前言 ::

今日係 Jan03, 2006，唔知半日打唔打得晒呢？估唔到自己咁有恆心打日記，邁向第二個年頭，今年和往年一樣，其實都係為俾自己睇翻。總結來說，05 年係穩步上揚的一年，開心比唔開心既多好多。 04 年回顧 → [Here]

---
事業 ::

上年就有工自己唔做，今年係想做無得做。就在 2005 年，終於投身了社會，開始要接受社會殘酷既洗禮。咁暑假係學校撈左份工做下，因為學校政策出現問題，所以特別多油水，賺了一生人第一次既人工，俾阿娘掠左一半。學就無乜野學到架喇，不過幾過癮既，D 學生勁爆笑，堂堂都吹吹水就落堂，亦都呢份 Summer Job 改變左我少少。詳情 → [Here]

之後到年尾本來話有 D Free Lance 既，但係生意不景，間公司都好似就接，咁又做唔成。咁就開始搵補習做，開頭 In 左份社區中心小組補習既，但係又唔成事。之後靠過 Co 爺介紹，有一份補習做，但係補 CE 仲要補 Math，自問數底唔係太好，唔想勉強。再者，係當事人質疑我，慨然係咁無謂了，唔做。

之後都係 Co 爺介紹，幫兩個妹妹仔補習。說實在，太唔穩定了，真係幾不滿。不過自己又懶懶閒無認真咁搵過另一份，不過 06 年唔會了，我要主動出擊！唔係個兩個妹妹仔考完 CE 先搵就真係食穀種了。再一次說實在，照現時走勢，兩位妹妹仔應該有一位可以順利原校升讀，有一位就差少少了。

不過最意外既 Job 都係係 AGS 做 Helper，有第一次就好易有第二次！詳情 → [Here]、[Here]

本來意為自己將來應該會從事「創作」，但係 05 年就令這個想法改了一些。發覺對「教書」都有強烈興趣喎，對住 D 小朋友朝氣勃勃咁都唔錯！之但係又怕教壞細路，呵，我都唔係甚麼好人來的！「教書」都係好長遠既事來吧，點都係讀完個學位係社會打滾幾年之後既事吧。請大家不要忘記，我對政府工都有一定興趣，因為想穩定！目標：入境處、海關！

---
學業 ::

AL 覆桌結果係一科升、一科不變、一科跌。。。但係 CM Interview 之前得到林老師拔刀相助，幫我個 Portfolio 招魂，唔係都無書讀，詳情 → [Here]。

咁終於入到 So Call 最想讀個科，但係入到去發覺同想像中都有頗大既差別。。。不過點都好，總算入左去，平平穩穩的話應該都可以畢業既，但求有個學位唧，仲求乜野。開頭係有 D 期望既，不過依家絕對無了。唔入呢科之前有好多 Idea、好有 Passion，但係依家就乜都無晒。。。係個人和晒定係其他野呢？！

雖然係咁，但係係 Poly HD 個年我又覺得無白費喎，讀過兩間大學，感受點都有 D 唔同。在 Poly，認識到那些是好人、那些是賤人。大學 Lecturer 都係無個好！如果佢地係掂既都唔會黎教書啦！事實上唔係大學唔想請有料又識教既人黎教，係有料又識教既人都唔會去 Poly / City / 大學教啦，搵真銀唔好。

在 Poly Sem 1，雖然係 HD，但係感到環境優美、課程輕鬆、更無考試壓力，托賴得到 3.x GPA。真係估都估唔到，Management 竟然 A左。。。可惜既係到 Sem 2 要應付 AL Exam 而忽略左 ITEC 既試，GPA 急跌到 ~2.0。

