今年學校 Form 5 有個 7A1B，應該都拔硬。9 個人修 Arts，咁有 4 A + 4 B + 1 C，成績好好。之但係個修 Arts 魔咒還在，讀 Arts 既學生考 CE 都唔太理想，得 3 個升翻原校。老師地位提高了，而 Arts 呢科都開始受高層著重了。

咁就講開 D 陳年舊事。話說我 Form 1 - 3 個陣無 Arts 堂，有 Art Society 都係發生一兩年既事。咁 Form 1 由 S 班踼左去 2H，咁就遇上老師。咁個陣班房有 D 壁佈，咁就有一期壁佈輪到我同另外幾位同學一齊做。咁我最記得就係「巨大 Easter Egg + Pokemon」！仲派過 2 份好簡單既問卷問同學既意見，依家 D 問卷仲 Keep 住。個陣用 Printer Print 個 D 公仔出黎帶來非常之大既反應，最起碼係無人試過。

如是者，就係個塊 Board 幫我擠身入學校做 Arts 既行列。咁到 Form 3 - 4 個陣同當時既多位同班同學入左 Art Society，咁有幸得到賞識做到 Chairman。如是者 Form 3 既時候開始有好多機會發展，起初都係釘下 Board 咁，都唔會話太多 Solo。

到 Form 4 既時候開始「發光」，突如其來有好多機會俾我發展。咁經老師介紹之下，輔導組有人搵我做 Board 出 Leaflet 咁，個陣學校既 Leaflet 係絕對唔會印彩色的，咁我有幸係打破呢個「傳統」既人。

之後學校唔知幾多週年要做 Cultural Night，咁有個話劇，唔知好彩定唔好彩 Art Society 有份參與。做下佈景、舞蹈員既打扮、電腦動畫。咁真係遇上一個好好既學習機會，感受到老師之間對高層既不滿、老師與老師之間既不滿。儘管出晒所有幹事等都係得 8 個人，完全唔夠人手。而且好多野都由我策劃 (又唔可以講到好重要既) ，咁都做到眼凸凸。咁仲要將部份初中既美術堂用黎幫手做。

咁托賴好順利咁完成個 Drama，亦因為咁就同當時 Drama 既導演、Form 4-5 既英文老師熟絡左。最記得當時係做 Drama 做到病，係無時間睏。到演出個日特登請半朝病假睏翻陣，再到下晝先翻學。辛苦就梗架喇，對高層都好不滿，外行人評內行人，意見多多，Budget 有限，時間更有限。高層成日飛紙仔，今朝講完下晝又話改左，真係 __ 晒咀。

亦是 Form 4 那年，經老師們大力推舉，有幸得到兩個 Scholarships。到 Form 5 個陣就少做左好多野，都係偶爾有 D 細 Board 要做。個陣有人話過我做 Board 貴，原因係 Print 野要錢，去埋 D 貴價地方買料等，有人話我「屈機」！？

咁到 Form 6 個陣再做翻 Chairman，咁就再次「發光」。不過個人覺得唔及 Form 4 個次咁「光」，但係就遇上另外兩位賞識我既老師 (當然，Form 4-5 個位班主任都賞識既。) ，兩位都係睇到我替 Art Society 整既 Poster 再問翻美術老師先識我。印象中至搞笑好似有句就係「阿 VICTOR 做架，係你個班既學生黎。」Form 6 都係做下 Board 咁，那些「班際」大多漏入我地班中。

個陣有少少名氣啦，Form 6 個陣有次 Speech Day 就 CLC 有塊係學校當眼地方既 Board。咁就輪到我地班某一組同學做，咁 CLC 老師竟然主動搵我話可唔可以幫手做一做個塊 Board。噫，突然間覺得好大面呢！到 Form 7 個陣已經站在非常穩陣的招牌上 (好似誇左 D 咁) 。

咪以為 Form 7 停手唔做 Board，反而做左 2 大塊班房大 Board。理論上就輪黎做既，不過成班都無乜所謂，咁我搵左六、七位同學做。效果不錯，又有獎。另一件大事又發生係我身上，話說會有上台拎獎既環節，但係咁岩 Assembly 個日我要去影身份證，咁之前個日班主任打黎問我「可唔可以趕到翻學校拎個獎」。咁就當然趕唔到啦，不過覺得老師真係好有心的說！最後就由肥仔代攞，呢件事都俾佢講左一排。

如是者到第二期既 Board，咁岩遇上 5 年一度既 Open Day，各位同學都忙到嘔茄。各有各忙，我都有我忙既環節，咁諗住趕好塊 Board 見人。最記得既就係個日大家扭計唔上 UE 堂做自己野！咁有 D 同學好快做完自己野就得閒起來，佢地就主動問有乜野幫手。開頭就得幾位，但係到後期差唔多成班都一齊幫手做，個個 Moment 真係好正，依家諗翻都覺得好感動，就連班主任都幫手做埋一份，哈哈。真係非常感恩，個個 Moment 絕對係我中學七年以來最深刻既一刻！我諗呢一世都無第二次。

美中不足既係到「派獎」既一刻我地個塊 Board 竟然三甲一入。。。失望就肯定有，唔單止係我，大部份同學都覺得好可惜 (我估) ，就連幾位老師都問翻那美術老師為何三甲不入，最後都係無一個答案。

Form 7 還未完，個陣 CLC 有個 Project，咁雖然波折重重，但總算成功。包裝方面，我係有下個心思的，那些 Foam Board 做封面 / 封底令大家誤信係硬皮包裝。不過有一樣野俾老師講到依家都仲講既就係我無留到釘裝個條邊，咁每頁都有兩個位 D 字無左。。。

到 Last Day 個排，就同其他同學聯手整左每人一小本既 Profile 送俾老師。說實在，我覺得係幾靚的。這個中學生活既公開作品就到此為止。

咁考完 AL 之後，美術老師問我有無興趣幫學校 Cultural Night 做 Poster，咁我個陣無乜野做，咁就幫手做一做。那時從影相、排版都一腳踢，又學到好多野。至堅啄就係拎埋張 Poster 係校長面前 Sell 下！雖然無開口讚，但係聽翻老師講話原來無意見就已經好滿意了！靚姐姐行過都話靚！！真係非常好！依家我都 Keep 左張 Poster 同場刊呢。

到入左 Poly HD 個年，心諗無乜機會發展啦。但因為一些私事找了那位 CLC 老師，機緣巧合之下就替學校團契出 Booklet。咁得到各路朋友既協助，都算做得幾滿意，自己都可以試 D 新野。

後記：

咁入左 City CM，擔心就總有，我真係怕唔夠人「練」。無可否認，我技術層面係比之前進步了不少，但係反而覺得無咁「Creative」。作品的風格好似還得單一，唔夠多元化，唔作出突破就好難再發展落去。

依家反觀一切一切都好奇妙，當初唔係由叻個班踢左去差 D 個班就唔會遇上美術老師，自己亦唔會得到咁多機會。如果 Form 6 死充大頭鬼揀 Science 班的話又唔會遇到兩位那麼賞識我的老師。如果唔係第一次 Jupas 結果派入 HD，我唔會找老師，亦唔會翻教會，更加唔會遇到那些機會。

這一切一切不到我不說奇妙呢！最奇妙的是我有非常支持自己的屋企人、幫助我既朋友、啟蒙我的老師。

PS. 現在 Arts 呢科終於上晒軌道，咁佢話當年我地搞得好。咁實在唔敢當，都係同學們既努力吧。