 , 所以周地都係佢地既 "黃金" ! 希望對鞋唔好中咁多金啦 ~

一開始本來想去埋 二月堂, 三月堂 , 但因為實在太熱 , 真係無動力去, 決定取消, 提早去搵地方食晏仔

第九站 : 我地終於行番去 d 大街, 見到有一間望落都岩食既食堂 (係咪算食堂呢?) , 買飛俾飛, 真係好似食堂, 買左飛 , 自己揀位坐, 俾飛佢, 佢等陣再送野食來
佢叫 吉列豬扒飯, 我就叫左 雞蛋烏冬 , 嘿, 佢果碗係好味D 既 ^^" , 一分錢一分貨嘛, 唔出奇啊, 平得來又好食先最特別耶~~~

食飽坐夠, 就再正式向下一景點出發 ! 第十站 -- 東大寺 !
我地0係條大街上面行去東大寺, 一路都見到好多鹿鹿 ! 有d 停左0係度 , 有d 慢慢行緊, 有d 趴左0係地, 真係睇得我好開心 !~~~

0係東大寺門口 "南大門" 前面, 有 2個小檔口, 賣 鹿餅 的 , 每份 150円 ~
d 鹿餅好似香港 d 細蝦餅咁大, 閃咭書話無乜味的... 我明明話想搣少少試下, 但最後都唔記得左 !
一群聰明既鹿鹿們長期徘徊呢兩個小檔口前面 , 佢地一見到有遊客買 d 鹿餅, 就會一堆圍埋去, 爭住食, 好似餓左好耐咁 !
如果遊客們餵得慢, 有 d 大隻d 丶對角起角既, 更加會用對角撞一撞你 tim !
吖, 經佢一提, 發現左樣神奇既事 ! d 鹿仔老老幼幼全部都唔去搶檔口果度 d 鹿餅餅的 ! 真係好乖噢 !

其實都0係 "南大門" 前面丶兩個小檔口附近停留左好耐 , 都係猛咁影 d 鹿 + 嘗試同d 鹿鹿合照 + 睇下d 人餵鹿 + 影下d 人餵鹿
來到 "南大門" , 竟然有幾隻 守門鹿 ‧‧‧
呢d 鹿鹿就比較陰公, 企唔到個好位爭餅食 , 佢地企0係門口中間, 望來望去, 睇下有冇人餵野食, 但經過既途人身上多數都無曬鹿餅餅了

行到入去仲有一道門 -- "中門" , 佢既光鮮程度同 "南大門" 成強烈既對比
"南大門" 基本上無乜色, 木造丶純啡色既一座建築物, "中門" 就同之前去過既 "地主神社" 一樣, 重新上色, 新既一樣 !
"中門" 基本上係個入場收費站 , 俾完錢, 就修去繼續參觀了 ~
"中門" 既裡面, 原來有好幾個紀念品檔, 其中有賣面譜, 某個小臉面譜好似玻璃面具既紅天女面譜!
不過賣得最多既都係奈良地標 -- 鹿鹿~ 所以多數都係專賣鹿圖案製品 - 公仔, 電話繩 etc. , 我地都買左 一對小鹿斑比電話繩 : > ~~~

0係中門遠遠咁望去個大佛殿 ... 加埋大大既藍天白雲 , 真係好靚 !~
又係靚到好似睇緊加工過既明信片咁 !

一行到入 大佛殿 , 即刻見到座大佛, 真係好大好高 !~
佢既左右兩旁仲有兩座細d d 既佛像
向右鑽入去, 再見到另一尊 - "廣目天" 像 , 雖然唔知 "佢" 既歷史, 應該都係好犀利的...
"廣目天" 既隔離 , 就有 三個東大寺模型, 整得好精細啊 !~ d 門框吖, 模型殿入面既柱吖, 佛像 etc. 都有 ! 真係一d 都唔馬虎
再過 d , 就有 "廣目天" 既兄弟 -- "多聞天" , 都係一樣, 都係唔知 "佢" 既來歷, 不過深信都係好犀利的 ~
吖, 呢個東大寺入面其實都幾乾淨喎, 連 d 雕像, 牆身, 角落 etc. 望落都少少麈, 好神奇好神奇 ! 唔知有冇人日日爬上去抹抹呢~

再隔離少少既一條柱底, 有個 細窿 , 原來係話如果邊d 人仔爬過到個細窿窿, 就 "可保健康" 喇 ... 現場所見, 爬既全部都係小朋友, 因為都只有小朋友夠過的 ..........
不過又諗, 爬完窿可保健康都有合理解釋的! 爬得過既只得小朋友, 而肯爬呢個窿既小朋友 , 多數都係 d 活潑既小朋友 , 咁活潑既小朋友有咩特點呢 , 咪就係比較健康囉 , 咁 "可保健康" 呢個目標唔難達到吖

大佛殿入面仲放左幾舊 呢個殿既原材料, e.g.某一忽既屋頂
行到大殿既最後一個角落, 就見到有三兩個檔口賣紀念品, 賣既同中門果幾間差唔多, 所以無買

之後我地又再行番去岩岩入大佛殿時既地方--殿既左邊, 因為果度有櫈坐下抖下,
抖緊時, 見到有隊外國旅行團行入黎, 個導遊講英文的 ! 所以我地一路坐, 一路都偷聽下個導遊講緊咩 ~

抖左陣, 我地就離開呢個大佛殿喇, 出番去中門, 見到有隻鹿鹿趴左0係門邊邊乖涼
我地又行埋佢旁邊坐低 + 扮老友 + 偷偷地影相喇
我覺得自己今次都行得幾近嫁 !~~~

再出到南大門, 又睇多陣人地玩鹿, 睇睇下, 見到有個鬼佬仔攬住隻大鹿鹿影相, 阿鬼佬仔 一d 都唔驚隻中鹿鹿喎, 而隻大鹿鹿又無咩, 無一腳伸開佢喎 ... 真係好羨慕! 我又要抱 !
再行出d , 又見到遊人餵鹿, 仲有個鬼佬佬揭起佢件衫尾, 果度有d 濕濕地既跡, 嘿, 應該係某隻鹿鹿親吻過佢件衫 ...

