年輕人去旅行，少不免都睏得晏少少先起身。昨天吃完無老鍋都比較夜先返到酒店，更加睏得晏少少。但「睏得晏少少」係我身上都唔會話睏得太晏，咁到九點起身梳洗下、睇下網上報紙就到酒店附近的台北車站逛逛買下 Donut 吃，用悠遊卡買有「買五送一」的優惠，買了以下這些。一個個球形連埋個款既 Donut 幾好吃，同日本吃個 D 有少少唔同，比較煙韌 ↓



話分兩頭，我地不約而同咁有幾件 Uniqlo既 Polo，約實左會一齊著。他倆說如果尋日見到我地著 Polo 佢地會即刻返房換，搞笑。如是者四個人就坐係房到吃下 Donut 影下相，我就有先見之明，買晒最鮮色個 D 款 ↓



今日之所以晏起身其實係因為諗住去「上引水產」吃 Brunch，車程唔係話太遠但腳程都有少少遠，當然識行都好方便，可惜唔識行，去到都成十二點幾一點。入到去都無想像中咁大，去到有分幾個區域，有賣海鮮、有賣生果、有立食壽司、有火鍋等 ↓



時間不早，肚仔有 D 餓，找了自己好想吃的備長炭燒海鮮來作 Lunch。坐底飲杯茶拗拗手瓜 ↓



對面兩位就合巹交杯 ↓



點了不少海鮮，雖然係平過出面、但對於我們這些草民其實都唔平，樣樣試少少咁。跟著店員出去海鮮櫃指指點點，點了鮑魚、帶子、秋刀魚、蝦、牛肉串、牛仔扒、菇、栗米、煎飯團，還有長蟹腳 ↓



味道方面，蟹腳真係很好很好，很值得推介！帶子就淡 D，係小樽街邊檔個隻燒鮮帶子有味得多同埋鮮 D！肉類都 OK、蝦和秋刀魚都過得去。其實都想試下龍蝦，不過佢細細隻好似肉唔多所以都無試到。但依家諗返應該要試一下。食食下突然行雷落大雨 ... 正當我地想話改行程，坐多幾坐吹多幾下水又放晴，Very Good！呢餐埋單都差不多成千銀港幣，係整個行程最豪既一餐。

吃飽飽就坐捷運四點零左右去到淡水，我地由地圖 3 號位置遊到地圖左上方無標記的漁人碼頭 ↓



疑似是國中學生到這裡旅遊，坐晒係度點名集合。除左我影相之外，還有位志同道合既人兄在 Mister Donut 既位置影相 ↓



行左一小陣就去到淡水商店街，街道入口有幾檔小販檔，有位阿叔賣核突波，有蕃茄、雞蛋等，很像真，亦因為咁我地之後既旅程見到同類產品既時候就買左幾個 ↓



天氣很炎熱，我地分別買了「巨無霸霜淇霖」吃，有少少似 Frozen Yogurt，比較冰和硬身。所以先可以玩到格劍 ↓



跟手就去某間手信鋪揀下、買下手信。係呢間都買左一定數量，有 D 有名既匙扣，都幾岩心水，都係度揀左 OK 耐 ↓



行多幾步有 D 甚麼甚麼奇珍異獸館，擺明就係碌水魚、當然無中計。街道兩旁還有很多很多的食品手信店，當中有 D 賣杏仁粉、杏仁豆腐，之但係我都無乜特別想試，皆因唔係我至愛的日式杏仁豆腐。行啊行，就見到一間頗有名氣的「天仁茗茶」，本身呢間係一間賣茶葉、茶藝用品既店鋪，但竟然有珍珠奶茶賣！？見珍珠奶茶有 Promotion，咁就買左來試試，味道都 OK，珍珠煮得剛剛好 ↓



話分兩頭，呢間廟宇都幾新潮，看看其電子牌 ↓



邊行邊飲，途經魚蛋博物館 ... 眾人買了些魚酥、蝦穌，又左一袋右一袋。期間經過 07 年去過賣陶泥公仔的店鋪。上次買過牛牛組合的擺設，一路都不知道其去向。今次再次見到，點可以唔買呢？就係呢個。話分兩頭，見到一款象棋，當中的棋全是陶泥三國公仔，好似賣港幣七百左右，其實都幾得意，可惜無位擺又無錢所以作罷 ↓



時間不多，都差不多日落時間，還要趕去情人橋！本身見到有架的士泊在路邊，都想話上車，點知無啦啦司機走左 … 咁無計，唯有不斷向碼頭方向行，搏有的士 … 雖然趕，但都不忘要欣賞一下美景 ↓



