好啦，咁就過左一個禮拜。咁其實每朝返工都要五點九起身，六點三走人。朝早都特別留意有無紅雨黑雨，話晒都唔洗返學喎！尋日朝聽到出面落緊雨，點知原來無料到。咁都唔知係好彩定唔好彩，出門口個陣細雨左，返到去既時候都無落雨。到今日一起身發覺有一號風球，不過維持左一日都係一號風球，又係無料到。依家每朝返工係西隧口都遠遠見到山頂既凌宵閣，一見到凌宵閣就好似泵左幾啖氣咁精神左。就係企係度望到 ↓



無他既，腦海飄浮著兩次既山頂遊 → [#1143] [#1235]，之但係氣就總會洩既。要站得穩，少不免就要兇狠，開學八日，都差唔多每日都要開開金口。對於小問題學生，鬧係解決到，但對於大問題學生，鬧係解決唔到，都尋求方法中。值得高興既事就係已經同 3 位同學傾過計，問題暫時舒緩左，不過都要繼續觀察。

其實重有 D 事想記，不過暫時唔記得。貼下早輪同渠 G 吃飯既相，話說某日吃 Pizza Hut，見到呢兩隻野，真係不其然 O 左下咀 ↓



禮拜六就去左和民吃 Late Lunch，其實真係唔係話好食，之但係耐無食又想試下劣食，所以就去了。前後食左兩個零鐘，D 野食黎得慢 ... 我地又見到當年係日本食過既「わらび餅」，不過理想同現實係有距離既 ↓




雖然賣相差 D，但係味道方面都幾似日本食個隻，都 OK 仔。



That's All.

經一事長一智，經過網頁及爆泥事件後，講野要好隱悔。今日係九月三號朝早，依家先叫做有兩堂黎坐自己個位。基本上九月一號係乜無特別，朝早見下自己班 D 學生咁，下晝開長命會。雖則 D 同事話呢班係成績比較好，同埋乖既班，但係同我想像中既乖始終有一大段距離。女同學還好既，男同學有 D 都幾有惡意，咁要繼續過招先得。雖則學生係難 D 處理，但勝在班既人數比較少，少到有 D 得廿零人，就算係多都係得三十人左右。同埋大部份堂都係 Co-Teach，有好有唔好既。要趕既野都係未趕得切，之但係又無乜動力去做，唯有繼續見步行步啦。

九月二號都幾黑仔，惡運連連。話說一朝早出門無帶八達通，好在夠大餅撘車，唔係就麻煩了。咁返到去都無乜特別既，陪這陪哪。感覺上低年班堂好過高年班堂，都要慢慢適應。不過今日第一日試過「無飯吃」，話說本身大家都聽唔到鐘聲，主講遲左 20 分鐘落堂，咁已經遲左好多啦。跟住由於 D Notes 未印好，咁諗住去印埋先吃飯，點知一部油印機無墨、一部就 Jam 紙，真係我的天啊。最後趕得切印好，之但係諗住拎廿蚊出去買 D 野食既時候，咁就打鐘完食晏。連擊！如是者 Lunch 後繼續上堂，到落堂個陣先食左包 McVitie's。

到今日 Check Email，發現林老師係七月頭 Forward 左封 EMail 來。睇到 G 都有多少感動，全部野都中晒，中到好應。早 D 睇到咪幾好 ......



祈禱都祈到眼濕濕。



That's All.

話咁快就來到超爆黑之旅下集，一早就樓下食 Buffet，雖則都唔算一早了，都九點零。就款式與及味道來說，只屬一般，要真金白銀比錢的話就唔係咁值啦，值得讚係有不同種類既果汁。間食肆叫「盛事」，係開放式廚房設計 ↓



食完之後就返上房執埋 D 野，開電視一看，竟然有渠 G 個名 ↓



驚喜完一輸之後就開始今日既行程，到左酒店內既法式亭園打個轉，就係咁既樣 ↓



熊貓花既 Close-Up ↓



都幾搞笑既。睇完之後就入左去賭場打個轉，雖則朝早無乜人，但係都有一陣煙味。超特多老虎機，不過呢 D 係咁入錢而難贏既野真係無乜興趣。其實都只係穿過賭場到隔離既永利，諗住重施故技穿過永利既賭場，點知今次 D Security 要我將個背囊寄存。咁搞笑既，背囊唔入得！？咁算啦，又要兜大路到酒店個邊既正門睇這個「富貴龍」。去到既時候剛剛完左一場，咁就襯人散影一影個場，頂頭就有個打得開既 Screen，個闡門係十二生肖造型 ↓