臨離開前, 我地決定折返 .... 餵鹿鹿 !
我地去番旺 d 果檔, 再靜靜地買左一 pack 鹿餅 , 慢慢行去鹿少既地方, 佢開始餵鹿, 我做全程既攝影師~
一開始時, 得一隻 "右邊面有粒黑點" 既鹿仔食佢既鹿餅餅的, 而佢都搣開細細舊俾佢食, 但之後, 再來多一隻, 再來多幾隻, 總共有 3細 1大 既鹿鹿爭食
嘿, 個情景都幾緊張嫁, 有 4隻鹿鹿圍住, 尤其隻大既有對大角, 俾佢頂到都唔少野啊 !
好彩佢都行來行去, 唔俾d 鹿鹿圍住失控 , 但睇到好刺激 ! 如果我俾 d鹿鹿圍住都唔知點算 ...
俾鹿鹿好刺激咁圍左幾次, 終於俾佢地食曬d 野
最後, 就係做個指定動作 -- 攤開兩隻手 , 話俾d 鹿知無曬 d 鹿餅餅喇 ! 而d 鹿鹿又真係好乖咁無再圍住佢搵野食 !~

佢餵完, 就番入東大寺果邊搵厠所洗手, 我0係南大門等佢,
嘿, 見有隻鹿鹿好得閒咁企0係度, 我就做左件事 -- 同鹿鹿自拍 !~
呵呵, 都好刺激 ga , 一路影一路都驚隻鹿鹿轉個頭來咬我 ^^"
影影下時, 隻鹿鹿真係有轉個頭來, 我果刻真係有嚇一嚇 ! 好彩又無事, 佢只係轉頭整理下身上d 毛 !
之後都無咩既, 本來都驚驚地, 遠遠咁影, 不過其實之後影影下, 同佢混熟後, 都有越 "痴" 越近隻鹿鹿 ~ 可能有d 驚, 所以攞位時唔係咁好, d 相入面鹿鹿個樣唔夠正面 ^^"
影左好幾張 "自拍照" , 佢就行番出來了 , 我地就正式離開呢個 東大寺

行番原路番去起點
熱辣辣咁搵到去第十一站 -- 興福寺 + 五重塔
果度一D 遮蔭既地方都無喎, 好空曠, 遊人都少, 同埋佢又係要收費入場的, 所以都係0係外面影相算,
同埋0係太猛太陽底下, 我 d "起勁" 會曬走左 , 所以提唔起勁影好多相 ^^"
睇番相先記得, 0係興福寺前面, 我無影到相, 係叫左豬仔影多d , 影埋我果份 ^^" ....

不過行過d , 我就有影喇 , 因為又有鹿鹿!
0係一撻高起左既草地上面 , 有一大堆, 幾十隻鹿鹿趴曬0係度抖暑,
而0係佢地隔離 , 就有幾位老師帶住一班小朋友0係樹玩同影相
d 小朋友都唔驚 d 鹿鹿啊 ! 好犀利!~ 我都想同一大堆鹿鹿影相 =3=
神奇畫面出現了 !
一隻深信係大佬丶無同堆鹿鹿趴埋一齊, 自己0係隔離既樹幹下乘涼既公鹿突然起身 ,
行去唔知邊度 (飲水?) , 行左無幾耐, 果一堆鹿鹿就有行動了
佢地一隻二隻咁行番落黎, 跟住大佬既方向行, 唔止一兩隻, 係全部都跟住起身行 !
全部都好有秩序咁一隻跟住一隻行, 形成一條整齊既隊伍, 個畫面真係好震撼 !~

第十二站 : 之後我地行番去車站附近 , 再搵搵地圖上出現既 郵局
真係爭分奪秒 , 因為果時已經 4點幾, 就快 5點關門了
郵局入面果位櫃位小姐, 竟然都知知地我地講咩 , 塞左 "奈良限定" 既郵票俾我地 ~
呢兩個 "奈良限定" 既郵票對我來說真係好珍貴, 第日拎番出黎都會記得 ! 多謝豬仔帶我去買 : D !~

及時買到郵票後, 就去番車站附近行, 果幾條街有好多好多舖頭, 仲有 100円店, 有行不過無搬到D 咩出來, 再跟地圖行, 行左OK 耐 , 去搵搵,-- 第十三站 : 旅遊賞光案內所
本來諗住入去嘆冷氣, 點知係弱冷來既, 真掃興 =. ="
0係入面睇下地圖, 原訂既奈良町, 因為時間開始晏晏地, 怕 D 舖會關門+ 好遠 + 怕攰所以無去, 直接去 第十四站 : 猿沢池

一行到去 猿沢池 , 見到既係 .... 一個望到盡頭既湖
我地一直沿住個湖順時針咁行, 湖入面有好多龜的, 都見到有遊人 餵白鴿 同 餵龜
一路都未望到個湖有咩好絕色既地方 , 直到行左一半 , 開始睇到D 景
我地直情搵個位坐低抖抖 + 慢慢影 ~
D 樹做背景 + 有個塔頂突出來 + 湖邊有兩三座樓 + 藍天白雲 + 平靜既湖面 + 湖中既倒影 + 金光閃閃既夕陽 = 真係好靚 ! 真係水天一色 !
不過都要岩時間先影到座樓 "金光閃閃" 的 !~ 所以都難影嫁 !~
影到埋個咸蛋黃個景就更靚喇 , 不過影到咸蛋黃就影唔到夕陽影照下既 "金光" 樓景吖, 兩樣都靚啊 , 無得兩樣都影到添 !

