今日既重點係「好戲在後頭」。今日既行程都係係京都個陣 Plan 的，只係準備左少少，剩係搵左點樣撘車去。不得不提既係，全個旅程剩係比蚊咬過一口，就係係酒店大堂用電腦上網搵資料個陣咬，真係百密一疏！！言歸正傳，今朝九點鐘左右就起身，一起身就食返尋晚買既 Mister Donut ↓



個暖水壼就係個紙袋後，見唔見到呢？差不多十點就撘「阪神電鉄」去神戶。出發前，影一影今次我地既「閃咭書」同埋日本鐵路個 D 車票 ↓



撘車非常順利，坐到「特急」。由於準備唔夠，所以諗住係車到睇下本閃咭書準備下。隔離位有個中年既男人係咁裝過黎望下我地睇緊乜，佢都裝左好耐好耐好耐。終於，佢同我地講野，佢先黎問我地係咪去神戶，咁同佢講左幾句。之前咪比人誤認過韓國人既，就係呢個時候。點解會咁？唔 Gur。同佢都傾左好耐好耐，真係匪夷所思。佢就提到一 D 關於神戶既野，神戶係一個好 Modern 既城市，充滿濃厚既藝術氣息。如是者就閒談左一會，幾難先等到佢落車。

話咁快就黎到神戶，「Kobe 我來了！」。咁就去左附近既觀光中心拎 Coupon 同地圖。呢個地方真係唔好 Miss，Coupon 唔算話好實用，都有 D 用既。最緊要既係觀光中心提供既地圖好過一般旅遊書既地圖。輾轉就離開車站，往山上去「北野」。

上山既路絕對唔講得笑，都幾斜幾長。本來路經這個有名既「六甲牧場のソフトクリーム」，係食牛奶軟雪糕既。六甲牧場係仿瑞士而建既牧場，奶酪製品保證日日新鮮。不過因為有人嫌 300 yen 貴，所以就無食到，唉。咁繼續上山，經過售賣平價既入場卷 Package 既檔口，「討論」完一輪之後決定買個「3 館共同卷」，咁就可以入「丹麥館」、「香之家荷蘭館」和「維也納奧地利之家」。輾轉終於行到去「北野町廣場」，見到著名地標「風見鶏の館」，風見雞即係風向儀 ↓





而我地身處既廣場係假日時會有好多街頭表演，廣場有一些以爵士樂為主題既雕像，由雕刻大師黑川晃彥操刀。好似咁 ↓



大家感唔感受到個地勢係高左上去呢？由於當日係閒日再加上正午，所以附近都無乜人。咁我地再繼續行上去，好快就來到「オーストリアの家」，即係奧地利之家，門口有個 Cafe，出名在佢提供 Sachertorte，係一種維也納最出名的糕點。用上的 Imperial Torte 係由維也納的 Hotel Imperial Vienna直接空運過來 ↓



這個館裡面就就係仿奧地利既裝飾，好似 ↓





常識題，大家估唔估到佢係邊個 ↓



昔日奧地利各地城徽 ↓



如是者就到隔離既「デンマーク館」，丹麥有乜野？當然有北歐既海盜同大力士啦，館中心放左艘木船，就係呢艘 ↓



船下面有幾頂海盜帽玩 Cosplay ↓



點解丹麥有姆明既？！乜唔係芬蘭嗎？↓



還有美人魚雕像 ↓



好啦，呢個館就咁就完啦。係咪有 D Hea 呢？我都覺 ... 如果唔係 Package 包，我諗真係唔會有人入去。咁就慢慢行返落去，好快就來到「香りの家オランダ館」，香之家荷蘭館 ↓



眼利的話可以見到個牌寫住「神戶市指定傳統的保存建造物」，咁入去都要換對拖鞋先入得。入到去好似「更上一層樓」咁參觀示範單位，叫得做「香之家」，當然有 D 同香既野喇，就係可以付費嘗試自己整香水，呢部就係個部香水調製機 ↓



大家再睇睇間屋既其他地方 ↓













屋外就有唔著得既鞋同一個巨型風車模型 ↓



裡面有位女職員能操流利既英語，係 Native Speaker 個種口音，實屬難能可見！除此之外，門口 Counter 個位女職員就操流利既國語，可惜太流利都聽唔到佢講乜，Feel 到佢係話要換鞋先可以入去個館。如是者就離開，離開往下行，期間去左「ラインの館」，就係呢間 ↓





呢個館其實無乜特別，只不過門口有部強冷既冷氣，如是者就係個度企左一陣。之後就上左二樓既展館坐，由於無人，非常寧靜舒服。咁整理過行程之後，決定 Skip 左「北野工房」呢個景點，之後落返地下買左少少神戶手信就離開。其實可以唔洗行得咁辛苦既，係有 City Loop Bus 坐，就係呢架 ↓



不過撘車就睇少 D 野既，咁所以就行另一條路返去「三宮駅」，順路搵埋野食。途經既「英國館」↓



正宗神戶渠蓋 ↓



路途期間都經過一間閃咭書有提及既法式餐廳「Bistrot Cafe de Paris 」正在裝修，咁無辦法啦。都經過一 D 食肆既，不過討論過後都係決定車站附近既食肆，一來方便去下個景點、二來肯定多 D 野食。好快就行到去車站既地下街，有好多間鋪頭都好似幾 OK，曾經諗過 Sabu-Sabu 既。不過最後都係去左呢間食 ↓



揀呢間鋪頭既原因一來 D 野岩食啦，二來呢間鋪頭有禁煙既時段，空氣清新，食得開心。個陣係兩點九，其實三點零鐘個禁煙時段就完，所以都好快就食完。叫左呢幾樣野食 ↓



有一句名句已經唔係第一次係日本食肆見到，都有好幾次，就係呢句 ↓



睇唔睇到寫乜呢？就係寫住「日日是好日」，哈。食完都三點半有多，咁就準備前往下一個景點。

係大阪梅田我地行過最大既電器城「Yodobashi」同「Comme Ca Store」；係京都就行過「高島屋」；來到神戶，我地就來到「Sogo」逛。原先無諗過行 Sogo 既，只不過時間已經唔早，成四點零鐘，去遠少少既「舊居留地」又的確遠少少。再加上天氣熱熱地，好難抗拒冷氣既誘惑。如是者就行 Sogo，呢間 Sogo 雖然都有新舊二座，但其實都好細。基本上，每間百貨店既樓層賣 D 乜都好似一樣，地下層數通常係超市，地面個層就係名牌，再上去既就係女裝男裝童裝玩具等等。日本百貨同香港百貨最大既分別會係「休憩處」，香港真係想搵張櫈仔坐下都難，日本就易得多。咁係 Sogo 買左少少手信就離開，出發到「郵便局」。

