泰國摸摸骨之旅 Day 3
今朝比之前個日早少少起身，本身想話去享用一下酒店設施，不過其實時間都唔係話好多。先來當然係吃個早餐先，今日呢餐比前日的豐富，可能之前個晚吃得唔好掛。今次朋友仔終於叫到佢既炒蛋吃，正、而我都係吃我最鍾意食既牛奶粟米片 ↓
除左有好多西式麵包之外，還有一定數量款式既中式包點，不過就無提供甚麼工具比人去夾。個個都辣住隻手先可以拎到個包，失策 ↓
桌上的真花 ↓
吃完早餐就去酒店平台泳池逛下見識下，其實呢個平台細得黎都幾有設計，雖然唔知後面顏色鮮豔又勁高既野有甚麼用途 ↓
回頭看便是泳池和酒店房間 ↓
泳池就是這樣，係咪無乜特別呢 ↓
認為無乜特別既就錯了，呢個泳池以玻璃來間隔開的 ↓
有埋圖教大家去擺 Pose 影 Chok 相 ↓
小庭園還有幾個「小矮人」在草場上奔跑 ↓
由於時間所限，都落泳池玩，返上酒店房。由上面望落泳池的我 ↓
還有一堆易碎的手信要處理 ↓
都算係幾靚聲的 iPod HiFi Docking，之不過臨尾部 iPhone 差 D 卡實在係個 Dock 到，嚇死我了 ↓
話咁快就離開酒店，係酒店門口影返張相 ↓
Check-Out 過後其實都馬不停蹄，到附近的商場打左個快轉，買了 Hand Cream 咁。飯都無食就去做今次泰國遊既第二次 SPA，今次都算算地係 Thai Massage，真係會幫我地拉筋、拍下骨，都咪話唔恐怖。平心而論，上一次 SPA 做得安心又舒服 D，之不過個環境都算 OK 既 ↓
做左兩個零鐘，真係餓唔係講笑，咁就返返去酒店 Café 去 High Tea，也是旅程一開始吃蛋糕個個位 ↓
點了個 Set B，飽就無可能飽架喇，不過叫做有 D 野食落下肚頂住先 ↓
Woody & Latte↓
呢個 Tea Set 都有 D 派頭架，唔好講笑，而味道亦比想像中好，值得推介。其實本身諗住去四季酒店 High Tea 架，不過無時間 ↓
吃完之後都早少少 Call 的士入機場，人在異地坐的士，少不免都會加幾倍小心，今次同上次都一樣影低左的士司機既相關資料。不過呢個司機都唔錯，無兜路之餘幫我地揀左條唔塞車既路線，幾好 ↓
話咁快就去到機場，Check-In 之後去搵食，行過幾間睇過幾個餐牌都唔係話特別岩食。最後想話有 D 米氣落肚，到了這間 Lee Café 既食肆吃，個餐牌都幾得意既 ↓
雖然就細碟 D，但其實味道都算唔錯。有這個菠蘿炒飯和芒果糯米飯 ↓
之但係為左慳個一毫幾分，無叫到椰青飲，到了其他 Food Court 類既地方買。味道唔太好，開頭以為佢開個椰青開得衰，漏左 D 椰青水落個袋，想話搵支飲筒飲返佢。點知 … D 水勁苦，仲要有少少啡色，真係反晒胃。勁想嘔，但又嘔唔出，最後唯有狂飲水沖啖。唉，早知就唔貪平唔貪心啦 ↓
入闡後上機前見到有 Mister Donut，特登買左兩個吃。不過呢到既 Mister Donut 同之前日本、台灣吃個 D 有多少唔同，佢個面勁 Cream，食得好「論盡」… 總之就煩啦 ↓
最後上到飛機都有個飛機餐吃，不過先前吃飽了，依家都無乜胃口吃 ↓
如是者，財散人安樂 …今次泰國遊係無乜點吃過特別好食既野、無乜點睇過名勝，剩係記得做左兩次 SPA 既情況下完結。寄望下次布吉或者蘇梅陽光與海灘之旅！
That’s All.