0係我地坐0係度邊影邊抖時, 竟然 再次見到鹿鹿 !
隻鹿鹿0係路牌邊企0係度, 奈良果然多鹿鹿 ! 度度都見到鹿鹿 ! 驚喜!~
隻鹿鹿仲行左去水渠邊, 唔知做咩, 不過再睇下睇下, 都唔止一隻, 都有兩三隻鹿鹿 !~

第十五站 : 嘆夠影夠, 就去番果幾條商店街仔搵晏仔,
研究左 ok 耐, 終於食 "咖啡一族" , 基本上係一間 cafe ,
我叫左炸三文魚定食, 佢就叫炸可樂餅飯, 兩樣都幾好食 , 都估唔到炸三文魚都整得幾好食 ~ 佢既可樂餅就梗係好好食啦!~
見有人入來食野+食煙, 就快快手走了 , 又估唔到日本都幾多人食野時食煙喎 !

第十六站 : 食完野, 就去番頭先經過過+mark 左既超市 -- "OKest fresh mart" 掃貨 !
"OKest" 真係我地既樂園 , 呢間真係超市來的 , 比起周街都有既便利店, 佢既價錢絕對經濟實惠合理 !~
逛左 OK 耐, 買左 蕉, 白桃 X2 , 杯麵 X2 , 飲品 X2, 共 814円 ~

之後, 我地就搭番近鐵奈良線番京都的家
回程又有插曲 ..... 話說我地 8點頭去到奈良站, 又好似朝早咁買左兩張 8:30pm 特急卷, 每位額外多 500円, 售票果個都問我地, 係咪8:30pm果班
就0係遲遲疑疑買完特急卷後, 睇到個顯示板打住, 最快會開出既係普通列車 , 而特急就起碼 15分鐘後
咁不期然浮起個問號, 普通其實慢特急十幾分鐘而已 , 咁點解要花 1000円&十幾分鐘 去等列特急呢
就為呢樣, 我地又 "討論" 左好一陣喇 , 不過, 其實都無邊個岩同錯既 , 買之前我地都未睇個顯示板, 唔知咁快有普通, 隔咁耐先有特急既 ~

9點幾番到去京都既家, 放低曬d 野 , 就做我地晚晚都做既運動 -- 洗衫 !
今次仲多左項任務 , 就係 刷鞋 , 刷靚佢對鞋 ! 我都有 功架 , 都有好俾心機刷的 !~~~ 讚我啦讚我啦 XD ~~~

下次我地再去過時睇下個板囉 , 好嘛 ?~
我地唔好傷和氣啦 ... 我地兩個都要開開心心噢

10- 7- 2008 (四) Day 4
無數全馬毅行正式展開 !
今朝 . . . 算早呱 , 話曬都要落地下去食早餐 ... 7點左右落到去, 今次可能係最尾一日 @富士屋 , 佢今次都有一齊來食早餐, 今次d 食物同 day 2 既一模一樣, 爛蛋又打回原形了
佢既早餐 .... 再一次地 , (今次打孖兩個-->)餐包+甜蛋+橙汁 , 好細食哦 ‧‧‧
我今次又係來一堆食物 + 今次只有 雜錦三重奏--橙汁+味噌湯+hot茶 , 牛奶今次無飲 ^^"

大約 8點頭拖住大喼細喼去到長堀橋站, 再坐 mtr + 京阪電鐵 去京都 !
來到京都, 自然又一番新景象! D 樓吖真係再矮d丶再靚Ｄ丶古色古香D 嫁喎!~~~

今次搵左一陣仔就搵到我地第二間既酒店 – Kyoto Garden Hotel~ 不過其實佢0係d 橫街雜巷裡面, 而且個招牌仲要係日文 “京都XXXXXXX” (<-- 對我來說 ^^”)
都有個蚊型插曲, 就係我地行下行下, 行到去果條巷前, 佢問 “呢條巷見唔見果間野?” … 我非常仔細咁望勻成條巷D 招牌, 有冇 “Garden Hotel” / “花園酒店” D 我熟悉既字眼…. 望曬, 無我想搵既字眼, 正當我以為好幫到手咁話 “呢條巷唔見喎” 時, 佢就話 “見到間野了!” 原來間野個招牌係日文…. 等我仲以為今次幫到手 tim , 真係好瘀好氣餒!
卸完d 行李, 就出發去我地京都景點既第一站 --> 清水寺

