今日先發現每個禮拜六都會照著一個無形既時間表做事，通常睏到十點幾十一點到，起身埋電腦面前 Check Post / Message，Check完之後差唔多夠鐘睇無記既《魔界小金毛》，如果無野做既話就睇埋《龍騎》。之後播新聞個段時間就翻大陸睇下有乜野撈就順手撈翻黎，搵野撈既時間通常都唔短，無記就做《體育世界》，通常都會睇下佢。睇完之後個乜野音樂潮就會熄電視聽下歌、逛下網咁。到四點鐘又會開翻電視睇《忍者龜》，四點半之後又熄翻電視。咁通常就會睇下動畫 / 打機，到七點就睇下《星期六檔案》做乜題目，岩睇就睇睇，唔岩睇繼續睇動畫 / 打機。到八點半就去睇下 Pearl既 Reality Show，如果 Pearl 有 D戲岩睇既通常睇埋落去，唔岩睇既就 Hea下 / 睇動畫。到十點半到打 Diary，打到咁上下再 Check下 Post + 逛網，臨睏先就留 D Message等人覆，第二朝先睇翻，十二點前點都會睏覺。

基本上今日都 Follow到個 Schedule，不過無得睇《魔界小金毛》。。。撈野方面都幾好，好豐富。Reality Show 今晚就首播《Branson’s Quest For the Best》，都幾好睇，Richard Branson 真係唔到你唔服，俾十個叻佢！咁今日都差唔多的說。

是日 Spot ::
1. 今日係受難日。。。朝早唔知點解一起身就咬損左個咀唇，再加兩粒飛滋。。。之後晏晝無食野，下晝屋企人買左 D 炸魚蛋翻黎食，咁自己食左好多，食完之後都覺得有 D 不詳既預感。。。果然！本身唔食得太肥膩 (哈，所以成日話食齋。)，一次食咁多炸魚蛋結果食到個肚唔舒服。。。夜少少就扭一扭隻腳，可能真係少運動。。。到夜晚就 D 眼一毛跌左入隻眼到，真係痛到我喊。。。到現在可能用得 Mouse 耐 + 打得字多，個手腕位有多少痛痛地。。。天殺的！

2. 講開食晏，發覺都好多時都唔記左食晏晝。點解會咁呢？我都唔知，可能有野做緊 / 唔肚餓啦。通常發現未食晏都係屋企人放工翻到屋企買左 D 麵包翻黎既時候，例牌問下食唔食 D 麵包咁，通常都會食少少，就係個一刻先醒起「啊！原來今日無食晏晝！唔怪得咁肚餓啦！」。禮拜四又係咁，今日又係咁。。。

3. 雙子座既朋友仔真係花心。細佬佢已經轉聽國語 + 粵語歌，幾個禮拜前仲係日文歌。。。今期佢聽小豬 + 張敬軒既歌。真係播得好密，尤其係個首《鬥魚 II》主題曲，係咁「飲雪水」。。。唔係話唔好既，之不過估唔到佢轉得咁快。另外佢見我個 HDD有套《鬥魚》，咁佢就開始睇。次次佢睇親我都實同佢講「我不明白，有甚麼好睇呢？都唔知點解個人一出街就俾人打。」，真係想 Delete左成套片等佢無得睇！

PS. 哼，唔想聽到國語歌 / 粵語歌呢，至愛外語歌！不過可惜改變佢唔到，唯有接受。。。

4. 今晚見無乜野做，打機 / 睇片又唔夠時間，走去睇左陣《殘酷一叮》。其實有多少用尊嚴換取金錢，俾著我就唔會去，有錢派都咁話 (之不過到我山窮水盡就唔同咁講) ，不過始終好似怪怪地咁。不過個個六歲大既男仔都幾得意下。

5. 尋晚做「奶仔」，今晚做「乖仔」，走左去幫屋人洗碗 (平時偶係絕對唔會做任何家務的，OK少爺啦。) 。見自己又無乜野做，又無話有乜戲睇，佢地又睇緊套《行運超人》。見佢地睇得咁入神費事阻佢地啦，咁就去左洗碗了。係咪好乖呢？呵呵。

話時話，煩請大家覆一覆我既留言好嗎？咪意為唔急就唔覆呢，你未覆既記得覆一覆唷，次次都食左我 D留言，都令人幾氣結，Yes / No 都講翻聲吧，謝謝。That’s All.