最後又比我地行到 07 年決定放棄前往漁人碼頭的位置，07 年在這裡坐定吃煙韌雪糕。今次重臨舊地是差不多在這裡乘上的士，有趣！↓



都咪話，撘的士都 OK 遠 … 如果當年真係選擇行去既話真係不得了，個陣還要烈日當空，唔攰死都曬死 ... 撘左幾錢就唔記得左了，但除返開四個人都唔算話好貴，涼涼爽爽咁來到漁人碼頭都咪話唔正。依家諗返其實呢到都有少少赤柱 Feel，又係有座幾層個建築物有 D 食肆咁。同埋其實漁人碼頭有間酒店，個靚景就靚，不過真係十萬級唔方便 ↓



地標之一的「Love」↓



在這浪漫的地方，少不免要浪漫一下，啜啖先 ↓



跟手就行上情人橋，之但係點解情人橋叫情人橋？有甚麼特別呢其實？原來這條跨港大橋 2003 年 2 月 14 日啟用，所以就被名為情人橋。長就唔係好長，大約兩百米，由橋面望上去 ↓



係橋上可以看到淡水的夕陽景色，時間剛剛好睇到，幾好幾好 ↓



兩對情人係情人橋當然擺下 Pose 影下相，看到嗎，是單腳 ↓



剛好相反的一對 ↓



呢個 Pose 真係經典，難為了幫我地影相的香港小情侶 ↓



擺下 Pose 相下相係幾開心，其實都真係 OK 熱。又要搵 NT$90 兩包 80 片裝嬌生嬰兒純水柔濕巾（棉柔加厚型）來抹抹汗↓



同埋加映，一堆背囊和一堆魚穌蝦穌 ↓



呢張相不得不 Share，來玩個遊戲，大家找找我倆在哪裡？↓



換過角度再看看漁人碼頭，果真有 D 船停泊在這裡，相中間的建築物是一間酒店 ↓



落橋再影橋，個陣時天色都未黑，影出來既相自自然然地靚 ↓



本身都諗住走，點知又來影 Kai 相 … 係這個位置都玩左 OK 耐 ↓





玩啊玩，如是者就撘「紅26」巴士回捷運站，行到去車站附近剛剛有車，唔洗等，正！架車都幾多人，無位坐，得企位。不得不提既係，期間見到個女仔著得件衫幾靚，係好幾位都話靚。轉個眼就去到「劍潭」站，在這站一出行一段路就會去到「士林夜市」，期間經過賣核突波既地方，買了幾個、又經過賣袋的地方，睇左 OK 耐但就無買到。跟手就行到了士林夜市附近，開始有 D 小食檔，先來的就是在這間鋪買了玉子燒吃 ↓



一份是筍蟹柳蛋、一份是Cheese 蛋。味道都不錯，不過細份 D 同等左好耐。明明睇住個位阿叔密密整，但整極都唔係整我地個 D ... 另外檔口播緊一段關於玉子燒訪問的片段，望落去片段既玉子燒大份好多喎，再望真 D 原來段片並不是介紹呢樓，係介紹日本築地魚市場附近的一檔玉子燒。唔細心睇都會以為段片係介紹呢檔！

跟手就行到去士市夜市，同 07 年去個次都有幾大分別，重新規劃過。地面就賣下乾貨、地下就賣熟食。今次再吃多次胡椒餅，可能今次新鮮熱吃，我覺得好吃過第一晚吃個隻，同埋皮餡比例合當多少。還有試過瀨尿雞排，瀨尿背後係話塊雞扒炸完都還有很多肉汁，好似瀨尿咁。熱辣辣炸野其實又好難唔好吃既，塊雞扒都 OK，不過又係等左好耐 ↓



等既期間見到同一集團既另一檔賣「棺材板」，檔面寫上「好好吃」，但我覺得中文字部份係檔主後期加上去咁，日文個段字明明就唔係咁既意思 ↓



到了今晚主吃，台式鐵板燒。呢檔都好似拎好多獎，相裡面既店員全數登場，雖然其中一位係相裡既既相既左邊個話要花多少時間才能認出來。點了一個套餐，有些菜、有些牛、有些帶子，每人幾十蚊港幣。依家回想個味道其實都唔係話十分特別，D 味來來去去都差唔多，只不過夠熱、夠濃味，同埋我地個陣時其實都好肚餓。不過咁既價錢都真係吃得過既 ↓



夜市內的飲品就無試，其實都 OK 唔衛生，由淡水老街、夜市內既見到鋪頭賣既甚麼乜乜冰乜乜玉露其實都無話點樣蓋好，全程「露天」。有人黎買既時候，店員就求其搵個 mug 一野「筆」起再倒落杯到。老老實實，呢 D 飲品飲完真係驚會屙。離開市場回到先前賣袋既鋪頭，當我還拎住塊雞扒咬緊既時候，朋友仔今次終於有決定，如是者就買左個袋。兩個女人買了兩個袋，有少少折扣咁。雞扒吃得七七八八，咁就返酒店去了。唔好意為就咁完，返到酒店繼續吃飯後甜品，吃支特價雪條，義美製造，唔知有無用有毒既原材料做呢 ↓



