今天的行程有好有壞，時間安排上有極大的改善好間。可以用係「一啖砂糖一啖屎」黎形容今日，一路睇落去就明白點解。朝早九點零起身落去吃早餐，先來有兩支真玫瑰放係每張檯上。估唔到係真花 ↓



餐廳有室內和室外，窗口望著的便是唔知甚麼山。驟眼看很多外國人都選擺背向行人道面向山景，但我地選擇的是平排於行人道與山景，是文化差異還是基於安全感呢，就真係不得而知。話分兩頭，室外位都真係幾凍 ↓



五星級酒店果然係五星級酒店，早餐種類非常豐富。任飲任食，乳酪、芝士、麵包、果汁、穀物類早餐應有盡有 ↓



不知道是否週日的關係，款式真係幾多。至有趣既係竟然有三文魚，朋友仔拎左唔少。當然唔少得鬆軟牛角包，相反其他自切麵包非常硬，都唔係好食得落口。另外見唔見到兩包朱古力，當地叫 Caotina，是瑞士十分有名的朱古力粉。以熱牛奶沖調，味道十分好！我地都買左 Caotina 返香港飲 ↓



又係栗米片，係瑞士吃左勁多栗米片，同時都飲左勁多牛奶同食左勁多乳酪。次次飲完食完都急便，但都繼續食 ↓



見到旅遊書推介呢到既 Massage，都特別留意一下。見到酒店房有 Coupon 有Discounts，所以都想話試下。基於人手問題，無得兩個同時按，只可以逐個逐個來按，就預約左今日下晝徬晚時份來個 Classic Full Body Massage↓



如是者十點零鐘就正式出發上少女峰展望台 (Jungfraujoch) ！先來就要行去撘 WAB登山鐵道到小夏戴克展望台 (Kleine Scheidegg) 。天氣非常好，但比像中要行得耐 ↓



呢座山疑似係艾格峰 (Eiger) ↓



唔好以為呢條係普通一條河，其實佢既源頭是來自阿爾卑斯山，是一條冰河。危險既事唔做，無試到 D 水係咪真係凍 ↓



說時遲，那時快就行左十幾二十分鐘就行到去車站仲上埋車。呢程車就真係令到朋友仔驚心動魄。本身架車都幾滿人，有位坐已經算係咁，點知朋友望見前面有隻大狗，咁佢就好驚慌唔敢坐，選擇企係度。咁見佢企咪陪佢企，但上山路途都有 D 起伏，都危險。咁有其他乘客好心提我地有摺椅有得坐，但我地婉拒左。到之後無幾耐有列車職員開埋椅比我地示意要坐，咁就真係無辦法，唔坐唔得。如是者呢 35 分鐘既車程朋友仔就全程望實隻狗睇下佢會唔會走過來，最後當然無啦 ... ↓



列車便沿山而上，其實建造這條鐵路既人都咪話唔厲害 ↓



如是者就去到標高 2061m 既小夏戴克展望台 (Kleine Scheidegg) 。旅遊書說這是眺望艾格峰、莫希峰和少女峰既最佳位置，可惜時間匆忙 ... 之後就轉車繼續上山，今次就轉個位避開任何狗隻，都 OK 既。這是小夏戴克展望台車站 ↓



如是者就沿山而上，從車上望回山腳位置，看到山峰的陰影嗎？呢座山都咪話唔高大 ↓



這是另一個轉車站艾格冰河站 (Eigergletscher, 2320) ，在這站有一健行路線「Eiger Trail」。當然，時間緊迫既我地當然唔會選擇去行。當中係呢道發生左一件小插曲，話說我地之前買既 Jungfraujoch Railway Pass 原來只係包到呢一程，再上去少女峰個程要另外買飛。其實我都知知地，之不過就無去買到。到真係查飛既時候當然查到無飛啦，好在可以即時買返，唔係就真係煩了 ... ↓



如是者繼續上，會經過艾格北壁站 (Eigerwand, 2865m) 和 冰海站 (Eismeer, 3160m) 。當時當然知道是那一個站，但依家睇返相就分唔到邊 D 係幾時影，每一個站都會停三分鐘到。由於隧道內沒有恆溫系統加上陽光照不到，其實都幾凍。這就是從站裡外山下望，見到山的影比之前大了嗎，呢到似 Eigerwand ↓