條龍就係由呢個大圓球呢邊升上黎 ↓



未夠鐘到酒店內既名店廊打個轉，順路見到酒店大堂，呢盞吊燈都幾靚 ↓



好啦，話咁快又夠鐘睇表演，條龍就係咁轉出黎，頭殼頂個 Screen 就 Show 下火、雷咁 ↓



另一個 Look ↓



唔夠幾分鐘，條龍就係原地轉返入去，如下 ↓



睇完之後就展開今日既行程，本來諗住行路或者撘巴士到「崗頂前地」個堆舊建築群參觀下，但係天氣熱再加上又唔知行幾遠，所以就打的過去。上到的士既時候，都特登抄低佢既車牌。開左一陣間，個司機話個到無野睇喎，我地都愣一愣。落車既時候，由於太陽光打正個咪標到，睇唔到幾多錢。咪問司機幾錢，跟住佢竟然話 $15，到比錢個陣都特登數大餅比佢，諗住無得比佢呃。點知比錢個陣跌左三蚊落 D 陰濕位，執返兩蚊。跟住司機竟然話，算啦個一蚊。但係明明佢睇住我跌個一蚊落去，懶係好人咁。落車既時候再計返，其實車錢應該係 $14.5，本身個司機都收貴左 $0.5，都係奸，係度扮好人。

算啦，總算到達，一落車既時候就影左呢幅相，同旅遊書可是一樣的 ↓



之但係落車後就搵我地 D 景點，但係搵極都搵唔到。最後發現我地既景點竟然維修緊 ↓



阿婆井搵唔到，崗頂劇院、聖奧斯定教堂維修緊，剩係去到何東圖書館大樓，真無癮。由於突如其來既失誤，天氣又鬼咁熱，咁都要冷靜下先得，入左去圖書館涼住冷氣咁 Plan 下一站。咁就決定行返落去新馬路撘巴士到氹仔先，今次撘巴士都算順利，好快就到步。一落車四周打探下先，跟住就到左呢間專賣大菜糕既鋪頭買左兩杯大菜糕，一杯椰汁味，一杯蜜瓜味 ↓



講杯大菜糕先，其實真係無乜特別，又唔係話特別好食，隻蜜瓜味勁似新年食個 D 透明長條狀既中式蜜瓜糖。呢間店值得提既唔係佢既食品，而係個疑似老闆娘疑似呃錢。話說兩杯大菜糕夾埋 MOP $14，比左 HK $50 佢找，第一次剩係找返 $30。見少左 $6，重唔大大聲同佢講「重有六蚊呢！？」。跟住佢先疑似扮唔記得話「啊，唔好意思，唔記得左。」下！？咁都有得唔記得，咁真唔記得定假唔記得剩係佢先知啦。就算旅遊書推介、名人幫襯過既鋪頭，都要加倍留意了，千期唔好被人混水摸魚。

Lunch 都未食就食大菜，轉個頭就去另一間旅遊書推介既 Cafe 食 Cake，就係呢間 ↓



留意既係門面無寫過任何價錢，而上一年既旅遊書寫既平均消費都係廿頭。一入到去見到餐牌，真係 O 爆咀。大家睇唔睇到有乜玄機呢 ↓



「不消費者收取 $15」，嘩，都幾 __ 街喎！唔係人均計，係每個人都要叫野。Menu 最平既熱飲都要 $18 一杯，而我地叫既木糠蛋糕係 $28，我覺得都幾貴，最重要係唔係特別好食。兩個人食左舊 Cake 就走了，基本上除左落單、端上蛋糕外，都無其他服務，水都無杯，但係都要收 10% Sercice Charge。總括來說，我絕對唔推介去呢間鋪頭，貴得黎唔值。行多幾步就多到著名既「小飛象」，有諗過去吃既，不過最後都無食到，當時係中午兩點 ↓