時間都趕趕地，郵局就關門。機緣巧合比我地搵到間郵局，想話買 D 郵票返去紀念下。但真係估唔到，就係呢個時候出現言語不通。突然間唔記得郵票係「切手」、又唔記得記念係「記念」；剩係記得郵票係「スタンプ (Stamp)」、記念係「メモリー (Memory)」。咁之前係京都寄 Postcard 既時候順便買多個郵票，咁無問題啦。係奈良既時候，個位女職員都明我地想買乜，就買左個奈良限定既記念郵票。係大阪既時候，個位男職員半明半唔明咁都知我地想買記念郵票，可惜就無得就咁買一 Set，一買就要買成個 Collection。但係係神戶，我地係郵局同個位年輕男 Staff 周旋左好耐，佢不斷問我地想寄去邊，佢每次講之前都要諗一諗，再用英文同我地講。但係佢未講之前都知佢想講乜，我地就不斷同佢講剩係想買個郵票，比埋之前買個 D 郵票佢睇，但係佢都唔明。最後 ... 佢搵左佢上級幫佢手，佢上級睇一睇我地手頭上既郵票，不出十秒就拎左京都既記念郵票，咁我地本來想睇下有無神戶既記念郵票既，但係搞咁耐，都係算啦，買左京都既神戶郵票。臨走前都好感謝個位年輕既 Staff，希望佢無比人照肺啦。

買過郵票之後就真係出發到景點，去「元町」，沿路上都有 D 有 D 名既東西，就例如這個「花時計」↓



行多幾步就有「三宮神社」↓



話咁快就黎到「元町」，入口有個靚靚玻璃工藝牌坊 ↓



Close-Up ↓



入口就有個咁既牌 ↓



雖然寫住禁示單車進入，但實際上都有單車飛馳既，所以都係小心睇車啦。商店街裡就係咁，係幾企理同幾靚既商店街 ↓



又係睇名鋪既時間，先來香港 Sogo 都有賣佢產品既「本砂高屋」↓



講到神戶名鋪，點少得香港人都食唔少既「神戶風月堂」，我估呢間都算係旗艦店，有埋 Cafe ↓



咁再行前少少就去到另一間當地有少少名既店鋪 -「杉養蜂園」↓



咁係賣 D 蜂蜜製品，不過興趣不大啦。反而就花左 300 yen 食左杯聲稱有蜂蜜既軟雪糕，Feel 唔到有蜂蜜，不過雲呢拿味好香。輾轉就行埋附近既「南京町」，非常華麗既「西安門」↓



裡面就係典型既中華街 ↓



其實都只係略略睇下行下，完全無食既意慾，一來天候熱，唔想食熱騰騰既小食、二來又未到食飯時間，無胃口。如是者就繼續行，好快就到另一端既「長安門」，係「友愛長安門」↓



之後就出發到「神戶港」，期間見到既大型藝術品，大家估唔估係乜野黎呢。實在太大，又搵唔到好既位影佢，都唔易估中 ↓



話咁快就去到「メリケンパーク」，即係「美利堅公園」。少不免搵 D 櫈仔坐下既，睇下人玩滑板、睇下噴水池、噴下蚊怕水、飲下水、影下相，好快就到日落。相中係地標「神戶海洋博物館」，500 yen 入場費 ↓



當中既木造船模型 ↓



另一著名地標「神戶港塔」↓



神戶既夜景一，「Mosaic」與「Mosaic Garden」↓





神戶既夜景二，「神戶海洋博物館」↓



神戶既夜景三，見唔見到遠處山頭有幾點火，其實係節日既「火文字」↓



準備離開個塔個陣大約八點幾，個塔既食肆都關門，不過見到餐牌有 D 搞笑，「Port Towner Rice」 ↓



依家睇返都覺得好老土。正所謂越夜越精彩，到呢個時間大部份食肆都關門，至少神戶港附近既食肆都關得七七八八。面對可能「無飯食」既困境，我地都好急勁咁返返去車站附近既地下街搵食，沿途人影都無隻，真係有乜事迷路都無人問到路。一路要同時間競賽，唔係就飯都無得食，好在聰明的我們好快咁搵到路行返去車站，去到地下街既時候已經八點半有多，有間岩心水食飯既餐廳已經準時咁關門。隔離就有一間連鎖式 Cafe「Excelsior Cafe」未關門，亦都係唯一一間未關門既食肆，咁重唔快快手入去買野食咩。咁就叫左個意粉吃 ↓



可能肚餓啦，係熱既野都好食，不過個意粉都算幾 OK，比我想像中好。食完就好安心咁坐下抖下，輥轉就返上去神戶站。點知呢個時候見到車站內有個小 Food Court，哈哈哈，有拉麵、有麥仔，想食乜都得。可能會問唔係一早就知有 Food Court 嗎？咁其實呢個神戶站唔係我地之前去達個站，所以我地都係第一次黎。如是者，有 D 戇居咁啦，不過再揀多次都應該會食返依家個間既。咁係車站內仲有 Supermarket 同麵包店，都逛左陣，買埋明天既早餐先返去大阪。真係點估到呢，性質類似既京都站本身都無乜商店，係隔離既地下街、百貨公司先有。呃晒！

作為神戶結束 ↓



其實神戶還有好多野睇，例如「北野工房」、「舊居留地」、「姬路城」、「寶塚」、「Mosaic」等等，預兩日半行程就比較鬆動。如果係旅行團式既密集行程都至少要日半，不過就一定少左自由行個種「悠閑」，一定無得比你坐下公園睇下海港。有利有弊啦，依家雖然好似好 Hea，但係去得舒服自在。



Day 9 完結。That's All.

