2325，聽日終於返學了 ... 真係未放夠假。

1. 「親疏有別」，絕對是上年度經典四字詞之一。不論在任何場合都能用上這四字詞而不失禮。俗語版即係「同你好熟呀？」。

雖然我周不時口沫橫飛，但只係對住朋友先會係咁。係唔熟既人面前，真係乜都唔想講。講完好無安全感，話自閉又好乜都好，總之就唔想講。唔想格硬夾咀形，一來無性格二來過唔到自己個關；又唔想照著自己既意思去講，因為人地通常都「唔岩聽」，萬一潛意識下「串」左人就無謂啦。既然係咁，點解仲要去講呢？

除左「唔熟」會令我唔想講之外，「咀形唔夾」又會令我唔想講。話不投機半句多 ... 既然都唔岩傾，又做乜要仲繼續講落去呢？攞苦來辛 ...

我真係好鍾意「分享」，乜都可以講一大論。但係遇著又唔熟、咀形又唔夾既人，真係好難有 Mood 去講。日常生活都常都係同 Friend 底玩多，極少同陌生人玩，所以完全無呢個問題。反而係 Church 發生既這類事件既機會大好多呢 ... 點解決呢？同時又點解會咁呢？明明 Feel 到有點「奇怪」，但無理由係咁架喎！



2. 晏晝肥仔打黎話約我食晚飯，都真係幾突然。問多幾句，原來係同埋另外兩位超唔熟既中學同學一齊吃。咁肥仔不斷說服我去，話成年幾無見，出黎吹下水都好。但係正正就係 Point 1 所講既「又唔熟」、「又唔岩咀形」既人，咁去食飯就真係食飯，說話都唔會半點多。所以我都唔係好想去，而且咁岩個晚我放九點半，咁就仲簡單，諗都諗洗諗了。

肥仔就話我太保護自己，又話唔會將身邊既人分得咁清楚，只會有熟同唔熟既朋友。但係我就會分熟同唔熟既同學，而朋友就一定係熟到爛。這就是價值觀不同吧。將呢件事話比 +hung 聽，佢就話寧願去坐都會去，原因是太耐無見。

除此之外，其實問題既重點係對那兩位中學同學有多少的壞印象，所以都係無謂啦。



3. 講開朋友仔，其實我一路以來都好慶幸身邊有一群無脾氣既朋友。由初中既 Honman、Ex；高中既肥仔、+hung；Poly 既 Wilson、阿海、等等。點解佢地 EQ 會咁高呢？發老脾、多不滿、黑面既都係我喎！真係好神奇。

話分兩頭，究竟係「因為靚先鍾意」，還是「因為鍾意先覺得靚」呢？



4. 今日終於開了 The Legend of Zelda : Twilight Princess 黎玩 ↓



仲要特登 Set 做 16:9 黎玩，而呢個就係 Zelda, the Twilight Princess ↓



故事既主角係叫 Link，Zelda 只係故事裡既公主，大家要記住了。雖然仲係用 AV 線配上舊款 LCD Mon，但係隻 Game 既畫面都已經好靚。如果用色差線駁落去高階少少既 Mon，畫面一定會仲靚！玩 Game 個陣就好似睇緊戲咁，好緊張！就因為咁緊張，令我感到有壓力 ... 真該死。



5. 碎點 ↓

．明天開學了 ... Sem 頭無乜野要準備，唯獨是要溫一溫日文，因為有多少文法唔記得左 ... 唔溫就實追唔到進度。再者，第一堂可能會好老土咁自我介紹，點都要準備下。

．有人好似我咁見到唔熟 / 無乜計傾既人就唔打招呼！哈哈，會唔會係我影響左佢呢？今日問佢如果「肥仔晚飯事宜」發生係佢身上會點，佢都係答唔會去的。



2441，好．眼．睏。That’s All.