轉個頭就行到去另一個景點，係熱門既結婚場地「嘉模聖母堂」 ↓



之但係無得入去參觀，剩係係出面影相。旅遊書講到好靚，話一去到會有結婚既衝動。我地就無啊，可能太熱無乜心機。背後就係澳門既婚姻署冊處，裡面無乜野睇，剩係得呢到叫做特別 D ↓



另加一顆漂亮但寂寞的心 ↓



再行前多幾步就見到一片綠葉，幻想下係六月既時候，係開滿晒荷花的 ↓



如是者，咁就到左澳門版既「北野異人館」，詳情可參閱正品 → [Click Here] ，呢個係土生葡人之家 ↓



呢個就係佢地既飯廳 ↓



其他都無乜特別，睇完示範單位之後就到隔離間屋睇這個圖片展 ↓



其實都只係 N 年前 D 土生葡人既一 D 生活照，其實同大家想像得到既差唔多。之但係屋內有強烈既天拿水味，點解？咪就係 D 屋仔都係維修緊 ↓



睇完圖片展之後又到隔離間屋睇另一個展覽，今次係關於不同地區既葡國人既風土，主要都係服式上既分別。呢到就係不同城市？鎮？區？既旗，係咪有 D 似曾相識呢 ↓



其他展品都係有 D 公仔著住不同既服式，都無乜特別。睇完呢個館又去隔離間屋睇藝術展覽，係關於銀器、金屬，大家估下呢個係乜黎 ↓



係一盞燈黎，哈。睇完個展覽，搵埋路就出發到「威尼斯人」，大熱天時行左十零分鐘到就到。真係人頭湧湧，個大堂好大，但係都迫滿晒人，真係好堅啄。裡面係仿威尼斯既設計，有人工河，可以比錢坐船仔，個「船夫」會邊撐船邊唱歌仔，例如「Santa Lucia」，呢首歌超鍾意，大家想聽可以去 Youtube Search 下，特別係 Hayley Westenra 既版本。但係至重要係有冷氣 ↓



先來個過江龍，奇華餅家 ↓



再來就係咀香園 ↓



其實裡面都有鉅記，不過係 Kiosk 黎，都無特別去影佢。呢隻疑似係威尼斯人既吉祥物 ↓



到左下晝四點半，終於有飯食，之但係都係兩個人 Share 呢碟炒烏冬，真唏噓。↓



本來諗住搵間餐廳食好 D，不過渠 G 又話食咁飽夜晚又食唔到。食完之後就坐酒店 Shuttle Bus 返去碼頭個邊。如是者就有碼頭慢慢地、挨著熱地行去漁人碼頭。話咁快就到左，先經過一個叫「唐城」既地方，就係咁，都無乜特別 ↓



經過一座「火山」，裡面就有過山車既，不過無興趣，Skip。之後穿過一間秘密機地遊戲機中心再穿過一條超短商店街，都係無乜特別。如是者就來到「阿拉丁堡壘」↓



裡面有四項兒童機動遊戲，可以用頹黎形容，D 職員都悶到無乜野好做。另一邊廂就有一隻 Black Hawk Down ↓



呢隻野就係一檔玩 War Game 既主題店用黎做 Promo 既東西，可能係平日啦，係無客。D 職員同兒童機動遊戲個堆一樣，都幾悶，或者佢地好 Enjoy 都唔定。漁人碼頭其實都分左唔同既區域，唔同區域就有唔同既主題，好似先前既中式、阿拉伯等等，個表演場地就係仿羅馬鬥獸場 ↓



跟手就行啊行，行到盡頭有間英式裝修既酒店 Rocks Hotel，雖然唔算好大，但係都五星，個景都靚仔。之後都係係附近影下相咁，影完之後就行返去碼頭準備下一站。去呢個下一站就真的憤怒了，話說先前比的士佬呃左兩穫，對澳門的士都無乜信心，所以我地決定就撘巴士去。不過等了又等再等，等到天都黑都未上車。當然係有諗過打的去，甚至決定 Cut 左呢站。究竟邊個站有幾巴弊呢，就係旅遊塔！