好啦，一早就準備離開住左四晚既 Kyoto Garden Hotel。日頭既時候，房對出其實就係街景，就係咁既樣，幾有日本 Feel，哈 ↓



其實呢間酒店都幾 OK 仔，同上一間酒店比，我覺得呢間好 D，可能間房大 D 掛。酒店對出個條街，都有另一個「鉾」，日頭時就咁既樣 ↓



夜晚就係咁既樣 ↓



本來係諗住 7:30am 就離開既，結果係 10:00am 先走得。點解會遲咁多呢？無他既，睏晏左 D，再花多少時間食埋 D 麵包存貨。咁之後就坐「阪急京都線」返去大阪，哈，無啦啦有得玩「電車 Go！」↓



唔係講笑，唔試過都唔知「電車 Go！」原來咁真實，唔怪得之咁多人玩啦。呢個絕對係巧遇，完全無諗過會坐係車長後面個排位。車廂裡面就係咁既樣 ↓



大家睇唔睇到有乜特別呢 ↓



睇唔到？10月19日喎！好啦，差唔多十二點就抵達我地將要住宿既「大和屋本店」。唔知點解，咁多日都無影到呢間酒店既相，詳細情況留返遲 D 再講。咁就去左道頓堀搵食，見到著名大阪道頓堀名物食倒太郎「くいだおれ」結業，都幾愕然，咁難得既時刻，當然要影一影相 ↓



Lunch 就去左有名的拉麵店「金龍拉麵」吃，唔係去無冷氣既舊鋪，係去左有冷氣既新鋪，就係呢度 ↓



門口既食卷販賣機，賣既只有拉麵同叉燒拉麵兩種 ↓



間鋪頭都好日式，坐位都係「畳」，即係「他他咪」。由於好多人都好快就食完碗麵，所以都唔會除鞋放埋對腳上「畳」，快快手食完碗麵就算。咁 D 位又唔係咁岩，所以好多人都好似我咁打側身坐，其實咁坐法黎食野唔係太舒服 ↓



個陣天氣真係好熱，冷氣又只係弱冷，真係坐都坐唔直。呢兩碗分別就係拉麵同叉燒拉麵，分唔分到邊碗係邊碗呢？↓



上面係叉燒拉麵，下面係拉麵。其實拉麵都有幾片叉燒，只不過叉燒拉麵就有更多叉燒。唔好睇小呢兩碗拉麵，分別盛惠 600 yen 及 900 yen，都要幾十蚊港紙，絕對唔係平。除左碗拉麵之外，還可以任添白飯與「漬物」，即醃菜。不過 ... 兩樣野都無意慾去食。吃完之後就離開道頓堀，白天時的道頓堀 ↓



吃飽就出發到今日既首站「大阪城」，我地由大阪城公園行過去，途經既地方如下 ↓







點解咁隱秘呢？我都唔知，總之經呢條路就行得到去。如是者就由淺綠色既右下角行到去啡色與深藍之間既紅色點個個位，放大先睇得到 ↓



係烈日之下行左 15 分鐘，終於來到「大阪城天守閣」↓



轉個頭就見到空既「內濠」↓



行前多幾步，就見到天守閣 ↓



少不免要買入場卷既，呢三部就係入場卷自動販賣機，見到販賣機上印有櫻花、松樹同梅花既圖案 ↓



如果係賞花期去的話，係靚好多的，可惜我地係夏天去。再來一幅天守閣 Close-Up ↓



一入到去就見到一個 1:20 既戰爭模型，係關於「大阪夏の陣」真田幸村軍對松平忠直軍 ↓



真田幸村 Close-Up ↓



除左呢個模型之外，還有「立體螢幕」播《秀吉傳》，大約係講豐臣秀吉既一生，螢幕裡有 D 立體既模型，而影片就計岩晒位，經投影機投影出來。錯覺上會覺得影片中既人物係立體既模型中穿插，就係咁既樣 ↓



再上頂層，天守閣望出去就係咁，見到另一邊既內濠係有水的 ↓



天守閣既金器裝飾 ↓



咁天守閣內有得玩 Cosplay，可以試戴名武將頭盔，衫都好似有。不過影唔到相，無相睇，哈。再重申一次，日本呢 D 公共場所有個大優點，就係一定有休憩處比人抖下，呢到都唔例外。坐左一陣，整理下行程就準備離開天守閣，無乜手信好買，係販賣機買左枚紀念金幣，再係呢部刻字機刻字 ↓



部機係直接打 D 字上個金幣，打到轟轟聲，都幾震撼！原本係無諗過會買個 D 金幣，之但係就係比部刻字機 Fake 一下，入左錢落去部刻字機先知要另外買枚金幣。如是者，就係大阪城天守閣奪金了。之後就係公園內既小食店買軟雪糕食，提子味，盛專十幾蚊港紙。如是者，咁就離開大阪城天守閣。

由於有人睇錯字，所以就有多少意見分歧，令到白行少少路，最終修正返無事。咁下一站就到日本最長既商店街「天神橋筋商店街」，全程 2.6 公里。我地由六丁目行去一丁目 ↓



貴為日本最長既商店街，少不免都有「鉾」既 ↓



大家細心留意背後係寫住「天神祭」，這個祭與京都既「衹園祭」和東京的「神田祭」稱為「日本三大祭」。可惜 7月24號那天已經離開了日本。言歸正傳，日本既商店街其實好易認，只要係有「蓋」既街道就係商店街，好似咁 ↓



差不多所有商店都集中係商店街，人流亦較多，反而商店街以外既人流係少好多。一街之隔卻有千里之別！叫得天神橋當然有多少「天神」啦，係二丁目就見到八個 ↓





同時係二丁目就見到每日賣薯餅、可樂餅賣到街知巷聞既「中村屋」，店員炸到無停手。花左 120 yen 買左炸可樂餅同炸漢堡扒吃 ↓



如是者邊食邊行，話咁快行完整條日本最長既商店街，完成之後有小小「禮品」，唔值錢不過幾有紀念價值。走馬看花咁行，大約一個鐘到啦。經過多日黎既訓練，呢段路絕對係濕濕碎。咁就撘返地下鐵返去酒店，係車廂見到涼子既資生堂廣告 ↓