淨係搭車去已經一波三折, 一路有d 猶豫咁行去大馬路四条烏丸, 搵住0係果度搭巴士去清水寺 ….
點知行到去個巴士站, 因為祇園祭… 執左! 我地問附近既停車場保安員, 佢就指左我地向前行, miss 左個車站, 所以行極都未有, 又唔知果個人講得岩唔岩, 幾經辛苦, 終於俾我地見到個車站, 上到車, 好好彩有個位仔坐, 仲有冷氣涼~
落左車, 再0係山腳呢條 “清水道” 長直斜 一路行上去, 沿途見到有d 屋雖然舊舊地, 但真係好似d 卡通片大雄住果d 屋, 木門木圍牆瓦片屋頂, 真係好有日本味道, 我地真係來左日本了!~

仲首次見到 “古銅‧猛男‧人力車”, 真係仲有人拉人力車的, 仲要唔止一個兩個!
個太陽又唔係真係曬得好緊要, 係萬里無雲果下陰公d 唧 ^^”

又終於行到去, 個清水寺門面都好靚喎, 絕對唔殘唔舊 !
一去度有地方俾人入寺前洗淨對手… 唏唏~ 真係好清涼, 消暑佳品!~
其實呢個清水寺都幾大喎! 入面好似包括左幾個小名勝, 除左有佢個本寺, 仲有地主神社丶音羽瀑布 etc.
如果慢慢行, 邊行邊抖, 一定可以行一整個下午!
那個地主神社比清水正殿更新淨, 而且都好多人去, 可能呢個既主題係姻緣, 岩曬d 年青人吧~

雖然個正殿唔夠 d 地主神社咁光鮮新淨, 但其實更加有味道既, 感覺到自己真係去左間有好耐歷史既建築物, 而唔似去左d 道具丶佈景度咁,
新修葺既, 影相係會靚 d , 地方會乾淨 d , 但總係失左果份真,
(指既係古跡, 酒店等另計! -->) 修葺一下絕對唔過分, 但有d 真係新得好緊要, 新到好似佈景咁
清水寺周圍都幾靚, 幾清新, 感覺好平靜, 唔錯唔錯 , 真係好古色古香, 而且好 "日本" !
而且而且, 真係真係有人天時暑熱着住和服周圍行的 !

呵呵~ 行到又有d 攰, 有d 熱時, 好彩又見到救星 -- 日式涼亭 !
哈哈, 呢d 新淨+乾淨就岩喇, 坐都坐得舒服 d !~~~

坐左陣, 就行去搵啖食, 途中仲見到「音羽の滝」, 都幾多人排隊 ! 有 3條唔同主題既水柱流落去, 俾左錢既人就去搵佢支野裝水洗洗手, 夠膽既可以飲埋落肚, 都幾得意既 ~
再行多陣, 終於見到我地既目標 -- 「六花亭」
初時叫左個 士多啤梨牛奶刨冰, 超好味, 甜中又有d 奶味, 唔會齋得d 冰, 鐘意甜品既我岩曬 !~
之後又諗費事再搵地方食lunch, 呢度又好似都ok 仔咁, 所以就0係度叫埋晏仔 -- 冷麵
嘿, 我遠遠咁俾個碟呃左 ! 我真天真 !

食完就行番落山, 今次行左另一條路先 , 首先行 "五条坂" 落去, 之後再轉番朝早行果條 "清水道” 上去, 行到咁上下, 再轉小路 "產寧坂" 去下一個景點 - "八坂神社" !

途中又見到閃咭書提過既 "よーじゃ", 係京都著名化妝品牌, 佢就0係入面買左面油紙吖, 書簽吖, 鏡吖做手信越洋俾佢細佬
行下行下再行入 "ねねの道" , 都係閃咭書推介, 又見番 “古銅‧猛男‧人力車” , 仲游說我地搭下 tim !
行左好多大街小巷, 又係0係唔知行得岩唔岩路既情況下, 終於行到去 "八坂神社" !~

呢日既 "八坂神社" 好多野睇喎!~
入面都唔少人嫁! 再一次見到好多好多唔知點解唔駛番學既後生仔女, 唔通轉眼間又已經放學了咁嘆?!?
0係入面見到好多好多既大燈籠 , 再行下行下, 因為正值祇園祭, 仲見到 "特別嘉賓" 迎接我地 -- "鉾" !~ 總共有 4架咁多 ! 我未來京都之前未親眼見過咁金光閃閃的鉾的!~~~
嘿嘿, 真係好金好閃, 呵~ 好吸引我 !~ 即時同佢地影番張相 !~~~
0係 "舞殿" 上, 有第 4架"鉾" , 呢架細好多, 仲整緊, 有一大班工作人員+高層圍住

雖然熱辣辣, 曬猛猛, 但呢間 "八坂神社" 其實都好靚下!~

一行出 "八坂神社" , 就見到d 野 !
馬路旁邊圍左d 人, 而馬路上竟然有祇園祭既巡遊隊伍 !~
隊伍既主角係幾位騎0係馬上丶着曬 "古裝" 丶化到好 "行" 既小朋友, 好似佢話齋, 十足十 "飄色巡遊" d 朋友 !
但我地一出來見到既係隊尾, 而且佢地不斷前進中, 咁我地又想影下靚相+見識下, so 我地就好似企0係我地隔離既電視台記者咁, 不停咁穿過人群, 跑吖跑吖 ...
終於, 俾我地跑到去巡遊隊伍既前段 , 影左好多靚相 !
吖, 巡遊隊伍入面d 人都幾 "敬業" , 幾有笑容 ga wor! 有位哥仔全程都笑笑口....
& if 佢心水清既話都幾搞笑, 佢0係幾條街前見到有 2個物體0係度影佢相, 行左幾條街後, 又見番果 2個物體0係度影佢相, 都咪話唔搞笑
如是者, 就一路跟住條巡遊隊伍跑+行左幾條街喇 !
嘿!~ 我地又再有一次驚喜咧 !

