前言：
話說某日上完堂就去左旺角《生活文化》度買綿花，點知上到去發覺仲有好多野買，見到 $98 有個 50% 完成 DIY 熊仔 Pack，咁就買左佢，諗都無乜點諗過。。。其實我都係第一次整熊仔，之前整 D 絨布公仔就整得多。材料方面遲 D 講。就係下圖既左上角既阿 May。



---
1. Dec4 中午開工整，幅圖顯示出買翻黎裡面有既組件，基本上車好晒，留左開口入綿花，有條唔靚既裙。



2. 到左旁晚，已經入好晒綿花，期間覺得好難聯，皆因呢隻皮上既毛比較鬆散，隻手濕 D 都搞到 D 毛變質，好易散，總知就難搞啦，當日既 Comment 係我未來半年內都唔會再整熊仔！真係好麻煩，想打個結都勾住晒 D 毛。另外入綿個度發覺有 D 組件入得唔夠多，搞到好似「林賴賴」咁。除此之外，發覺買翻黎個陣個熊仔鼻有多少歪歪地，唔太掂。個晚半完成既圖



3. Dec8 中午再次整熊仔！今次聯埋 D 四肢先。本來一開始想逐隻手逐隻腳聯埋佢，點知發覺聯完之後一係唔平衡，一係就好怪，聯左隻右腳後發覺唔掂即係拆翻開。臨尾係格硬用長針一次過聯一對腳 / 手，效果比較自然 D，感覺都 OK。再睇圖



到中午三點到因為有隻大黃蜂突襲，被迫暫停一個鐘！！！

4.最後當然係聯埋個頭啦，經過聯手腳既經驗，今次聯個頭就比較熟手 D，好快就連好左。不過對眼就無拉到線。。。



5.之後手多試下著條裙，發覺真係好唔掂下，所以放棄條裙。。。可能係未打個蝴蝶結既關係，，好似男人著裙咁。



---
總結：
其實真係唔值個個價錢的，不過真係省去左剪布既時間。不過好想知有無呢 D 熊仔既紙樣，下次可以試下自己買布 (買 D 無咁毛既！) 同配件整。不過要有心情 + 時間 + 送禮對象先得。

整完成隻熊發覺街買既熊仔其實幾抵下，尤其係 D 有牌子既熊仔，真係貴得有價值的。所以男孩子想送熊仔既就不如係街買算啦，又靚又省時間。就算呢期麥記既熊仔都好似靚過我整個隻。都咪話唔陰公。。。

唔好以為咁就整完隻熊仔，其實我仲想包一包裝隻熊仔，等佢再 Cutie D，可能幫佢整個聖誕裝。不過睇下有無時間先啦。咁就聖誕可以當禮咁送出去 ~ 唔知邊個咁好彩，收到隻咁 K 形既熊仔呢。