係大和屋既三晚就係睏呢間房，係和式房間 ↓



帶洗手間、浴室 ↓



大家唔好奇怪點解無啦啦講附浴室，和式酒店既和式房間係未必一定有浴室。因為和式酒店通常都有大浴場，咁所以有 D 房間就無浴室的。同埋和式既廁所剩係得個馬桶，洗手盤就係另一個地方，而浴室就通常比較大，有張櫈仔比你刷下背，再加個 Size 比較大既浴缸。酒店房望出去既景，無乜特別 ↓



整理完行裝之後，就準備到附近既「心斎橋筋」行下順道吃晚飯，就係呢處 ↓



係裡面行左陣，最特別既係一間叫「カワチ」，係一間有百年歷史既美術用品鋪，還有其他商鋪都行左陣。之後就食晚飯，我諗大家都估唔到我地晚飯食乜，我地竟然去左 ↓



哈，去麥仔就係想試下個個炸蝦包，即係呢個 ↓



「現實」個樣同「理想」既圖都係爭少少啦，不過比無香港個 D 走樣走得咁過份。反而味道就認真不錯，個個食過都話正，呢個包絕對係推介！咁買麥仔個陣，個女 Counter Staff 估到我地來自香港，比個叻佢。你地可能話有幾難估，但實際上 ... 我地比人誤認過係日本人、韓國人。食個麥仔又點會飽呢，所以就去附近既 Mister Donut 買左多少野作飯後甜品與明日早餐。買完付款個陣，個位女 Trainee 對我地講出黎既「Thank You」反應好大，鞠個 90 度躬再加「ありがとうございます」，有多少受寵若驚。可能 D 客少講「Thank You」掛，不過都有鼓勵性既。

返去酒店之前去返我地係大阪既補給基地補給一下，就係呢間「Gourmet City」↓



其實我地今次住個間酒店同之前住個間酒店係好近，隔一條街。所以今次都慳左好多搵路、搵食既時間，住係預料之外。補給既四種飲品 ↓



「成分無調整豆乳」即係無糖豆奶，真係淡到無味。「カルピス」就係桃味既益力多。點解會無啦啦買水呢？因為今次呢間酒店無煲水既設備，剩係得一壼用保溫瓶裝住既熱水，咁想衛生 D，所以就另外買水飲了。等沖涼既時候，灘起地下向天花板影左張相，好無聊，但有一種說不出的感覺 ↓



今日成功奪金，再加獎狀。前者係大阪城奪得，後者就係天神橋筋商店街行畢全程得到，不過好似寫左「Victar」，都係我填 Form 個陣填得衰，不過咁樣更特別 ↓





Day 8 完結。That's All.

宇治 ... 對香港人來說比較陌生。但係對日本人來說，這是十分有名的地方。雖然宇治綠茶製品和世界文化遺產之一的「平等院」都很有名，但都比不上《源氏物語》。《源氏物語》是日本史上最早的長篇小說，由女作家紫式部於西元 1001 年至 1008 年間寫成。故事其實好似無記個 D 師奶劇，話說日本某天皇為左令自己兒子逃離官廷鬥爭，所以把他降下為臣籍，簡單來說即是將他從皇室中刪名。天皇賜姓「源氏」，咁就成為這部物語既主角。《源氏物語》講述源氏與一系列女性的愛情，睇完這部書大家應該都唔會明白點解《源氏物語》會咁出名。原因有二，一是我們不是日本人，好難明白當中一些意思如「物哀」，好難睇得投入；二是年代久遠，那時的價值觀套在現在也許很可笑，或者係由細到大都睇慣 TVB 既師奶劇，真係有乜婆媽劇情未見過。不過 ... 大家有興趣既都可以睇睇既，這裡有個簡介



講完關於宇治一些背景之後，好快就去到京都準備坐鐵路到宇治，先前幾日都好似無 Post 到自動售票機既相，依家補返 ↓



一行出車站無耐，就見到好多義工幫手派下單張，那些係幫旅客遊覽的一些資料。行多幾步就見到一個茶壼型既郵筒，係紀念「宇治市制施行 50 年」而設置，似似地灣仔既金紫荊花啦，不過佢真係用黎寄信 ↓



宇治站既外部，見唔見到好多的士呢？大家都估到有生意做先有咁多的士啦 ↓



步行係旅行既一種體驗，所以無打的既。車站對面就有一個好大既牌坊，就係《源氏物語》中既源氏同紫上。上面寫住「歷史街道のまち宇治」，「まち」指「市」；而方向亦清清楚楚咁寫住，都幾好既 ↓



行入去就會見到有名既「上林茶鋪」，不過無入到去 ↓



好快就去到我地既首個景點，「平等院」，當然要付入場費啦。當時賣票個位嬸嬸講左句「日本語いいですか。」，咁就簡單解釋下邊 D 可以去、邊 D 要再比錢先可以去 ↓



平等院裡面既「鳳凰堂」，好多好多年前，呢到係漆上極鮮豔既顏色、內裡既裝潢亦金碧輝煌，集壁畫、雕刻、建築於一的國寶。大家仔細咁睇下會見到屋脊上的金銅鳳凰像，是像徵著尊貴。在 10 yen 硬幣與 10000 yen 紙幣都會見到鳳凰堂，可見鳳凰堂在日本國民心目中有一個重要的地位 ↓





幅相絕對無 Tune 過，個天真係睇到既咁藍，可以唱返首「天空 ... 這樣藍 ...」。如果再遲多幾個禮拜去，應該就會見到荷花，依家剩係見到得荷葉既荷花池 ↓



轉個頭就到博物館性質既「鳳翔館」↓



由於係博物館，所以 No Photo，不過都有人偷偷地咁影，唔係我地。裡面就放有鳳凰堂裡既一些物品，如壁畫、佛像。印象最深刻的是有一個展廳，有一道牆掛滿 51尊「雲中供養菩薩像」，加上燈光，整件事變得好有 Mood。真係值得一睇。除此之外，鳳翔館有一個精品店，裡面賣既精品好 Stylish。係靚得好過份 ... 絕對係意料之外！為左比大家睇下有幾 Stylish，預先 Post 定今日既戰利品，右手邊個堆都係鳳翔館買返黎。那些 Folder 真係 ... 靚到無言 ↓



