點解整個十月都無打日記呢？原因好簡單，因為每日都筋疲力盡，真係身心俱疲 ... 都係 Keep 住煩、無心機、唔開心。每個禮拜都有麻煩事發生。簡單黎分可以用禮拜黎分，首先既係 ↓

Oct 7, Wed：得悉被 __ __ 安排要設計一條 OK 巨型既橫額，__ __ 重未話詳情比我知要點做，其後唔知邊日講過下話 Oct 13 係 Deadline。


Oct 9, Fri：當日頭三堂 __ __ 都見到我唔我講，總括來講全日都見到我但係都唔同我講。我都已經下晝五點十先走，一踏出學校門口個下就打黎搵我。我又唔知點解又聽左，我同佢講我話已經出左學校門口。佢就話咁點算，咁我話行返黎睇下有乜事。真係唔好行回頭路，一行就出事。__ __ 要求我留底幫佢係個 Server 到搵相用黎做橫額。佢講到自己搵左 45 分鐘都搵唔晒，皆因相庫太多相。當日約左人吃晚飯，當然都婉拒話唔留底啦。講真，呢 D 野可以一早同我講，我有時間都會做。我話唔留個陣 __ __ 個樣幾唔 Like，跟住佢就打蛇隨棍上，就同我講話個 Banner 好趕，暗示我要禮拜六返去同佢做再加搵相。我跟住都係婉拒，講真，一來一回都三個鐘，倒不如係屋企做再電郵比佢。當時我都不斷強調係「盡力」做，本身都多野做，再加上時間咁趕都唔會點做到野。__ __ 就建議我暫時放下教學工作先，做左佢既野先。心諗唔係嘛，咁都得？！佢又教我1:1 咁用 Photoshop 整，都真係黐黐地，都無人會咁樣做。我咪建議用 Illustrator做就算啦，但係佢又多多藉口話唔好。亦都係呢日留下牙齒印。


Oct 12, Mon：由於都好攰，週末週日都係用黎休息。不過我都係禮拜日趕到個 Draft 出黎，係返工個下已經將個 Draft 放係 __ __ 檯頭。跟住之後因為 D 事見到佢，佢竟然話我唔比野佢，但係明明已經放左係佢檯頭。好啦，都算，拿拿聲落去佢張檯拎返份 Draft 上去比佢睇。我都一早預左要改，咁都無乜所謂。禮拜一既堂數較少，我都盡快咁改。__ __ 比左本大陸 Source Book 我，叫我搵下有乜靚既圖就用。咁我都照佢意思做，改左。如是者到當日六點幾個刻我改左三次，最後我都親手比左份稿同 Soft-Copy 佢睇，但係佢都無講過乜野。我見係咁咪走，個日都七點走。


Oct 13, Tue：原本話左今日係 Deadline，諗住稿又交左比佢，應該乜事都完啦嘛。都係個句，__ __ 一整日見到我都唔同我講，又係諗住走個陣先打電話黎搵我。我都聽唔到電話，都無聽到佢留意。如是者就埋下導火線。


Oct 14, Wed：再一次個句，__ __ 一整日見到我都唔同我講，又係鬼鬼崇崇咁襯我唔係個位到留張紙仔寫住「放學找本人」。如是者咪搵佢，兩個人去左個課室，跟住佢就炳我點解唔聽電話又唔覆佢、又炳我無交帶、又炳我唔主動問人有無野要幫手、又炳我唔謙虛。我都講返事實比佢聽，係病左、係住得遠、係有書要教、係有課要備。佢就話呢 D 係藉口。正所謂「欲加之罪，何患無詞。」如是者，兩個人嘈左 50分鐘。再係咁迫我答「你點樣彌補？」跟住就去返佢地頭，就話 TA 好辛苦咁做左啊，你點樣彌補。總之就想迫我做返 D野，咁我咪搵相熟既印刷公司睇下印唔印得切，其實最快都要禮拜六。但係 __ __ 話唔得，要禮拜五收到，係咪黐線，係印唔切就印唔切。如是者，當晚六點幾都搵左 D 同事講返件事，佢地都教我做 D 野，去備案先。真係淚的控訴，個晚都七點幾走。


Oct 15, Thu：該做既野做左，諗住都當無件事想話睇下有乜野幫手。點知 __ __ 態度勁惡劣，咁即係無計傾啦。咁我都無理咁多，做返自己本份，其實 19 號有大型活動，要佈置，我都搵左 D 人仔幫我手去做。都有成十個人幫我，都真係算唔話得，都有一絲既感動。請左 D 人仔飲野，都搞到六點幾先走。


Oct 16, Fri：今日開始 __ __ 無主動同我講野，心諗非常好。放學後都係搵左 D 人仔幫手做，好似做極都未完。有同事見到我話你無七點都無得走，我心諗呢次都大穫架啦。不過都係盡做而矣。


Oct 17, Sat：一早八點幾九點返去同 D 人仔繼續做，請 D 人仔食 Lunch，食左一忽肉。都唔緊要啦，難得佢地義務幫手，佢地真係算係咁啦。點知，__ __ 唔欣賞反而話 D 人仔做得唔好，要重新再做過！？D 人仔當然唔順氣啦，皆因唔係佢地做得唔好，係本身件事一定會係咁。咁有風吹架嘛，吹就自然會亂 / 郁 / 歪，無計架喎。萬一激走 D 人仔個陣重慘啊，無人做。個日我都五點幾走。


Oct 19, Mon：真係黐線，睏到半夜發燒。但係都唔想請假，皆因今日有重大慶祝活動，被安排作攝影既工作，都避左人地多說話。呢日都難挨啊，人生第一次感到生日快樂既珍貴性。總括黎講其實都麻麻地，夜晚出去同渠 G 吃飯。吃個 Italian Tomato，不過都攰仔 + 病仔，得唔到最大既感受。呢年生日都算近年最麻麻地既生日。


Oct 30, Fri：如是者雙方零溝通到今日，再一次再一次個句，頭三堂見到我唔同我講，第四五空堂又見我唔講，襯我第六堂上堂又鬼鬼崇崇放張紙係我檯頭話「放學找本人」。心諗今次都麻煩，搵佢前都多番祈禱望平安，諗住佢炳我份試卷。點知唔係，係搵我做小冊子 Template，今次要 Nov 7-12 內完成整本小冊子。講真，都係趕，不過都只係 Um ... Um ... 同好，費事講咁多。不過至搞笑係話要每日都要匯報進度，家下乜事啊，咁嚴重。不過都算，開罐頭就算。難得回家可以打鋪機，真係好難得。


Oct 31, Sat：今日去 PageONE 搵 Sourcebook 做小冊子，花左 $700。切忌帶錢打工 ... 真係要不得。



到依家，也許開始有精神病。話分兩頭，其實 D 同事都算唔話得，而學生有 D 都衰，但大部份都算比面。呢方面係感恩既。



That's All.