嘩。。。敗家計劃第二波完了。。。我都玩完了。。。最唔開心就係貼塊保護貼失敗左。。。遲下要買個塊先得，家陣貼住用住先。。。今日咁就洗左差唔多兩千銀。。。，真係好大罪惡感。

今日食完 Lunch 兩點半出門到灣仔 298 買 Flash Drive 先，搞左一大輪，差 D 行去電腦城買，咁岩俾我搵到個心水價咁就買左，個陣三點半到，之後行去 188 買NDS，都發覺好多人買 NDS / PSP，閒日黎講真係算幾多下，搵左成個場都無 Touch Made in Wario，唔開心。咁個陣無買到 Game 住，跟住撘地鐵到深水埗黃金搵下有無 Touch Made in Wario，又係白行，不過買左個鑽鑽袋。見未買 Game，就再撘地鐵到旺角先達搵下。俾我見到魚網拖阿婆既老公！不過都係無個隻 Game。本來想買隻 Feel the Magic 玩住先，不過見貴 $10 咁就唔係個度買，順度翻去銅鑼灣糖街個頭 + 反斗城 + SOGO (如果有既話過 $400 都買！) 。結果無收穫，最後由 SOGO 行翻去 188 買個隻 Feel the Magic。。。唉。。。如果跟機買可以平多廿蚊架。。。唉。。。激死。個保護貼又貼得樣衰！！！又要買個塊。。。啊。。。想咬人呃！！！

PS. 1 最新消息，原來灣仔場係有 Wario 賣，不過係個間好有白店 Feel 既 X勁。。。賣 $348。。。哎唷！激死我喇，等我行左咁耐。。。真係唉。。。點解當初唔間間問，係揀黎問呢。。。呢穫都算自己抵死。。。

PS. 2 我見出 PSP 既人比較多少少，真係多 DD 喇。D 人要機唔要錢。。。見到有個初中生同阿媽係灣仔度買 PSP，睇到我呆左。。。我比較窮。。。無錢買住。。。成兩千幾近三千銀。。。

發覺雖然唔係行得好耐，不過家陣 already 癱ed。。。一個好男人要有好腰 + 好腎。似乎兩樣野我都無。。。真陰公。。。
---
呢次認真大穫了！！(唔計得罪人個 D，皆因周不時發生 A_A”) 。呢期洗左筆意外之財。。。我竟然愛上 Pinky (唔係 Pingu / Pinga，更加唔係人名！) 。睇圖 ↓



真係好鬼可愛啊！！已經開始儲緊，貴就唔算貴既，幾廿蚊個喇。當然限定版就貴好多喇。今日出開灣仔都可能睇下有無 D 未買就買翻個。買黎做乜？無他既，貪佢可愛 (敗家怨念又再次蘊讓。。。) 。越睇越可愛！！！遲下仲可能出 Cosplay 版本，有 EVA 既零 + 明日香，仲有春麗、櫻花。越諗越正！有錢實買晒，呵呵呵。

[Pinky 官網]

死野！激死我，唔聽我電話！都話架喇，都唔知乜野時間打俾你好。十一點幾應該起晒身既時間我最得閒，之但係你應該未起身。。。過多陣到我自己煮 Lunch 既時間就我唔得閒，但係呢個時間應該你起左身得閒。。。到我食完既時候你就要食 Lunch，又唔得閒。。。你食完 Lunch 就到我可能睏晏覺 / 打緊機忙緊，到六點零七鐘到係方便講電話既 Last Minute 到，遲下多人就唔方便喇，我就個個 Moment 打電話過你，你就唔聽！！！真係激到嘔血。。。到八點零就我食飯，到九點到邊十點到就你食飯，你食完飯個陣我就通常沖緊涼準備睏覺。。。結果就留 Message 過你，但係你個死野又唔覆，再次激到嘔血。。。約個人姐。。。唔係咁難嘛，都 OK 趕的。就快找狂了。。。我會咬人的說！吼！！