在另一個站望出去就望到一條長長的冰川 ↓



開頭見到有 Slogan 寫「Jungfraujoch - Top of Europe」，諗極都諗明點解佢係 Top of Europe，計山峰高度又唔係最高、計展望台高度又唔係最高，直到最近朋友仔講先知 Top of Europe 應該係指條登山鐵路車站，展望台車站標高是 3453m。都係既，完全唔需要任便裝備就話咁易上到山頂附近，不得不讚嘆當年設計和建造這鐵路的人的智慧與毅力。這是從 Eismeer 站內的環境，有當年既照片 ↓



話咁快就來到 Jungfraujoch，先來從室內望出去冰川，好靚啊！靚到當時我即刻拿起 iPhone 影低佢放上 Facebook 同人分享 ↓



這就是整個展望台有的設施，其實都真係好大。旅遊書說最少要預兩小時，但我覺得都唔夠。我地無上到 Sphinx 瞭望台(3571m) 、無去 Ice Palce、無玩 Husky 雪橇 ... 好多野都唔夠時間。早知今日就早 D 來，認真失敗 ↓



我地唯一去過的是少女峰雪原 (Jungfraufirn) ，我倆人生第一次踏足真的雪地 ↓



延綿不絕的雪，在這裡不得不戴上太陽黑鏡，陽光從雪地反射，真係好耀眼！這方向是行去 Mönch（僧侶峰，4107m）↓



這冰川叫「阿萊奇冰川 (Aletsch-gletscher)」，看看後面的山便知道甚麼是「景深」了，靚到呢！這冰川與少女峰、比奇峰地區於 2001 年被登錄為世界自然遺產。這冰川是阿爾卑斯山內最長的一條冰川，23km長！不過由於氣溫上升，呢條冰川已經縮左水 ↓



雖然我地見過雪櫃內的雪（嚴格來說是冰）、餐廳吃的刨冰，但雪地都真係無踩過，一場來到當然要玩下。留意下我地既裝備有頸巾和手套 ↓



雪啊！冰啊！↓



雪地咁平坦皆因有職員用鏟雪車「壓實」和「鏟平」塊地，如果唔係 D 雪鬆泡泡，行步路都難 ↓



呢架直升機同我玩個 D 搖控直升機外形上非常相似，遊客可以付費坐上升直機遊纜整段冰川、雪山 ↓



不知道是甚麼名字的山峰和雪景 ↓





在這時，手套和頸巾已脫掉，太陽曬住好熱 ... ↓



回頭向後望雪原入口與 Sphinx 瞭望台，瞭望台後的便是 Jungfrau，即少女峰主峰 ↓



朋友仔繼續玩雪，搞笑 ↓



這張相就比大家睇下 D 雪未壓實的話，真係好難行。一踏隻腳落去，凹左成呎 ... 當然，係雪地跌左幾次，太冼了 ↓



朋友依家在玩雪↓



話分兩頭，我地真係唔識嘆，又見到有外國人攤係雪地曬太陽，驟眼望埋去好似飲緊熱朱古力奶。我地只係在雪原上吃了幾片朱古力咋，飯都無食。好在早餐吃得夠飽！之但係係室內地方，見到勁多亞洲遊客，不知是中國還是韓國，一個二個坐晒係度吃韓國辛辣麵泡麵！？個情景都幾震撼，聽到有 D 外國都講兩句笑笑口咁。

這就是全歐洲最高的郵箱 ↓



買了兩張名信片去寄。我們竟在歐洲最高的郵箱附近吵起上來，原來有人唔高興我寄張名信片給某位女仔。次次都係咁，我地無語問蒼天 ... 咁開頭出發前講左話會寄名信片嘛，咁見難得的機會咪寄。又唔係鬼鬼祟祟，都唔知嬲乜。_ _ _ _ _ _，好好珍惜張名信片，呢張名信片除左郵費和名信片之外，還付上我們兩人的感情作代價 ↓



