2235，蓋棺定論。

1. 所謂「澳洲三寶」並唔係袋鼠個 D，而係比較地道既野，就係「肥婆、烏蠅、醉酒佬」。呢三寶認真一絕！

肥婆肥佬就唔洗點解釋啦，話唔定同基因有關，LOL。上網查過有 D 報導話澳洲有出口人工培養既「無菌烏蠅」，聽返網友講話澳洲 D 烏蠅好遲頓 ... 用腳踢都好易踢死佢地。不過呢一寶至煩既地方係好鍾意「褸」人，而唔係「褸」食物。係高速公路駕駛過後，總要落一落車抹走死係擋風玻璃既烏蠅 ... 聽聞老澳洲人 D 英文口音係「特別」唔同既原因係長久以來都唔可以爭大個口說話，怕 D 烏蠅飛入去，係真定假就唔知啦。最後一寶 ... 網友話好多澳洲佬早餐都飲啤酒！？OMG。



2. 晏晝真係曬到煨，唔帶把遮出街真係唔得。Lunch 同 Wilson 係 Pizza Hut 食，等左一陣就有位，不過可能坐係一枱好多人既白領附近，真係幾嘈下。之但係都無損雅興，一樣傾到計，主要都係講返之前個個好熱門既話題。個話題都同唔同人講過，起碼至少同左十個人講，次次都講唔停口。

食完 Lunch 之後返去上 CCIV，無乜特別，今堂有人 Present，打後兩堂都係 Present。其實都唔係呢一刻先覺，之前都覺，就係係 City 讀左咁耐，都未試過一次認認真真既 Present。之前個 D 「Present」 全部都係以廣東話輕談形式進行，唯一一次要用英文 Present 個次我重缺席添，都咪話唔 Hea。不過黎緊個個學期實有機會 Present，至少 FYP 個個都係認真個隻 Present 嘛。

落堂就走人，期間係東海堂買左個朱古力慕絲蛋糕，價錢比想像中平。食落都 OK 既，不過比較膩口吧。



3. 今晚終於打完《OG1》既最終於，Final Boss 真係屎到呢 ... 一 D 氣勢都無。接下來應該係開始 OG1「二周目」還是係開 OG2 黎打呢？+hung 好削。

話分兩頭，呢隻熊仔係咪影得好有氣勢呢，好有艦長正在指揮既模樣 ↓



不過個表情有點「呆滯」 ... 今日都有整熊仔，整好左隻右腳，不過腳踭位出左 D 小問題。雖然作出補救，不過作為「生父」，總係覺得有 D 唔知點咁。礙眼？又唔算既，隻熊係我整出黎，係會知邊 D 位手工差架喇。



2330，明天返早。That’s All.