前言：

其實早係放榜個排已經想打個 Free Talk，但係又無時間又唔記得左，襯仲未放完 Summer 就拿拿聲打翻出黎。唔係開左學再打就無乜 Feel 咁。02 年係 CE 放榜既日子、04 就係 1st AL放榜既日子，就在這個 Diary 未有之前已經發生了。今次就來個前傳吧，哈哈。

2002’s August：

放榜前個晚我記得好早睏下，大約 2300 就入房睏。有 D 都唔記得太清楚了，印象中零零舍舍個晚無打俾 GF，而佢都無搵我。咁死磨爛磨到 0400 真係不能入睡，咁出左廳打 FPS Game，個隻 Game就係《Medal of Honour : Allies Assault》！印象非常深刻！咁開頭仲好 Fit，Killed / Death Ratio 都好下。咁後期就差 D，入左個可以 Cheat 既 Server，咁就同 D Cheat 人一齊 Cheat，係度消磨時間。

更正：個晚 GF 係有打電話俾我的！她實牙實齒地說的，哈哈。

到 0600 到，都無乜同學 ICQ Online，有兩三個咁，都有傾幾句啦。咁之後大約 08xx 就離開屋企行翻學校。個次呢，係阿娘特登請假陪我翻去既。之前已經準備好如果低分既話應該點做，有幾份學校成績表 Copies、相片、所謂既「Reference Letter」，甚至連要求原校 Repeat 既信我都準備好的。

一翻到學校見到美術老師，老師當時說我精神好差，成條喪屍咁。之但係其實老師們 0800 到已經知道晒所有學生的 Result 的。

咁呢，學校制度係分開兩層派 Result 的，所有同學先去低 D 個層，咁班主任講幾句就黎料。係派左唔夠 14 分既同學既 Result 先，聽唔到名既就往上一層走。幸運地，可以往上一層進發 (好似 RPG咁。。。) 。

到左上一層之後，有樣野一定要記既，就係 +hung 大大遲到。唔知點解一黎佢就上上面個層既課室，一入課室既時候仲要講「唔好意思，遲到！」。就係佢呢個 Gag，搞到成個課室輕鬆晒！咁呢，接過 Result之後，睇一睇，都 OK 喎，甚至連有「語障」既我中文都有「D」。真係有 D 意外！

接完 Result 之後呢，仲未知學校收唔收，要出翻課室一陣。咁就呢個時候阿娘 & 老師就埋黎傾下咁啦，老師說我揀 K 班會適合 D，揀 Science 班的 S 班可能無咁著數咁。咁其實個陣都諗好左係揀 K班，話晒男女比例適中，而且肥仔、+hung 都係揀 K 班。

咁之後又入翻去課室揀科，咁個陣 GF 就打俾我問我考成咁。咁 Sweet 一番之後又出課室，咁班主任就行埋黎講幾句，好彩 Econ 都考得 OK，呵。咁等一陣之後就唔知係貼出黎，List 左學校收邊 D 咁。咁自己有份，基本上已經完成當日既事。

之後美術老師叫我完晒之後搵搵佢，咁傾下計咁。阿娘亦放下一舊石，之後就翻公司。最後我就翻屋企抖抖，但係肯定無睏晏覺的。

2002’s August 後記：

咁之後既假期就係要翻學校玩 2 日所謂既迎新？！再之後既日子就係補課。。。

其實 GF 都係丁點就夠分了，如果當初唔係未考試就決定走佬的話，俾 D 心機既話肯定同我同班啦。咁就唔會變 Ex-GF！？呵呵。不過當時人地班主任同佢訓示個番話好似唔太適合，好地地做乜鬧人！吼！！

---
2004’s July：

咁呢，今次就到左 1st AL 放榜既日子，咁呢今次都係緊張，但係可能分兩次咁 D 緊張分散 D。咁拎 Result 之前個晚睏得好好，06 到起身。阿娘問我洗唔洗陪我，咁大個仔唔洗了，況且都只係知一知考成點咁。

咁個朝約左肥仔一齊翻學校，原因係肥仔驚？！咁行啊行，行到翻學校見到 Bio 老師，肥仔問老師我地考成點。老師說「你地啊，好自為之啦。」。當時肥仔臉色一轉。。。我都差唔多咁啦，行啊行，行去 MMLC 一人一機上住網接 Result。

咁呢，整體來說成班都考得唔好？！咁學校 D 升學及就業組 & 輔導組就出動，給同學們一些意見。咁我個陣個 Result 唔係話無得揀既，只係好少好少，基本上唔係揀，係等佢揀。咁老師們俾下意見，咁樣就 Re-order 個 List。