Created On 03/05/2013 21:12:04
泰國摸摸骨之旅 Day 2
朝早晏一晏先起身，爭 D 早餐都食唔到，之但係落到去 Lounge 都仲有 OK 多野食喎。平心而論，呢間酒店既早餐 Buffet 真係幾多款，剩係以麵包來說都算多款 ↓
第一 Round 就係咁，其實都唔係話食得好多。有我至鍾意既牛奶粟米片，正。話分兩頭，呢隻太陽蛋叫 Fried Egg，而唔係朋友仔既 Scrambled Egg，哈哈 ↓
吃完早餐就過左酒店附近既 NaRaYa 行下買下野，行左十分耐，都差唔多行左成個晏晝，個零鐘左右。之不過，間鋪又唔係真係話好大，可能酒店個區多日本遊客下榻，鋪內都有不少日本人。買了幾個小袋、一兩個大袋就返酒店放低 D 戰利品同「換褲」！點解無啦啦要「換褲」呢？原本諗住去大皇宮睇下，遊客要參觀就要著指定服式，而當中男性遊客就要著長褲。本身諗住去大皇宮參觀，不過時間不早之餘而且天氣真係好熱，所以就取消了。去了附近既 SPA 預約時間，跟手就返酒店拎返 D 凍點出來降降溫 ↓
吃完凍點 Hea 左陣就出發往 Central World 搵食。話近唔近，話遠唔遠，要撘這些架空列車 ↓
原先諗住 Central World 呢 D 大商場一定好近鐵路站，點知原來唔係，行左十幾二十分鐘先到，遠到媽媽都唔認得，至衰天氣熱，D 汗不停咁流出來，真係陰公豬。有志者事竟成，終於行到去。去到商場內 D冷氣撲出來，呢 D 真係爽皮啦！去到戲院附近，有Iron Man 3 Cosplay睇 ↓
呢次企定定比大家影 ↓
哈哈哈，未來泰國之前已經睇左啦！戲院都有 D Iron Man 既裝甲 Display，不過我覺得頭先真人個款既裝甲型 D 同 Fit D 咁 ↓
睇完 Iron Man，係 Supermarket 行左個轉就四圍兜四圍搵食，行啊行、行啊行，終於行到去心宜食肆 – Mango Tree Bistro ↓
週末晚上應該有 Live Band 表演吧？有室外和室內，熱到就死既我們當然坐室內。當刻無乜人就好似好鬆動，之不過如果坐滿晒人的話，都咪話唔迫狹 ↓
點了以下這些，有個菠蘿炒飯、蝦多士和沙嗲串，還有兩杯凍飲，一杯椰子味、一杯士多啤梨味 Colada。飲品是 OK 的，不過其他食物就一般般啦，名過於實↓
吃飽飽之後又係商場內逛下、逛下全亞洲最大間既 Uniqlo，不過其實只係將同一款商品由一列貨架增添到兩列，有多少取巧咁啦。跟手路過 NaRaYa，嘩！多人到呢，和晏晝他他條慢慢行既情景完全唔同，在這裡完全無心機行無心機買野 ... ↓
行完 Central World 就到附近既大 Mall 繼續行下，BigC 都真係幾 Big，不過裡面賣 D 野都貴貴地，買左些少食得既手信。話分兩頭，Mall 與 Mall 之間都有 D 佛像供善信參拜，這個是四面佛嗎？不清楚 ↓
買完野補給完，行多幾行就坐船仔到曼谷版漁人碼頭，位於湄南河旁。整得咁靚，當然係做遊客生意，其實都睇中左某 D 產品，之不過想話講價，但係一蚊都無得減，咁就無買到了。個 D 咬死皮既魚都幾搞笑，其實 D 魚係咪唔洗餵魚糧，剩係食死皮就夠呢？其實都真係幾唔衛生 … ↓
在泰國，好似比較少多 Coca-Cola，取而代之既就係呢隻叫 EST Cola 既本地牌子。味道當然有少少唔同，不過都唔理得咁多了，天氣熱唔飲幾啖汽水點得掂呢↓
這個漁人碼頭既名稱就叫做 Asiatique the Riverfront，雖然下半部份既字 D 燈壞左。呢個碼頭係 1907 年左右到出現，為既係提升當地既國際形象。言歸正傳，本身呢個構圖呢個光線都幾有情調，之不過就有個唔通氣既遊客企定定係度 … ↓
呢間應該係間酒店，本身都想話住係度，之不過 D 交通好似唔係好方便咁，所以唔住佢了 ↓
日落西山，地標之一的摩天輪，呢個摩天輪個 Size 一般啦，都 OK 既。不過當日就唔係好多人上去坐，唔知係咪因為貴呢 ↓
由於盤川有限，食唔起碼頭範圍內既食肆，咁就撘返船去市中心。在這個 Siam Square、Siam Paragon 之間遊走，都分唔到邊個打邊個，應該去左 Siam Square 裡其中一間都 OK 頹既拉麵店食左兩碗麵，唔好食既 … ↓
吃完麵補充體力過後再後附近行，比我地行到去 Siam Paragon，呢個商場就真係大啦，有好多食肆又有 Food Court，極多選擇之餘望落都岩食。可惜 ... 我地已經食飽左呢 ... By the way，Siam Paragon 內有個「好大」既水族館，太貴，無錢入去，之但係有錢都未必會入去，哈哈 ↓
雖然無閒錢食貴野、之但係都有少少錢買左個普普通通既蛋糕 ↓
個蛋糕係咪好普通呢？都唔緊要，都叫做有個蛋糕切下賀一賀生日，時間真係 Fit到無得再 Fit 了吧 ↓
如是者，今日 Hea 下 Hea 下流下汗咁就一整日 ... 話就話 Hea，之不過今日都 OK 辛苦。
That’s All.
