剩係睇 Title 都知今日以「步行」為主題，照估計，應該行左一個馬拉松。言歸正傳，今朝「再次」一早起身食酒店既 Breakfast Buffet，其實真係好唔岩食，所以尋日都無食到。今日見最後一日，再幫襯一下啦。只係食左兩個餐包、兩塊火腿、兩片甜蛋、兩杯橙汁。食完返上房拎埋 D 行李就 Check-Out 離開住左三晚既「富士屋」。落地鐵站之後，不得不提就係以下既事，大家估唔估到我想講乜野呢 ↓



唔係講個女店員，而係門口賣既透明長遮。短短係日本幾日，都唔難發現 D 大阪人好鍾意用呢種遮，話平又唔係平，剩係遮到雨又遮唔到太陽，都唔知點解咁多人會用。說時遲，那時快就到左京都唷！其實我地住既幾間酒店都好近地鐵站既，係幾方便。不過由於想快 D 到，我地係拎住 D 行李行上行落樓梯，都咪話唔堅毅。呢間就係我地係京都住四晚既「Kyoto Garden Hotel」，都幾 OK 架 ↓



好啦，放低行李又準備出發到清水寺，而我地既步行馬拉松亦正式開始。咁岩個段時間京都舉行日本三大祭典之一既「祇園祭」，咁路上都有好多人組裝緊 D 「鉾」，即係花轎。呢張就係其中一幅組裝緊既「鉾」↓



由於要組裝「鉾」既關係，個巴士站取消左，結果就行多一個巴士站先有得上車。烈日當空之下咁行，都咪話唔熱，擔遮都無用。不過一上到巴士就即刻涼爽，架巴士夠冷氣，真係好難得。係巴士上都見到其他前往清水寺既外國遊客，所以跟住人群落就實無錯。落車後，當然要影一影張地圖 ↓



話就話十分鐘，但係我覺得唔止，可能係行斜路既關係吧。條路好斜又唔係好斜既，都拉到人力車，係長命斜唧 ↓



話咁快就黎到清水寺，當日都有好多日本遊客參觀，當中重有學生！乜唔洗返學嗎？！↓



重要文化財產之一既「三重塔」↓



唔好睇小呢 D 水，有名堂，叫做「歡喜水」↓



知唔知點解有咁既名？其實好易 Feel 到，大熱天時行上黎，真係熱到暈，最歡喜就莫過於有泉凍水濕濕手啦。不過冬天既時候 ... 咁就唔歡喜了。不過當日個天少少陰，落過幾滴雨，都 OK 既。清水寺附近就係咁了，無乜高樓大廈 ↓



清水寺係依山而建既寺廟，背後當然就係一片叢林 ↓



日本既寺院大多都分為收費區域與免費區域，想睇到寺院既最值得睇既本堂，少不免要俾多少入場費既，清水寺本堂入場費為 300 yen，本堂門口就係咁既樣 ↓



當然又有水比大家洗洗手，出水口係龍形石刻，唔同既寺院都有唔同既雕像。除此之外，每間寺院既入場卷都有佢地既特色，清水寺本堂既入場卷就係咁既樣 ↓



入到裡面就見到同樣出名既「地主神社」↓



出名既原因當然係個 D 例牌野啦，大家睇下呢幅相知唔知呢 ↓



應該都估到七七八八啦，個神社既保養係咪好好呢？新得有點過份 ... 洗手既位重誇張，睇下 ↓



大家都應該估到呢個係同「戀愛」有關既神社啦，最最最出名既就係呢舊石 ↓



跟據閃卡書講，只要閉上眼睛、念著意中人名字，若能由一端的石頭順利走到另一端的石頭，便會心想事成。參觀當日見到有一群韓國遊客係到玩，有一個白種女遊客係玩，佢地個個都玩得好開心。我地當然無試啦，哈哈。除左戀愛之外，還有其他家宅平安都祈求得既。輥轉又行返去清水寺個邊，入清水寺正殿睇國寶要再另行收費，無落到去睇，門面係咪好似好殘舊呢？無計，佢係國寶，點殘都唔可以話整就整 ↓



