呢排等運到，係家中打機多，玩下《Team Fortress 2》，雖然個 Ping 好大，但係勉強都玩到下既，重殺得興起添。此外，都搵返 Wii 既舊 Game 玩，繼續《Super Mario Galaxy》，得閒就玩下《Winning Eleven Playmaker 2009》，踢下波咁。

話說友人今個禮拜放大假，日子又變得繁忙。佢成日都叫我去旅行，但係咁既時勢，邊有心情離開香港。就算澳門咁近都好，但係萬一有 Interview 都唔好啦，又或者 H1N1 咁又係煩。佢就係唔明白，講完一次又一次再一次，我都無咁好氣了。咁都諗住盡量陪下佢啦，所以今日就去睇戲，睇這個《天使與魔鬼》。但係除左睇戲前、後一小段時間再加睇戲個陣無拗撓，一頭一尾都有。點解咁呢？放假明明應該要開開心心。原先有另一個 Plan 既，但係有 D 阻礙所以要變，一開頭佢又係度怨話無活動又乜，見佢咁都去睇戲啦。一開頭我有 D 野要做，諗住係香港仔等，打比佢話到左。點知佢連車都未撘，真係無名火起。咁又無計啦，唯有直接銅鑼灣等。面對住咁既情形，我真係笑唔出，明知唔得就唔話晏少少啦，次次都係咁。

氣紛好轉過一排，咁係去太古城中心間 UA 睇，買完飛之後去 FoodCourt 食，今次食 PepperLunch，無食好耐再食，係幾 Good既。咁見有 D 時間，咁就去睇下數碼相機。見佢個部都舊，再加上之前睇 Concert 時都覺得部機唔係好夠用，提議過佢買過部，但個陣佢又話唔好又話重用得。點知今日失驚無神又話想買，真令人費解。如是者就埋下嘈交既伏線，原先睇定左 Nikon 某個 Model，但沿途行既期間又見到 Sony、Panasonic D 機都好似好唔錯。正所謂有得揀就煩，果然出事。期間去七仔買野飲，佢買完之後先醒起有張 UA $10 Coupon。又黎了，次次都係買完之後先醒起有 D 野唔抵啊、未諗清楚咁。次次都係咁我次次都好嬲，皆因次次佢都好似怪責我。個 D Coupon / Discount 咪一樣要用錢買，洗唔洗為左 D 咁既野嘈啊？講返相機，我就覺得其實部部差唔多，用開 Nikon 幾好，其實都唔洗點諗。不過友人話最好拎上手摸下先決定，氣紛都麻麻地，我都知佢要諗好耐，都叫佢返屋企諗清楚先買，但係佢又話打鐵襯熱。

好啦，好在夠鐘睇戲唔洗嘈。套戲本身好 Straight Forward，D 解迷解得好 Hea，好似一解完迷就睇住 D 人質送死。雖然故事尾段有 D 出乎所料，不過其實唔合情理。個殺手又話留有餘地唔殺男女主角，但又出奇地殺死阻住佢辦事既警察。此外，個總管係咁叫人走，但其實 D 人走晒，佢點做英雄呢？又係講唔通的。不過劇情簡單唔洗諗，都有佢好處既。

睇完戲都無乜野，剩係友人發覺跌左條手鍊，又無左幾百銀。咁落返銅鑼灣 Time Square 買相機，咁就去左間叫做識人既連鎖店。不過去到都無即刻搵熟人，皆因知道友人有排揀，咁埋 Counter 搵 D 機拎上手摸下，但係友人拎住兩部機，但係對眼係望係第二度，奇。咁都無乜特別，都見 D 野送得好齊就諗住算啦。咁岩識得個人就係隔離幫緊個客試機，都打左個招呼。好啦，搞掂晒咁走啦，但係友人講左句，又話識人既，唔係有得再平 D 咩，我係豐 __ 買有分儲啊。原先我見個價都差唔多同埋「送」個 D 野都齊，咪算數。估唔到又係買完先黎怨，又黎啦又黎啦，次次都係咁。點解唔可以早 D 講呢，早 D 講我咪早 D 問。唉，心淡。不過都好過當時為左 20 yen 而嘈既，之但係都唔好得幾多。如是者就不歡而散。



That's All.