Created On 02/05/2013 23:46:23
泰國摸摸骨之旅 Day 1
有時懶開就懶，勤力開就繼續勤力，見之前台灣遊記快快手個零兩個禮拜就打完，再來回帶打返之前既遊記。今次係「泰國」。本身今段時間就無諗過去旅行，剩係想話賀一賀朋友仔生日，之但係去迪士尼過一晚要幾千銀、去澳門過一晚又要多幾千銀，計過度過不如去個短短既旅行啦，順便賀一賀我做完份 Research Project。如是者就放左三日假去泰國走轉喇。由於我地遲作決定、機票貴左之餘，二來預備既時間都不多不多，我份 Research Project 唔係 Extended Deadline 既話應該就交左，咁 Extened 左當然就未交住，不過其實都做得七七八八，所以都好放心咁去。去之前一晚朋友仔還要返通宵更，我當然不滿，應該射個靚波吧。由於今次既旅程比較短再加上朋友仔要返工，所以朋友仔一早交低件行李比我再加埋我 D 衫褲就起行。我地今次撘九點機，所以天矇光我就出發撘首班機場巴士往機場去，唔係講笑，都幾多人。朋友仔就放六點左右，出中環再撘機鐵。理論上我會早到，所以我去 Check-In 先，成件事好完美。之但係 … Check-In 個陣 Counter 個位職員唔比我出晒兩張機票，我剩係拎到一張，另一張要等朋友仔來到先可以出得，點解會咁既呢？點解呢？好啦，都無辦法。點知朋友仔話機鐵信號故障，要轉撘接駁巴士。有種預感，唔係咁順利 ... 朋友仔終於來到，大家唔夠睏又唔太順利都難免面黑黑，輾轉再排過隊 Check-In 過，總算可以坐相鄰位。吃個大快活早餐就走人。
上到機，未起飛已經睏著左 ... 上到機無耐就派早餐，賣相麻麻但又幾夠味，竟然食晒 ↓
呢間娛樂系統之前比較少見，撘得飛機少，哈哈。睇左大半套「海嘯奇蹟 The Impossible」，故事係 ... 一家人在泰國經歷大海嘯、失散 … 尋親 …係咪有少少唔吉利呢？百無禁忌 ↓
飛左幾粒鐘終於飛到泰國，至印象深刻既係 … 過海關過左超耐，發生乜事啊，洗唔洗慢到咁。真係好似唔願做，慢慢慢慢咁 Chop 個印 ... 出關拎行李夾埋都應該有成個鐘 … 係機場坐的士往酒店去，期間個位的士司機講左幾句唔似英文既英文，明與唔明之間，總知要比高速公路費咁。人生路不熟、言語不通，加上世途險惡，所以都有影低司機資料，萬一有乜事都搵得返個人。去到酒店兩點半，真係餓死我，還記得朋友仔同我講，一落機就食 Lunch，朝早唔洗食咁飽 … 呢盒爆谷都食左唔少，太肚餓了。不過隔離粉紅個杯茶唔知乜黎，味道怪怪地 … ↓
由於無散錢比的士錢，所以就去酒店 Lobby Reception 先，期間有位 Bell Boy 話可以幫我地拎 D 錢比司機。席間我都估到個位 Bell Boy 未必會比返 D 零錢我地，所以都唔敢比多佢，好似剛剛好多 20 Baht 到。Check-In 個陣我倆仲係度討論究竟個 Bell Boy 會唔會找錢呢？到最後上去房之前都無出現過。言歸正傳，我地入住既酒店係 S31 Sukhumvit Hotel↓