返返去鳳翔館，鳳翔館對出有一個好 Modern 既日式休憩處，就係咁既樣 ↓



另一邊就有 D 庭園佈置 ↓



見到呢 D 地方，少不免會 Hea 下啦。絕對唔怕餵蚊，因為我地有蚊怕水！不過真係好熱，熱成點？睇下我既汗印就知，係咪好似孭緊個無形既背囊呢 ↓



其實諗返，每日最烈日當空既時間，我地通常都係 D 無冷氣既地方移動緊或者睇緊景。都唔可以話蠢既，話曬影相最靚既時間就係烈日當空既時間，有得就有失既。抖左陣就準備離開平等院，再由其他角度睇睇鳳凰堂 ↓





其實鳳凰堂係可以入去參觀既，不過要另外再比入場費，而裡面又不是太吸引，所以都 Skip 左。如是者就離開平等院，搵地方食 Lunch。個陣大約係兩點半，但係好多食肆已經關門，最想試既手打蕎麥麵「ながの」竟然「本日終了」。心諗，唔係嘛？好過份喎！你話暫時休息準備晚市都正常，但係「本日終了」真係估佢唔到 ... 不過亦因為咁，我地試左另一個都幾地道既食肆，門面就係咁既樣，係料理旅館 ↓





大家估唔估到裡面係點呢？算啦，估唔到架喇。我地自己都估唔到，有少少驚喜啦，就係咁樣 ↓



全部都係食天婦羅綠茶冷麵，再加埋冰綠茶，再加埋有強冷既冷氣，真係爽過 Dee Dee ↓



如是者，就好他條咁吃 Lunch。吃完之後就去「伊藤久右衛門」買 D 宇治特產中既特產 - 綠茶製品。不過由於天氣炎熱、再加上我地還有幾日先返香港，所以好多野都唔敢買，例如蛋糕、福餅、Cheese Cake、布甸咁。我買左一個抹茶蛋糕都比人咒佢樂壞咒到返香港。依家諗返應該係當地買多少即刻食，不過福餅一盒 12 個，又好似多得滯。Cheese Cake 唔係話唔好，不過又唔係即刻買完即刻返酒店，所以都比較難試。布甸其實係最 Fit，一盒 4 個，轉個眼就乜都吃清啦，蠢左 ... 買完之後準備到今日第二個景點，宇治橋 + 宇治神社 + 宇治上神社。先來個紫式部像，影得都有 D Mood ↓



沿住宇治川行，就會見到《源氏十帖》既銅像，可惜背光，睇唔清楚。之但係就有另一種 Feel ↓



轉過眼就到「宇治神社」，這個就是神社前必有的「鳥居」，類似係結界的門，劃清俗世與神社。如下 ↓



「一分錢一分貨」，免費的好像沒甚麼好東西。兜個圈就離開，又轉過眼就到「宇治上神社」，呢個神社主要供奉菟道稚郎子命、應神天皇和仁德天皇。都係免費 ↓



內裡既「拝殿」就係咁 ↓



而「本殿」就係咁 ↓



唔好睇小呢兩個殿，佢地都係國寶。我諗呢度免費既原因係大部份地方都唔比人進入，唔需要負擔遊人帶來既損壞，所以就免費。話分兩頭，原來我地見到個一潭死水係好有名，叫「桐原水」。離開宇治上神社，出發到「源氏物語博物館」，路途上既樹，D 樹葉都幾得意既 ↓



滴住汗就來到源氏物語博物館，咁門口有一塊玻璃，上面當然係同源氏物語既舞臺有關啦。不過睇相應該睇唔到，即管貼下 ↓



裡面分有兩邊，一邊就係博物館，收費入場，裡面放有同《源氏物語》既一些東西。例如平安年代既衣著、插畫等等。不過對《源氏物語》既認知十分有限，所以又 Skip 左。咁就到另一邊既精品店同 Info Centre 逛下，咁買左 D 野就離開。離開時既影既照片 ↓



係某間鋪頭吃了綠茶雪糕，咁宇治之旅都七七八八。貼兩張唔知影乜既相，都幾得意既 ↓





宇治的確係歷史街道之市，竟然比我地見到 ... ↓



估唔到 ... 真係估唔到 ... 一來部販賣機好舊、二來個鋪位咁耐都租唔到出去，好難得！真係好難得！另外電話亭上都有鳳凰既銅像 ↓



發生一段小插曲，有人質疑我地來既車程係咪最快既車程，咁有質疑就自然會對話啦。咁無他既，點樣來就點樣去，唔洗諗係咪 Very Good 先。咁最後都係原路離開既。宇治之旅正式完結，咁就出發到京都站。

大家還記得的話，咪有個背囊既汗印既。咁難得係車廂內有冷氣，咁當然除低背囊吹一吹。咁岩對面面就坐左一對姊妹，咁岩又見到我，佢地都笑一笑。咁佢地笑乜野都估到下啦，當時真係想同佢地講「とても暑いよ！」。真係唔中暑都算係咁啦。轉過眼就到今日最後一個景點「京都駅」，外在 ↓



內裡 ↓



月台 ↓



路經車站內既旅行社，睇下幾大場面 ↓



作為香港人，都想知道其他國家既人黎香港會做 D 乜，咁都拎左好多關於好多香港既旅遊既宣傳單張，咁睇下有無機會係後記寫返出黎。京都站對面既「京都塔 」，呢個係未日落之前既樣子 ↓



之後就行去車站隔離既「手塚治虫 World」逛下，一入門口就有幅全家福既相，可惜原來我無影到 ... 所謂既 World 裡都放左 D 人氣甚高既角色等身大公仔，有「小飛俠」 ↓