另外還有一個日本郵筒。大家可能好奇怪無啦啦點解有個日本郵筒係呢到，原來1969 年有一隊日本攀山隊成功登上少女峰，為左記念呢件事，便有這郵筒的出現 ↓



寄完名信片、去完洗手間、買完該買的東西、壓過紀念幣後就啟程落山，個陣都下晝三點零。其實我地只係係度逗留左兩個鐘左右，真係唔夠喉。假設我再有機會來的話一定要預鬆 D 時間。題外話，隧道維修中 ↓



趕落山其實是因為我地 Book 左 5:00pm Massage，咁三點零鐘落山都應該只係岩岩好到步，未計換衫之類既野。早知就 Book 晏少少又或者一早就出發，有咁既錯誤都係我錯誤估計上少女峰既時間，可能我計少左一段 30 分鐘既路。記唔記得一開始我地咪要行一段路先去到登山車站既？回程都一樣要行，不過今次就堅啦，係斜路上 … 如是者就氣來氣喘咁急步行。我呢 D 一有併勁起上來好耐勞既當然無問題，但朋友仔就行到就死咁，我見到咁我幫佢拎埋個背囊行。但都無用 ... 又話平時挨得，原來都係假。最後！幾經辛苦終於上到酒店，一開酒店房門就聽到有電話打來，係 Wellness 個邊打來。無理由身臭臭咁落去架，咁所以又要沖沖身先，趕到呢 ... 最後 5:30pm 先做到第一個人。我都襯朋友仔落去Massage既時間沖身，如是者 6:00pm 就到我了。由於愛係好偉大，所以朋友仔就選擇左 30分鐘既 Partial Body Massage，留返個 Full Body Massage 比我。算係咁算係咁！依家諗返都唔知點解咁想做 Massage，一來係我地兩個都未試過比人 Massage、二來感覺上會比較衛生。我第一次既 Massage 就係係白人女子手上！做 Massage 既期間真係好 Relax，一整日既疲勞真係推走晒，之但係Relax期間都要保持腦筋靈活，因為推拿師會問我地力度岩唔岩、邊度想重點按摩等等，佢用德式英語，我用港式英語，都算溝通到既。

做完個 Massage 就去吃晚飯，由於 Skip 左個 Lunch，夜晚都要食返多 D。咁就去左一間叫「Hirschen」酒店開既餐廳吃，個裝潢都 OK仔，有鹿頭！？↓



今晚是吃 Set Dinner，見佢唔貴得來又有肉吃。有湯有甜品，都好似好 OK 啊，就係咁。留意檯上的每一項物品 ↓



大家無睇錯，我地檯上有一瓶白酒叫「Fendant」，是瑞士相當有名既白酒款式 ↓



有一杯 Cappuccino 和一枝裝式的蠟燭 ↓



識我既朋友仔都知我唔飲酒，點解無啦啦會叫左支白酒呢，這絕對是一個美麗的誤會。話說當地屬於德語區，識講英文既人其實唔係太多，就算識都係識德式英文。對於我地唔識德文既人來說要買野、要點菜都係猜猜畫畫。再加上 Serve 我地既侍應英文不太靈光，溝通上都有 D 問題。我地見到 Set Dinner 有幾行，以為有得揀下前菜、主菜，咁同侍應溝通過後好似明 D 又唔明 D 咁，不過見主菜係雞肉都應該無乜問題。之後想話叫杯野飲，咁我「關」埋本 Menu 就咁講話飲 Fanta，咁侍應當然會用德式英語覆一次，我都唔太聽到都係點點頭咁。如是者，到上來既時候 ... 就變左 Fendant 了！朋友仔說這是懶型，做乜唔拎住本 Menu 指，但從我既角度來看，想飲芬達唧，唔洗指住叫嘛。個位侍應又無錯既，咁 Fendant 真係瑞士著名既白酒，點估到有人飲 Fanta 唔飲 Fendant 唧。

Set Dinner 便是這樣，有半隻春雞、意粉、同埋碎菜。之前咪話同侍應講過話有一份餐想唔要 D 野既，咁我個份就無要到 D 碎菜 ↓



OMG！好難食 ... 朋友仔話都唔明點解可以整到 D 雞肉咁「鞋口」，儘管個位置理應是最滑。雖然我地都應該幾肚餓，但都吃剩唔少，呢張相都應該吃到後期，食埋意粉都差唔多 ↓