酒店房又唔係想像中咁貴，其實以這個房既間隔、設計都算物有所值，有 D 特色咁。睇睇張床，大到呢 … 真係 King Size，還是 Double King？就咁一張好大既床當然沒有甚麼特別啦，大家睇唔睇到還有甚麼特別呢 ↓
係咪見到有盞燈呢？無錯啦，今次入住既酒店房是複式房，有兩層的。由上面一層望落去就是這樣，有長長既落地玻璃、還有張長椅 ↓
上落就係隔呢條樓梯，其實都好易仆死 ↓
上層洗手間連浴室，個幾級樓梯係更加易仆死，有度巨門可以拉埋隔開浴室同張床。話分兩頭，坐廁旁是一盞燈，點解呢度會有盞無插電掣既燈呢？我唔係太明白↓
客廳，右下既啡色門係另一個洗手間↓
Bar Table，有個有冰格既大雪櫃、又有微波爐。至開心就真係個部 iPod Docking，叉住電播歌，很好很有氣紛！Cause there'll be no sunlight, If I lose you, baby. There'll be no clear skies, If I lose you, baby，正到爆。話分兩頭，真係好貼心，個Snacks Corner 有安全套，果然 Play Safe ↓
酒店對面是另一間酒店，另一邊地盤工地都似係會起另一間酒店 ↓
攤起長椅抬頭向上望，都幾寫意 ↓
稍稍 Refresh 過後都下晝兩點幾，都餓到唔餓了，但都要食 D 野。去了酒店 Lobby Lounge 一人吃一件餅打個底，再加杯 Latte。唔敢吃咁飽，因為 Book 左三點半去做 Body Massage。以下呢件係 Green Tea Mousse ↓
一出酒店就真係熱到傻 … 真係幾熱喎唔係講笑。行去做 Spa 之前路經找換店，看到匯率之後沉一沉，係機場換貴左。天氣熱、唔夠睏，少不免大家討論幾句。轉個頭就行到去 Spa Centre，揀了 Spa 2 Package ↓
呢類 Spa Centre 同之前係酒店既 Spa 有多少唔同，細間 D、無咁 Grand，但價錢真係平好多，依家係買一送一，4000 Baht 大約港幣千一，但做成三個幾鐘，都唔錯啊！Body Scrub 幾神奇，捽下捽下捽左好多死皮污垢！之後 Full Body Massage 當然爽！沒有泰式 Lock 頸做得特別安心！間房是這樣，唔係話好豪華，但都企企理理 ↓
唔賣廣告，就係呢間，哈哈，有三間分店 ↓
做完 Spa 都唔早了，到了附近商場旅遊書推介的 GreyHound Café 吃，吃新派泰國菜。食物就有少少驚喜，特別係個龍蝦汁意粉、炸雲吞都好香口，反而再叫多次就唔會叫個炸海鮮拼盤，麻麻地至唔好吃。杯檸檬茶既冰係用返檸檬茶黎整，咁 D 冰融左杯檸茶都唔會變淡，但係 … 我覺得係噱頭黎唧，反而杯西瓜特飲唔錯啊！返到黎香港先醒起香港都有得吃 ↓
等位等左一段時間、等食物又等左一段時間，等到勁頹 ↓
吃飽飽就慢慢行返去酒店，係 Lobby Lounge 臨收鋪前再買了兩件餅做甜品，Very Good 啊！再播住歌傾下計，太有情調也 ↓
如是者，Hea 下 Hea 下無乜特別就過了 Day 1。明天再續！
That’s All.