細個分唔清楚佢同獅子王既「小白獅」 ↓



型到爆炸既「Black Jack」 ↓



最後我地係呢部貼紙相機放低左 500 yen，不過影得唔靚 ... ↓



如果大家之後聽到類似呢 D 咁既 Sight，千期唔好有任何期望入去，唔係一定會好失望。之後就入返去車站逛下裡面既商店街，呢個就係日落途中所影下既京都塔 ↓



之後就落去地下商店街「The Cube」同「Porta」買 D 京都手信，本來都想話買 D 和菓子，但係放得七八日，返到黎香港都差唔多過期，所以無買到。不過都搵到 D 幾 OK 既手信既，咁去左呢個 100 yen Shop 既強化版 300 yen Shop 打個轉，我自己就無收穫。咁再逛下逛下，睇下有乜野岩食。不過呢，最後都無係地下商店街食。咁就行返上車站，呢個時候，已經入黑，又再睇下入黑既京都塔 ↓



哈，咁就睇晒三種不同既京都塔。咁又未真係好肚餓，由 West Zone 既樓梯望返去車站就係咁，大家留意中間偏上有一條半密封既道路 ↓



Hea 左陣就去附近既「拉麵小路」搵食，有呢 D 野食 ↓



期間有位婆婆問我路，我當然唔識啦 ... 晚餐就係食 ... 應該都估唔到既 ↓



點解去京都會食大阪既野呢？我都唔知道 ... ↓



食飽飽之後就到隔離既空中花園行下。那處比想像中多人，只要有櫈坐既地方都有一對二對人坐係度。咁 D 人有乜野做呢？無他既，就係摸黑談心，有幾黑？大家睇下咪知 ↓



空中花園其實同京都塔既景差唔多，不過京都塔要比錢就當然有佢優勝既地方啦。至少呢個空中花園圍牆既玻璃比較污糟，矇矇地又睇得唔清楚，想睇清 D 個夜景既都係去京都塔啦。咁睇左陣就行頭先個條半密封既空中走廊，由空中走廊望返過去樓梯就係咁啦 ↓



空中走廊裡面就係咁，個日都算無乜人 ... 可能我地晏啦，個陣大約夜晚九點到↓



係空中走廊都可以望到京都塔，大家又有機會睇多次 ↓



唔知係咪地勢高少少再加上空曠，個晚都幾涼幾大風。真係相機都 Hold 唔穩，呢幅就係由 East Zone 影返去車站 ↓



咁四日既京都之旅都進入尾聲，係酒店附近既「烏丸御池站」裡有個小既展覽，老實講，係幾無聊都但幾幽默既，例如用酒樽整既燈泡 ↓



除此之外，還有比雀鳥築巢既斧頭，都幾得意既。如是者返到酒店，不得不提呢幾日陪伴著我既 Vitamin Water 1L 膠樽 ，由奈良既 Supermarket 買返黎 ↓



係街買 D 野飲平極都要十幾蚊，咁一定係買大樽既飯品倒小樽又或者係自己煲水飲先化算。普通 500 ml 個 D 樽裝得幾啖水，絕對唔夠飲，平時見開既既 1L 樽又太高身拎出拎入又唔方便。呢個 Vitamin Water 1L 樽矮得黎夠肥，放係背囊裡面真係 Fit 到漏。除此之外，咪話 Laundry Service 好貴既，有幾貴大家自己睇 ↓



洗件 T-Shirt 都 500 yen，去 Cheap 爆既既鋪頭夠我買件新了。所以點可以唔晚晚洗衫呢？



Day 7 完結。That's All.

今日既行程對比起先幾日算係無咁體力化，只係去左兩個景點。不過呢 ... 天氣真係好熱，成三十幾度，都咪話唔辛苦。咁先來既就還返把刀比 Reception，有位 Staff 想問返住邊間房。唔知係咪係兩間酒店既房號差唔多，一個 402 一個 403，所以呢 ... 第一次係講錯房號既，個位 Staff 都有少少錯愕，明明無人住架，點解無啦啦有人住既，唔通係 ... 少少搞笑啦。入正題，一出酒店就見到先幾日既「鉾」，好快手就已經組裝完成 ↓



行多幾步就去到巴士站，呢個站算叫做大站，咁就有個電子顯示牌。唔知係 GPS 定係巴士司機按掣 Send Signal 定係計時間，總知個電子顯示牌係 Work 既。運作模式類似以前機場個 D 顯示牌，會發發聲咁轉 D 資料出黎，都幾得意同實用既 ↓



日本既巴士係由中門上，前門落，好似係香港搭電車咁。今日就買左京都巴士 One Day Pass，咁理論上係巴士上過一次機之後，就咁 Show 張 Pass 比司機睇就得。巴士上呢，有一部自動兌換機，唔夠零錢可以即時兌換。巴士都分為均一票價與非均一票價，後者既計算比較複雜，遲下再講講。巴士既車廂就係咁既 ↓



話咁快就黎到首個景點 - 「金閣寺」。先前咪講過話唔同既寺院有唔同種類既入場卷，今次就係一張護身符，呢張符已經夠保平安，哈 ↓



鼎鼎大名既金閣寺就係咁樣啦，正名係「金閣舍利殿」，真係金色的。還有大家見唔見到層頂上象徵吉祥的鳳凰呢 ↓







金閣寺有很多具有特色的名景，例如這個「陸舟の松」，樹齡至少六百年以上，是足利義滿將軍心愛既盤景之一，外貌如一艘揚帆艘船，地上的小石如海上的波浪。睇下大家 Feel 唔 Feel 到個意境啦 ↓



少不免有賣禮品既地方，呢度就有個專賣「御守」，即護身符既地方。唔好小睇這個貌似茅屋既地方，其實係裝有冷氣的 ↓



呢個真係唔講你知都唔知影緊乜，其實係影緊「鯉魚石」和「龍門の瀧」，可能係影既角度唔好啦，難 Feel D ↓



行多兩步石級就會見到一潭死水，叫做「安民澤」，見唔見到樹與樹之間有個石刻，個個就係有名既「白蛇の塚」↓



我們從另一個角度看看金閣寺 ↓



金閣寺附近的茶寮，Framing 有 D 怪怪地。大家係咪覺得好寫意呢？比蚊咬你就知 ... ↓



轉個頭就會見到另一座寺，叫「不動堂」，內裡放有重要文化財產之一的「木造不動明王立像」。留意相中右下黃色的箱，其實係籤筒來的，有多國語言 ↓



如是者，金閣寺之遊就此完結，準備出發到「嵐山」看風景。一聽到「山」，有人就以為我地真係上山，咁事實當然唔係啦。由金閣寺坐巴士去，一到步就去附近既車站整理下行程，而那個車站就成為我地係嵐山既休憩點。車站都佈置得好和式，有食肆、商店，其中一間如下 ↓