睇完影完相, 就行番我地條 "正路" , 因為唔經唔覺, 我地已經到左祇園 !
睇睇閃咭書, 搵番我地既目標 -- 細工館 ! 閃咭書話呢間整既布造精品好靚的 ~~~
又0係實景同地圖中浮沈左陣, 終於搵到!
wo~~~ 入面d 布公仔好精緻好靚靚吖 !~~~
有吊飾 , 布袋仔, 電話繩, 鎖匙扣, 鏡袋, 大公仔, 細公仔, 布壽司 , 裝飾品, etc.
全部都好靚, 每樣都睇到我兩眼發光 !~~~
正當0係一樓 (=地下) 好歡喜咁買左一袋行出黎 , 就見到商場指示板寫住仲有二樓 !
諗住上樓睇下有咩睇, 點知又見到d 新既布藝精品 , 我地就繼續血併 XD !~~~
最後又買多一大袋出黎, 好彩我醒目, 即刻拎埋之前張單出來, 購物滿 3000円就可以換一條得意金魚手巾仔 !~~~

滿載而歸後, 就繼續 向祇園出發 !
繼續搵下閃咭書入面提過既其他舖頭, 不過有d 就搵唔到, 有d 就無興趣食
咁見都五點左右, 就慢慢行去閃咭書另一推介 -- "Kyouen" , 據說是結合左傳統同現代既設計丶兩層商場式建築物
都係穿過 d 平民住既橫街小巷行過去, 行去途中 (又係行去!) 見到d 和服店吖丶便利店 etc. , 我地仲成日行行下走入去d 便利店入面涼冷氣 ~~~

穿街過巷後, 終於到左 "Kyouen" ! 外觀望落都幾靚! ~~~
我覺得 d 望落似木造既屋, 係特別靚的 !
入到去, 個格局原來係d 木屋以井字咁圍住中間既花園, 有好多位俾人休息~
而個花園都唔 hea 喎 !
個 "枯山水" 同另一邊既 "真山水" 俾人既感覺好舒服, 周圍既燈光都配合得好好
去旅行去呢d 地方真係正, 又學佢講, 好 relax !~

抖左陣, 再影下相, 就去搵啖食喇 !
今晚我地去左香港都有分舵既 "山頭火" , 拉麵專門店 , 0係香港我當然未食過啦
入到去坐低, 佢望左我地幾眼, 就自動塞左張中文menu 俾我地, 我叫左麵豉拉麵 , 佢叫左叉燒鹽味拉麵
都真係好好味喎 , d 麵咬落好好味~~~
尤其佢既叉燒, 好 "林" 好好味, 有幾分似 "入口即溶" 了 !~ 真係好驚喜, 估唔到豬肉都可以咁林咁軟滑 XD !~~~
呵呵, 雖然個湯底都幾濃, 可能幾多味精, 但 , 都好岩我食 , 濃味我都幾 like 的 !~~~~

吖, 日本既食店有個最大大既優點, 就係唔收加一 , 明碼實價 , 童叟無欺 !
食飽飽好滿意咁行出黎, 6點半左右 , 都開始入夜了
我地又決定行番去 !
我地跟住條 鴨川河畔 行番去, 行到去河邊時, 有個女士行過, 聞到一陣香味, 以為係香水啦, 點知行遠左後 , 唔係喎, 無理由 d 香水咁勁, 咁遠都聞到喎! 終於搵到源頭 -- 河邊栽種既花香 , 仲好似係白玫瑰來 tim ! 日本好犀利吖, d 路邊既花都咁香咁靚 !
因為已經入夜, 行河畔有 d 風吹來, 真係 "爽過 dee dee" !~
河畔兩旁都開左唔少食肆 , d 食肆好型吖, 露天既座位全部都起0係水上面的 !

行到番去四条烏丸近鴨川橋邊時, 又見到好多人堆0係度, 我地見到咁, 雖然又係唔知發生咩事, 低當然都唔執輸, 機不可失啦~
我地又塞埋去馬路邊等 , 都等左好耐 , 終於見到 , 又係 祇園祭 既特備節目 !
應該就係某 "鉾" 既隊伍 來一場預演, 曬下排場, 吶喊助威下
個隊伍都有幾十人喎, 有d 就拎個 "鉾" 出來, 有D 仲捧左兩束大火把出來扔落地 , 唔知有咩意思 ...
原本我地企0係尾部, 點知原來佢地0係前頭表演, 所以我地好似晏晝0係祗園咁, 再一次0係人群堆中行呀行呀 , 爭取有利位置影相 ! 我地直頭0係人堆中伸隻手出來由高影埋去, 可以避過前面d 人頭 ~
嘿!~ 今次又咁岩呢個時間俾我地見到! 我地又再再有一次驚喜咧 !

睇夠影夠, 我地就又 行番屋企 喇 !
經過 "不二家 Cafe" , 都唔係經過, 都係特登搵的, 因為都係閃咭書推介 , 買左 D 麵包返酒店當第二日早餐
入面都有好多精美cake, 再裡面仲有間餐廳仔, 唔知又係咪不二家既呢, d 杯碟會唔會印住牛奶妹嘜頭 ?