其實等左好耐都無巴士，等到都好炆。咁岩有個澳門女士又係等巴士，可能佢見我地等左咁耐就伸出援手，佢話可能市中心塞車，搞到無車返黎。再等一排，終於有車返黎，個位澳門女士就提我地要行出去路中心揮手，佢話如果唔係咁做鵝話司機可能飛站。我地照足佢既說話揮手，點知巴士司機飛站，個個 Moment 真係 O 爆咀，等咁耐竟然飛站！？混他的帳。好在過左一陣間就有第二架車黎，今次個位澳門女士幫我地揮手，Good。真係算係咁啦，係澳門遊少數遇到既好人，真係要點名稱讚。明明望就好近，但係架巴士兜路，搞到耐耐地先去到。一去到既時候，門口有間反斗城，有個由 Lego 砌既旅遊塔，就係咁 ↓



除左旅遊塔，還有少少關於 Hello Kitty 既野，就例如呢個 ↓



言歸正傳，上到個塔發覺有一班日本旅客，個感覺突然返到去好似上年係神戶塔個陣，詳情請看 →[Click Here] 。呢個塔其中一個特別之處其實無乜特別，都只係玻璃底 ↓



另一個特別之處就係可以玩下笨豬跳、Skywalk 等等，不過夜媽媽再加上係閒日，係無人玩既，D Staff 同漁人碼頭個 D 一樣咁得閒。呢 Set Pictogram 都幾得意 ↓



係個塔影出去個景都幾靚仔 ↓



話分兩頭，係個塔到見到呢張櫈，我有印象係名師設計，係邊個就唔記得了。唔知呢張係咪正版呢 ↓



依家回想返，係個塔個一刻係感到好寧靜，唔知點解呢，係幾舒服既。不過我地今次係個塔既時間都唔算好長，同神戶塔個次一樣要趕住「搵食」。今次就趕住返去大三巴到買手信，一離開個塔之後打的返去。雖然今次無比司機找少錢，不過我地兩個都形住形住個司機兜路，明明好近，但係又好似兜左好耐都未到，總之都係無乜信心。難得夜晚到大三巴，當然要影下相 ↓



呢幅係渠 G 影，真係幾有水準，好有 Feel ↓



咁我地分別就係咀香園同鉅記買左三袋手信，買完之後都真係趕住食晚飯，個陣都八點幾九點。由於辛苦左一日，我地決定行返去酒店吃 Buffet，順便可以拎返 D 行李。我地九點三先開始食，其實都 OK 晏，而且十點頭左右就要走，都幾趕。其實胃口都唔係真係咁大，不過係坐得舒服咁，都食左好多生果，皆因實在出得太多汗流失太多水份，非常口渴。渠 G 砌左朵花出黎 ↓



再講一次，個 Buffet 唔係真係話好好食，我覺得一般般，而且價錢都幾五星級。我地又坐得唔耐，其實就真係唔係好抵，不過算啦。如是者就撘返 Shuttle Bus 去碼頭，轉個頭就上船，呢 D 就係我地係買既手信 ↓



其實明明香港都有得賣，都唔明點解要特登係澳門買返黎。另外呢幅相真係超鍾意，可惜大家睇唔到，哈哈↓



如是者係上環搭地鐵落銅鑼灣再撘巴士回家。唔好意為就咁就完，返到家門口想話拎鎖匙黎開門，點知個背囊垂直跌左落地，裡面部 DSLR 都垂直跌落地 ...... 不幸中之大幸係，剩係個塊用黎做 Protection 既 UV 鏡碎左，個真身無事。之但係個塊鏡既 Ring 跌到變左型，砌唔返出黎。唉 ... 呢個澳門遊真係黑到爆，而且當中所遇到既都唔係甚麼好事。最好既事係總算個人無事 ...... 呢個已經係最大既手信。



That's All.