PS. 哈，今日開始睇埋下半段既 Get Backers，又開始 Cap 圖！呢套野真係好搞鬼下 :D
---
話說呢幾日應該播左首改自《We Are The World》既《愛》，裡面有多達八十位既歌手合唱。其實真係好難得，一來人腳方面已經無分邊間唱片公司、而且退休多年既徐小鳳都有出黎唱。再講歷來係絕少甚至無人可以用 Michael Jackson 既曲黎填詞，今次好似話係香港既 CASH 同有關唱片公司傾掂數，有香港、北京、台灣三個版本。概念真係唔錯！值得一讚！

不過講翻唱既人方面，好明顯某幾位較資歷老既歌手係唱得特別突出 (指聲線) ，反觀翻新一輩的歌手好似有多少力不從心。之前聽過原版 85 年 Michael Jackson 既《We Are The World》，發覺呢次港版比原版係少緊過高潮，原版近尾段既部份真係聽到有多少共鳴 → 毛管凍個隻。但係尋晚聽收音機既港版就唔太覺得有，好平平淡淡咁就完左首歌，真係麻麻地。遲下睇下台灣個邊的版本會否比港版好了。

最難頂既就係有 D 人係度唱「不分遠近，不分富或貧」。。。十個難頂我俾廿個！
---
消化幾好，唔錯唔錯。下晏五點幾，心情十分高漲！[機戰語] 氣力達 150 [/機戰語] ！真係講句「你老板！終於 Download 完！」Download 完既有高質少少既紅白 Part 1 (呢個等左幾日，一路都無 Seed，我一路都掛網無理佢) ，質差既紅白 Part 1-3，睇到我至鐘意既 Gackt。之不過呢，佢今期個爆炸頭 Look 我就唔係咁 Buy 了。。。睇圖↓



佢個妝都好似淡左 D，無咁妖豔了。都係上年個 Look 正 D！

除此之外仲感動左陣喇，Download 左 + 睇埋倉木麻衣 04 年中 38 場循迴演唱會，不過塊面都係肥多少，都係再上年紅白個 Look 正 D。臨尾佢 Encore 唱《通往明日的橋樑》既時候真係全場既高潮，佢都有 D 眼濕濕，再加上佢例牌既馬尾，真係殺晒！不過佢都係瘦得制，肥翻多少靚 D，不過唔係塊面！

話時話，麻衣妹個馬尾紮得有 D 似 FFX 既 Rikku，都幾可愛 (如果塊面無咁肥仲可愛！) ，又睇圖↓



其實女孩子未必一定要負離子先靚架，紮馬尾都可以好靚，Avril 呢個馬尾都紮得唔錯！睇圖↓



---
天氣真係開始暖翻，活動能力都開始上升翻，係時候出街買野，敗家計劃第二波就快到了，點解要買呢？真係為買而買，係乜黎大家都應該估到下，哈，我要上堂玩 :D。不過家陣好似有 D 罪惡感。。。學 Blue 唱翻句「I’m Guilty!」

話說尋晚都成十五、六度，不過我既禦寒裝備並無因此除落黎，結果咪睏覺個陣熱到醒左。。。諗起都低能喇，七、八度又係咁著，十七、八度都係咁著。 (話時話，家陣日間我都著翻咁多衫，係無戴頸巾同帽，覺得暖既情度岩岩好，係隻腳板都仲係覺得赤赤凍儘管著左襪。) 。夜晚睏覺著三件衫，一路睏一路熱，由十一點零睏到兩點到真係熱到流汗，就除左件長袖 T-Shirt 再睏。。。過多十零分鐘都仲係覺得熱，就除多件超級暖。再過多十零分鐘到先真係覺得溫度岩岩好，之但係已經醒左。。睏唔翻。。

