唔打正衰仔系列 - 大阪 (5)
Cross Hotel 都真係幾特別，個洗手間門有個大姑窿方便偷拍 ↓
再一次打爛杯 … 又係朋友仔刷刷下牙冼手跌爛隻杯 … ↓
臨走先嚟落雨，都總好過全程都落雨 … 早上嘅道頓堀好零靜，最多的是小型貨車，來的是送食材 ↓
沿大路行，好快就去到黑門市場 ↓
今次再來黑門市場，發覺都幾多嘢賣喎。上次嚟又唔多覺，不過可能上次係晏晝來，有部份店鋪已經關門了。見幾日無飲過豆漿，花了 ￥60 買了杯豆漿飲。如果是鱔稿，一定會話杯豆漿好鮮好香，可惜呢篇唔係鱔稿。杯豆漿飲起來感覺好健康，沒有加糖，係有豆味嘅，但只係普通貨式 ↓
市場有魚檔、有醃菜檔 ↓
還有生果檔，嗯，點解個身影咁熟口面嘅？朋友仔係度買咗份提子↓
另一間生果檔，大好多，鋪面嘅生果陣都未免太誇張了 ↓
秋天最當造嘅栗子，又真係幾靚喎 ↓
在這檔買了幾個大梨、提子、柿，找店員幫幫手 Pack 入箱之後就到對面菓子店買菓子。呢間菓子店叫「三都店」，就係當年朋友仔為咗睇賞味期限而反轉盒わらび餅而店員噢咗咀嗰間店！買了兩個大福、兩盒わらび餅，加兩兩舊粉團 ↓
輾轉到魚生檔買魚生，時間早，有靚嘢賣，可惜朋友仔買嘅係三文魚，是挪威來的三文魚 … 明明同香港吃嘅一樣。話分兩頭，現在吃到嘅三文魚大多來自挪威，部份來自智利，全部都是養殖的，基本上都無野生三文魚食。至於生吃三文魚會生蟲，我想到了現在全養殖的情況下都不會了。成日都話正統日本料理店唔會有三文魚刺身吃，是文化關係多。等於我地出街係酒樓食飯，都好難叫佢煎條紅衫魚，不是不好吃的問題，而是文化因素吧？↓
這就是今天的早餐，個兩粒白色粉團真是一舊粉團，沒有餡的。點解買？因為朋友仔見佢平 … 最後當然無食晒 ↓
黑門市場還有藥房，又買了些面膜和唇膏 ↓
內含多種生果，可惜拎到返香港嘅時候，啲提子都撞到爛爛地 ↓
吃完好 Light 嘅早餐就 Check Out 走人。Check Out 嘅時候做返個有品嘅客人，主動話打爛咗隻玻璃杯，問洗唔洗賠錢。之後重點就來了！嗰位化妝後都幾靚嘅後生 Reception 就用佢十分有限嘅英文單字問我地有無整親，每講一句佢都停一停諗一諗先講！當時都幾錯愕，唔洗賠就預咗嘅，但估唔到問返我地有無整親。感覺當然 Good 啦，唔係鱔稿，Cross Hotel 值得推介！
Check Out 過後就到かに道楽吃蟹宴，店內十分搶眼嘅水缸，全部都是擠迫戶 ↓
時間尚早，有靚位坐。張餐紙也很有特色 ↓
點了這個餐，叫「萌黃」，大約 HK$280 一位。晏晝來說好似好貴咁，但夜晚吃差唔多嘅嘢係更貴，而且要等位。同埋一分錢一分貨，真係幾好味。話雖如此，タラバ（鱈場蟹）真的很貴，ズワイ（松葉蟹）就抵吃得多了 ↓
大約就是這些，有蟹刺身、蟹腳、茶碗蒸、芝士焗蟹、蟹天婦羅 ↓
還有蟹飯 ↓
甜品是抹茶雪糕，有位職員發發發發咁發起啲綠茶再淋上雪糕面的。同埋值得留意的是職員腰帶個結裝咗好多嘢，至少我地見到有火槍 … ↓
在店內看店外，中午時間道頓堀多麼熱鬧。還有疑似是遊客的日本學生在自拍 ↓
吃飽飽要散下步，到了附近的夾公仔鋪夾下公仔，亦都因為呢次之後我地返到香港係咁夾公仔 … 還見到有專賣 Cosplay 服式嘅鋪頭 ↓
現在很興ツムツム，原來我地當時都買了兩隻 ↓
更難得嘅係竟然係機場內嘅商鋪見到海洋堂嘅山口式，係大眼仔同毛毛。買完之後朋友仔黑晒面，點解要咁呢？佢買護膚品面膜等等我都無黑面，為甚麼呢？話晒難得見到有 ↓
旁晚機，雖然機上有晚餐吃，但始終吃啲嘢打個底穩陣啲嘅。吃了個咖哩可樂餅飯，簡簡單單但味道不錯↓
打底的決定很正確，機上的餐不太啱吃 …↓
如是者 … 整個旅程就完結了。很快又展開新旅程！
That’s All.