諗住見搵到工，近近地到澳門玩返一兩日。如是者，咁就兩個人仔訂船飛、酒店房過大海。出門個下都無乜特別，時間都係剛剛好去到信德中心，去完 Service Centre 拎船飛，拎左一份澳門旅遊局出既 Tourist Map。跟手就上船，係坐 Turbo Jet，點知先黎就比個劃位阿伯 __ 左句話「兩個人一齊坐就一齊比張飛我啦」。依家發生乜事啊，係咪賭錢輸左搵個客出氣啊，呢 D 咁既人真唔掂當，唔掂當左幾十年。聽完呢句後就展開超爆黑之旅。上到船之後，就有職員派個 D 入境紙，點知手快快兩個人仔都有個位填錯左，諗住問個 D 職員拎過。個職員點頭示意知道，但結果無比我囉。見 D 人咁樣做野，都無問佢，諗住落地之後自己拎過再填。話咁快就到步，渠 G 就催要快快落船，我就覺得唔洗急都得，要做個有質素既香港人而唔係醜陋的中國人，但係佢話咁係「執輸」。過澳門海關個陣，見到個男關員染左個頭，頭髮又長長咁，真係點睇都唔似係把守邊境最前線既要員。

算吧，咁離開碼頭就見到好多唔同酒店既 Shuttle Bus，不過我地諗住係附近既八百伴食個 Lunch，行啊行，又望下地圖，唔對路喎！行錯左少少路，又再回頭搵，明明地圖寫住既位置無八百伴喎，係地盤工地！？咁就吃蕉了。輾轉熱烈討論左一輪，決定去酒店 Check-In 先，咁就坐 Shuttle 去我地入住既 MGM Grand Macau。先來酒店大門個隻獅子像，大家有無印象係邊睇過呢 ↓



咪就係 MGM 電影片頭個隻獅子！例如 007 咁，片頭就有呢隻獅子係度咆哮。酒店大堂都大，而且都有不同既藝術品，剩係呢幅相就有三件，全因酒店老闆鍾意藝術 ↓



酒店房係幾靚的，的確係五星，個海景就弱 D 啦，就係呢片黃泥水 ↓



前面個片爛地應該都會起野，應該唔會太高掛，無理由阻晒個酒店海景。係房度影下相瞭解下之後就出發吃 Lunch，咁就行左去議事亭前地個頭，熱到暈。諗住吃義順既，渠 G 又話唔好食 D 香港有既野，記住呢句啊！咁就去吃有 D 名氣既黃枝記，渠 G 手上個本旅遊書係 08 年版，根據書上既價錢同現在既價錢比，非準確估計餐牌上既野平均貴左 $5-$7，咁既格局咁既食物我係覺得貴。門口就係咁 ↓



兩個人就叫左一碗雲吞麵同蝦子撈麵，請記住呢碗蝦子撈麵 ↓



埋單 $50。食完之後諗住到旅遊書上推介既甜品店食 D Cake 咁，途中經過 D 街道，Pan 個頭上去就見到，有隻貓坐係窗邊 ↓



言歸正傳，條路都唔係易搵，原來係 D 不知名小巷。搵到小巷但係又搵唔到個 D 店鋪，數返街號，個幾間甜品店應該執晒 ... 唉，一年就爭咁遠，呢個時候對本旅遊書都無乜信心。咁就到附近既 Milk Top 食雪糕，其實香港都有既 ... 不過天氣實在太熱，真係唔食都唔得。我就叫左榛子 + 柚子，渠 G 就食朱古力 + Cream Cheese，如下 ↓



都無乜特別既，我覺得幾唔錯，不過溶得好快。話分兩頭，唔好諗住呢間賣日本牌子雪糕既店鋪會好靚，又或者有好年輕既店務員。其實兩樣都無，門面都乾淨既，不過個店務員都係阿嬸，重唔知點解成日行左去對面鋪，又唔係同人吹水，剩係企係門口，怪怪地咁。回頭望返去議事亭前地 ↓



個身涼透之後就去左隔離既天主教教堂「玫瑰堂」參觀 ↓



內裡當然靚啦 ↓



教堂內有個小型展館展覽返 D 同澳門人與天主教既一 D 物品，不過老實說，大部份物品個造型、色水對我黎講都幾恐怖，所以無相睇啦。最頂層個層最多只可企 10 個人，唔係話空間唔夠，而係個 D 木板只能安全地承受到 10 個人既重量，行個陣都有 D 「Eeg Eeg」聲！教堂有兩個鐘，疑似還用得的，其中一個就係咁 ↓