咁呢，成堆同學仔傾下閒計咁上上網 Check Check Result 咁就走左了。之後美術老師叫我找找佢，咁佢又同我講話其實考得 OK，起碼 All Pass 咁，仲叫我放心。咁離開既時候打左個電話個阿娘，阿娘聽到話有 B 個心好似安樂 D 咁。事實上個 B 係得半隻，無乜用，佢既另一半 Math & Stat 係個 E。。。

2004’s July 後記：

咁其實當時自己排個個 Choices 係以「有得讀」作基礎，D High Dip 都放到好前下。這是老師說的「有得讀好過無得讀」。

當時自己都無話好怯既，可能有科 BA Creative Media 放頂，個次 Interview 覺得都唔太差，況且無交到 Portfolio 都有得 Interview，真係問你死未。再者都要等 August 先知攪珠結果。

---
2004’s Early August：

到放 Jupas 結果個日，我亦都係無一早 Check，阿娘有打幾次電話翻黎問我結果，咁我一樣話等佢翻黎先 Check。咁呢，阿娘個日 Lunch 特登趕翻黎同我一齊 Check XXD

咁大家一望，有我個 Number 喎！好既開始黎，點知 Click 到入去就 High Dip 黎既。。。阿娘即場無言，佢唔知用乜說話安慰我。之後就講左句話「阿仔，讀住先囉。」。

當時我對她說了這句 ↓



就是這樣，經過多番的考慮，問了好多人既意見，終於接左個 Offer，亦都抱住讀住先既心態去了。

2004’s Late August：

之後收到個 E-Mail 話個科有個 Pre-Course Workshop 要上。當時即刻諗，唔上得唔得架，結果試下上第一堂睇下點先，一去到 Poly N Core 個度，見到好多男男女女。咁呢，幾經辛苦咁開口所謂識左幾位同學既名，咁就入去上堂。

PS. 1. 那個 N Core 都唔算陌生，去過個度考 Poly Design 既 Aptitude Test。

PS. 2. 個陣都知道係同其他 Courses 既人一齊上堂，但係都估唔到有咁多女仔，仲以為 Computing 既科唔係對機就對佬添。

個期 Lecture 係個女人講，非常之悶 + 賤，專揀 D 鮮色衫既人答問題。Wilson 著紅色衫，都中過唔少次，一問個刻都 Feel 到會被揀中。咁上完第一堂 Lecture 之後，一大伙人去 Canteen 食飯，個次係第一次係 Poly 食。

PS. Lecture 係上過 2 堂咁大把，佢話唔係 Compulsory 要上就當然唔上啦，反正 D 野自己都摸到下咁。最唔想翻既原因係要答問題個下煩，另一絕頂既係個 Lecturer 遲過人上堂但係早過人落堂喎！

咁食完飯又要上個乜鬼 Tutorial，真係嘔晒血。去到上 Tutorial 間房既時候，見到個其貌不揚但心地善良既 Tutor，個陣都上得 OK 既，無話唔願意咁。

由於係細班，咁同同班同學仔有更多接觸。以下部份恕我直言。我覺得 IVE 個邊既學生有 D 大佬 Feel，有 D 怯。。。咁有 D 十足十死讀書個 D，個樣都唔同 D 的！咁又有一 D 似翻個正常學生，咁都主動同佢傾下計 - 就係 Wilson！！有 D 好有活力既，都 OK 傾到計的。又有 D 太有活力，連個口都好有活力既，成個口水佬咁。。。Sigh ... 最後就係零零舍舍有兩個女孩子，係幾養眼既。無他，成個 Tutorial 都得兩個女仔，悶悶地望下咁，偶爾都著得幾火辣辣。這就是萬綠叢中一點紅的道理，話就咁話，都唔太好這種事。

哇哈哈，就是那時開好分辨那個朋友仔是「可愛」吧。

2004’s August 後記：

如是者就完左個暑假了。個陣估唔到識朋友仔係比想像中易，不過要熟絡都要經一段長時間。開頭對個課程有 D憧憬既，曾經有努力過諗住讀好佢，但係好多事令我對佢失去興趣。不過呢年都無話浪費既，話晒都有幾位要好既朋友仔。話唔定，可能我係佢地既仔仔女女既契爺，甚至係契哥！！哈哈。

希望黎緊呢年都一樣咁易識到朋友仔，會搵到岩傾既朋友仔啦。