Created On 23/10/2013 23:11:11
唔打正衰仔系列 - 京都、大阪 (4)
今天是轉酒店的一天，早一晚已經 Pack 好啲行李。今天早餐與昨天的一樣，都是 Mister Donut，再加多盒 Lawson 自家出品嘅奶茶。唔好以為自家品牌係 Cheap 嘢，味道都頗不錯，有驚喜！印象中盒奶茶做緊 Promote，都幾平的 ↓
看看酒店對出的景色，基本上是無景色的。都唔係，是平凡社區景色 ↓
第一站係去郵局寄明信片。係裡面都搞咗好耐，寄明信片唔耐，耐嘅原因係裡面有好多款記念郵票、地區限定明信片，都真係花多眼亂 ↓
買完就係呢個郵筒寄 ↓
剛巧遇到流動捐血站 ↓
當日天氣都頗不錯，看似好多雲，但有啲雲遮下無咁曬 ↓
本身諗住一早上去齊清水寺，可惜嘅係係郵局搞耐咗，不得不取消直接去京都御所附近睇「時代祭」巡遊。都真係幾多人，好在我地都叫做搵到好位企↓
還有皇家雙妹嘜內成日見到嘅警車 ↓
隨著騎警開路，時代祭正式開始 ↓
整列隊伍都頗多人，就咁定點睇都要兩粒鐘先睇晒整隊。相信隊伍成員有贊助商會嘅人、學生等等，有老有嫩、有馬仔又有牛仔。未睇過的話都值得睇嘅，但睇過一次嘅話呢一世人都唔洗睇第二次了，相信是大同小異的。事前都做定功課，睇下隊伍嘅排列、有甚麼歷史人物，之但係 … 成兩粒鐘都係咁就真係有多少悶。去到後期都好多人離開了，我地係少數睇到最後嘅人。↓
睇完都差不多四點，肚子餓到爆，返去京都站內嘅食街食，到了這間蛋包飯專門店吃 Late Lunch ↓
點了牛肉蛋包飯還有焗芝士海鮮飯，另外加錢有餐湯和飲品，另外再加咗一份甜品。味道其實都真係唔差，不過海鮮飯疑似漏單，追了幾次連甜品上埋都未來，真係有無搞錯。去到呢啲時候，真係唔洗識日文，只要「拿」埋口臉再炆炆地指下隻錶就乜都明晒。搞咗好耐好耐，最後係廚師親自端碟飯來 … 話分兩頭，個人經驗是在日本食肆點菜後上菜都普遍快的，所有菜式（包括甜品）雖端上後會將「收據」放在枱面。咁樣來表示上晒菜都幾好，店員知道邊一枱未齊、顧客又知道自己個餐齊未，唔洗煩 ↓
吃飽之後再係京都站逛下，跟手就坐 JR 去大阪。酒店在道頓堀附近，雖然附近有鐵路出口，可惜無電梯，唯有托住兩件行李行樓梯。係大阪呢兩晚嘅酒店係叫 Cross Hotel，屬於精品酒店，房間唔貴，但間房又幾大喎 ↓
更大的是洗手間、浴室這位置 ↓
還有一套 l'occitane 洗頭水沐浴露 ↓
房窗望向心齋橋 ↓
Lobby 都幾型，黑媽媽咁幾有情調 ↓
講咗咁耐，又行返去道頓堀邊行邊搵晚飯吃 ↓
估唔到呢到都有葡撻賣喎 ↓
蟹道樂，今晚唔係吃呢間，係睇定聽日晏晝食乜！ ↓
其實夜晚係諗住吃呢間「四天王」拉麵的↓
有中日韓英餐牌，唔會唔識睇↓
不過 … 其實真係好普通 … 同上次試「金龍拉麵」一樣咁普通。真係唔好太相信旅遊書嘅推介 ↓
くいだおれ太郎 翻生了↓
一碗拉麵點夠飽，見到有章魚燒賣，當然要買盒返酒店吃，味道 OK↓
飯後甜品。今次買了 Lawson 橙汁飲，一樣是特價品↓
住埋今晚就準備返港，來個戰利品列陣（今天）↓
如是者，今天就完結了 …↓
That’s All.