還有今早上在台北車站買的「蕨餅」。由於無牙簽、叉，其實是買蕨餅是有的，不過跌左落雪櫃睇唔到所以找不到來用。最後用牙線叉來叉住吃，有多少某弟兄在Camp 內用牙刷吃杯麵的感覺 ↓



吃既點止呢 D 呢，還有些重港帶來的朱古力條、在附近便利店買的可樂。在房內吹下水 Hea 下又搞到好夜睏。最後，附上今天在便利店門口扭蛋機扭出來的兩隻肥倉鼠匙扣↓





That’s All.

一覺睏醒無耐就出門食早餐，補充返多少有趣事。事件一都唔係特別有趣，係特別煩，話說間酒店每次離開都要交低門匙給他們保管，此舉令我地覺得四個有多少煩。本身昨日想話唔交低直接走，之但係大堂個位職員叫住我地，結果當然要交低門匙。話分兩頭，我地差唔多同一日見足同一位職員，難道佢地唔洗休息長期係度？！太恐怖了。事件二就比較搞笑，話說對小情侶其中一位在沐浴，另一位無所事事竟然揭開床下底找到了公主閃閃變身棒既玩具盒一個，有趣不在玩具盒，而係有人會揭開床下底去望。今次就話紙盒唧，萬一見到 D 唔應該見既野咪不得了！？事件三就關於房間冷氣，我倆的房間出風好猛、躺著也會被吹到；而另一間房好似熱帶雨林咁唔係好夠冷氣 ...

言歸正傳，朝早就到台北車站內的這間食肆吃，吃一些點心 ↓



點了煎鍋貼、烙餅、蒸肉餃、油菜、酢醬麵、和一碗麵。的確係幾多，不過尋晚太早吃而且睏醒有 D 餓所以都吃得幾多下，之但係都係食唔晒既。不得不提既係煎鍋貼和烙餅幾好味 ↓



台北車站就是這樣，中庭都幾大，很有電影中車站的感覺 ↓



車廂就比想像中殘舊多少了 ... 都 OK 污糟 ↓



之前未撘過台鐵，我地買左指定席，咁有得買就當然有位坐。但奇怪既事就出現，點解有個阿叔坐係我地坐緊既位呢？咁都唔奇既，可能坐錯既唧，但又出奇地個位阿叔同我地講話「邊有人真係對號坐」。開頭覺得剩係佢呢個人亂坐先亂講野發泄下，但坐多幾坐又發覺唔係好對路，有 D 阿姑就坐左係之前張相既圓拱形既位。嗯，真係幾出奇喎！原來指定席既車廂可以比人企咁神奇！？與此同時係無人 Check 飛 … 唔怪得 D 人亂坐啦！不太文明，Dislike。

話咁快就去到瑞芳，落車排隊買平溪線一日遊車飛。人太多指示又唔太清晰，都無乜秩序可言。不過總算買到，影低個時間表比自己睇 ↓



瑞芳有甚麼？看看廣告牌就知 ↓



其實來這裡是撘巴錢士往九份、又或者撘平溪小火車到十分。我們先去的就是「九份」，所以去撘巴士 ↓



一出車站無耐就見到有架往九份的巴士，又係急急腳咁上到車，喘著氣坐定定就開車，又剛剛好有位座，實在太妙了 ↓



在車裡往外看，天朗氣清，熱到黐線 … 迎面有輛旅遊巴經過 ↓



依山而建的民居，都咪話唔勁！按 Wiki 說，好耐好耐之前，這裡有九戶人家住在這裡，每次往市集購物都要買「九份」，所以這地方就叫「九份」↓



從山上遠眺基隆北海岸 ↓



四個人就在這個亭影下相抹下面從新整理一下行程。雖然係平日，但都幾多遊客到這遊玩 ↓



其實這個地方係 2007 年已經來過，當中店鋪都好似無乜大分別，上次到這沒有甚麼東西買，但今次就唔同了 ... 由於夾埋一齊買會平 D 或者送多一包的關係下，原本無諗過會買任何產品的我最後買了薑母茶和茶葉。咁又唔係被迫既，自己試飲過都覺得 OK。看就是看中了，不過打算行完整條九份老街後才回頭買。路過一間店鋪，有一隻家貓熱到攤咗係店鋪門口 ↓



繼續向前行，行啊行就行到「阿柑姨芋圓」，叫了兩份，一份綠豆、一份雜豆。說實在，這間鋪是遠眺個海景宜人，芋圓本身我只吃過幾次，唔識分好唔好吃，但就係幾彈牙幾好咬既。PS. 原本我諗住會有 D 豆花底的 … ↓