Created On 01/05/2013 20:49:29
台灣跑到癲之旅 Day 5
不經不覺已經來到旅程既最後一日，今朝話早唔早出門，本身諗住朋友仔起唔切身我就自己出去行下打個轉，朋友仔又起到身咁就一起出發。與此同時，隔離房個兩位九點零 Send 個 Message 來話唔出去吃早餐，遲 D 見。好明顯，佢地想睏多陣 ... 如是者，我倆就出去 KFC 吃早餐。早餐有六個餐揀，有粥吃、有酥皮多士等，但都係尋日個款「吮指嫩雞堡」唔似伏，所以都係揀翻佢 ↓
本身其實打算早 D 起身去車站維格買鳳梨酥，但時間唔多，所以吃完早餐之後都返酒店。每日一乳酪，便秘遠離我。台灣好似無乜品牌選擇，見唔到 Emmi Swiss Yogurt，最常見既係這款「林鳳營」牌 ↓
飲完乳酪 Check 清楚無漏野就過隔離房匯合，年輕人係亂少少，加上房既冷氣唔係話太夠凍，有 D 似熱帶雨林咁，來個 Snapshot。佢地爭 D 漏左件衫係衣櫃，好在我多少開來睇下 ↓
由於遲左出發，所以都要急急腳去車站賺返 D 時間趕車。烈陽當中的小情侶 ↓
原先上網找到班車會途經「鶯歌」，但去到車站都趕唔切。經過票務職員講解，可以撘密 D 既區間車，同埋平 D。呢幅圖寫住幾款唔同車，唔同既車名代表行車速度的不同 ↓
買完區間車車票後有 D 時間，咁就過去隔離國光巴士睇下去機場穿梳巴士既班次，咁都密既，每十分鐘有一班。睇完安過心之後朋友們買了壽司外賣吃，如是者就上車往「鶯歌」去。一早起身大熱天時跑左一輪，到最後發覺，嗯，原來唔洗咁趕喎，都明白大家心情是怎樣，所以大家係車上抖抖，休一休。去到鶯歌出闡後找了個位，大家就開餐吃幾舊壽司。吃完就出發，影下地磚 ↓
香港早前麥仔晚上有飯賣，台灣係晏晝已經有 ↓
如是者一行人行去鶯歌老街，沿途經過個人護理用品店，同行的女士在這買了好多好多好多盒面膜 ... 係我錯，我唔應該叫大家入去睇下。再經過一間賣袋的鋪頭，同行的女士又買了袋子，係我錯，我唔應該話睇岩就買喇。一袋二袋咁行啊行，就行到去某間陶瓷體驗的店鋪。開泥 ↓
聽聽講解與示範 ↓
每人有兩舊泥，任揀其一，或者要晒兩舊再加燒。燒陶 NT$ 250 一個，加燒 NT$150，另外再加包裝 NT$50，運費自付。咁價錢都 OK，格局都幾企理，至緊要夠光猛之餘又有冷風機，Good！我其中一件簡簡單單的作品，本身有隻碟整得幾好，點知自己多手繼續搞，點知散左 ... 唉。不過就真係幾好玩既，玩完洗下手就走得，唔洗自己執拾 ↓
小情侶其中一件作品「Honey」↓
其實呢個「杯」都整得唔錯，不過小情侶 D 錢洗得七七八八所以影低就當整左↓
呢六件就係我地既作品 ↓
搞完晒比埋錢洗埋手都三點幾，其實我地最理想就係五點去到機場。由於時間不多，又要加緊腳步返去。去到呢刻其實未食晏晝，有多少頭暈暈，去到車站吃了飯團再繼續上路，好在唔洗點等就有車。由於我想買維以鳳梨酥、還想買多盒 Mister Donut 同換隻杯返香港，同時又要返去酒店拎行李，我地決定兵分二路！唔跑得唔熱得的朋友係台北車站買 Mister Donut 再係車站內的旅行中心等，其餘的就去酒店拎行李，有三件行李再加一大袋和一小袋。由車站經地下街跑返去酒店，真係唔跑唔知身體好。拎行李時有小插曲，話說大家都買左好多野，都會扔緊 D 野唔拎返香港。我倆就無扔甚麼，有都插晒落 / 放係垃圾筒旁；隔離房的唔知點扔，將 D 唔要既放了在一個膠袋內，但搞笑的是執房以為佢地漏左呢袋野，拎行李個陣比返佢地！？笑而不語也。