從另一個角度睇睇清水寺，唔知大家有乜野感覺呢 ↓



行到攰就係呢個亭仔抖下，好有日本 Feel 的 ↓



日本其中一個值得拍手掌既地方就係每個商場、寺院等地方都一定會有一個地方唔細既休憩處比人休息，絕對唔係求其係路邊搵個地方放幾張櫈仔，真係有一個角落靜靜地比人抖下。唔似 Time Square 咁係 D 電梯人來人往既位置位放張檯，搏你地唔願坐。係個亭斜對面，就係有日本百大名水之首「音羽の滝」，中文譯名係「音羽瀑布」↓



係咪同大家相象既瀑布有多少出入呢？不過唔緊要，三道水代表三種唔同既功效，左手邊的是學問、中間是戀愛、右手是延壽。那三道水都可以飲用，飲左就有先前所講既保祐，但係每次只可以飲一口，還要一口飲曬。如果飲左兩道水，就二分一機會達成某道水既功效；三道就三分一。清水寺之叫做清水寺，就因為寺院水清而得名。呢堆木柱叫做「舞臺」，就係佢撐起成座寺，全部係以入樁式建造，無用過任何一口釘。不過依家有無用金屬做維修就不得而知，就算睇相都睇得唔清楚 ↓



離開清水寺，到了附近既茶寮「六花亭」吃個 Quick Lunch，環境就係咁 ↓



先來個草苺牛奶刨冰，再來個冷麵 ↓





吃完抖左陣，主要係比對腳抖之後就去附近既「清水阪」同「五條阪」行下睇下 D 店鋪。基本上係行左重複既路，Suppose 上山時就睇既，係我當時話早 D 上山睇完先落返去睇，咁睇完就要行返去半山既「產寧阪」到其他景點 ↓



咁行下行下就行到去青龍苑，當中有京都著名化妝品牌「よーじゃ」↓



係裡面買左少少手信啦，都幾特別既。之後就沿路向前行，沿途都係呢 D Style 既店鋪 ↓



係咪好日本 Feel 呢？不過其實呢 D 係後期重新建造既，原先既建築大多比一場大火燒曬。繼續行，行完產寧坂再行「二年坂」，咁就經過「ねねの道」↓



之後再到「京・洛市ねね」、「高台寺」、「石塀小路」等地方，原本高台寺有個「百鬼夜行展」，不過見要再上山到高台寺而且入場費都唔平，所以放棄左。呢個「高台寺」係同豐臣秀吉有少少關係啦，係秀吉既老婆ねね為左紀念秀吉而建造。如果有機會，都想睇下，聽聞都幾靚同幾禪。

好啦，千思迢迢終於到我地既目的地「八阪神社」↓



八阪神社係衹園祭既「主辦」，咁少不免就有不同既鉾啦，睇下 ↓



神社既舞殿，掛滿了燈籠 ↓



舞殿上，其中一個組裝中既鉾 ↓



如是者，就由神社另一邊既出口離開，呢個出口同之前個個真係有天壤之別 ↓



一出門口，望見馬路有一群人企定定唔知做乜，跟住八卦四圍望下，竟然見到 ↓



YO！有衹園祭既巡遊！真係 Plan 都 Plan 唔到咁既行程，來個 Close-Up ↓



係有三個小朋友坐係馬上面巡遊，類似長洲既飄色巡遊。個日 ← 其實係個排天氣都好熱，唔好話小朋友，大人都好易中暑。咁大家見唔見到係馬旁既女士呢？當日見到佢間中就幫個小朋友撥下涼、印汗，如果唔係我保證個小朋友實暈 ↓



由於個日係閒日，所以都唔算太多人。之不過我地係由巡遊既尾段跑去前段先影到 D 相 ↓



好啦，影完相之後，就行返去之前跑過來既路，到有名既「ちりめん細工館」買左 D 手信，全部都係布藝製品 ↓



買完之後，又再行去另一個景點，沿途經過好郵局 Feel 既郵局同埋小橋流水 ↓





好啦，行左一大段路，咁就到左「Kyouen」↓



去到既時候天未黑既，呢幅係食完飯之後影既。咁裡面就係有一 D 日本傳統庭園為主題既綜合商場，話就話商場，其實得兩層。不過入到去都幾 Relax，因為好靚同好禪 ↓