還有一個臨時郵局。哈，大家都好熱 ↓



好啦，嵐山既行程中 ... 竟然係帶大家睇下先前係京都買過手信既「ちりめん細工館」，門口就係咁 ↓



非常出名既布製壽司，價錢比得上真既壽司 ↓



再來睇睇其他布製公仔，有十二生肖 ↓



睇完之後，就路經「天龍寺」。點解話「路經」呢？因為真係路經 ... 係門口影左張相就無算，無入到去。點解會咁呢？我都唔知點解，可能未食飯掛 ↓



咁係車站附近行下搵下有乜野食，咁就決定去呢間鋪食 ↓



內裡就係咁既樣 ↓



來來去去都係食個 D 野，都唔多介紹 ↓



吃完之後就到附近行下，有這個有名的「渡月橋」↓



而這條河就叫「大堰川」↓



黎到呢 D 地方，除左睇景之外都係睇景，真係好悠閒，悠閒到唔似去旅行 ↓





其實來到嵐山，應該會再去埋嵯峨野，不過由於唔係賞花季節，所以都無安排這個行程。大家可能會覺得嵐山行程好似好 Hea，其實都係既，因為係嵐山其實係睇景，無乜特別推介。附近就有個「美空ひばり座」，係記念館性質的展覽館 ↓



當然無入去啦，都唔知佢係邊個 ... 嵐山既街道就係咁既樣，D 鋪頭都係好早就關鋪，好似唔恨做生意咁 ↓



以「夕子」作為嵐山之行既總結，哈，咁岩個陣又係黃昏 ↓



搭巴士離開嵐山出發到「四條河原町」，其實早幾日已經來過，今次就係白天時影左幅相，位置就係 Day 4 衹園祭影相個位 ↓



咁就到日本有名既百貨公司 - 「高島屋」逛下，大家點都估唔到去旅行去到行百貨公司吧？咁就去左裡面逛下睇下有乜野岩食，淺水灣有乜野食？就有呢 D 食 ↓



哈，唔知點解個度都有好多日式香港菜。除左「淺水灣」之外，重見到有「糖朝」，係香港都未食過，有機會真係要試下 ↓



結果 ... 係無係高島屋食晚飯既，就係樓下既 Super Market 買左 D 炸物就返酒店，夜晚既京都街道就係咁 ↓



咁夜晚食乜呢？又係估都估唔到，大家都估唔到去旅行竟然會食 ... ↓



呢 D 杯麵、飲品、生果都係由奈良既 Supermarket 買返黎。乳白色個枝飲品，味道同益力多差唔多，都係乳酸類飲品，佢就無益力多咁甜。D 杯麵始終都要搵一日食左佢既，所以就揀左今日。一個係鐵板炒麵、另一個係塩拉麵，即係鹽味拉麵，再加埋由高島屋買既炸物，咁就成為 Room 403 既一餐晚餐 ↓



吃完杯麵之後就有今餐既主角，大家都估到係乜黎啦 ↓



哈，估唔到係精選蛋糕呢？ ↓



除左個蛋糕，大家見唔到見到下方個兩包「冰」呢？唔好睇小佢，質地有多少似護理用既 Ice Pack，無記錯應該有人帶左返黎。買呢個餅既時候就尷尬了，個女店員想同我地講話明天前好吃完個蛋糕，但係我又突然聽唔明，結果有另一位顧客用英文同我地解釋返，之但係 ... 我地都係聽唔明，哈。我諗個店員無諗過會有遊客走黎超級市場買蛋糕吧。正當吃緊蛋糕既時候，扭開電視突然見到 ↓



嘩！好 Surprise！真係無估過會見到涼子！咁岩佢有套日劇《ヤスコとケンジ》首播。如是者，我就坐定定係電視前了。原來今日係「在電視驚見涼子之旅」。作為一日既總結，今日既行程編排比較鬆散，如果再編過的話應該會改一改，至少會撘下鐵路，而唔係全日坐巴士。不過正因為鬆散，今日消耗較少的體力，可稍作休息。休息是為了行更遠的路！哈。



Day 6 正式完結，That's All.

今日繼續「怒行之旅」，咁一早就過左京都附近既奈良。就係塔 JR 特急過去，係咪好型呢 ↓



之不過 ... 其實我地係塔近鐵奈良線既，就係呢架 ↓



的確係無咁型 ... 不過佢係快 D 既。一去到奈良站就見到今日既主題 - 「鹿」↓



鐵路站既外貌就係咁 ↓



行唔夠兩步就見到有奈良特色既渠蓋 ↓



本來諗住撘巴士既到首個景點既，但係經過昨日既訓練，行得到既都行去了，慳返巴士錢。咁途經奈良名勝「奈良公園」，點解咁出名，一睇就知 ↓



哈，係奈良，要見鹿真係唔難，隨處都係。有鹿既地方就有鹿糞，都係隨處都係，佢地係邊食邊行邊痾，個日都見到唔少。有無踩中鹿屎？睇落去就知。朝早既時候，D 鹿就會係呢個草地食草。D 鹿一 D 都唔怕人，Friend 過打 Band。摸落去鹿身時 Feel 到隻鹿既熱力，D 毛唔算軟身，都有少少硬度。再來一幅渠頭鹿相 ↓



之後一路行一路行，就行到行程中既第一個景點 -「春日大社」，世界遺產之一。附近還有很多小神社，那處能稱得上是神社群 ↓



呢個神社洗手既水泉係有個鹿雕像，叫「大阪白鹿社」，如下 ↓



路旁的石燈籠，呢堆未算澎湃，澎湃既係一座疊一座，石燈籠仿如欄杆一樣 ↓



又再行一段碎石路，就到左「春日大社本宮」，來幾幅照片先。相中既係南門同廻廊 ↓









係咪有 D 奇怪呢？世界遺產點解可以咁光鮮呢？無他既，因為個 D 部份未列入遺產，當然可以不斷翻新修建啦。真正既係呢個區域，不過無比入場費，所以只可以係外面睇一睇。相中部份係日本人結婚既場地，唔好睇佢好似好頹，其實係十分熱門的 ↓