晏晝睏晏覺既 Risk 就係夜晚睏唔到，果然尋晚係中左招。。。咁床頭係有成四個鐘的，一個唔準時既收音機鐘，另外三個就係指針鐘，夜晚睏唔著覺唔多唔少就係俾 D 滴答聲影響。有個指針鐘已經覺得太嘈已經拎走粒電。不過剩低個兩個都仲係幾嘈下，最後將個兩個鐘放左入櫃度，靜晒就真係睏著覺了，不過個陣已經係三點。。。今朝因為無鐘既關係，係睏到成十一點有多的。。。睇唔到頭個 Part 既《美味天王》。。。
另外有時 D 野真係唔知咁岩定咁邪，無喇喇睏覺發夢夢到有人打電話過我，咁印象中好似話過佢地聽等陣再打翻電話過佢。咁一路都無留意既，個陣係兩點鬆 D 到喇 (熱醒左個陣) ，今朝起身睇翻個 ICQ 果真個兩個人係大約兩點留底左 Message。。。巧邪啊！！！

今日係無日記的。。。原因是 → 個 Diary 消化 (率) 不良。乜野叫消化率？有留意外日本遊戲界既實知道的，即係出貨量同實際購買量既比率。咁就咁一個 Diary 點解都會有消化率呢？聰明 / 可愛 既都應該估到的。

話就話無日記，都講翻幾句：
1. 朝早個《美味天王》雖然重播左好多次 + 睇左好多次，之不過佢都可以再吸引我睇多次，呢D 就係以前無記劇集既吸引力了，家陣無記成年先有一套劇可以吸引我去睇，可能口味唔同左掛 (但係我覺得似係佢劇既質素差左。。)。雖然呢套劇係抄日劇《美味關係》，之不過都算 OK 喇 (有機會都想睇《美味關係》，咁多年都無睇過。) 。講開又講，呢套劇我係加國睇過幾集 :D
2. 無左譚玉瑛姐姐既兒童節目完全係垃圾，家陣套《放學ICU》真係唔掂！還我譚玉瑛姐姐！！
3. 講開劇，套《功夫足球》真係幾無聊下，見佢今日講到場賽事好緊張咁就睇下佢，開頭都 OO 地 K 既，不過後尾就真係頂佢唔順。。點解成隊波唔去搶人波反而企係龍門口俾人省龜呢？個個彈腳終極絕招都頗屈機喎，早 D 俾人省龜早 D 領悟到就唔洗搞成咁喇。頂！
4. 幾日無睏晏覺，見今日攰攰地就走去睏一睏，不過晏左睏晏覺。放左部手機係床頭，諗住有人搵我都唔洗出暖暖的被窩喇。之不過唔記得個鈴聲 Set 左做熱血萬分既《三一萬能俠》，真係睏著都嚇醒左，無錯！係嚇醒左！講完個電話發覺蠻精神。。。皆因個鈴聲真係好熱血。。。早知 Set 做和諧 D 既 Mr.Children 既《Sign》或者《君が好き》。Gackt既《君に逢いたくて》都唔錯！

係咁多先 ~ 明天個 Diary先再打 ~ :D

唔想再打字。。。今日打左三千幾字。。。好攰。。。大家有空的話看看樓下既《04 年回顧》吧，打左成幾粒鐘的。。。

另外因為一 D 極微小既事搞到頭赤赤。。。唔好講點解了，肯定換來「低能」的評語，淨係同零食有關。睇埋集 CSI 就睏。。。不過好似呢套 Las Vagus 無 Miami 個套咁刺激。。。頂！個頭都真係幾痛下。。。

話就話睏，不過睇埋最後兩集《探偵學園 Q》！究竟邊個係冥王星派去 DDS 既內奸呢？個動畫係無講到的。。。但係絕對唔會睇漫畫，實在太長了。。。下期可能睇《龍珠 GT》、《閃靈二人組》或者睇套輕鬆小品 D 既，好似《Comic Party》、《Happy Lesson》咁。呢次真係睏 @ 00:25。。。