第一幅相裡面既係「枯山水」，裡面既水其實係小石、砂礫；山就以大石代表。有人說這是有助僧侶冥想而設，但諗深一層僧侶大多在室內冥想，絕少在庭園中。另一個我覺得更適合既解釋係同日本人傳統觀念有關，中國人傳統上追求的是長間上既延長，例如長命百歲；但是日本人受到佛教禪宗和神道教既影響，追求既係時間上最美好的一瞬間，例如茶道中提及的「一期一會」，意思是這一刻將來是無可取替的，雖然人物、地點可以相同，但時間已經過去。所以，他們追求的是「不變」。「枯山水」經過五年十年都一樣保持著最美的一刻，所以先會係日本庭園設計上使用。以上係上 Japanese Culture 聽返黎，有無聽錯記錯就唔知了。好，講返正題，夜晚就去左 Kyouen 裡既「山頭火」吃晚飯，無錯，係香港都有分店既「山頭火」 ↓



叉燒好好食，可能係豬種唔同，係軟滑 D ↓



係幾好食既，不過好重味精，食完好口乾 ... 之後就沿鴨川行返去酒店，但係其實一 D 都唔近，我諗有灣仔行去天后到啦。鴨川河畔 ↓



係鴨川河畔聞到一些香味，呢種香味又唔係話好特別既，之但係未預期過係咁既地方聞到。我地竟然係一條街上聞到濃烈既花香。開頭以為係路過既行人噴既香水，但係香水味無現由咁持夠。真係大鄉裡出城 ... 行返去既途中又見到一大群人係兩旁，等左陣又有衹園慶典啦。人山人海，不過都未係正日未算最多人，睇過衹園祭大巡遊個日既相，絕對係以人海黎形容，睇睇呢到既小人海 ↓





唔知大家見唔見到個鉾呢，真係好多人。今日都算幾好彩，完全係預料之外，諗都無諗過咁都睇到兩次巡遊，的確係有 D 運仔。咁經過「不二家 Cafe」，門面都幾靚 ↓



裡面有好多精美既蛋糕賣，係咪好吸引呢 ↓



蛋糕就無買，買左 D 麵包返酒店當早餐。再到 Lawson 買 D 飲品返去，不過同超級市場比，當然係貴 D 啦。雖然貴少少，但已經係我地係京都既補給基地 ↓



行到腳震終於返到酒店房，我地咁行就慳左 200 yen 既巴士同時賺左沿途既景觀，個人覺得係靚過富士屋個間，張床都大張 D ↓



Room 403 既我地就買左呢兩款包 ↓



不得不提既就係呢個熱水壺 ↓



呢個熱水壺每次只可以煲到隔離個玻璃杯兩杯水，想話煲夠水入水樽都要花一段時間。每晚返到酒店既活動除左煲水之外，就係洗衫。酒店係有 Laundry Service 既，不過洗件 T-Shirt 都要 350 yen，咁真係不如自己洗。其實係富士屋最後一晚都開始洗衫，因為唔洗又要擺咁多日一定會好臭，咁所以 D 衫褲夠著都會洗。富士屋最尾個晚開始洗，三個衣架當然唔夠用啦，黎到呢到就有四個衣架，不過一樣唔夠用。咁就唯有搵 D 特登帶黎裝衫既大垃圾膠袋鋪起 D 檯頭、行李面上，再攤曬 D 衫係上面等佢乾。做過測試，基本上 24 小時就乾得曬，唔得既就用 America's Next Top Model 當中 Tyra 教既方法，就係用風筒吹乾佢。如是者係京都既四晚都係咁了 ...

如是者，Day 4 既行程都完結了，That's All.

基本上今日既行程編排同昨日大同小異，朝早都係去睇動物、晏晝就去鄰近既美食街 Lunch、下午去 Mall、夜晚再去有名既美食街吃晚飯。昨日睇完陸上既生物，今日就睇海洋既生物！不過出發之前計一計數，突然間好似唔夠盤川洗，點解會咁！？明明計過應該夠洗喎，種種疑問之下，決定唔洗得咁豪。