Updated On 06/04/2014 23:44:08
唔打正衰仔系列 - 奈良 (3)
九點正出發往奈良去，半個鐘唔洗就去到奈良↓
天氣頗不錯吧？昨天還落毛毛雨。之但係去到奈良車站嘅時候，有種好陌生嘅感覺，點解好似未嚟過嘅？諗多幾諗，呢個車站係無嚟過！上次係撘近鐵到奈良，今次係 JR，唔怪得之無印象！如是者就撘巴士往租和服嘅店鋪去，去了 着物あそび にっこり 租和服！
門口就是這樣 ↓
這間不像京都那些大型店鋪，是小本經營的。正正因為小本經營，店鋪只有老闆娘一位。去到的時候剛剛有一家人租和服，所以去到都等咗好一陣子，但都唔緊要，就用嗰段時間揀服飾。老闆娘技術非常純熟，幾下就幫霞姐著好件和服。除左和服之外，還包埋簡單髮型、小袋子、鞋屜。和服下午前歸還就可以了，~￥4000。之不過老闆娘剩係識英文單字，事前上網做定功課會好少少。嗯？點解我唔著埋一份？原因很簡單，我著唔慣人字拖，莫講話要行足成日。
著住和服係古都遊玩很有感覺 ↓
小本經營還有個好處，服務夠貼心！老闆娘畫了路線圖比我地、教我地去行奈良嘅著名景點，沿住行就無問題。這就是「鷺池」↓
期間已經見到奈良小鹿↓
沿途有告示牌提醒遊客小心啲鹿 ↓
所以呢位遊人就企定定影相 ↓
時間不早，再次到這間食堂吃午飯，點了滑蛋豬扒飯和蝦天婦羅烏冬 ↓
吃飽之後就去東大寺 … ↓
同鹿相影，睇下幾得意 ↓
有好多小敗賣鹿餅，啲鹿一見有人買鹿餅就會湧埋去 ↓
我買咗餅之後就多咗堆跟班 ↓
呢兩隻鹿仔好搞笑，唔夠膽跨過條渠，條頸要伸到盡伸埋脷去食塊餅。之不過其後有隻大鹿行過嚟，我地諗住佢都唔敢跨過來，點知一腳就跨過，勁搞笑 ↓
其實當時天色都有啲詭異，好在無落雨 ↓
係東大寺附近玩完鹿之後就慢慢行去五重塔 ↓
興福寺 … 又裝修 … 呢次行程好似好多「裝修」↓
隔離嘅 南円堂 應該係裝修完無耐，啲油漆新新地↓
沿樓梯行就行到去 猿沢池，水天一色↓
見到一家人，兩個女盛裝打扮，應該係七五三。曾經有一絲衝動問下不如一齊影張相 ↓
除左家庭樂，還有兩小無猜談情說愛 ↓
沿住宅區行返去和服店，可惜行遠咗成條街無返到去，嚇鬼死以為盪失路↓
回到和服店，老闆娘接近收工狀態。換衫期間，有部腳底按摩機按下腳，都真係幾貼心。更貼心嘅係有部細細嘅電子相架 Show 返出發前霞姐著住和服嗰張相！呢間和服店值得推介！跟手坐巴士返到 JR 奈良站，係車站廣場買咗啲 Made in Japan 嘅杯杯碟碟，幾百 Yen 都 OK！
返到京都，往去衹園逛逛。路過 祇園辻利，買了些綠茶，還買了綠茶軟雪糕，好味！↓
眼尾看到 よーじや，入一入去又無咗舊錢 ↓