PS. 都話冷帽有用架喇，唔戴咪就係會凍到頭赤赤，道理就係咁簡單 ~ :D

前言：
其實一早想係 Jan1 / 2 既時候打個年度性回顧，之不過天氣巧凍，又遇岩《機戰 GC》，再加上我懶既關係，到今日 Jan3 先走去打。哈，其實個回顧係俾翻自己睇的 A_A” ，等來年睇下有無乜野目標上年未達成 / 達成左，計劃下來年應該做 D 乜咁喇。巧！開始回顧下先！
-----
事業：
事業方面其實都好似好唔錯，都曾經有份文書既 Part Time 、一兩個補習同幾份 Free Lance 過我做架，不過全部都係自己推晒。點解推晒？自己都唔知確實既原因。。。不過諗落似係怕自己做得唔好喇，幫唔到人就算，但係害人就無謂喇。但到年尾假期個陣都 OK 後悔，真係發覺幾悶下。廿歲人係時候感受下搵錢既辛苦了，雖然家陣又唔係話特別好需要錢，亦都無乜野想買 (經濟能力許可下的東西。) ，不過賺下經驗都唔錯。哈，已經同有 D 人講過睇下有無人要補習咁。但係去補習社個 D 又好似誇得制，貼係百佳同惠康個 D 又好似急得制，都係順其自然喇，遲下要翻學就應該無咁得閒架喇。咁繼續等等先。幾時都話，咁後生出黎做野，幾時做到你六十歲，梗係遲得一日得一日喇，間中食下散餐 (Part Time) 就得。
-----
學業：
說實在，考得好差又唔係，好好更加唔會係喇，都係掹車邊既成績喇。掹車邊有幾穩陣大家可想而知喇。路面平平坦坦既咪無事，山路崎嶇既話，架車一拋成個人都唔知飛左去邊。不過總算有得讀下喇，開頭覺得呢個課程真係十萬個唔掂，唔係對電腦就對男人，簡直人生最痛苦既事 (不過之後發覺另一回事喎！都算有多少驚喜既！)。學個 D野唔係太難不過係煩。最怕 D煩同要背既野，少量既都還可以接受既，下下都要背的說真係撞個頭埋牆死鬼左去算。上半個學期完結，發覺都唔係想像中咁差既，都算 OK喇。唯一希望來年可以勤力 + 專心多少喇，等覆桌都覆得有多少回報，跳出家陣個困境喇，之不過可能到我釘蓋個日都做唔到。
-----
金錢：
家陣諗翻起零四年都無乜花過甚麼大錢，最貴都係買左部 All-in-One Printer，都係千幾銀到，比起先幾年算係洗少左好多錢。雖然大錢洗少左，之不過都無錢儲到，可能平時洗錢無乜話計住計住喇。自己最堅個次都係儲到近七千到放棄走左去買野，來年都好多野都好想買，最想就係換個部手提電話，其次想買部 iPod Mini，另外都想買部 Notebook，有時想係房玩下電腦唔想下下係廳，可以話睏就睏，唔洗行來行去。能力負擔唔起既野都係想買呢 D。自己能力負擔到既想買實在太多，多到數都數唔晒，近期想買既就係 NDS同 Mr.Children Tour Live 2004喇。不過好在自己成日都係優柔寡斷，唔係一衝動就真係洗左好多錢。。。好彩好彩
-----
音樂：
哈，唔好以為我曉玩樂器，之不過想分享下今年特別迷上邊幾位歌手、樂隊喇。一定要講既就係 Mr.Children。呢隊樂隊真係有一種令人著迷既魔力，雖然未必聽得明佢地唱乜野 (當然睇完中譯歌詞就明白) ，但係佢地既歌既 Melody令人聽得好舒服，佢地近期既 PV都好有意思的，其中《くるみ》奪得 MTV of the Year既獎項。個 PV 真係睇到有多少共鳴，都算係震憾了我個心。之前既《Hero》都好似奪得相同既獎項。最初接觸 Mr.Children既歌應該係《Youthful Days》，係日劇《西洋古董洋果子店》的主題曲。不過當時都無乜留意呢首歌，可能比較輕快吧。之後真正搵黎聽既就係《Hero》，再接下來既就係《くるみ》。呢兩首歌都覺得蠻有意思的，係一 D 好簡單既哲理，亦都係呢兩首歌牽引我進入小孩先生的世界，後來再搵到他們的一些歌，例如《君が好き》、《Sign》、《Not Found》、《抱きしめたい》等等都係一些扣人心弦既歌黎，看來我真的中了小孩先生的毒了。今年佢地細碟同大碟都分別入左全年銷量 Top10，認真不錯唷！自己都算成功地推介左 Mr.Children 俾其他朋友仔，唔算太多，六七個左右喇，佢地都算 OK 著迷的。不過點解你唔聽姐，試下嘛，真係好正的。