一黎就買左「Osaka 海遊きっぶ」，咁就有海遊館入場卷同埋一日地鐵 Pass，盛惠 2400 yen 一 Set ↓



好快就到港灣區，咁相中見到既就係郵車，而後面既摩天輪亦都係港灣區既著名地標之一 ↓



轉眼就到今站既主角 - 海遊館 ↓



展館以地區黎分，其中日本展區就有呢個都幾靚既瀑布 ↓



而瀑布下就有好多柒柒既海瀨，真係好柒柒。咁岩遇正佢地開飯既時間，原來佢地用手接食物，再反轉個身浮起水上麵食，食完又再伸手拎食物 ↓



睇完柒柒海瀨，就去睇柒柒企鵝，期間重見到企鵝 BB。呢個展窗有兩種企鵝，睇下你見唔見得曬兩種，企近岸邊既企鵝其實係準備跳落水，不過都 Hold 左個姿勢好耐好耐 ↓



另一款企鵝 ↓



柒柒企鵝真係好得意，其他日本遊客都不斷「可愛い」。期間又見到條好鍾意用條脷抹魚缸邊既海豚，好搞笑。之後就去全場最大既展館，個魚缸係非一般既魚缸，而係有天窗既魚缸，睇下幾靚 ↓



咁大個魚缸當然有返咁上下大條既魚，其中一種就係鯨鯊，共兩條 ↓



除此之外，還有超大條魔鬼魚？！我都唔知係乜黎 ↓



重見到 SunFish，真係好樣衰！睇左海洋公園抄佢既水母館。最後見到長腳蟹兵團，絕對係戰鬥格 ↓



與天王寺動物園相比，呢個海遊館睇得舒服得多，有強冷之餘又有櫈坐，真係非常正。之不過 ... 同臺北既木柵動物園比，木柵動物園既入場費的確係無敵價，內裡動物既數目都好多，真係抵到爛。



如是者，咁就離開海遊館，行去隔離既天保山 Market Place。裡面有條食街，叫做「なにわ食いしんぼ横丁」↓



裡面都幾特別，不過唔太岩食，又或者係為左慳錢唔食裡面既餐廳 ... 係出面既 Food Court 既丼丼亭買左個咖哩飯食，之後入返橫丁買左個咖啡牛奶布甸、又買左杯草苺牛奶，去露天茶座 Hea ↓



真係好舒服 ... 好悠閒 ... 旅行旅到咁真係好爽，Quality of Life。之後入返去 Market Place 行陣，裡面有間寵物展示店既門口放左隻羊，D 人又可以買飼料去餵佢。重有就係個 market Place 有 D 大阪地區限定既扭蛋扭，相既右下角 ↓



之後就離開天保山 Market Place 了，見到個水渠蓋幾特別，又係大阪地區限定 ↓





離開港灣區之後，就既 なんば 既「よしもと開運健康幸福百貨店」行下買下野。門面都幾特別 ↓



不過裡面就把鬼了，絕對無旅遊書寫得咁多野睇同買 ... 所謂既百貨店只係類似商場既一個 Booth 咁 ... 係有 D 位比 D 師傳贈兩句既，不過當然吸引唔到作為遊客既我地。反而隔離既遊戲機中心都重有 D 野睇。補返幾句先，日本既遊戲機的確係層出不窮，連雪糕都有得夾，呢個係天保山 Market Place 裡既 Sega 機鋪 ↓



細心留意的話，可以見到係 100 yen 玩一次，裡面 D 雪糕都唔 Hea，有 Haagen-Dazs 的。不過點會一次就比你夾到呢 ... 都係個句，買係平過你走去夾。除左雪糕之外，其實仲有餅乾夾 ↓



大型既電玩有真實版碌波既 Bingo、曾經係香港好熱門既「戰場之絆」、而最終吸引我地去玩既唯一一部電玩，就係呢部 2006 年出既「投球王國」 ↓



玩法係有一堆波波池既波波碌出黎，咁就要執起佢黎掉向個 Screen 打左某 D Item 或者完成某 D Objective，玩到 Level 2 就失敗了。玩完先醒起，點解我地用正常方法去投球呢！？點解唔一堆咁掉出去呢？還有就是點解唔入一次銀一齊 Share 咁掉呢？！每個「點解」都顯出我地係幾咁 Out ...