離開教堂就行去有名既「大三巴」，幾型 ↓



由上面影返落去，左面橙黃色既建築物係博物館來的，有導賞服務 ↓



行上去牌坊上先發現原來下面可以裝上黎偷睇人裙底的！接著發生既事情，真係是日既高潮。估都估唔到竟然發生係渠 G 身上。咁渠 G 話肚仔痛，去洗手間，我就係大三巴個邊等啊等，等左一段時間，渠 G 終於出黎。之但係，佢塊面竟然腫晒，全身都發紅。我初步估計最大機會係食物敏感，又或者比勁蚊咬，即係非洲個 D，一叮即全身腫個 D。咁兩個人都焦急地搵醫務所，本身記得係議事亭前地個頭有間醫務所招牌，諗住上去啦，點知搵極都搵唔到路上去，問 D 人點上，但係答得勁 Hea。跟住搵到條樓梯，但係完全無燈，個格局勁似黑市醫生，所以放棄搵過另一間。都諗住撘的士去附近既醫院，點知搵極都無，心中已經勁 __。

期間經過另一間上樓醫務所，咁上去諗住睇，格局似返間醫務所，都 OK 多人等睇。點知醫務所個人仔話無打電話預約今日唔知有無得睇。有無搞錯，急症喎！見佢咁多人而且貌似中醫多過西醫，咁都即刻走人。落到樓下有間士多，花左 $8 買支屈臣氏蒸餾水，渠 G 話我地問價錢個陣，個店員有 D 猶疑，似係比人呃左。不過呃都無計，搵間便利店都咁難搵，我印象中剩係見過一間便利店咁大把。幾經辛苦先有架的士，咁同司機講車去最近又有得睇急症既醫院，司機咁就車左去山頂醫院，大家記住係山頂醫院。好快就上到去，錶寫住 $13，我比 HK$20佢，佢剩係找返 MOP $5，都知佢比少，但係見急所以都無同佢嘈，諗返應該問佢拎返個 $2。找少錢都只係其中一樣，第二樣我遲下再講。咁都好快掛左號，等左陣先輪到有得分流，分流完之後個護士已經即刻帶渠 G 入去，係最緊急類別。入到去打左支抗敏針，再坐 20分鐘睇下情況有無好轉，情況好左就出返黎了。咁去比錢，開頭都估要五百架喇，實收三百零，比想像中平。不過澳門就係醫藥分家， D 藥就要自己去藥房配。如是者，渠 G 算執返條命仔，嚴重既食物敏感係可以致命的。

開頭諗住撘的士 / 巴士落返去，但係環顧四周乜都無，我地就決定行返落去。路程又比想像中近喎，係超近個隻，十零分鐘就到。如是者就去搵下附近有無藥房，又咁岩比我地搵到間藥房喎，叫「合成大藥房」。說時遲那時快，已經比左張藥單 D 配藥員執藥，報價大約 MOP $120，其實貴平都唔知，都只係靠個信字。開頭我地係咁搵 D 澳門幣出黎，諗住用返晒呢 D 平錢。之但係個位職員好有道德地話呢 D 藥係用澳門幣標價，比港幣佢會有得找添。呢個真係今次澳門遊中少數遇到既好人，值得稱讚。間藥房對出無幾遠竟然有間八百伴，原來係搬左黎呢度！如是者，我地再續八百伴搵食之旅。我地就係佢個 Food Court 到食左個炸豬扒烏冬 + 照燒雞扒拉麵，再加杯騎呢果汁同西柚汁 ↓



但係明明得兩杯果汁，但點解有三個杯呢。原因好簡單，揸揸下西柚時竟然無晒西柚，所以就比左杯細橙汁我。不過今日無啦啦中左穫堅野、再加上又抖唔夠、天氣又熱成咁，大家都無乜心機吃，兩個都唔係點吃得晒。食既期間拎返張澳門旅遊局出既 Tourist Map 黎睇下，一望之下原來當時我地坐的士個位置係近鏡湖醫院多過山頂醫院。個的士佬都幾賤喎，找少錢都算，重要兜路。講真，唔急都唔撘的士啦，去醫院都係急症，真係好無品。