拎完行李又跑跳跌踫行去國光巴士站，小情侶就去買車票，我就跑去台北車站與朋友仔匯合，當時已經四點七，撘車要一小時、七點機，即係最遲五點都要上車，唔係跑都趕唔切。之但係，可惜跑到去旅客中心既時候竟然見唔到朋友仔！？OMG，打電話都無用，因為無開電話。咁就跑去 Mister Donut 個邊睇下係咪買緊，又唔係喎，兜左個圈都見唔到，落返去旅客中心睇多次都唔見佢。重複剛才的動作一次，兜多個圈都唔見。明明好清晰話係旅行中心等，大家都聽到，但點解唔見人呢？時間又趕心又亂，唯有在大堂跑來跑去搵佢，最後終於比我搵到，佢企係大堂另一側 ... 佢手上除左 Donuts 之外還有兩杯珍珠奶茶，仲話比我聽車站邊個位有得賣鳳梨酥。講到話 Mister Donut 排晒長龍又搞好耐，但又有時間買珍珠奶茶，我應該讚佢定鬧佢？唔係咁做野架嘛，無語問蒼天。唔理咁多，又跑返去國光巴士站，好在好快就有車。
如是者係車坐下睏下就到機場，我問朋友仔我地登機係 Terminal 1 定 Terminal 2，朋友仔斬釘截鐵話係 Terminal 1。咁去到 Terminal 1 既時候就落車，但發現原來係 Terminal 2 ... 我應該自己睇一睇，朋友仔成日怪我唔信佢、自己問完佢都要 Reconfirm 多次，之但係今次既事教我都係要自己 Reconfirm 一下。都唔理得咁多，推住架行李車就由 Terminal 1 仿如 Formual 1 咁極速跑去 Shuttle Train 再過去 Terminal 2。跑到傻，好在當時無乜人咋，唔係實撞死。阿叔平時練開功，跑完氣都無喘，但係朋友仔就好似就死咁。都叫妳平時練下功架喇！都去到 Check-In Counter 差唔多六點，好好彩唔洗排隊。還有少少時間，咁就趕去機場內的維格買鳳梨酥。不過呢間鋪既職員態度麻麻，同時間鋪都比出面鋪頭少好多款，如果想買維格產品，都係係出面買好過係機場買。維格吉祥物 ↓
買完就過關出境，又好好彩唔洗排隊；更加好彩係 Boarding Gate 都近，更加好好好彩既係班機 Delay 半個鐘。平時 Delay 機就真係麻麻，今次真係 Delay 得合時候，咁就可以係 Boarding Gate 附近影下相 ↓
呢個景幾好，可惜張相晚得矇矇地 ↓
長榮的 Hello Kitty 機，不過唔係我地撘個架。Helluo Kitty 機前個間細機先係我地撘個架 ↓
成日都無乜點食過野，呢餐飛機餐真係好緊要。味道頗濃，岩晒 ↓
係飛機上前面個對情侶睏覺，我地就係後面計清楚條數，計下錢銀咁。期間見到大自然奇景，遠眺機外海面上有雷雨雲，不斷打雷！係幾震憾！如是者一個鐘到就返到香港，拎行李 ↓
拎完行李就係機場翠華吃個正式 D 既晚餐，服務認真麻麻，連最簡單比餐具都做唔好。話分兩頭，呢堆就係今日係鶯歌買既面膜，當中有五盒面膜我放左係我背囊一整日 ↓
十二點左右撘的士回家，$350，快靚正。最後，呢隻就係 Mister Donut 換返黎既杯，都幾靚仔 ↓
五日四夜台北遊到此結束，有與趣可以重溫一下 2007 年既台灣遊記：
2007 年 台灣四日三夜永安遊‧Day 1
2007 年 台灣四日三夜永安遊‧Day 2
2007 年 台灣四日三夜永安遊‧Day 3
2007 年 台灣四日三夜永安遊‧Day 4
That’s All.
Created On 31/05/2013 13:25:54
台灣跑到癲之旅 Day 4
基於行程關係，今天既遊誌預計字多圖少。今天是 ... 「購物日」 ... 相對地，今天都算係比較早出發既日子。十點零鐘就去到酒店附近既 KFC 吃早餐，點解來到這裡都要吃 KFC 呢？原因很簡單，酒店入住包的早餐是 KFC 早餐。酒店職員比 D Coupon 住客，咁住客就過來這裡吃，一家便宜兩家著。酒店慳左預備早餐既工夫之餘 KFC 又有生意做。言歸正傳，四個人都係吃「吮指嫩雞堡」，加杯飲品，換返做港幣就大約十零蚊左右。理想與現實當然有一段既距離。賣相雖然一般兼麻麻，但味道其實都 OK 的。至驚喜個舊蛋係較日式個隻厚身蛋，即係圖中雞扒下邊個舊黃色東東 ↓