由於我地坐唔到睇到海景的位置，所以吃完都走了。行返條樓梯返老街，好一對小情侶小心奕奕咁落樓梯。其實今次四個人去旅行都想貼多 D 我倆既相，誰不知道 … 有時對家幫我地影的不夠好 … 所以借住他倆的相來用 ↓



呢間主要賣懷舊零食、玩具的店鋪，見到有「維他露」。店鋪呢位阿姑就醒啦，無話唔比影相，只不過阻住人影相唧 ... ↓



從另一個角度看九份 ↓



如是者往老街買茶葉和薑母茶就行去撘巴士回瑞芳車站，比我地見到 D 騎呢野。竟然見到有旅行團同我地呢 D 普通遊客爭車坐 … 旅行團撘誇市鐵路就話唧，竟然係撘巴士 … 唔係嘛！？好在一來了兩架經過瑞芳車站既巴士，唔係唔洗旨意上到車。又好好彩咁四個都有位坐，係路途中整理一下堆茶葉和薑母茶，我個超顯眼浮浮地誇的背囊裝咗六大包薑母茶，真係不得了！

撘個平溪小火車就來到平溪線的尾站「菁桐」，來個礦工雕塑先 ↓



本身都想在這裡買點東西吃，可惜過了午市、很多地方都準備收鋪，無野好吃。想吃碗豆花，但賣晒 … 無計，唯有唔吃住，不過都真係 OK 肚餓。唯一一間還有小食賣的鋪頭，不過貴貴地又唔吸引，所以最後都無吃。這裡都係主要賣下懷舊 ↓



在菁桐最有名的都係可以影相的火車軌還有木製名信片，就是在這間鋪頭買的。在這刻名信片都應該差不多穿到香港了吧 ↓



除了名信片，還可以在這裡買竹筒，寫好之後掛在這裡 ↓



抬頭一望 … 都幾恐怖↓



各人各自寫名信片，我偷偷看到其他個幾位朋友仔都寫左好多野。我本身都想寫多 D 野，之但係當刻實在太餓，個腦 Function 唔到、寫唔到幾多字。依家諗返應該寫多幾句有多少意思的字。寫完之後就到路軌影相，幾難先做到下 D 騎呢動作，真係企都企唔穩 ↓



從這張相的 Post 來看，難道真係年紀大機器壞？無隔離個對咁好體力做動作，不過這兩張相係影得幾好，個人十分喜歡 ↓



影到咁上下又要拔足趕上火車，車就是這架 ↓



轟隆轟隆就到「十分」，這裡出名的除了放天燈還有的是吊橋、瀑布。由於時間關係，剩係在這裡放天燈。講起天燈，就自然想起是「點」還是「放」。「點」的是在電視劇見到的酷刑；「放」是用作許願的休閒活動。言歸正傳，這就是吊橋↓





可能這裡是放天燈的熱點，較夜的時間還有小吃檔。在近車站的檔買了釀雞翼都吃，有火腿蛋炒飯或者辣泡菜作餡。熱辣辣很好吃，可能因為肚餓。如是者就求其找了一間鋪放天燈，朋友仔的第一句是 ↓



I Love World Peace ~。其中阿叔亂畫的一面，認得出誰是誰嗎？本身想係頂部位置寫 HAPPY，點知可能太攰錯手寫左 HAY … 最後加多 D 野變左 HAYY！我忘記寫我的願望是希望大家的願望落空，哈哈，講笑唧 ↓



呼呼的升空 ↓



十分黃昏的天空。好似好優閒吧？錯也，話說放完燈買下手信，到比錢個陣個位店員提我地依家有車返去瑞芳。唉，又要跑，好在最後都趕到上車。不過上到車無位坐，比我地遇返之前幫手放天燈的店員，搞笑。↓



由瑞芳返去台北都需要一段時間，如是者就到夜晚，我們到了「無老鍋」吃晚飯。呢間鋪頭就堅啦，開店時間是 1100 - 0400，真係岩晒我地呢 D 玩到無時間吃飯的遊客。晚上 9:30，不用等位就有卡位坐，座位很闊、坐得幾舒服。點了鴛鴦鍋，一邊是小辣、另一邊是推介的養生冰淇淋豆腐鍋，每位附送一粒失傳百年的冰淇淋豆腐 ← 這是來自店鋪網頁所寫，有少少誇張，實則應該是雪到硬晒既豆腐 ↓



