2145，一個字 → 「唉」。

1. 係囉，點解平時返學既日子會比唔係返學既日子平淡呢？真係無乜野好講吧。今日係調堂後第一次上堂，不出所料，真係好自閉下。不過都唔緊要了，悶極都仲有部電腦可以上下網既。不過呢科就係學打 WarCraft III，興趣可以話係零。依家又要搵位裝隻 Game，麻鬼煩。

唔係呢，大學生活唔應該係咁。但係又無乜辦法改變現狀，唔係話 Join 會玩 Activities 就可以解決問題。點解！！何必偏偏選中我 ...



2. 尋日講既重要事就係去搜購這套 New Super Mario Bros. 既 NDSL 筆 (扭蛋) ↓



Lunch Break 飯都唔食去左兆萬，點知間間鋪都未開。襯未上堂之前去又一城既反斗城既扭蛋機睇下，點知蛋殼都無個。放學之後去多次兆萬，都係白行一轉。去灣仔太源街搵下有無成 Set 買，又無。去 188 走轉，都係無發現。結論就係行動失敗。

點解要儲呢套蛋呢？就因為佢靚。而且呢款 NDSL 筆係比原裝筆、坊間賣既筆好用好多，Fit 晒手形！可惜被人扭得一乾二淨。我自己一支都無，但係細佬竟然有一支「金幣」！？聽聞香港仔仲有，已經托細佬幫我盡扭吧。好耐都無見過扭蛋咁好賣，呢套蛋係上週六上，三日後已經無晒貨。再一過聽聞係幾日後會再返貨，到時再踫運氣吧。

其實開頭諗住係買 1 或 2 Set，搵 Alice 叫佢揀返幾支心水筆，咁就送比佢，剩底既就自己用。可惜呢 D 邪惡計劃總是唔成功，慳返。

PS. 如果大家見到有扭蛋機有呢款的話，煩請大家代勞扭一兩個，重酬。



3. 今朝返學前睇左《不能結婚的男人》既第 9 話，好有共鳴！有劇透，不喜勿看。

話說男主角桑野信介基於性格、個人習慣問題，是一個不可能結識到伴侶既男人。但係今集桑野竟然結識到「女朋友」，咁其他女性朋友如鄰居 - michiru、醫生 - 早坂、同事 - 沢崎等人都有不同既反應。michiru 就因為咁而參加聯宜、早坂就答應老爹去相睇、沢崎就差 D 應承去另一間公司打工。佢地有這樣的反應既原因就因為連桑野竟然有「女朋友」，佢地就有一種不爽的感覺，繼而想識個伴。

咁當然桑野並不是真係有「女朋友」，只是大家有一場誤會。那些被刺激既人就問了「為甚麼會咁著緊呢」。。。大家又知唔知點解呢？

呢期成日討論這個話題的原因都與這套劇相似，但係就比較正面，並不是出於妒忌、不爽。這都是歸究於「朋友的刺激」吧。哈，劇裡面說，結婚前還是應該好好的談戀愛！



4. 碎點↓

．由於整日無食早餐午餐下午茶，下晝真係感到有點餓，更有點暈。心血來潮又想食壽司，咁就去左元氣壽司 Order 外賣，如是者晚飯就吃了壽司！元氣竟然出月餅！？

．係部腦搵返 D 相，都幾搞笑，此其一 ↓



這是一幅冗員的照片。



2320，超眼睏！That’s All.