不得不提既就係神社既職員，就當日所見，全部都係女性，穿上傳統的巫女裝束。行埋 D 櫃台除左感受到冷氣之外，重傳來陣陣花香。呢種花香係來自巫女既頭飾，看來每日都換上新既鮮花，個種花香絕對醒神過白媽油。得個側面睇 ↓



係春日大社買左少少手信就行埋鄰近既神社，先來就係「夫婦大國社」，大家應該都知道祈求甚麼東西吧 ↓



除此之外，行遠少少就有個「金龍神社」，呢個難估少少，其實係同金錢運有關↓



路過的還有「三輪神社」同「若宮神社」，不過規模當然無前者那麼大，只是一個細細的，供人參拜的小小本殿。其他神社因為比較偏辟，所以就放棄無行去啦。我地沿住大路離開春日大社，馬路旁都有好多指示牌提醒司機會有鹿跳出黎 ↓



到正午時分，D 鹿都要去樹蔭抖涼 ↓



我成日話風景好靚，大家睇下點靚。一片綠悠悠既草地，慰藍的天空，不過小心踩中鹿糞 ↓



由於天氣炎熱，所以都刪減部份行程。咁輾轉就去左某間食堂食飯，我揀既飯禪聯「好味榜」既首位，真係好難次次都係我揀個種最好味，我揀左「カツ丼」，即係吉列豬扒飯，相既上面個碗 ↓



雖然唔係甚麼出名既食肆，但個飯都好味，都係個句，D 豬扒好軟滑。看來應該係豬種同水質既分別。講個小知識，就係日本既水屬於軟水，而我地用開既係硬水。軟水中的鈣質和鎂質含量較少，也許因為咁，用軟水來煮飯特別香。豬種唔同、飯種唔同、蛋種唔同，夾夾埋埋就係新既體驗。講就咁講，就咁一個豬扒飯就吃左 900 yen，約 $65。無他既，個條街得佢一間食堂。食飯時間，D 鹿都走黎附近搵食，你估下邊隻係雄性邊隻係雌性 ↓



沿路行去「東大寺」，D 鹿就攤曬係路上，就係咁樣 ↓



行多幾步就到東大寺既「南大門」，國寶之一，要保持原貌 ↓





鹿 ... 係無處不在既。呢隻公鹿就進備跨過南大門，佢地都跨得幾高的 ↓



南大門兩旁既木造金剛力士立像，都係國寶 ↓





行入少少就見到東大寺既中門，唔係國寶，所以係光鮮 D。係重要文化財產之一 ↓



比過入場費就入左去大佛殿，就係咁既樣啦 ↓



大佛殿內既雕像，「廣目天」與「多聞天」↓





國寶 - 「盧舍那大佛」 ↓



大佛殿內既大佛殿木製模型，望真 D，係有個木刻佛像係模型裡面 ↓



係大佛殿內坐左一陣，有外國旅行團黎參觀，咁個導遊就係正我地休息既位置講解，我地當然聽埋一份啦，內容同我地所睇所知既都差唔多既。抖左陣買左少少手信就離開大佛殿，準備另一個即興既活動。先來睇下遊人餵鹿既情景 ↓





搵食搵食，唔搵唔有得食。東大寺都有好多賣鹿餅既檔，150 yen 一份，當你一由檔口買完鹿餅之後，D 鹿就好醒目咁睇到聞到，咁就空湧而上圍住你。但係佢地又知道唔去搶鹿檔 D 鹿餅喎！你當然要識做比佢地食啦，唔比既話佢地會搶，公鹿會用鹿角頂你，如果你收埋 D 鹿餅係衫底，佢地會咬你件衫。有個外國就遊客因為咁，件衫就比鹿咬到濕左。六目交投，D 鹿仔係咪好馴呢 ↓



只限小鹿，餵到一半就有隻公鹿黎搶食，情況開始有 D 控制唔到 ↓



當你派完鹿餅之後要做個動作話比 D 鹿睇你無曬鹿餅，就係呢個 ↓



佢地見到之後就會自動散開，不過佢地嗅覺真係好厲害，就算隻手有 D鹿餅碎佢地都聞到。搶食起上來 D 鹿都幾兇狠，真係搵食艱難。D 鹿邊行邊食邊痾，耐不耐就有條鹿糞路，呢位婆婆就不斷係到清掃 ↓



作為玩鹿既總結，來一幅全家福 ↓



補返少少，係路旁就有個牌話你知 D 鹿既特性，例如幾時出產期、幾時發情期、舉起鹿角就代表佢地處於緊張狀態 ↓



之後就去左另一個世界文化遺產之一的「興福寺」，著名既五重塔 ↓



相較地就無咁多野睇，之不過草地上又有一大堆鹿乘涼，重有學生黎遠足 ↓



口渴？鹿大哥就動身去水池飲水，其他鹿仔就跟住大哥戇開。大約有數十隻鹿咁一行行去，都幾震憾 ↓



本來想去「奈良町」既，但係時唔不早不晏，行到去 D 鋪頭可能又關門。咁所以到附近既商店街行下睇下夜晚係邊食。日本既商店街好易搵，就係一個有蓋既街道。日本既 Mister Donut ↓



行多兩步發覺一件好有趣既事，竟然見到「聖公會」。間幼稚園叫「親愛幼稚園」，真係好親愛 ↓



探完路之後就到附近既「猿沢池」等日落睇日落，順便整理一下行程 ↓



坐左一陣，就去食晚飯，去左一間 Cafe 食。門面同內裡就係咁 ↓





我就食可樂餅 Set，都 OK 既 ↓



吃完飯就到我地既奈良補給基地 ↓



係裡面買左大樽裝既飲品、杯麵、生果返去京都既酒店。返到酒店，當然試一試 D 飲品同桃，飲品係 Fruit Mix 既奶類飲品，都幾開胃！如下 ↓





夜晚又加插一個新既活動，就係「刷鞋」 ... 今日行左好多碎石路，再加上踩中一粒鹿糞。忍唔住手就走去用酒店既牙膏牙刷刷下對鞋，即刻變返乾淨曬。



Day 5 正式完結，That's All.