玩完之後就去左今日最後一個景點，就係「道頓堀極樂商店街」，著名地標之一既巨型電子蟹同大福樣 ↓





前者係食蟹專門店，門口有燒蟹腳賣，都幾香口；後者就係以 70 80 年代日本為主題的食街，要比入場費，315 yen，遇正推廣期，女士免費入場。由於時間尚早，去左隔離既 Glica 既大型公仔影相 ↓



其實重有個細版既，寫住「おみやげ」既鋪頭就係 Glica 既專賣店，裡面既環境係點，留返 Day 12 先講 ↓



裡面既裝潢就係咁既樣，裝飾到好殘舊，都幾特別既 ↓





裡面有一個歌舞團晚晚表演既，場地就係呢到，當然個 D 撈金魚檔會移開啦 ↓



言語不通，所以都無睇了 ... 係知道有好多 Wire 咁比 D 演員飛來飛去。咁繼續係商店街內行，去左一間鋪頭食「団子」，就係咁既樣 ↓





都幾好食，煙煙韌韌幾得意。之後食過大阪章魚燒、燒內臟 ← 呢個係買錯，本來以為係另一樣野。最後就係呢間店鋪食晚飯 ↓



呢間係食鐵板燒既，叫左個鐵板炒麵食，都幾好食，可能肚餓啦，就係咁既樣 ↓



食完之後睇下 D 精品店就離開商店街了。有個大大個 Meiji 桃哈多老伯，幾得意 ↓



道頓堀條街大約就係咁既樣，留心相中間既部份，見唔見到有幾個短裙少女呢？佢地同一個中坑傾緊計，唔通佢地準備交易！？ ↓



行返去 Glica 既大型公仔影相，開曬燈又係另一種感覺 ↓



道頓堀好多野食，其中一間就係賣章魚燒好出名既「赤鬼」，都想試下，不過 ... 唉 ... ↓



還有另一間剩係賣拉麵同叉燒拉麵既「金龍拉麵」↓



之後，沿住道頓堀川行，有個地標 Donki 摩天輪 ↓



返去酒店附近既補給基地 - 超級市場，呢間超級市場係日後既日子都幫到我地，繼續留意我既日記吧。咁係超級市場買左 D 飲品返去，今次買左大大支 Aquarius，類似係寶礦力水特既飲品，約 300 yen ↓



如是者 ... 係富士屋既三晚就完結了 ...



Day 3 完結。That's All.

真正行程既第一日，亦都係唯一一朝能夠如 Schedule 既時間出發。一早就落去食 Package 包既 Breakfast Buffet，平價酒店即係平價酒店，個 Buffet 的確無乜野好食，有蛋、火腿、包呢 D 大路野，仲有「林」既薯條 ... 有橙汁、咖啡、鮮奶飲，不過 D 奶唔同香港飲開個隻味。總括來說，我都無乜點食。

入正題之前，大家見過成間屋既 Uniqlo 未呢 ↓



好啦！入正題！今朝既活動就係去天王寺動物園，門口就係咁樣既 ↓



差唔多動物園一開門就去，遊人數目唔多。人少既原因唔係因為時間早，而係 ... 大家睇下先前 D 相睇下估唔估到。來！一來就睇左幾種動物，都令我大開眼界，開眼界既原因唔係動物既品種罕有，而係竟然會係 D 咁既地方見到 D 咁既動物 ... 大家睇下 ↓



左上角既天鵝身處既地方好普通啦，無乜特別。右上角既海獅身處既 ... 唔係平時海皮公園咁見到既人造灘頭，而係普普通通一個水池，圍欄大約半個人咁高，右下角個張圖就可以見到 D 圍欄大約係點樣啦。遊人可以近距離見到 D 海獅。如果隻海獅有心，其實都唔難跳出黎。設計成咁既原因係遊人可以花 100 Yen 去買飼料餵 D 海獅。係動物園既水池附近，都唔難見到 D 企係圍欄既雀，就好似右下角個張咁。佢地又唔鬱，開頭仲以為佢地係裝飾品 ...