個位侍應問我地好唔好食，我都唔知點答，應該係話 OK 定 Not Bad 咁上下。咁都係，未必係難食，只係唔岩我地食。唯有飲下 Fendant 笑下高興下。甜品都 OK 既，算係苦中一點甜 ↓



唔知係咪飲左酒，個人都有 D 興興地，我竟然比檯面支蠟燭燒親手指毛，有相為證，有 D 手指毛燒到攣左，認真黐線 ↓



哈，呢戲都唔平啊。個 Set Dinner 都 CHF33 一位，個瓶 Fendant 要 CHF20。計埋呢餐總共食左 HKD880 到，差唔多成千蚊，食「鞋口」雞肉咋↓



一離開餐廳，驚覺原尋晚話好好食個間餐廳竟然在隔離 ... 早之食返呢間，不過無早知既。開頭以為醒啦，唔再叫勁重白酒的芝士火鍋，點知都中伏。天意！↓



回到酒店餐廳門口，見到個餐牌，就咁睇都好似幾岩食啊 ... 天意！↓



回到酒店房，繼續洗衫。點解咁熱衷於洗衫呢？無他，酒店 Laundry 貴得幾嚇人，洗一次夠我買過件新衫 ↓




最後，總括今日行程都幾多改善空間，首先真係要早 D 出發、依家搞到係少女峰展望台睇唔得晒玩唔得晒。同埋要帶眼點菜，Fanta 變 Fendant，都咪話唔搞笑。去到最後，之前咪講過我地落山之後行左勁多路又要上斜路先返到酒店既。我之後睇返原來落山既時候架列車會以酒店附近的大站做終點站 ... 我地行了很冤枉的冤枉路 ... 但都開心既，最後再補多一張相作為今日的結束 ↓





That’s All.

前言： 行程上今天無在 Bern 的一天多麼精彩。點解咁講呢？因為剩計此日遊記相片數目好像在這裡少一些，Bern 過百張，但在 Grindelwald 約六十多張。話雖如此，這裡的風景靚得很，靚到搞左好耐先分到哪座山是甚麼。

先來個題外話，話說這裡百物騰貴，如果飯後係餐廳吃個普通甜品都要港幣舊幾水（實情是港幣太疲弱 ... ），所以都會另外在超市買些甜點在酒店房裡吃。咁咪出事囉 ... 唔知變左傻的嗎定還是唔記得左，竟然將雪糕放左係個雪櫃，又名「冷凍櫃」裡面，結果當然係融晒。難得買左隻爆谷 Vanilla 雪糕，依家唯有就咁 Cheers 啦↓



言歸正傳，九點正落到樓下吃早餐，吃早餐個位係地面個層，窗外便是 Interlaken 的大街 Höheweg ↓



再來又是經典早餐組合 ... 唔係話好食到日日都要食，只不過每天最岩食都係呢幾種東西 ↓



另加兩碗栗米片，呢個係我 Favourite，我至愛香甜栗米片，其他朱古力、生果就一般了 ↓



吃飽飽之後就撘 BOB 登山纜車去 Grindelwald（格林威爾華德） 。從地圖上去，我們由橙色點往紫色點。話遠唔遠，大約 35 分鐘就到。不過我地 Miss 左一班車，唯有去下洗手間等下一班車。同埋呢 D 登山纜車去到某些站會脫卡，所以個陣都打醒十二分精神留意著有無坐左係會被脫的車卡中（哎，點解無影到車卡的相呢？奇！） ↓



話咁快就去到目的地，到酒店放低兩件行李就往旅客中心，這中心也是區內主要運動中心，剛剛這裡有球隊練波。這些都不重要，最重要的是這裡有清潔衛生且免費的洗手間 ↓



秋夏季來到 Grindelwald 來的原因只有一兩個，就是「睇下山水」、「行山」、「上雪山」，我們身處的地方便是這樣。之但係，其實我地都唔係好識分每座山，實在可惜 ↓



行啊行，準備去 Pfingstegg（普菲克修特克） 行山與睇下山水。唔好意為好近，其實都行左好遠路。相片中呢間是民房還是酒店呢？都幾靚喎 ↓



Dorf-kirche（多夫教堂），區內較大間的教堂↓



小屋與雪山，氣紛勝於一切吧 ↓



撘 Pfingsteggbahn 上展望台。如果無 Jungfraujoch Railway Pass 就要花 CHF18上山。當然，我地係 Interlaken 買左個 Pass 就免費撘車上山 ↓