肚子餓餓，在丹波屋買了串團子吃。其實真係無乜特別的，係路過試下 ↓
本身諗住係鴨川納涼床吃晚飯，但可能因為已經踏入秋天，無晒呢類嘅露天位。唔知納涼床是甚麼？就是半澤直樹坐緊嗰隻 ↓
係花見小路行咗轉，一係唔啱食、一係就太貴，結果都係返去百貨公司內的食肆吃，去了松屋吃鐵板燒 ↓
點了這個「煌」，話貴又唔係貴、平又唔係平，貪佢有黑毛牛肉！↓
有牛肋肉、胸腹肉、豬頸肉、法蘭克福腸、菜。有一樣嘢係睇唔明日文、食唔出是甚麼嘅，就係テッチャン（餐牌尾三個樣），返到來先知係牛大腸 … 唉，放咗入口咬好耐都吞唔到，好在吞唔到！
張餐紙都幾有型↓
呢個爐真係堅，堅彈油 … 呢個設計麻麻地，啲油積咗係個邊位，不斷彈返上嚟，個直入式抽煙位阻住大家四目相投 … Bad 也↓
黑毛和牛牛肩肉，可惜比個黐底爐搞到失晒分↓
吃飽飽就散住步行返去酒店，今天嘅戰利品主要都來自祇園附近嘅商店↓
睏前急不及待試了這塊 よーじや 面膜，當然不是我試↓
That’s All.
Created On 21/10/2013 21:53:55
唔打正衰仔系列 - 姬路、神戶 (2)
今次入住嘅酒店包早餐，之前嗰日都要買定啲野食做早餐。係車站廣場見到呢款綠茶年輪蛋糕，望落好似幾特別，而且自己都鍾意食年輪蛋糕，如是者就買咗做早餐試下，好食嘅就買返香港做手信 ↓
裡面就是這樣。試過真係幾好味，兩個人吃咗大半個，再望埋杯牛奶，正↓
如是者就坐 JR 往姬路去。上次去神戶無去到，但聽朋友講話好值得去，所以都諗住去會一會。只可惜天氣不似預期，竟然落雨 … 由車站去姬路城都好方便，沿著一條直路就會去到。路上見到姬路城上裝飾「鯱」的仿製品 ↓
真係話咁快就到姬路城，有舊大石刻住。之但係點解見唔到個城嘅？！↓
過埋櫻門橋↓
嗯！唔通因為姬路城係國寶嘅關係要搵嘢笠住佢？另外，個吉祥物都幾得意↓
￥400一位入場↓
行啊行，行到去大天守嗰到，見到排隊上去，咁就跟住排。嘩！排咗成粒鐘都有。開頭諗，禮拜日再加上國寶級景點果然係唔同啲！之但係，上到去嘅時候發覺中伏 ... 無得入城內嘅！？剩係有兩三層展望台可以參觀 … 由上面望返去姬路市↓
上到去剩係睇呢啲 … 陰公豬，除咗入城嘅門票外，上來這裡要額外門票 … ↓
我地嘅位置就係呢到，平日會有工人係度做維修。遊人就睇佢地維修 … ↓
自己預期會睇到的是這個 … ↓
結果剩係睇到呢一小部份 ↓
姬路城內種滿櫻花樹，到春天花開時係個賞花熱點。欣賞下凋零的櫻花樹 ↓