最奇特既就係左下隻北極熊，來個 Close-Up ↓



睇見佢就陰公，大熱天時無冷氣涼 ... 無冷氣點頂啊！探訪當日，隻北極熊唔知點解係到四圍行，望落好似好不安咁。還一下飛碌木落水池到 ... 幾兇狠！話分兩頭，動物園職員影個張北極熊相真係好搞笑 ... 接下來就係入森林睇大象 ↓



老實講，大象都幾陰公架，明明係「大象」，成日比人叫做「大笨象」，唔笨都叫到笨啦。來個馬騮仔表情速成班，睇睇 ↓



之後去睇鹿仔，睇下佢地有乜特別 ↓



隻隻都「May May 眼」，好搞笑。輾轉就睇袋鼠、駱駝、駝鳥、火雞、綿羊、山羊，名副其實既羊咩鬚 ↓



呢 D 就係假山上既羊。唔係講笑，現場見到個刻好有摩西 Feel ↓



之後睇下老虎、獵豹、禿鷹同埋熱到攤埋一邊既獅子 ↓



真係好熱 ... 同埋肉食性既動物既眼神的確係銳利好多好多，真係兇！之後睇到有冷氣嘆既樹熊、又睇左河馬。最後就睇埋爬蟲館，有隻係玻璃邊 Hea 緊既鱷魚，又係唔鬱都唔知係真定假 ↓



總括呢個景點，其實都 OK 既。雖然入場費要500 yen，但係動物都 OK 既，算係比較近距離既接觸。當日就無乜人，好似包場咁。原因係當日天氣唔好，落大雨 ... 所以就無乜人。落雨個陣都有多少掃掃地興，始終無咁方便既。話分兩頭，離開酒店個陣已經貼曬蚊怕貼，但係一入園內就發覺唔夠，有人仲比蚊咬左幾啖。我就無啊，可能我著長褲啦。結果就拎出其中一樣法寶，就係蚊怕水！行一陣又補給下，行一陣又再補給下，非常有效！



離開動物園之後就行去第二個景點 -「通天閣」↓



上面大約寫住「具活力的大阪、美麗既水之都」。本來都可以上一上塔頂睇下大阪市既，可惜落大雨，乜都睇唔到，所以就無上到去。之後到左有名既「匠匠小巷」，但係 ... 到左晏晝十二點幾，差唔多成點，都無乜鋪頭開門 ... 反而隔離既街市仲多鋪頭開門。晏晝搵食，第一餐係去左裝潢幾靚既雞泡魚專門店食，食既唔係雞泡魚，而係 ↓



都幾好味既，不過貴少少啦。好啦，吃飽飽之後就出發到 Comme Ca Store 既「Sweets Museum」行下睇下食下。點知希望越大失望越大，無想像中既「Museum」咁厲害，只係有大約七間左右既專賣甜品既 Cafe，無旅遊書講到咁堅。重整一下，就行去新梅田 City 既「空中展望台」睇日落，由下麵望上去就係咁 ↓



已經成七點先上去，但係個天都重係好光。如是者等啊等，終於等到佢日落，真係好靚 ↓





係上面搵人幫手影相、幫人影相、自己影下相、欣賞下夜景、吹下水咁就差唔多九點了。本來諗住去梅三小路食晚飯既，但係見識過搵路既煩惱、「小巷」既小、與及店鋪晏開早收，真係唔敢再行咁遠搵食。結果就係新梅田 City 地庫既「淹見小路」吃晚飯，大約就係咁既樣，有多少古時日本街道既情景 ↓



晚餐就係呢 D，當然唔係全部啦，食完仲有得再食 ↓



咖哩義大利粉，咁大個人第一次食，估唔到呢兩樣野都咁夾！身處日本，又食埋 D 日式西餐，感覺有多少似夢幻西廳，好想玩返下！最後途經放棄左既熱門食街「梅三小路」，不過食飽左 ... 之後撘返地鐵返酒店，Day 2 亦接近尾聲了，最後貼一下頭三晚住既酒店既門口 ↓



Day 2 完結。That's All.

今日就係「西遊記」出發之日，由於昨晚係街晚飯過後回家時間已不早，還有兩日行程未 Plan 好。今朝一早起身 Print 返 Plan 好曬既行程，之後唔係 Plan 埋餘下既兩日行程，而係走去打 Team Fortress 2，我都唔知點解 ...