再行到酒店附近, 再0係 "lawson" 買野飲
行呀行呀, 終於番到去酒店 ! 即時同番d 戰利品影相 ~ 隻兔仔真係好得意, 我仲搵豬仔幫兔仔整番個噹噹 ~~~
番到去時, 見佢咁攰, 都有同佢做下d 小運動, 郁郁手腳

呢間 “Garden Hotel” 都唔錯 , 我地係 room 403, 以白色為主所以感覺幾乾淨 , 而且都幾近地鐵站
其實今朝都有d 小小插曲 , 今朝上房卸行李時, 一入到去,
曾經有幾秒呆左 , 我果刻以為京都果間係和室來的
正想問 "乜唔係和室來既" , 突然又醒起 , 係喎! 大坂果間先係和室喎!
好彩無問佢唧~~~
講番 “Garden Hotel” , 個浴缸細左, 不過個厠所就乾淨左, 張床都闊左
仲有個好貼心既電熱水壺, 可以俾我地煲水+裝水落水樽 ~

0係京都話曬都有4個晚上, 所以我地都嗱嗱聲做番d "酒店夜間活動" ........
....... 嘿, 呢種活動好用體力嫁 , 用力既都會出汗嫁 .....
... 嘿~ 咩活動呢
.......
就係洗衫喇 , 洗完有幾日俾我地吹乾d 衫嘛 ~
& d 褲都有d 厚, 所以想洗乾淨時都要用力, 都真係會出汗嫁 ! 嘿嘿~


今日係行左好多好多路, 我地粗略計過, 應該最少都有個全馬了
真係好犀利 , 我地由 清水寺, 行去八坂神社, 再行去祗園, 再再行番去酒店 !
耐力同實力既表現 ! 真係頂俾個叻叻我地!
我絕對唔係話行唔辛苦, 真係幾辛苦, 熱到標汗, 但都真係睇多好多野既, e.g. 如果我地揀左全程搭車既, 就可能時間唔岩/ 落車地點而見唔到兩次既祗園特備節目了


我地今日共有 4大個驚喜 !
特別多謝豬仔, 同我一齊行, 一齊去渡過 !
真的, 好多謝你

9- 7- 2008 (三) Day 3
今日... 都早左少少起身既 ^^" , 今次我自己一個 ~8點幾落去食早餐, 佢0係房沖竹庶茅根飲, 今次既早餐同尋日既差唔多, 係火煺片變左腸仔, 炒爛蛋變左庵列形咁 ... 我今次試飲 "雜錦四重奏 -- 牛奶+橙汁+味噌湯+hot茶" , 嘿! 仲頂得住!~

差唔多 9點左右我地就繼續向大阪出發, 去今日既重頭景點 - 海遊館 !~
我地0係地鐵站買左兩張 海遊館pass, 盛惠 2400円 ~ 買左先知尋日蝕左,
原來拎住呢張 pass , 去動物園可以平d ! dump dump dump 呀!
不過唔緊要, 仲有大阪城呢個機會, 拎住張pass 去大阪城都有平的!~
(而呢個優惠, 亦為將來既再 dump 多次埋下伏線...)

都係 mtr 去 大阪港站 , 之後慢慢搵過去, 原來唔同地方既 渠蓋 都唔同的 !
靚到值得幫佢影番張相 ! 開始收集渠蓋相大行動 !~
行入海遊館前, 見到一大班小鴨仔團0係海遊館前面影相 ! 我地都影埋一份~

入到去, 首先出場既係水瀨, 一堆 好鬼懶丶郁都唔郁既水瀨 !
之後有好鬼肥丶但係好鬼可愛既海瀨 , 佢地全部都曉兩隻手拎野食, 拎完之後仲反轉身食野tim , 超趣致 !~
再次見到企鵝 ! 今次係有強運丶強冷+大玻璃館住既企鵝 ! 佢地行時兩隻手拍下拍下, 真係幾得意的!~
仲見到有 醜樣既大魚丶 b b 企鵝丶 用自己條脷抹玻璃既海豚丶一群郁都唔郁既魚

之後有海遊館既一哥一姐 丶(原本)住0係太平洋既 鯨鯊! 真係好靚+好大條 !
佢 d紋真係好靚, 游得又好優雅, 仲有一大班魚毛跟住, 真係好靚靚 ! 仲有兩條咁多
所以我又影左佢好多相 !~~~
再來仲有二哥 -- 魔鬼魚 ?!?
又係好大條 ! 仲要張開佢既血盤大口 !
呵, 我有 2張相都好正! 一張係有鯨鯊既大特寫 , 一張係一哥二哥同一姐 既大合照 !~
同場仲加映 "一塊" 太陽魚 丶蜘蛛長腳蟹丶擘大個口既一群魚丶八爪魚 丶海龜丶超似水母館既水母館 etc.
行完海遊館, 我地仲有0係禮品店買禮物俾自己--> 一人一條 得意既企鵝電話繩 !~~~

我地之後就行左去就近既 "天保山 market place" 食lunch , 今餐係好味甜咖啡飯 !~
食完再行入 "浪花美食橫丁" 買咖啡布丁 + 士多啤梨新乎奶昔 , 好好味耶~~~
一邊食, 一邊望住 天保山海景, 爽! ~~~
再0係呢個 "天保山 market place" 行左陣, 有間舖頭養左好多動物, 俾人買飛入去餵野食etc. !

嘆夠我地就 mtr 去難波了 !
我地第二次俾個名呃左 ! 那個 "開運健康幸福百貨店" 好 hea 呀! 正確來說係一間舖頭而已 ! 買左d d 手信
我地去左隔離間 ~歡樂天地 玩扔波波 ! 結論係原來不能用正常玩法玩的 !
再影左靚靚貼紙相 ! 係來到大阪之後既第一張貼紙相 !