這四樽不是飲品，是湯底。還有一個全金屬超堅重的茶壺，這裡的茶甜甜地幾得意。況且流足成日汗，唔飲多 D 水點得呢 ↓



這裡的白飯是任意裝，食幾多有幾多。食物方面免費的腐皮真係超級好吃！還有免費一小杯的白桃沙冰，正啊！我們點了以下這些，食物方面我覺得都算 OK ↓



滾下滾下吹下水真係幾寫意，良朋共聚一樂也！期間講到話呢度職員既衫唔知係乜朝代，D 衫係薄紗來的，行過係會 Chok 到有風！思前想後再睇下店鋪背景，應該是古日本吧？還是不清楚的，不過店員 90 度鞠躬真係好誇張！有多少唔慣咁。話分兩頭，負責招待我們這檯客的是一位男侍應，講野好柔。埋單每位都只係港幣百零蚊，食物質素又不錯，服務一流，這家鋪真係值得推介比大家！離開前朋友仔影到一張好相，值得分享！放天燈，與今日所做鵝十分貼切 ↓



我們去的就是台北新生店，距離捷運約十分鐘腳程 ↓



食飽大家情緒高漲，做下 Kai 野 ↓



如是者差唔多十—點零就返酒店休息，See You Hotel 夜晚是這樣的，招牌有燈唔著，有多少頹頹地咁 ↓





That’s All.

前言 1： 瑞士之旅看來距離完成還有一段距離，在這期間已去了好幾次旅行，如果諗住完成整個瑞士遊記才開新遊記，應該到 2046 先可以完成。有見及此，襯剛剛去完台灣打鐵襯熱來個每日一篇遊記！睇下我做唔做得到。

前言 2： 今次旅行與先前的有多少分別，之前通常都係兩個人去，今次就來個新嘗試，四個人去。韓國、台灣、日本，最後揀了一定岩食、言語無障礙而且旅費較抵玩的台北來個五日四夜自由行。

前言 3： 出發之前個日是一天 Busy Day，返足一日工、大家都很忙，都無乜時間休息。與此同時，撘早上七點機飛去台北，最後得出結論是撘尾班機場巴士到機場睏一晚再上機。誰不知道朋友仔竟然係出發前個晚約左佢 D 舊同學晚飯，佢重要未執過行李之餘早一晚還是返通宵更，係咪黐咗線？咁都算啦，咁佢講到話機場見，咁我都費事做電燈膽阻住另一對拖友，自己夜少少先撘機鐵入去。點知失驚無神友人竟然趕到 A10 尾班車而唔通知我？！我真係 O 晒咀 ... 好在我諗住早少少刷牙換衫，唔係就一定趕唔切。結果就係拎住件行李跑去巴士站，大家無睇錯，係拎住件行李！諗住近近地無乜野帶就用個細行李喼，因為太細，所以拎住跑方便過拖住跑。最後比我趕到班車，當然全程黑面勁嬲，嬲點解唔可以講聲話有機會趕到車呢？少少交帶都唔可以？係到機場先破冰。洽下醒下就夠鐘 Check-In，基本上我都無乜點睏，相反其他個三個又好似睏得幾好咁。

排左陣隊 Check-In 完就到大快活吃早餐 ↓



來了！來了！要跑了！ 明明就預夠時間往登機闡口，但唔知點解 D 時間就無晒，可能吃早餐期間吹水吹多左。好在過海關都算快，一過海關就拔足狂奔百幾二百米到闡口，雖然唔係話撘過好多次飛機，但人生第一次 Final Call 先到闡口登機 ... 好在阿叔平時勤練功，唔係未出發先斷氣。

由於睡眠不足，坐落無耐飛機未飛已經睏著，飛機餐當然無乜好吃，無理繼續睏 ... 如是者一粒鐘到就到桃園機場。出關後到找換店換錢，3.718，同香港換差唔多。慨歎港幣好唔值錢，幾年前都有 4 ... 唔知乜事，換錢都發生騎呢野。話說原本計劃係我倆每人換 $3000，共 $6000。朋友仔比左疊錢我揸住先。另一對小情侶幫忙換錢，所以我將自己個 $3000 和朋友仔個疊錢轉交比對小情侶，無幾耐個對小情侶問我係咪換 $6000，我說是。與此同時，朋友仔發現疑似跌咗錢，當我倆搵緊錢既時候，小情侶拎住一大疊台幣回來，真相亦解開。原來當時朋友仔剩係比疊錢我揸住而個疊錢佢無數過，個到就係 $6000！咁當小情侶問我係咪換 $6000 既時候，我既概念係我 $3000 加朋友仔 $3000 就係 $6000，點知原來小情侶係想問我係咪我一個人換 $6000 … 當時太攰了，沒有甚麼好說 … 無語問蒼天 … 跟手又突然好順利撘到車返去市中心，到酒店放低 D 行李就去搵食。到了酒店附近的日本餐廳 Lunch，豬骨拉麵、味噌拉麵、炸雞拉麵和牛肉飯。一般般、淡少少 ↓