如是者，就出發往西門町，我們選擇以步行既方式前往。天氣十分好，熱到黐晒線 ... 不知不覺就在烈陽中行了好一會與，咁就到西門町。期間經過「維格」，入去混下吉，試食下咁就走。諗住之後總會遇到另一間維格，所以都無買到野。話分兩頭，維格隻牛奶太陽餅都真係幾甜，甜得有點兒過份。行多幾步就見到另一間「繼光光香雞」，時間太早，未開門，影雞留念 ↓
接下來所發生既事，過程比較複雜，簡單來說我會稱之為街頭騙案。好啦，話說行到西門町無耐，就有一位身形較胖、曬到 OK 黑既後生女走過來問我地係咪台灣人，由於我同朋友 D 普通話真係無乜兩句，再加上個位胖黑妹講野既語調扮作可愛，其實真係聽唔到佢講乜。故事開頭個胖黑妹就話自己係國中生，要賺學費所以要出來賣野，賣到野佢地就會有加分，加到唔知乜分就會有錢咁啦。如是者，聽又唔係幾聽到、講又唔知點講既我倆全程都無乜好講，加上天氣真係好熱好熱，都無乜心機理會，我剩係記得我話不如比粒糖佢算啦。跟住個胖黑妹死纏爛打，同行既小情侶普通話十分好，和胖黑妹過招。直跳到結局是小情侶幫胖黑妹以 NT$300 買左個煙盒，開頭我仲以為係環保袋、銀包。至衰就係個胖黑妹想話唔找錢屈佢地買多個，好在最後都有找到咋！洋名 M 字頭的朋友說我們馬後砲，都係既都係既，我地唔應該等佢地買完之後話佢地比人呃，應該拉佢走等佢唔好比人呃。
鏡頭一轉，已經十二點零，不過都有好多鋪頭未開門做生意。唯獨是 Uniqlo 開左，咁就入去 Uniqlo 再行一轉。間 Uniqlo 大就大啦，不過其實只係想原本一行既貨重複擺多一行，其實款式就無話多左既。香港、泰國、台灣、日本我都行過，香港最抵！如果貨品售價與當地人銷費能力掛勾，香港人真係窮。涼夠冷氣就去買鴨舌，洋名 K 字頭的朋友買了幾百蚊鴨舌，不過都唔算話好大盒，D 鴨舌都真係幾貴喎！買完鴨舌就繼續行，又比我地見到「天仁茗茶」。今次就試珍珠鮮奶茶，用鮮奶沖，飲落滑少少咁。不得不提就係相中個位阿叔，睇佢真係好用心咁製作杯奶茶，完全係將茗茶個種既茶藝運用係沖呢兩杯珍珠奶茶上 ↓
飲住珍珠奶茶，期間買了女士恩物，轉個頭就去到「西門紅樓」，入去打個轉涼下冷氣買下精品咁。其實就無乜特別野睇，但就唔知係度搞左好耐好耐。原本是市場，之後變成電影院，現在則是小型藝術表演場所，亦因為咁，有著濃厚的創作特色從藝術品 ↓
時間不多不多，趕快吃個午餐再上路。本身想試下吃「蛋蛋屋」的蛋包飯，不過要等廿零分鐘位，所以就走去另一間趕快午餐。去了這間吃意粉的，普普通通無乜特別咁，又唔係難食但就無乜特別 ↓
還有一對煙韌既鹽樽胡椒樽 ↓
係呢間餐廳裡，發生了一件頗唔衛生既小事。話說我地不約而同拎左酒店蒸餾水出去飲，飲完好順手咁放係檯面。明明我就將我支水放得好近自己，之但對面既 M 小組竟然一手拎左黎飲，還要將 D 水倒左 D 比 K 先生。我呆若木雞，來不及比任何反應，當我定晴後才發覺有人飲左我樽水。期間講下無聯野、話甚麼套取我 DNA 等等無耐，M 小姐忍不住笑，將口內個啖水好似園藝用既水壺咁向住我和朋友仔噴出來 ... 避也避不切，一臉無奈 ... 事後當然要用嬌生嬰兒純水柔濕巾（棉柔加厚型）來抹抹。
吃飽之後繼續 Shopping，一伙兒到了某商埋內的「富發」鞋鋪睇鞋買鞋。在這裡都睇了十分耐，百零蚊到鞋，著到幾個月都夠啦。不得不提，由於唔係每款鞋都有合適的尺碼，朋友仔語重深長講左句「買返屋企既通常都未必係自己既首選」，我十分認同！如是者大家一袋二袋又走去「港記」買鳳梨酥，其實都剩係我同朋友仔買唧，個類小情侶都無買。不過佢地推介鋪頭賣的紐約芝士餅，係鋪頭內吃真係幾好味，夠凍夠硬身，咁就買左一盒打算之後係酒店吃。途經一間賣豬肉片既小鋪，鋪頭賣既豬肉片都幾香口，唔覺唔覺會食左好多個隻來的。以下就係全日既戰利品 ↓