之後就行去 "道頓堀極樂商店街" , 搵左陣, 仲見到閃咭書入面講既固力果總店 !
個 "大招牌" 就係條河兩旁, 我地都有0係招牌前面影到相, 果個人影得好好 , 好有 feel, 真係一張靚相來的!~
而個店就竟然唔係0係招牌下面, 竟然0係 "極樂商店街" 既隔離, 個舖頭亦都係好細, 都係一間舖頭而已 ^^"
"道頓堀極樂商店街" 入面d 裝潢都ok 既, 果度報稱係仿照舊日本關西既設計而建
都幾特別既, 不過都有幾分似舊中國既風格 ^^"
入面大部分係禮品店, 食店 同 玩意兒店 ,
我地淨係幫襯左食店 , 買左 章魚燒丶丸子 丶 內臟串, 仲入左 "桃太郎" 食蛋包麵,
佢整得 7 7 8 8 之後, 我地自己有得揸個鏟仔炒少個蛋包麵 ga , 好玩 !~~~
食完, 再拎番每人一張既 極樂咭 去 "精算櫃位" 找數

我地再0係道頓堀河畔-- 道頓堀川 好浪漫咁慢行番去, 又影左d 靚相 : > !~~~ 多謝豬仔 !~~~
番到去執執行李先訓覺 , 凖備聽日既搬家行動 !

Day 3 完 ~

8- 7- 2008 (二) Day 2
因為 package 入面既富士屋有包早餐, 所以都有一早 7點幾8點起身, 嘿~ 好難得的 ^^”~ 佢既早餐設0係地下, 地方唔大, 好彩去到時都無咩人, 仲有位坐~ d 野食都係果d 啦, 特別d 既係有牛奶, 味噌湯, 不知名丶凍凍地丶似冷盤小食類東東(不過唔狩好味既 ^^") , 沙律, 甜蛋 ! 連熱白飯都有, 不過竟然無冷麵同壽司 = ="
都有野岩我食, 不過佢就好似對呢堆野麻麻, 淨係揀左甜蛋, 餐包, 橙汁食
食完野, 再上樓收拾細軟, 就出發去第一個景點—天王寺動物園 !

去到動物園前站, 又0係地圖同眼前景物度徘徊, 搵左ok耐, 終於搵到! 個動物園話平唔平 (同台北市立動物園相比, 呢個真係無敵價), 話貴又唔算好貴, 盛惠500円, 不過個 “門面” 就睇落幾舊+冷清 ^^”
一入到去, 就聽到d 怪叫聲 (唔係人叫) , 首先睇既係 “忽忽” 類, 嘿~個patpat真係紅色的! 好搞笑既係, 有兩個唔同籠既 “忽忽”0係度叫囂+對峙, we wa 鬼叫, 我地仲幫佢地配音tim “夠膽你就落黎隻抽”… 不過之前聽到既怪叫聲唔係佢地發出,
繼續行, 睇雀, 估唔到0係街成日見既麻雀都俾人俾去 “參展” …
繼續行, 終於見到怪叫聲既源頭 – 肥海獅, 有隻海獅真係肥到呢… 仲要噴水, 不過真係好近距離見到d 海獅…
繼續行, 見到北極熊! 仲係無得入住大玻璃+強冷氣館既北極熊! 有條木做佢既朋友+玩具, 佢真苦悶… 隔離仲有一塊有佢個嘜頭既板, 真係好得意, 張相影到佢好似同人揮手say helo 咁的!
繼續行, 見到佢既同種 –小黑熊, 不過無咩特別
繼續行, 再見到大笨象, 馬騮, 鹿仔, d 鹿仔真係好得意的! 有隻仲專登行過來影靚相~
繼續行, 見到袋鼠, 曬駱駝, 綿羊與雞, 山羊, 羚羊, 松鼠,
仲有 好得意可愛既企鵝, 不過又係無得住強冷玻璃館的...
繼續行, 再見到d "猛獸類" , 老虎 , 豹, 山貓, 老鷹, 狼, 狐狸, 獅子 , etc...
一開始時可能好早去到, 9點幾, 個動物園 9點開門, 果時真係無人, 我地好似包左場咁 !
不過晏d 就多番d 人喇 ... 睇到獅子時其實開始有雨, 仲越落越大, 好麻煩, 要行下停下, d 動物都縮番入去, 睇唔到...
再之後隱隱約約咁見到長頸鹿, 水牛, 樹熊, 蝙蝠 , 鱷魚 etc. 好多好多, 全部都用好少既欄圍住, 感覺同佢地好近, 好震撼 !
其實呢個動物園都真係養左好多種動物, 都真係值 500円, 真係唔錯既 !
仲要唔係好多人, 唔駛迫 !
仲要我地有蚊怕水 , 真係無蚊埋身的 !~

去完動物園, 就一路周圍睇 周圍行丶一路去搵那個 通天閣 . 中午時間, 周圍其實都幾少人
去到通天閣前面, 影左幾張相, 今次無上到去, 就去搵閃咭書入面提既 "匠匠小巷" ...
唔知係咪我地對呢條 "匠匠小巷" 充滿太多美麗既幻想呢, 果條真係一條望到盡頭, 好快行完既 "小" 巷囉 !
仲有 d 舖頭未開, 亦都好少人行 , 行去睇閃咭書推介既果間舖頭, 係賣串燒的, 不過個格局就係好長好長既抬圍住個 爐&廚師 , 不過我地唔知坐低之後點叫野食, 所以都無入到去食,
& 見到有 d 食店有個魚缸放0係抬頭, 入面裝住好多細魚仔, 聽豬仔講, d 人會飲啖酒, 再嗱條魚仔吞落肚, 好變態 !
呢條小巷最後都唔太岩食, 所以都係行番出去 d 大街度食 lunch , 我地0係一間河豚專門店叫左個天婦羅蝦飯同一碟炸蝦 , d 炸蝦好味~