都估到 IT Workshop 會高分，但係勢估唔到高到 A+ 吧。。。另一樣估唔到既係我 Advance Networking F 左囉，點睇某君某君都差過我，點解佢地 Pass 架！仲有估唔到虧佬個科得 D+ 囉，份卷照 Notes 搬字過字，我明明識架喎，唔係唔 Present 搞到咁嘛。。。仲有仲有，E-Commerce 既 Bobby Sir 俾個 Pass 過我，原來大學係咁黑暗，明明個 Project 做得超廢。詳情 → [Here]。

唔見過好野又點知差野呢？到依家都係覺得 Poly 好過 City，這就是銅鑼灣和旺角既分別吧。不過唔好還唔好，都仲有兩年幾要讀。家下 CM Sem 1 既 GPA 都唔會好得去邊架喇，希望有 Average 啦。至死蠢係個陣無 Print 到 Exam Result 出黎，唔係依家都可能有得 Credits Transfer。

---
金錢 ::

哈，感覺上今年都花左好多錢。由 CE 講到 05 年，終於買左 Notebook，購買詳情 → [Here]、拎機詳情 → [Here]。除此之外都無乜特別野買過，係近期買左新電話，詳情 → [Here]

上年年頭想既野已經達成晒。今年仲買左 Wireless Keyboard + Mouse、Wireless Router，應該就係咁上下，都唔係買左好多野，但係好似洗左好多錢咁。。。06 年一定要拼命搵錢！！

---
音樂 ::

哈，今年最堅都係去左 Avril Lavigne 既 Concert，真係唔錯架。不過就短 D 啦，詳情 → [Here]。暇相：如果 Gackt 可以黎香港開 Concert 就好了。

Mr.Childern 繼續堅啄，Pocari Sweat 主題目「未來」真係聽出耳油！另外中島美嘉既 CD 都唔錯，Live 就麻麻地。。。佢呢期出既 album《Best》都算係值得買，都有幾多好聽既歌。推介係「Will」、「愛してる」、「Find the Way」、「雪の華」、「桜色舞うころ」。特別係「Find the Way」，怨念真係好強！

倉木麻衣，又係頗不錯，但係 Live 都係弱少少，都係 CD 好聽 D！都係 05 年先開始大量聽佢既歌，其中冷門推介有「I Sing A Song For You」、「Chance For You」，熱門既有「Honey, Feeling For Me」！不過個人覺得唔係首首都好聽呢！

Gackt，最爆就係佢啦。係 ZETA 電影版主題目《Metamorphoze》扮演 MS 機師，睇到眼都凸埋。。。佢都算出碟密個類歌手，不過密得黎都仲有好高質素。推介有「ありったけの愛で」、「Black Stone」、「届カナイ愛ト知ッテイタノニ抑エキレズニ愛シ続ケタ」、「Metamorphoze」！佢好似又就快出碟了。。。

英文歌方面，首推 James Blunt 既「You’re Beautiful」，最主要 D 歌詞寫得好入肉的說！另外 Backstreet Boys 復出都值得留意下！

---
動畫 + 電玩 ::

呢一年內睇左好少動畫，打左好少 PS2。。。動畫就睇晒《GetBackers》、《探偵學園 Q》、《GaoGaiGar Final》、《他和她的事情》、《Full Metal Panic》Series、《Gundam 0079》、《Gundam Z》。講睇得最正既應該都係《GGG Final》同《FMP》，前者熱血，後者爽快，好少動畫劇情快成咁，引人一口氣睇晒全套！！難產既有《Chobits》，我提唔起勁睇 D 咁平淡如水既動畫。。。要有多少激情先得。

PS2 Game 方面就有《三國無雙》、《Shinning Force Neo》、《機戰 GC》、《3rd Alpha》。哈，以歷年咁多隻機戰來說，《3rd Alpha》都算得上係最正個隻！真係打到熱血費騰！《Shining Force Neo》惡評如潮，但係我又打得幾 Enjoy 喎，哈哈。

算不上電玩，但都係度講埋，今年 NDS 勢如破竹。家中已經有兩部 NDS 了，一部年頭買，詳情 → [Here]。另一部年尾買，可能今年農歷年前後會買多部？不過都要慎重考慮！NDS 真係好毒。。。