另外 Avril Lavigne 既歌都係上年先開始聽，講真，佢唱 Live 真係麻麻地，不過 CD 都還算可以喇，佢其實都算 OK 靚的，身材都頗不錯！哈，佢既《Don’t Tell Me》、《My Happy Ending》、《Sk8ter Boi》係必聽的！

除此之外，Gackt 都係咁堅、McFly 把聲俾我一個深刻印象，仲有好多歌手都不俗的！
-----
身體 + 健康：
好遺憾。。。高就唔知有無高到 (就算有都唔多覺，因為都仲係咁矮。) ，之不過重就真係無重過，呢一兩年都未試過長期突破 100Ibm，尋晚磅過都係得 99.5Ibm，已經係食飽飯 + 著好多衫。真係陰公，高度方面都無乜幻想話會再高，之不過真係俾我重多 20Ibm 我就心滿意足了。。。都唔知好嬲定好笑，俾我擁有一個女孩子會 OK 羨慕既九十幾磅都廿五腰。。。平時唔係唔食野架，只不過係揀飲擇食左少少姐，我食菜架，不過唔食肉，所以話想食齋既搵我。但係我係食好多甜野同飲好多汽水 + 食宵夜喇喎，點解唔會肥呢？！誠徵健康增肥良方！

健康方面都算 OK 喇，大病就好好彩無，傷風感冒呢 D 小病都少左，可能唔洗日日翻學無咁操勞，人都健康 D。
-----
朋友：
換左個新環境，都識左唔少「朋友仔」。係度講句先，唔係將 D 「朋友」分等級，只不過總會同某 D 人熟 D，某 D 無咁熟，就是這樣。學友人話，學期頭無錯係會一大伙人一齊食 Lunch (好似成班都好 Friend 咁)，不過之後都會再細分落去。都算好好彩喇，識到幾個巧岩傾既朋友仔，真係巧幸運呢，佢地又唔戒意係邊度食 Lunch，正啊！又學友人話齋，要盡量避免 Bad Debt，呵呵呵。得唔得閒都要出多 D 街玩多 D 喇，要組成飯團先得！遲下天地堂都真係唔知做乜好，死都癡到你地實一實！話時話，某程度上覺得如果細分左之後都無話同邊 D 人熟既話都幾弊下，到另一個學期個陣 D 關係通常都會再 Firm D，個陣先再同人熟既話就難 D 了。家陣係度諗，萬一熟既朋友仔下年可以脫離困境自己唔得都咪唔知點算了。。。蠻擔心！