食飽過後往捷運站撘車，撘之前替張悠遊卡充值，跟手就往動物園去 ↓



出發前都有留意近期台灣既天氣，就係勁多雨 … 開頭都擔心會落雨落唔停，點知陽光十分普照。唔好睇呢張相好似好多雲唔曬，其實曬到暈 ↓



一入去就見到美腿 ~ 睇下幾多紅鶴 ↓



曬到暈 … 行去坐「小火車」，NT$ 5，伴企既企鵝 ↓



如是者就行到去睇龜既地方，有真既大龜與假的大龜 ↓



入到呢度就展開唔係睇龜就係睇蛇既旅程， ↓



展品眾多，不過來不多龜、蛇、蜥蜴。呢隻蜥蜴就夠霸氣啦，勁似美版哥斯拉。唔好睇佢 D手腳肥到脹起，我深信呢 D全部都係肌肉↓



另一邊廂鏡頭一轉，見到緬甸巨蟒打呵欠，都幾壯觀，不過都幾恐怖，差唔多張開到 180度 ↓



睇完真蛇睇下假蛇，入到去先醒起原來今年係蛇年 ↓



離開有冷氣既兩棲動物爬行館，期間經過企鵝館，無乜野睇。之後就開始進入非洲草園區，以下為精選動物，有班馬 ↓



呢隻鴕鳥都幾搞笑，隔住塊玻璃伸個頭出來望我地。鴕鳥真係好大隻，雖然佢地主要吃植物，但如果係野外見到鴕鳥都咪話唔嚇死，當然野外見到任何大型動物都會嚇一跳。鴕鳥腳望落去都知好有力，睇 Wiki 話原來鴕鳥係陸地生物中有最大的眼球、還有濃黑的眼睫毛 …女孩子們，鴕鳥不用化妝已有大家渴慕的大眼濃密眼睫毛 ↓



一堆山羊，唔知點解會諗起摩西 ↓



話分兩頭，話說係唔同欄內都見到同一隻動物，開頭以為唔通佢係用來作食物，望真 D 又唔係喎！佢好醒咁飛去唔同欄區搵食 ↓



森林之王！金鋼！太有霸氣了！望落佢對眼真係好有靈性，見好多人望住佢既時候，佢識得拎起麻布袋走去 D 較隱蔽既角落，成個人一樣 ↓



行過無耐就見到有一班藝術家替度牆加上畫作修飾 ↓



再來有趣動物，呢隻唔知乜猴，總之唔係足金金猴。佢又係好醒，識得揀食物來食，當我地好奇地想睇佢點食雞蛋既時候，佢專唔揀來食 ↓



再來臭到爆既白犀牛，唔好睇佢腳短短，跑起上來可以好快 ↓



睇返相原來上次來台灣個陣影到樹熊的正面，今日就睇唔到了，剩係比得個背面我睇 ↓



如是者去家禽區遊覽，見到一隊鴨兵團，Saving the Private Ryan，都咪話唔搞笑↓



近年大熱的草泥馬，人地應該叫羊駝 ↓



還有十分臭、D 口水已變濃稠泡沫的駱駝 ↓



一見到麥當勞叔叔當然要同佢影張相，不過呢個造型咁古怪既 …↓



如是者在精品店買下精品打個轉涼下冷氣就撘捷運離開了，無啦啦對家耍功夫。佢兩個情侶裝示人，戴埋頂帽勁似職業特工隊 ↓



之但係當中發生一段小插曲，話說台灣捷運不准飲食，但流了勁多汗的我倆想話吃粒糖補充一下體力。由於列車是無人駕駛，所以有位職員在車廂內當值。開頭我倆還研究緊個位職員會好悶無野做係油位；轉個眼就見到車廂內有不准飲食的告示，還要罰款最高 NT$7500。話口未完，個位職員走埋來拎了張紙巾給朋友仔。我心諗佢唔通見我地多汗叫我地抹下？！原來係朋友仔個粒糖還未食完 ...朋友仔說這些行為似係大家考試出貓，我無比人捉到而佢就捉到應一應，我唔應該恥笑佢。但我並唔係這樣想。偷食都唔好咁明目張膽，食快 D爽手 D 嘛 … 我就一早吃完個粒糖。好在無罰錢，如果唔係換多左個 D 台幣就咁就無晒。

好快就返到去酒店 Check-In，住係台北車站附近的 See You Hotel。唔識行的話都好似有多少距離，但行熟左就發覺其實都幾近幾方便。由於遲訂機票的關係，機票貴左幾百，依家連四晚酒店要兩千八。揀呢間酒店最主要原因係較平而且地點方便。兩間 Double 房，雖然話係 Double，但係比先前住的 Double 房大小 Double了，小情侶個間房就稍稍細少少 ↓



