岩岩病好又食 D 熱氣野，今晚無飯開，叫左 Pizza 食。呵，食完好口渴。。。

1. 今朝都 OK 早起身啦，0745 起左身，咁坐陣睇下動畫、Hea 下到十一點到就去睏個早既晏覺 (呵，死未，已經變到要睏兩次晏覺。。。) 。十一點睏到一點起身煮野食，都係食湯米粉。咁之後兩點零鐘就出灣仔買野，買左 50 隻 DVD-r。

咁見呢期就快母親節，咁就四圍行下睇下有乜野岩洗啦。其實一路以來都無話乜乜節會買乜野俾屋企人，大家都覺得與其買野，倒不如將 D 買野既錢折現，呢個就係我屋企。所以都係諗住買 D 平平地既野算數。本來想買 D 細細束麵粉花送過阿娘，不過行左好耐都唔覺有，最後去左 SOGO 買左盒朱古力咁就算。

呵，想做下孝順仔都唔得添。真係費事搞咁多野，過幾舊水俾佢算。

PS. 銅鑼灣有幾個商場 / 店鋪我激少去，商場方面我唔去總統商場、東角 X、銅鑼灣地帶。店鋪就專賣女仔野既 Shop (指一般女性喜好既野，唔係賣女性用品個 D) 。去親個 D 地方覺得激無安全感，特別係銅鑼灣地帶，直頭係 MK 集中地，好驚一個人去個度。今日都剩係無去到呢個商場，其餘個兩個都入過去搵過有無麵粉花賣。

2. 我真係唔明白，點解大熱天時， D 學生仲可以著件冷衫呢。女仔都話可能用黎遮住件好透既校服咁，但係男仔都著就真係絕對沈默。個件真係神奇冷衫，十零度又係著佢，廿幾三十度都係著佢，真係神奇過神奇彩衣。短袖冷衫都算，有人仲可以著長袖。。。真係。。。無言以對。

PS. 1. 不過話時話，今日著條牛仔褲都覺得勁熱，那間摩利臣山泳池隔離既中學既學生做緊體能，個度 D 女學生喪架。。。著住件冷衫做體能，真係堅過焗桑拿。。。

PS. 2. 雖然學生們仲係無視天氣咁著冷衫，但係年青人既去街裝已經換曬夏裝，男既背心短褲，女既都一樣係背心短褲。又係時候食霜淇淋了，呵呵呵。但係品質參差，要小心小心，唔係食物中毒就唔好。(男女皆適用。)

PS. 3. 係咪女校男、女性荷爾蒙唔平衡，所以有咁多湯姆男孩既誕生？！今日見到好多女校學生，發覺每一堆人之間總會有至少一個湯姆。有些湯姆真係男人中既男人，Man 到爆！偶拍埋去簡直相形見絀。。。OMG

3. 這個回程既時候，又顯出南區交通網既弊病。聽聞維園那邊的路好像阻塞了，基本上無車轉到入去三越那條路。結果排隊撘巴士既人就煩燥，D 人等左起嘛有半個鐘，幾個巴士站都大排長龍。簡單 D 講，總之去南區既巴士都唔見曬，天殺的。

4. 晏晝諗左 D 野，關於 Summer Holiday 既。如果真係無 Part Time 做既話，咁不如做過「師奶」吧。今日兩點零鐘落去銅鑼灣，真係有個衝動同阿娘講不如我幫佢買餸，反正佢都係係百佳 /惠康買，咁每日落一落街既話都叫有 D 細藝，唔會話日日係屋企頹。

諗過每日既時間表架，咁朝早八點起身，睇動畫 + Hea 陣到十一點零就睏個早既晏覺到點零鐘就食 Lunch。食完就出銅鑼灣買餸，咁大約四點零鐘可以翻到屋企坐陣又得再睏個晏既晏覺又得，咁之後食飯再睇動畫或者做下自己野。怕無運動？又可以朝早去下游水打下波咁，都幾健康。