不過有新既朋友，仲可唔可以同舊既朋友保持良好既關係呢？呢個對我黎講真係一個大課題。由細到大只要唔係同一個環境相處就通常好自然咁疏離，真係無乜話再約出黎食飯之類既野，可能大家既興趣唔同啦。。。來年希望四支公打機組合可以再繼續落去喇，得閒又打機。 (話時話，呢個假期話打機打到依家都未打過。。隻四人 Zelda 仲未爆。。。) 之不過另一邊廂再舊少少既朋友似乎少左好多話題，唔知會唔會來年就咁就散呢？希望唔會喇。
-----
愛情：
還是白果的呢。。。哈，我唔係恨拍拖，係恨結婚。死未？！哈，應該去識女仔第一句就問：「你肯唔肯同我結婚？」 ← 某位老師講的。再諗翻起都幾搞笑，佢話呢 D 野順其自然，咁我就認同佢之後再話「係啊，可能我下年就請你飲啊，做定人情都差唔多。」。佢就話「應該唔會奉子成婚個隻嘛？應該都唔會既，後生仔咁聰明應該識做既。」咁我再付和佢「好難講架，順其自然嘛，咪順面擺埋滿月酒，抵晒。」隔無幾耐佢問「你唔鍾意出街，你唔會話閒時拍拖話係屋企睇碟、打機嘛」，我俾既反應「彩。當然唔會喇，我未有咁老夫老妻！都會出街既。」。最後佢就係度奸奸地咁講「咁都好 D。」激死我，呵呵呵。

不過遺憾的是。。。有人話我係遲婚格。。。晴天霹靂。。。不過真係整定既，無得強求既，如果到三十零歲都無個伴 + 有多少錢的話，睇怕都唔會結婚了。也許我無咁長命呢。呢方面都無話有乜期望，真係隨緣啦。其實有個人可以令我花多少心思過佢就足夠了 ~

PS. 呢幾日睇 Forum 見到有人好激動話「追女仔唔可以睇荷包」，呢句其實都幾岩架，最緊要洗得開心，人家領情就夠 ~
-----
言行舉止：
哈，平時講野都仲係 OK 細聲既，無計，一講野大聲就覺得好攰，真係講到頭痛。另外最想既就係做到 100% 純潔無粗口喇。不過某 D Moment 真係唔爆句粗真係好唔岩 Feel，一爆個下完全係情緒 + 氣紛既轉淚點 + 舒發黎。不過學某位知名人士話，一個受過教育既人應該懂得用其他詞語代替個句粗口的。咁唯有盡量改改啦，最起碼係 D 唔講粗口既人面前唔講粗口喇。

另開上年講野好似無咁絕 / 毒 / 串 (應該是吧。) ，希望來年講野可以獨到 D (望就咁望喇，呵呵呵) 。之前唔覺意講錯野得罪過你既就講句「唔好意思呢。」皆因來年睇怕都好有機會再得罪大家 (呢 D 就係死性不改了。)

哈，我要塑造既形象並唔係「低能」/「傻仔」，「可愛」既形象係造俾極少量人姐。雖然好似唔太正確，不過形象應該似係「冷嘲熱諷」+「冷淡」吧。

話時話，衣著方面想試下買 D 成熟 D 既 Casual Wear，Sports Wear + Jeans 唔係唔好，之不過有閒來著 D 成熟 D 既Casual Wear 都好似有另一番感覺。講到尾，都係要錢！
-----
其他：
1. 唔講唔知，身邊原來好多教徒。真係總有一個係左右，唔通自己最終都會成為他們其中一份子。哈，只差一點呢，殘念。
2. 教徒多之外另外都好多朋友仔玩樂器，最重要係估唔到咁多人識彈琴，有D 又玩中樂又玩西樂，真係估佢唔到呢。。。
3. 唔知點解，對上一年好似迷信左定係八卦左，以前都無咁留意星座命理個類野。準呢就某 D 喇，真係無聊先會睇下。
4. 年尾到 D 開始做翻一 D 小手作，都 OK 滿足的。真係想得閒 D 既話搵下有無熊仔紙樣再自己布去整隻熊仔！看來整上癮了。。。