有張書檯，房間都 OK 光猛，小情侶說剩係開床頭燈都光到唔洗開其他燈。尚算乾淨，當然有進步空間 ↓





稍作休息便到酒店附近買外賣回房吃，決定來我倆的房間吃。問小情侶為甚麼，他們說 D 味就唔會留係佢地房，哈哈。酒店附近都有幾檔有 D 名氣既小吃，買了牛肉麵、繼光光炸雞和炸尤魚鬚、台式飲品、胡椒餅 ↓



牛肉麵比想像中好吃！特別係吃錯別人點的那碗就更好吃！炸尤魚鬚比炸雞好吃，胡椒餅熱辣辣都好好吃，不過皮餡比例略嫌餡太多，唔夠皮吃。Day 1 最後合照 ↓



好似十點零就睏了，太眼睏，差不多以通頂狀態、烈日當空下玩了一整日，唔頭痛唔暈已經算係唔錯！


附上 2007 年往台灣木柵動物園當日的遊記： [Here] 。


That’s All.

由十二月頭已預約一月要聚下、吃個飯，光陰似箭，話咁快就來到這天。先來同友人去吃個好 Lunch ↓



來了兩個燒肉 Set，正！牛肋肉、牛肩肉 ... 其中有一種好吃 D，不過分唔到係邊款。在席間繼續談「朋友」這個話題，今次集中「定位」、「結識」這兩部份，傾左兩個幾鐘。究竟是性格影響識到甚麼朋友，還是因為朋友令到自己性格有變，仍是互相影響？在我的角度來看，我清楚明白自己的性格、特質，在結識朋友上自自然會「過濾」一些與自己不夾的朋友，做得朋友的是夾得來、精心挑選（註：字詞形容不太好）。這樣一來會容易 D 熟，同時自己不會有太大的戒心。或者因為咁，自己看來好似很多朋友也很熟。但自己細心一想，最近期識又較熟的朋友都已經幾年前識 ... 同埋背後自己都好主動「做 D 野」去保持聯絡。之但係又係咪因為做左 D 乜野而令到大家熟呢？或者都係，不過最重要都係「主動」，如果以無理由下下都係自己主動的心態去約人，或多或少已經失去了相聚的機會。正所謂「真心莫計較，計較就別真心」，真心交朋友不用計較太多吧，計較就難有真心朋友。每段關係都會有高有低，在高的時候好好珍惜；在低的時候也不必氣綏，控制自己的舌頭，或者對方只是有太多事情處理而無時間，送上慰問、耐心等候待煩人的事處理好後關係就自然會高。這也不是說要不離不棄的與朋友交往，始終一段關係的維持係要多方的努力，單方努力始終難辦。除此之外，每個人在不同團體或群組會有不同的角色，假如自己在某群組的角色慢慢矇糊、改變而自己又未能適應，便會漸漸退出該群組。

講到呢到先，埋單過後往 Uniqlo 買多少野，之後去影貼紙張，其實都真係貴貴地，不過影出來的感覺係唔同 D。原來依家 D 貼紙相機有 Apps 可以 Download 返影過個 D 相 ↓



如是者就往尖沙咀食晚飯，到了 Pizza Express。訂 7:00pm、8:30pm 交枱。點了一個六人餐，不用多想。本身個位望到海景的，可惜有船停泊在碼頭阻擋整個海景 ↓



其中一位朋友仔就黎生日，買左個「彩虹蛋糕」，就咁睇都真係幾靚 ↓



切開就係咁，有五層。當然無廣告個個咁「理想」。味道 ... 都 OK 既，係 D 生果有 D 酸，當試新野咁都 OK 的。不過可能人數上較少，每人分到個份蛋糕都幾大件，食落都有多少膩 ↓



在晚飯期間尾段又帶起另一段對話，是關於情侶間之相處。長話短說，幸福並不可能由單方面給予對方，而是要雙方努力才可以擁有。當吵架起來的時候，是不是代表不愛對方嗎？不是！只是雙方「上火」才會這樣吧。在那時也要冷靜下來，控制自己舌頭。要接受對方並不是自己，就算怎樣愛怎樣包容也會出現意見不同的時候，可以不認同但要尊重對方的想法，嘗試了解得出當中結論的邏輯。久而久之便可以做到切身處地，當然需要很長的時間和練習。還有的是 ... 對方為自己所做所付出的，並不一定是眼所能見，手所能觸，是要用心來感受。留意多一點對方為自己所做的，當然係正面欣賞而不是小心眼。

正如朋友仔所說，今晚的聚會不論是組合、討論的內容也讓時間過得很快，珍惜與大家相聚的時間。謝謝各位，每位都是主角，雖然我企係中間 ↓




最後最後，謝謝妹妹般的朋友在回程時所說所做的！

總結全日，由下晝兩點講野講到深夜兩點，十二小時，真係唔講得笑。



That’s All.