食完 lunch 後,
就搭 mtr 去梅田, 0係商場 "comme ca store" 度行, 都行左好多層, 玩具啦, 電腦用品啦 etc., 行到 3點左右, 就上 7樓既 "sweets museum" 食甜品 ~
嘿! 又俾 "museum" 呢個字呃左 ! museum 唔係好大好多間甜品舖嗎?
兜左 2次, 終於揀左 "yami yogurt" 食雪糕, 一人一杯~ 我果杯好味d~ 係 朱古力雲呢嗱乳酪雪糕 ~ 不過食到最底時好酸~ 但總體都係好好味~~~

之後就出發經行人隨道行去 新梅田 city 既 空中展望台 睇景~~~
都係搵左陣先搵到條行人隨道 ga! 去到那個空中展望台樓下, 都仲未日落 , 我地諗住影咸蛋黃嘛 ^^" ....
0係樓下蹉跎左 d 歲月後, 就上展望台喇, 每位盛惠 700円 ~
上到去, 真係可以望曬成個梅田喎 ! 連 HEP FIVE 既摩天輪都望到, 連好遠好遠丶遠到我都唔知係邊度既果度都望到 !
個景+咸蛋黃+間唔中既飛機+個天 真係靚 ! ~~~
當然又係狂影相啦~ 嘿, 唔影唔覺, 原來我都有影相既潛質的 , 嘿!~
我地由 6點幾影到黃昏, 再影到太陽都唔見埋, 就終於走 lu~

我地落到去, 見到原來佢既地窖有得食的!
所以就去左佢個地窖 -- 滝見小路 食 dinner !
嗱~ 呢條小路先係路嘛 , 都好多食店吖, 仲佈置得幾好, 嘿~ 食之前同左個郵筒影相 !
我地揀左間叫 "滝見亭" 食, 我地叫左 咖啡意粉 同 牛肉串 , 都唔錯, 幾好味ga ~~~

食完我地見仲有d 時間, 就行左去 "梅三小路" , 諗住睇下果度 hea 唔 hea
又係要搵一輪先搵到, 呢條小路都唔 hea 喎, 都有d 岩食既野, 價錢都好適中 ..... 不過去完空中展望台, 梗係去我地果個 滝見小路 食就近 d 啦~
望完 "梅三小路" , 就搭番 mtr 番家

day 2 完 ~

7- 7- 2008 (一) Day 1
我地搭果架飛機完全同人地相反, 我地既係午機去, 早機返, 3點鐘機, JAL ~
呢日我地都各自搭到去中環MTR, 再一齊搭佢最鐘意既機鐵 !
都早左去到, 一齊去機場入面丶 專出“無良精品” 既 “恆香棧” 食 Lunch
3:00pm 起飛, 一齊衝上雲霄 !
堆雲同個景 真係靚到呢 … 好似綿花同綿花糖! 我同佢都幫堆雲影左好多相~
原來飛機都有寶石方塊 game 玩的 ! 我當然有玩左陣啦~


日本快香港一個鐘, 所以去到都晚上 7點幾了
之後就 “神奇” 既事發生了! 明明0係機入面都仲好開開心心, hehehaha 的嘛, 到關西空港站就開始出事了 ...
可能我一到步就走來走去, 而佢又有多少緊張啦,
& 我確實覺得個網站誤導我 , 搞到我以為要0係某處轉車 , 我強烈不滿果個網呀 , 唔駛轉既個網專登 show 果個車站名出來把鬼咩! … 搞到我點左我地0係月台乾等 , 佢既面色不大好之餘, 我都唔好意思 ….
我討厭泉佐野 !!!~~~ 就係以為要轉車果個站 ! 一百個好討厭!
不過我都知道今次無論我有咩理由都好, 我確實點錯左, 唉 , 仲諗住幫輕下 tim‧‧‧
p.s.: 佢那句 “我都係靠番我自己算…” 我好傷心噢...


坐左好漫長+無聲既 南海電鐵+地下鐵, 輾轉到左日本橋站之後, 再拖住個喼行行行, 途中見到道頓堀果條街, 真係有隻大大大蟹做招牌的, 唔知係咪果時晏晏地, 果條街暗暗+靜靜地 ^^" 仲見到我地下星期一會住既 大和屋本店 ! 再行多陣, 終於到左我地既目的地 -> 日本橋既富士屋酒店
我地既 rm no. 係 402, 間房好彩未至於係 "一打開門就係張床" 果類, 如果唔係都幾搞笑, 可能間房有厠所! 間房都唔錯既, 睇落都唔污漕, 有得煲熱水, 個電視又係薄電視 , 個出風口0係電視隔離, 係形住個出風口污漕 d 唧, 又同間房影左堆相~ 窗口望出去.... 普通樓同普通馬路, 無咩特別
p.s.: 入 lift 時, 見到佢地既地下係叫 1樓來的 , 咁神奇既


好開心既係, 我地番到酒店之後都握握手和好了
我最想豬仔開開心心噢 … 多謝豬仔 : > ~~~