好啦，食完之後就到樓下既超少打個轉，本來諗住買支大既果汁返去，不過平個 D 個包裝又樣衰衰，貴少少個 D 渠 G 又覺得貴。最後係買左兩支奈奈子橙汁同一支雪梨茶。跟手再係間叫做「老佛爺」既麵包西餅店買蛋糕，開頭都跟人排隊，但係排左一陣發覺排頭位個人唔係買野既！？原來間鋪頭到關門前 30 分鐘開始就麵包、切好既蛋糕半價，好在問一問人唧，唔係又做傻仔。最後買左一個芒果薄脆蛋糕， MOP $160咁上下。其實我都預計到會食唔晒，不過渠 G 好想切蛋糕，所以都買左一整個。講返呢間「老佛爺」，真係好似老佛爺咁無得自己去揀麵包，全憑 D 店員幫你執。動作奇慢，比人自己揀重快，都唔明點解要咁樣做。此外，我地買蛋糕個陣，個店員既反應好錯愕，錯愕完又無理我地，繼續做自己 Stocking既野。後來只係另一位店員前來幫我地，原來澳門既人係咁做野，非常失望。

我地都係沿路行返去酒店，沿途既景色就係咁，有埋地標既「大菠蘿」 ↓





行多幾步就到「永利」，門前個人工湖剛巧有大型既特別效果表演，噴下水噴下火咁，不過我地都無睇晒，怕個蛋糕頂唔順 ↓



影左張相之後繼續行，好快就行到去 MGM Grand Macau 係賭場個邊既入口 ↓



不過一大袋二大袋，都諗住兜大路去返酒店正門而唔穿過賭場返去。夜晚時候既獅子就係咁既樣 ↓



返到酒店後，拿拿聲拎個蛋糕入雪櫃，但係個盒又鬼咁大，關唔埋個雪櫃門，最後要做下手作仔，搣爛個盒再組合先放得落雪櫃。未搣爛時候蛋糕盒既樣，定個神一睇先知原來間餅店係萄京酒店屬下品牌。食蛋糕之前沖個涼仔 Refresh 下，渠 G 就吃個藥仔，咁難得去旅行都去埋醫院，當然要影低 D 戰利品啦，有酒店吉祥物熊貓妝扮既獅子一隻、抗敏藥、胃藥、還有奈奈子橙汁一樽 ↓



大家 Refresh 完之後就是日壓軸環節，切蛋糕！個蛋糕就係咁既樣 ↓



切開裡面就係咁既樣 ↓



唔知係個口「Wei」定係芒果唔當做，但夏天都唔當做！？我覺得個蛋糕無左應有既甜味，反而酸酸地咁。應該唔係變壞掛，極其量係個蛋糕唔好食咋。真係失望，無樣野好咁 ... 我都同渠 G 講，無實力唔緊要，但係運都無既話就真係唔掂當啦。無啦啦今日諗住去碼頭附近間八百伴食 Lunch，點知又搬左；諗住去搵 D 推介既甜品 / Cake 店，點知執晒；食個蝦子麵又無啦啦食物敏感；搵醫務所又無間似樣；買樽水都疑似比人呃；坐的士又比人兜路又找少錢；買個蛋糕都係酸。你話係咪超爆黑！


不如意既事還有下集 ...



That's All.

Gackt 又有新歌，今次都係同 Decade 有關，係劇場版 Decade 主題曲，《The Next Decade》。Gackt 係呢個 MV 真係超型，佢飾演幪面超人四號 ↓




言歸正傳，幾經辛苦，終於搵到著落。之但係要返屯門，都的確係遠，不過要搬出去的話又未必圍得住。依家就轉兩程巴士就到，算近過返 IED 了。教學教學，要學既野都 OK 多，唯有見步行步。

呢期都好多野做，要排版、Plan 課程，都真係幾趕。趕還趕，早排都有堆新 Game 玩，隻 G Gen 都幾唔錯。Team Fortress 有趣 Cap 圖，睇下大家體會到與否 ↓




有又煩，無又煩，當然有又煩好過無又煩！



That's All.