都真係幾失望，不過無得怪人，怪就怪自己事前唔睇清楚。如果知道有咁大型嘅維修，都幾肯定唔會來這裡了。反而可能會去有馬溫泉浸下！如是者就行返去車站，見到有間麵包鋪賣緊這些丹麥條，沒有餡的，不過好好味。近日係香港 CitySuper 都有得賣，食過味道都頗不錯↓
原本今日嘅行程除咗「參觀」姬路城外，都諗住去神戶市立森林植物園睇下有無紅葉。之但係「參觀」姬路城耐咗，再加上落雨天去睇葉好似唔係好對路。最後！又咁啱停雨、加上霞姐真係好想睇紅葉，如是者我地就搏一搏上六甲山睇下。時間緊迫，買了便當和飲團係巴士上吃。個牛肉飯都 OK 啊，好有味道，太肚餓了當刻，嗰陣都兩點半了 …↓
撘半粒鐘巴士就去到森林植物園，園區好大，我地只係由「現在地」行到去地圖中央較深藍色的湖區參觀 ↓
遊客中心有舊木，說是世界上最大的的樹種，都真係幾大舊嘅↓
一來天氣麻麻、二來時間都比較晏，都無乜人係園內。兩個人仔都唔敢亂行，行大路往最有機會有紅葉的湖區參觀。可惜沿路嘅葉都翠綠無比、係偶爾有啲開始轉色 ↓
行入少少終於見到似啲樣嘅紅葉↓
這是好難得執到的↓
當時的打扮是這樣，唔戴帽都唔得，下雨天再加上近日落，勁多蚊蟲摟來摟去 …（注意我不是摘葉）↓
雖然未算係賞葉好日子，但係就正正因為咁無乜人先可以慢慢影下相。雖然呢到真係稱不上海外遊客熱門景點，但都OK嘅。天色極速變暗，趕緊撘返尾二個班車落返山。在三宮站行下逛下，去到百貨公司，當然要去下 Food Market，第一次見咁多松茸↓
行完 Market 再行書店，睇下勁多 BL 小說↓
行下逛下就天黑了↓
時間不早不夜，決定返京都吃晚飯。兩個人睏足開頭眼轆轆咁玩自拍，影咗一陣就睏著，直到京都先醒 … 返到京都站又去返站內廣場內嘅拉麵街吃晚飯。尋日咪講過樓梯有 LED 燈播動畫嘅，就是這樣↓
期間有個老豆同個女係梯間玩，係度走來走去「捉鬼」，場面都幾溫馨啊！揀了間拉麵店吃，店名都唔係好記得，味道正正常常無乜特別咁 ↓
吃完拉麵吃個甜點，抹茶軟雪糕，好似￥150 咁上下↓
路過見到麥當勞，同係香港麥仔買珍寶套餐一樣有嘢送，不過佢就係逢週一買套餐就送↓
由於執返嚟嘅葉都好污糟，花咗啲時間去洗舊。另外係神戶買咗一件柿葉壽司，係 Food Market 臨收舖特價品↓
內裡是這樣，味道一般↓
是日戰利品，係車站廣場間精員店買了些「小黃雞」精品，都頗不錯！還買了些明信片，諗住有時間就寫兩張咁，都幾靚的，係京都著名景點 Sketch。另外圖中有包黃色包裝袋的糖，兌返港幣六七蚊到，平得嚟幾好食，幾有咬口。香港見過都有得賣，不過就貴幾蚊 ↓
是日總結，再計劃多次行程就可能會去有馬溫泉、同埋會試下百貨公司內的牛肉專賣點的燒牛肉飯！另外臨睏前搵一搵「着物」資料，為明天作好準備↓
That’s All.