係我地影緊呢 D 無聊相既時候，又有另一位年輕人走來問係咪台灣人，好明顯又係同今朝胖黑妹一黨的，我地當然無理到。返酒店既途中，朋友仔買了一把自動縮骨傘，港幣八十幾九十蚊到。齊晒所有野之後就返去酒店稍作竭息。抖左陣又出發往台北 101 去，去到附近既捷運站可以坐穿梳巴士到 101。不過等左好耐又好耐先等到有架穿梳巴士，去到都只可以睇到夜景，錯過了黃昏。都唔緊要，有車都好快既，點知架巴士不斷係外圍繞路 ... 老老實實，計埋等車既時間，行過去一定比等車加車程快。不過都唔緊要，今年內將會有新捷運站係台北 101 旁。如是者，就上 101。四張飛夾埋 NT$ 2000，連埋 D 無乜用既 Coupon ↓
入去之前要先穿過幾間鋪頭、影埋張相先可以撘電梯上去。相就唔會特別去買，但會特登停係度影住電視 Show 出黎既 Sample，幾經辛苦終於影到！上到去 101 時天色都已經黑，先來歡迎大家的有這隻 Damper Baby，原型是一個風阻器↓
呢幅 3D 圖都幾有趣，一個角度睇會係 101 座建築物、另一個角度睇會係個 1字 ↓
既然咁有趣，當然會影相留念一下 ↓
其實由 101 望出去，個天都未黑齊的，可惜我影呢幾張相有少少震震地 ↓
來到精品店，至搞鬼的有得買一座 101 返去，不過都幾貴。所以影左相當買左↓
花了 NT$ 500 買了三個 Token 來影貼紙相，我們兩對各影兩張，再來一張大合照，比大家睇下，可惜比我遮晒樣 ↓
What we are … ? Family, Friends and Lovers。係呢度可以郵寄明信片的，他們現在是藝緊 101 印仔 ↓
買完精品印完印仔後，就上去室外觀景台，由觀景台望上 101 頂 ↓
我個人較為喜歡戶內的觀景層，雖然室外觀景台無玻璃阻隔，但保護圍欄、牆身較高，基本上睇到的景色還不及戶內觀景層多和清楚。跟手去睇利用擺動來減緩建築物的晃動幅度既「風阻器」，又係 Damper Baby ↓
相片背後就係真既風阻器，重 660 噸。之但係，點解要噴成金色呢 ↓
老老實實，我分唔到 Damper Baby 的正面和背面 ↓
睇完風阻器，就來到超名貴既寶石商店，先來大鵰 ↓
呢到本身無乜特別，係有工作人員幫公仔整理衣裝，但當時黑漆漆，再加埋 D 燈光，絕對有嚇鬼既感覺 ↓
睇完就撘電梯離開，以下就是 101 的日景與夜景，都幾得意 ↓
話分兩頭，離開既時候有一群外國人經過，個個都超高大，講緊係我地兩個騎膊馬都唔夠佢地高，我地四個彷如進入巨人國，成件事太搞笑了！晚飯本身想話去試下「伍角船板」，但時間已不早，都差不多九點幾，咁就去左 101內既「鼎泰豐」吃。有個搞笑公仔，同佢影返張相先 ↓
等左一小陣就有位，實在太感動了，其實個刻都真係幾攰。食物未到，先影餐具相中個對筷子是有得單獨買的，好似幾十蚊港幣咁上下 ↓
點了排骨炒飯、小籠包、紅油抄手、油菜、擔擔麵。其中一籠小籠包，係香港都吃過鼎泰豐，但食落覺得係台灣吃好味 D↓
飲杯！生日快樂！ ↓
吃到咁上下都離開了，想話早點返酒店休息，鼎泰豐的側面，型！ ↓
剛剛好有最後一班既穿梳巴士撘，呢班就堅啦，上到滿晒人，不過我地早上車有位座。本身咪想話早 D 返酒店休息既，結果都早唔到，搞到十二點先各自沖涼梳洗。期間有乜野做？都係講下無聊野，食下飯後甜品咁，今晚既甜品又係 Mister Donut。當然唔止咁少，還有下晝買既港記紐約芝士餅 ↓
睏前大合照 ↓
依家諗返我 D 錢去左邊，好大程度上某相當數量既錢係去左 101 裡面既精品，例如。其次就係個 D 鳳梨酥 ↓
最後最後，呢張貼紙係今日最意外既收穫。我深信 Sticker 上面寫字個位係一個靚女，哈哈 ↓
That’s All.
Created On 30/05/2013 17:41:13