十一月尾十二月頭有好多大大少少事情的發生令我感到好大壓力，期間試過超多減壓方法，以下是當中一些「方法」↓



先來講講壓力來源，最大的肯定來自 Assignment，當中有兩千字的 Short Essay 與及三千字的 Long Essay、以及 Project Presentation。前前後後讀左咁多年書，對趕功課呢樣野可謂身經百戰，真係驚都未驚過，但今次都真係有多少淆底。至淆既地方係對呢份個兩份 Essay 真係零頭緒，想借書做都唔得，因為真係唔知做乜。另一份 Project Presentation 講就講到好簡單，實際上又唔係，再加上遇到阻滯，真係嚇到心都離一離 ... 其次就係與人相處產生了磨擦 ... 呢個對我來說都有 D 壓力。跟手可能係見自己明明可以及早開工做功課但又做唔到個下好炆自己，又有壓力。

呢 D 壓力帶來的最大的影響「睏唔安、食唔落」。「睏唔安」講緊其實個人都已經好攰，好容易入睡，但係睏左半個鐘至四十五分鐘到就自自然醒左，之後就睏唔返。呢個情況都維持兩個幾禮拜，當然唔係晚晚，不過每個禮拜都有幾晚到。真係人都癲 … 整個感覺好似係坐巴士，睏到半個鐘就自然醒，唔係就會睏過龍落唔到車個隻。醒左之後又無啦啦會思考人生大事，如是者該晚無三四點都睏唔返。「食唔落」就係除左無胃口食野，還有就係一食多少少就想嘔。例如平時一碗飯，吃到一半時就已經唔想再吃，試過幾次想吃多啖飯，想吞個下就有種想嘔既感覺。

為左解決「睏唔安、食唔落」的問題，試過好多方法，初頭試過播音樂聽住睏，跟手試過戴眼罩睏覺，諗住係窗外既光影響睡眠，呢兩個方法開頭都管用。但過左段短既日子就失效，始終解決唔到睏左一小陣就醒既問題。跟手就試過吃 Piriton 諗住可以昏睡，點知都係入睡容易續睡難！還有試過臨睏前噴兩下 Night Spray，希望可以睏得好 D，但都唔係 100% 有效。繼而就再諗下有乜影響睡眠既事，試過臨睏前一段時間減少使用電子產品、熄電話睏覺，其實算係比較有效而唔傷身的方法，至起碼夜媽媽醒左想用電話都多幾重功夫！坊間又流傳空氣淨化機能讓室內空氣變得較「乾淨」，所以又買了一部好讓自己夜晚睏得好 D。之但係部空氣淨化機結構都比較簡單，實際較果如何也不知道，不過使用過後到現在的確感覺良好，少了病。

除了以上針對睡眠的方法外，試了些針對身體的方法。試過睇中醫去調理身體，醫師說「脾胃不和、睡不寧」，吃完幾服藥有返少少胃口。另外個排晏晝會飯都唔食或者食少 D食快 D，其餘時間就襯有陽光既時候衝出去散下步曬下，感覺係幾好既。我飲豆漿、食香蕉希望可以舒緩緊繃感、令到日常工作可以集中些，特意買了維他命B雜增強效果。本身豆漿、香蕉都係健康食品，咁多吃也無壞既。維他命 B 雜就感覺唔到有甚麼大分別，係小便黃了。減壓離不開購物，心血來潮買了一套 Soundbar 給自己作「聖誕禮物」！開頭無諗過換，不過用緊個套 mini Hi-Fi Speakers有少少接觸不良，間中會由雙聲道變單聲道。再者個期因為壓力大所以玩多左 PS3，覺得無套好少少的音響好像有少少缺失。如是者上網睇過幾款 Model，最終就買左 Samsung 呢套，感覺真係幾點同。與此同時，把心一橫換埋電腦張 Sound Card，換左一張有光纖 Output 的卡。為左張卡，搞到買多左條 8GB Ram，變左 16GB Ram ... 其實這沿自一個疏忽，真係浪費晒 D 錢！

大家有所不知，其實我有一個「愛人家」的 Whatsapp Group，睏唔著的時候大家會傾下計互相扶持下！想不到初初的「七點翠園」Group 竟然有這的轉變，哈哈！但講到尾，最有效的方法是找尋壓力源，繼而想辦法消除佢，壓力就自然唔見晒 ... 點解我咁講？當我交完個幾份功課後，個人真係鬆左超多，起碼夜晚無紮醒得咁密 ...



That’s All.