不過諗真 D。。。呢個時間表似退左休既阿毛。。。唔係嘛。。。

5. 諗住睏架啦，不過係度用緊 VNC 幫阿妹驅鬼，唔打 Diary 住了，貼圖！



PS. 1. 做乜個個都中這個 MSN 亂 Send Virus 毒呢？係 W32.Spybot.lzi。

PS. 2. 阿妹，妳好掂啊！完全無視我既存在！妳自己係度係咁睇 Diary。。。可惜我只係 8 色咁睇，唔係就睇到下妳 D 相，呵呵呵。

That’s All. 結果今晚係好夜睏， 2527 啦。。。

---
40樣香港人做過o既無聊o野

1.玩米缸，將手插入米缸裡面o既米裡面篤下篤下。
2.在百貨公司入面篤扶手電梯旁的吊牌。
3.地下有階磚時，特登隔一格一格o黎行(不可踩界，要完全在格內)。
4.用錶面反射陽光，照o黎照去。
5.跳樓梯(愈多級愈勁)。
6.行路上高起左地方(例如高起左o既長條型石博，好似玩平衡木咁行法)。
7.鋪張紙在硬幣上面，然後用鉛筆係上面油，油返個形出o黎。
8.食完瑞士糖之後，將糖紙包番個原本四四方方果個形出o黎。
9.超級市場踩住架購物車o黎行。
10.踩水"tum"，係好特登果隻。
11.吹口水波。
12.搣牆上的乳膠漆或牆紙。
13.係平滑o既地面上面"冼"下"冼"下咁行。
14.整濕o的紙巾，掟上學校廁所天花頂。
15.食完綠箭香口膠，一定摺返成張包裝紙，再放返入個大套入面。
16.響課室玩俄羅斯輪盤，將玩粉刷霑滿粉筆粉，放係風扇上面，等個風扇轉轉下，轉得怏個時飛出o黎，睇下個粉刷中邊個。
17.放膠袋(當風爭甘放)。
18.去後梯執鹹書睇，張睇完的鹹書撕開飄落街。
19.貼張龜仔紙嚮o的同學鮋背背脊果度。
20.踩人地個影。
21.狂踩人地對白飯魚，尤其是大肥仔果o的。
22.用幾條橡筋射纒o的同學。
23.掉人地門口的拖鞋落街。
24."蚊"消防喉，射水落下麵個球場，睇下射到幾遠。
25.擇水彈。
26.用氣鎗射街上的途人。
27.玩千揪，"fing"到咁上下就飛出去鬥遠。
28.落樓梯時坐係o的扶手上面"sir"落黎。
29.在自動梯行相反方向。
30.把"誤投信件"或沒有用的宣傳單張，胡亂放入其他的住宅信箱。
31.坐地鐵時，抓緊中間的扶手，地鐵一開動博命繞住轉(自轉)。
32.在月臺上鬥快跑。
33.帶玩具返學。
34.用圖釘弄穿學校壁佈板。
35.亂按人家的門鐘，然後鬆人。
36.明知過了三歲，仍然不買票，"捐"地鐵的入/出閘機。
37.用改錯水(很舊的有一個掃那種)附送的天拿水，搽在手上。
38.在井字型公屋中間的大天井中放紙飛機，或者放紙青蜒，看看誰放的紙青蜒最慢由廿幾樓落到地面。
39.煲蠟。
40.把汽水罐靜雞雞放在校車的車輪下攝住，開車時把它壓扁。

VICTOR ::

講下有邊幾樣無做過啦。11、18、23、24、28、30、34、35、37、38、39、40。原來都幾多樣無做過喎，哈哈。我唔係正宗無聊香港人，嘰嘰。基本上無做個 D 一係就能力問題 (eg. 吹口水波個 D 我到依家都唔識) 、一係就環境問題做唔到。