呢排都無乜特別，都係坐下等消息。話咁快就黎到 17 號，原先都諗唔到有乜特別，一講之下先記得今晚要睇林峯首場個唱。咁都無乜特別既，咪照去。咁睇之前就去左都會商場內逛下，搵下有乜野好食。行左個圈，最後都係去返「小魚滋味」吃。不過一坐低就發覺有 D 唔自在，可能係坐位問題，太迫，由兩張檯拼埋既四人檯分拆出來。隔離又聽到我講乜，我又聽到隔離講乜，Not Good。一望個 Menu，發覺 D 套餐唔係好岩食，再揭另一本 Menu，都唔係好岩食。最後係單叫，叫左「上海排骨拉麵」同「金菇牛肉拉麵」。先來的是「上海排骨拉麵」，但係一望之下，覺得似豬扒多過似排骨。後來的就只有金菇和牛肉雜炒，心諗乜唔係應該卷埋的嗎？但係再看一看張單，真係寫住「金菇牛肉」而唔係「金菇牛肉卷」喎！雖然係咁，但係兩碟餸都幾好味，真係估佢唔到，不過 D魚湯有少少腥腥地。話分兩頭，佢的確係抵食，算平。

食完之後就行去紅館，友人開始興奮起來，開始失控，好彩還算抑壓下來，順利進入館內。不過位置就一般啦，兩大條電纜 / 水喉係正視線中間。未開場既時候，少不免要吹脹打氣棒，誰不知道，友人又不慎跌左支吹氣管 ... 唔緊要，拆過另一包比佢。佢吹到好似好脹，實情係唔夠，Fing 多幾下到演唱會中場就已經開始漏氣，完場起碼無 1/4。個演唱會都 OK 既，我對林峯無乜愛，都無抱住期望去睇，當然無失望。林峯邀請的嘉賓都幾好，懂得搞氣紛。由於完 Concert 後有簽名會，所以無 Encore 了，其實有一首飲歌佢無唱到，無得伸盡手臂。不過友人就搞笑啦，明知睇 Concert 就叉好相機舊電啦，影到中途無電，係自己攞黎，係抵。重諗住用手機影，咁當然唔得啦。

完場後都係度搵 Souvenir，結果得 D 頹海報同新碟，只要在場買野就有籌乙個，可以拎簽名。佢又想買個 D 外圍影相佬個 D 相，但係勸幾句之後佢都無買了。友人咁愛林峯，少不免會打探下。儘管我係人地男朋友，但係見到要排唔之幾耐先拎到個簽名，都無乜心機陪佢，咁又唔想阻止佢拎簽名，所以就分道揚鑣，各自離開。咁一切都好地地，但係友人打探完無得拎出面買既碟黎簽之後又即刻跑住咁追上來。其實都好正常啦，點會比你簽外購既碟。聰明既會先買張 Poster，咁有個籌之後就順勢簽埋隻碟啦，幾 Perfect，可惜佢無咁做。就係追我既期間，比一級高出來的樓梯跘倒，亦即係俗語所講既「仆街」。唉，咁為乜呢？著住 D 婆仔鞋，平時又少訓練，點會咁易追得到我呢。一急就易仆街，咁真係為乜呢？遇到咁既情況，我真係唔覺得要可憐。好似好衰咁，但其實有 D 野係可以避免。



That's All.