輾轉好快就巴士 + 機鐵到機場，Check-In 過後就到了恆香棧吃個 Lunch，咁之後就好快離境了。北面離境闡口裝修緊，就到了南西離境闡口離開，就係呢個闡口 ↓



由於機位緊張，只有「晏機去早機返」既 JAL。呢架就係我地乘坐既飛機 ↓



呢個畫面真係好「衝上雲霄」Feel，好靚好靚 ... ，特登影埋機翼，咁先有 Feel ↓



原本唔係坐機翼，係去到 Check-In 既時候個 Staff 話原先訂左既機位既窗封左，咁就調左去後面。咁岩有一團「東 __ 遊」既朋友，佢地就蝕啦，一來一回無左兩日，五日四夜實質得三日三夜。

派餐時間 ... 空中服務員拎張有相既 Menu 派餐，有麻婆豆腐同燒雞飯揀，呢個係人地既燒雞飯 ↓



據報告，個燒雞飯麻麻地，反而個麻婆豆腐飯就好 OK，飲曬 JAL 獨家既袖子汁，Very Good。今次 ... 我地被誤認為日本旅客，LOL。之後好順利咁過關，亦都順順地利咁買了鐵路乘車票，全靠我一早印曬個 D 行程咋。諗都唔洗諗，指幾指就成功買到車票。每日既行程表有曬撘乜車、地圖，真係用心製作 ↓



呢個情境係咪有 D 熟口熟面呢，上年去台灣之前撘機鐵個陣都影左幅一模一樣，今次特登影多次，但係背景就變左南海鐵路 ↓



車廂大約就係咁，好多「吊環」同埋 ... 冷氣唔夠 ↓



由於第一次撘，而且行程表上既路線圖有少少唔清晰，結果由原本既「特急」轉車轉去「普通」。時間唔早，又加上有 D 攰，心情唔好就少不了既 ... 最後到搵到酒店之後，氣氛先緩和返。

呢間就係頭三晚住既「富士屋」，揀呢間酒店既原因係平，為左更平所以揀 Share-Double，其實都唔係好 Double，見到設備有 LCD TV、空氣清新機同埋三個衣架 ↓



有部空氣清新機，感覺特別 Fresh！點解會影低 D 衣架呢？一路睇曬全部 12 日行程就知點解。夜晚整頓好後就去睏了，雖然係晏機去，但係個人都好攰。可能我到左日本後過份緊張掛 ... 無他既，得我識字，係有多少壓力。

雖然有少少阻滯，但係今朝出發同夜晚搵酒店既期間都無落雨，真係算係咁啦。

Day 1 完結。That's All.

前言：
等了又等，終於算叫做 Update 左個日記。咁作為新日記既首篇文章，當然係 2008 年暑假重頭劇 → 日本關西 12 日 11 夜之旅。老實講，其實今年無諗過去旅行 ... 因為上年已經「預去」左畢業旅行。突然間有人同我講話請左大假去旅行，我都有多少錯愕。經過一連串既「積極考慮」，最後決定去旅行既。

咁反正都係請大假，與其去幾日，倒不如去十幾日，反正之後真係無乜機會可以去咁耐。旅行地點揀日本，其實都係首選黎既。台灣已經去過、東南亞又去唔到咁耐、紐西蘭又重皮，日本的確係唔錯。東京和大阪，選擇了大阪，皆因鄰近既京都、奈良有濃厚既日本傳統特色，非常適合愛好鍾意「睇」多過「買」既人士。

如是者，Jun 20 前後就買晒 Package、訂晒酒店，定於 Jul7 出發！其實係有 D 趕趕地，所以早機去晚機返既機票 Full 晒，得返午機去早機返既位 ... 而酒店方面以慳儉為主，都係 Share-Double 房多。值得一提既係最尾個晚訂了機場隔離既大阪日航酒店既 Premium 房，真係要試一試 Premium 既滋味。

到臨飛前四日，走去「百年」換錢，每人換六千。個排既日元匯率都幾高下，但諗住都唔會點跌，所以都放心去換。點知 ... 換完之後第二日跌返落黎。我換個日係 .739，之後個日係 .731，真係活該 ...

到臨飛前個日夜晚仲未 Plan 晒 D 行程，仲要漏夜執行李。到第二日飛個朝都無繼續 Plan，反而走去打左陣 Team Fortress，LOL。為左今次既外遊，屋企特別買左新既行李箱，易拎過好耐好耐之前既大行李箱，非常好。