從纜車上看回 Grindelwald 一區，看到相片左下方有條灰灰地的路嗎？其實這不是路，是河，重要係一條係冰河 ↓



再從高 D 既地方望落去 ↓



來到這裡，少不免要行下山，我地揀左條比較短既路徑。由 Pfingstegg 行去 Milchbach，貌似無乜特別，但條路都幾崎嶇。Prepare for the Worst 既我有一刻諗過萬一碌左落山會點呢 ... 依家係到打緊遊記就知我仍健在。回想返都真係幾危險，兩個人無乜裝備就去行，人影都唔多個，萬一有乜事就真係唔知點了。雖然好似好好陽光，但正所謂天有不測之風雲，再加上一無太陽照既地方都幾凍下，當日我都戴住頸巾。期間見到有行山客帶埋熱飲坐係長椅到抖，坐係度望住個雪山都咪話唔疏乾，蝕左！ ↓



Woo ... 見到冰河！當然以呢個季節，冰河既規模比較細啦。其實原來呢個唔係我地想睇個條冰河，興奮錯了 ↓



旅遊書說去到咁上下會有一間餐廳，可惜去到既時候只見到 ... 你話係咪心都寒一寒。好在當天風和日麗，唔係就嚇死了 ↓



吼！我到達終點了。一不小心就碌落山！話分兩頭，有個人仔話要跨過個欄望望，我當機立斷說不，太危險了。係到影下 Kai 相咪幾好，如是者就回頭了 ↓



回到 Pfingstegg ，個到有一個名叫 Rodelbahn 的遊樂設施玩，單次 CHF5。好眼力既你可以從張票既圖片大約睇到是玩甚麼。簡單來說，首先有一條「路軌」，乘客坐係一架特製既車上，車上得一支煞車桿用來控制架車既速度，玩法係咪好簡單呢 ↓



Rodelbahn 起點與終點。我地都睇左好耐諗緊玩唔玩，開頭「行山」既時候都路經部份路軌，就咁望都好似 OK 喎。再加上見到細路仔都去玩喎，驚都都有個泡啦？所以就去左玩了，其實咁樣衝落去都真係幾爽，之但係可能我保障左少少，去到某個平 D 既玩既車停左喎，與此同時朋友仔就極速衝緊落黎，無辦法，唯有自己搖呀搖，搖到急斜位繼續衝！朋友仔就因太極速，佢話差 D 拋左出去。玩到最尾有個「自動運輸架」運返個乘客同車上去，雖然自動，但係要乘客手動 Hold 實支煞車桿，如果唔係就會墮車。呢個位就要注意下了 ↓



個架車就是這樣，係咪好兒戲呢？ ↓



本身還有另一個方向小徑可以行，不過一來太濕、二來無裝備，最重要既係唔知行幾耐，所以都唔行了。如是者就撘返纜車落山，今次呢個位置正好多，無窗阻隔，以「高清」來欣賞這個美麗既風景 ↓





終於回到山下纜車站，就咁睇其實都真係幾兒戲 ↓



在車站有紀念金幣鑄造機，壓了兩個，不過呢隻要用人手轉，都要幾大力先得，好傳統啊 ↓



在山下望返上去唔知邊座山 ↓





之後就行返去較旺既位置吃個午飯，由於呢區係屬於滑雪渡假區，淡季時都比較冷清，有 D 酒店淡季時關門唔做生意。這裡好多食肆都係由酒店營運、好少自己一間獨立食肆咁。呢兩碟就係今戲我地點了的意粉，一個是 Set Lunch、另一個是單點 ↓



先唔講好唔好食，真係唔知點解，在這裡的食肆有好多烏蠅，正如之前係 Interlaken 都一樣。多烏蠅都唔奇，至奇係 D 人習慣晒，對呢 D 烏蠅完全無反應 ... 我對呢種習慣就真係唔習慣，所以都係邊撥邊吃。有情調都無用架，咁鬼多烏蠅 ↓