---
健康 ::

哈，都算得上身體健康既。05 年終於做左 Body Check，詳情 → [Here]。結果係心跳比較急左少少，血壓高左少少，膽固醇高左少少。。。大家千其咪激我，唔係我頂唔順會猝死的！

最大穫都係聾左，仲要係 Interview 之前幾日聾，花左 $1170 醫翻隻耳，真係肉痛死。。。詳情 → [Here]

---
朋友 ::

Um …創業難，守業更難！這個嘛，一心意為轉左環境會識到更多朋友仔，點知就事與願遺。。。同依家既同學都係麻麻地，係有一兩個熟少少。其他都只係點頭階段，反觀上年好好多呢！咁+hung、肥仔呢兩個真係不用多題，還是這樣爆笑。唔知第時佢兩個結婚會唔會搵我做伴郎呢？

係 Poly 個年最大既得著就係識到 D 朋友，仲要岩傾個隻，呢 D 真係好難得。回顧當然要講幾句啦，首先一定要講既就係 Wilson。這個人真的很爆笑。。。不知為何好有「一見如故」既 Feel，見到佢就有講唔完既話題講。佢又肯花錢落「食」，真係好夾下。一齊由 Poly 轉去 City，全靠佢帶住我先唔洗盲中中。。。第時結婚生仔記住搵我做佢地契爺！

同 Wilson 既第一段既 ICQ 對話 ↓



另一個爆笑無比既人就係 Alice，有多少頂佢唔順。幸運地，有佢既外形描述 → [Here]。呢個女仔係我識咁多既女仔之中最特別，生得一臉可愛模樣卻要裝酷。佢真係酷不起，實在太可愛了。佢講電話個陣仲可愛，可能佢自己都唔發覺。。。

同 Alice 既第一段既 ICQ 對話 ↓



PS. 兩個反應都差唔多。。。係 Miranda 勁，唔係我勁，哈哈。

---
感情 ::

還是如往年一樣「白果」。哈，我唔係恨拍拖，係恨結婚。← 上年講過相同的說話！

值得開心既事係完完全全放低 Ex 了，不過還算是好朋友，都不知是好事還是壞事了。都花左好耐，成年幾先放得低，呢件都唔係一件易事來的。講到底，我很長情呢，好難放得低！哈哈。

還有另一件事就係年頭到啦，有一個女仔，她太爽了！吸引了我，之但係結果當然係「無結果」啦。不過呢類型既女仔又幾吸引男仔既，依家都仲係咁鍾意。哈，唔知 06 年遇唔遇到我既結婚對象呢！？

---
信仰 ::

一切一切都不得不說奇妙。。。一連串的事都是祂的安排，每件事一環扣一環，環環相扣。就在 Dec31 → [Here] 和小學老師討論信仰上的問題，個陣都不以為意。到 Feb02 → [Here] 林老師就再一次向我作出邀請，到 Feb27 → [Here]就第一次翻教會了。

祂以不同的器皿引領我，有林老師、Bernie、Alice。就在整 Booklet 那時開始 → [Here]，我唔整的話就可能唔會深入一點去認識。可以說是林老師提供一個認識的機會給我，途中就有 Bernie 的幫助，最後就有 Alice 的意見。

之但係唔係一路都咁有「信心」呢？當然不是吧，的確有「小信」的時候。但是這些時候之後無耐就有一些類似「強心針」的分享、句子令到「信心」翻晒黎。

---
展望 ::

其實都無乜展望，都希望係做好自己啦，這並不是一件易做的事呢！希望有更多的「信心」，努力學習。哈，希望下年都可以有 06 年回顧啦，不過近期要煩著轉 Server 的事呢。。。

05 年最喜愛既照片是 ↓



因為在 05 年喜愛上橙 + 白的組合呢！