Created On 20/10/2013 21:53:14
唔打正衰仔系列 - 京都 (1)
前言：一拖再拖，拖完再拖，依家的起心肝快快手打完 Another 京阪神遊記！唔打正衰仔！入正題！
其實每次去旅行都係臨出發前兩三個禮拜到先訂機票、酒店，今次都唔例外。呢次差啲酒店都訂唔到，都咪話唔誇張。更加搞笑嘅係，本身諗住四日三夜，但整下整下又可以玩多日。玩多日嘅代價係加每張機票加幾舊水行政費去改時間 …為去旅行，我地都可以去到好盡！如是者，撘十點鐘機就出發往關西國際機場去了，天氣都不錯↓
上機前吃咗個早餐，上到機無耐就吃午餐。雞肉飯同唔知乜汁貝殼粉，後者賣相雖然一般，但味道都 OK↓
咁啱呢隻機個 Infight Entertainment System 係新啲個隻，加埋新啲嘅戲，都頗不錯吧？之但係，我地係無乜點睇嘅，因為太眼睏了 ... ↓
一路睏啊睏，睏到咁上下就落機，一切順利。再一次到訪關西國際機場，感覺好似未黎過咁 … 可能今次去咗另一航廈嘅關係吧。之但係呢個位置好有印象，上次來係夜機，今次終於見日光版 ↓
我地其中一個旅行目的係想睇下紅葉，見到啲葉開始轉色，絕對係一件好事 ↓
輾轉三點半到就離開機場，排了好耐好耐隊先買到 Kansai Area Pass，再撘 のぞみ 往京都去。剛剛入闡嘅時候錯過了一班車，唔夠睏嘅霞姐又發我圍。但錯有錯著，另一班車我地就有位坐，都唔錯啊，又可以睏過。去到京都站都已經六點，天都黑齊 ↓
兩個人仔拖住兩件行李搵酒店，其實酒店都近車站嘅，不過一開始唔識路又點媽媽，係要多少少時間找下。今次入住嘅係 Almont Hotel Kyoto，識行嘅十分鐘內行到車站，方便之後撘 JR 去神戶、奈良。真係唔好講笑，禮拜六晚勁難訂酒店，就算今次咁順利訂到，但都貴到 $1200 一晚，講緊係 Semi-Double 房咋，好在之後禮拜日、禮拜一平返少少，稅後平均都一千鬆啲一晚↓
Semi-Double 房細就梗架喇，但都算企理、裝潢都唔錯 ↓
可能我見識少，平時啲酒店通常有啲掛牌掛係門外請啲打掃人員清理，呢間酒店就有三塊磁貼，可以直接貼係門外，Interesting↓
安頓過後就行返去京都站逛下、食夜晚飯。呢間麥仔啲單人座位都幾有型，夠晒私隱度↓
係站內商店街行下睇定之後有乜嘢要買，都行咗一段時間。這是有名的傳統手藝品牌「永樂屋」，點解講佢，無乜特別，見佢啲袋子都幾靚，之但係都幾貴，唔捨得買↓
呢個 Installation 又係幾有趣，可以「顯示」文字的水滴。無片睇，自己幻想一下這十盞射燈加水柱可以砌到 Welcome to Kyoto 出來，厲害！↓
係站廣場打逛，逛到八點到就上去吃晚飯↓
本身想吃豆腐餐，但望過啲餐牌又唔係太啱食。如是者就去了「かつくら」吃吉列，呢間餐廳都算多人，等咗一小陣先有得入座↓
點了豆腐可樂餅併大蝦、炸豬柳餐、另加一隻大蝦同蟹肉可樂餅。味道真係 Good，一樣可以免費添椰菜絲、白飯（下圖個大膠盒就係裝住啲飯）。值得一提嘅係店裡的部份侍應都真係幾靚，特別係負責我地檯和收銀個位。京都嘅女性真係靚啲嗎！？↓
埋單￥4690，平過係香港 Tonkichi 吃↓
吃飽飽就上去 Skywalk 散散步，可能係 Halloween 嘅關係，頭先上來嘅樓梯間有 LED 燈播啲動畫出來↓
來到京都，例牌影返張京都塔嘅相。今次第二次黎，但都係無上去塔觀光↓
今天正日生日，點少得食蛋糕呢？去了站內一間叫 Berry Café 買切餅，店鋪外放了些展示用的蛋糕，係咪好靚先？去到嘅時候其實都叫做收咗鋪，好在店員都肯做我地生意，買到兩件切餅，兩件夾埋 ~￥1500。↓
就是這兩件，一件是香蕉朱古力、另一件就係士多啤梨雜果。靚就幾靚嘅，但其實味道就一般啦 … 好在無買成個蛋糕返黎切 … ↓
酒店附件有間 Lawson，少不免買些甜點返房吃，有綠茶三文治雪糕，還有次次去日本都會買的明治治級雲呢拿雪糕杯！胡迪望錯鏡頭↓
如是者，吃飽飽整理下明天行程就完 Day 1了。霞姐呢張相影得唔錯，作為是日總結↓
That’s All.
Created On 19/10/2013 22:19:45