2248，眼睏到我暈。

1. 襯仲未唔記得既時候就記一記先，小學時的事情 Part 1↓

．小學一年級上半集，真係十幾年前，個陣仲係馬鞍山住。至記得就係個陣撘校車落車個陣唔知腳軟定地下凹凸不平，結果仆損左個膝頭哥。另一件堅料就係「發老脾」，好似因為上堂無帶木顏色，張工作紙就填唔到色，結果我就唔想做住。但係個英文老師硬係要我做，之後就發老脾搵支橙黃色既木顏色亂填落張工作紙，之後當然係見家長啦。難道這就是「三歲定八十」的例子嗎？


．小學一年級下半集，搬家，我係插班生，個陣隔離位既同學唔識寫「一齊」但係我識寫，我覺得自己好叻。我教完佢寫之後，個中文老師行過話，寫「一起」咪得。我諗我當時反應應該是「哦」吧。呢個一年級都無乜特別，個陣每日返學有 $5 零用錢，唔知點解我大多拎去買汽水，冬天都一樣。

好多唔記得清楚了，返到學校又未夠鐘集隊既時候就捉下棋。個陣有 D 十合一既棋，即係一盒有十張紙造棋盤既棋，至鍾意玩係「食鬼」個款。個個年代仲有 Cheap Cheap 版「大富翁」，但係學校就禁左唔比玩 ... 還記得就係隔離 B 班有個女仔幾靚，而自己 A 班就有一個女仔幾靚，不過全部都唔熟。到先幾年，見返 B 班個女仔，點知變左肥妹，但個輪廓都還在。而 A 班的那個 ... 考 AL 時候遇上，真係 WTF，靚得好過份囉！


．小學二年級，呢年最無記憶 ... 記得教英文兼班主任，姓梁既女人。對佢完全無好感，好討厭，佢對我有成見！除此之外，我拎左人生第一次既六十幾分，個科係聖經科。低分既原因係做漏左一頁 ... 自此之後同類事情都無發生過。亦都係呢年 ... 買了人生第一部 GameBoy。


．小學三年級，個陣興玩磁石片 on 筆盒，我當然都有玩啦，都勁勁地架。除此之外個陣興打乒乓波，係操場又打，屋企裡面都打。係打唔用波枱既乒乓波，就咁搵波板猜波。與此同時，同個教英文兼班主任 Miss Chu 夾，直至幾個月前係街見到都仲認得我。呵呵呵，我呢 D 好學生點會唔記得。還有就係個個年代我 D 畫成日貼堂！



2. 碎點 ↓

．很好，今朝天未光醒左睏唔返，結果成日都好眼睏。今日返去補課，問下問題咁。之後同三位同學去朗豪坊既 Euro Go Go 食 Lunch，真係不經不覺，我又覺得自己串左。我 D 「坦白」真係唔係人人頂得順，Good。早排就話飯局唔出現既會成為批鬥對象，但係依家出現埋都一樣被批鬥 ... 其實都幾陰公。


．決定今個禮拜五買 Wii！希望個價位唔好升太高喇，咁就真係 Merry Xmas 同 Happy New Year。約左一位自己都估唔到會約既人一齊買機，係一人買一部！Good！唔知有無機會見到 Alice 呢。


．我唔記得左 ...



2326，有緣千里的確能相聚！That’s All.