講返個兩碟意粉，有塊肉個碟無乜特別，普普通通。同埋講多少少係係瑞士呢個地方吃肉真係價錢級數上，係Set Lunch 先平 D。之但係 ... 另一碟就真係「無言」，唔好就咁睇呢碟意粉平平無奇剩係有 D 香草伴碟，就係無乜特別先係最特別。呢個意粉超辣 ！一食第一啖就發覺奶野 ... 奶野既原因推敲返係我一見到個 Set Menu 有「牛肉」意思既德文就叫，對面朋友仔見到呢個單點意粉平喎，就叫佢先。但唔識德文既我地就因為咁奶左野 ... 咁都比我上網搵返個 Menu 喎，見唔見到有個意粉係 CHF19。至衰英文差，唔知「Peperoncini」點解。完全無意識到呢個意粉係辣到咁。叫最底個個肉醬意粉咪幾好 ... 我識睇啊！卡邦尼我都識睇啊 ↓



愛情既魔力係好偉大，我由有牛肉既 Set Lunch 調轉做勁辣意粉。估唔到尋日係 Bern 晏晝個次都只係叫唔好食，未致於食唔到。今次呢碟勁辣意粉就真係食唔到了 ... 自己帶去既水又飲晒，叫野飲又要幾十蚊港幣。最後都係吃唔晒，大家見唔到我倆既表情咋，真係食到七情上面 ↓



就是在這間餐廳吃，當地酒店 Steinbock 開既意大利餐廳 ↓



再講多次「好又一餐、唔好又一餐」，吃完飯之後就乘纜車上另一個展望台，叫「First」，大約坐 30 分鐘到就上到去標高超過 2000 米的展望台。有 Jungfraujoch Railway Pass 免費，無就要比 CHF53 來回票 ↓



上山前又再望下個唔知乜野山 ↓



除左撘纜車上去之外，還有小徑供遠足人士步行上山，行兩個零三個鐘到 ↓



見袋如見人，哈哈。由於上山個程時間已比較遲，可以兩個人坐一架車，鍾意點影相都得 ↓



話咁快就上到去，先來有間小屋與冰河。睇左好耐，相中左邊邊的那座山應該係Wetterhorn (3701m)，個一忽仔冰河係上格林威爾華德冰河 (Oberer Grindelwald-gletscher) ↓



從另個角度看，係咪睇得清楚少少個冰河。當然，由於呢個時間仍算比較熱，冰河既冰就自然少 D。另外相片右方突出來的山峰應該係 Schreckhorn (4078m) ↓



近睇上格林威爾華德冰河，當然係天氣好好先可以影得咁清楚 ↓



其實之前個程纜車係要中途在 Bort 及 Schreckfeld 轉車，轉車個站內是這樣的。見唔見到呢到有單車同頭盔租呢，不過就唔記得呢個係邊個轉車站 ↓



因為係呢個站裡有個野外遊樂設施比人玩，就咁睇都幾盞鬼啊 ↓



有人同牛玩，勁！↓



係纜車卡內都真係好仔細研究過 D 山，印象中個陣時都分到，但返到香港隔左勁耐之後要再上網、睇書先知道邊座是邊座 ↓



呢個景象我還以為只可以在電影、網上圖片才能看見，估唔到自己都有機會親眼睇到。左邊個凹位是剛剛提及過的上格林威爾華德冰河，右邊個凹位是下格林威爾華德冰河 (Unterer Grindelwald-gletscher) ，幅圖再右 D 既山就是瑞士三大峰之一的艾格峰 (Eiger, 3970m) ↓



如是者，終於到了 First 展望台 ↓



係咪好奇怪點解依家先落纜車但之前又晚到青草與雪山呢？其實之前既相都係係纜車既窗影返黎。依家呢 D 先係「著陸」後影的相。小屋與雪山 ↓



剛剛見到小屋的正面。起呢間屋個個都識嘆喎！唔記得裡面是甚麼，好似係 Café 之類咁。我諗到冬天個陣間先會開門做生意 ↓



從山坡上可遠眺今朝我地在 Pfingstegg 玩的 Rodelbahn既路軌，好直個條就係自動運送帶，即係話好危險唔緊握扶手會碌落斜坡個到 ↓



係斜坡既盡頭，無錯，係盡頭，有一個站。估唔估到呢個是甚麼的一個站呢？↓



之前個個係「First Flieger」既起點，玩既野其實就好簡單。戴上一條類似攀山用的安全帶，安全帶形成一個籃，坐上去，然後就一口氣滑落到先前講過的纜車轉車站 Schreckfeld。全程約800m到，時速84km！哈哈，旅遊書話會有好似飛落山既感覺。價錢 CHF25，由於結伴同行的朋友仔不會去玩，所以都無玩了。呢到就係終點站 ↓



除左滑雪之外，Grindelwald 係玩滑翔傘的熱點，應該係滑到去 Interlaken 個頭？其實真係唔知滑去邊。見唔見到幅相中間靠左位置有個塔仔，個到係風向塔？？但係我見 D 人都係去左個塔仔個邊先 ↓



D 人就係咁樣滑出去，係咪好簡單先。同一時間都見到唔少人玩滑翔傘 ↓



臨走前再睇多次上格林威爾華德冰河，規模雖然細過冬天好多，不過都好印象深刻 ↓



如是者就落返山了，個陣時都五點幾六點了。回程時都發生一段小插曲，因為落山既時間都接近纜車停車既時間，都好多人都落山。咁一架車就要坐滿六個人，啊，去到轉車站個陣有一對老夫婦入埋來，再之後有行山客帶埋隻大黑狗入來。隻狗其實都好靜咁伏左係個主人腳底，但因為朋友仔非常接近隻狗同怕狗既關係，佢就覺得呢程車坐左好耐，搞笑。

呢到 D 人都係識做生意，開間餐廳對正雪山，日落既時候真係好靚。呢間咁識做既餐廳叫「Rendez-vous」，是吃瑞士菜，都唔平啊呢間 ↓



在回酒店的路途上有個小型哥爾夫球場 ↓



嗯，一返到酒店房間到有個靚仔坐得咁有型係度睇書既？噢，原來係我自己 ↓



呢間酒店叫 Grand Regina，是區內較少有的五星級酒店。重申一次，酒店既級數取決於佢既設施而唔係裝修、服務。唔好以為佢五星級就好貴，剛好網上訂房既時候呢間酒店有做 Promotion，呢間大房只係三星級酒店普通房既價錢，大約 HKD 1900 一晚。早兩日住既 Royal St. Georges 要 HKD 2600 一晚，貴到嘔泡。 由於呢區係滑雪勝地，滑雪既話裝備都比較多同大，所以房間都比較大。呢間直情大得幾驚人，計埋晒我估都有差唔多成千呎！有幅牆分開「客廳」與「睡房」，有個大衣櫃咁。見唔見到上面幅相既檯面有一樽手和一大筒三角朱古力，這是 Welcome Snacks，Welcoming 都說都算幾闊佬 ↓



房間的另一角度，就咁數埋數埋都應該有五隻落地窗。另外呢一刻還未問 Room Service 借風扇，無佢就無咁易吹乾 D 衫。同埋我地都比較怕蚊蟲，都唔敢開大隻窗，有把風扇吹下無咁焗。間酒店可能歷史比較悠久，D 設備都有些少疲態。部電視機還是大肚電視機，哈哈哈哈。另外值得一提既係我做左 D 衰野，見唔見到右下角幅相有幅畫像呢？由於本人較膽小覺得佢有幾分恐怖，所以我就睏左係左手邊，叫朋友仔睏右邊，係咪好衰呢？床尾對住的是浴室和洗手間。係瑞士住到既酒店都幾興咁樣設計，搞笑。↓



這就是浴室，右邊個塊係暖爐來的，又係用來「焊」乾 D 衫既佳品 ↓



洗手盤與清潔用品，點解要影低呢？都唔知點解，留個記念唧 ↓



左邊個位係洗手間，個塊係單面玻璃，裡面望到出面、出面望唔到入便。曾幾可時覺得呢類設計都幾有趣，開放得來不曝露。不過真係不得不讚自己聽覺靈敏，話說係浴室內聽到 D 滋滋聲，一望之下原來有隻昆蟲。一怒之下就踢死左佢，哈，誇左少少，總之係帶著怒氣去擊殺佢 ↓



間房有個窗台，窗台可以望到唔知邊座山，夕陽影照下。一個字，靚！↓



說時遲那時快，影下相 Refresh 下就到七點幾，咁就搵左間餐廳吃，旅遊書有推介，是一間叫「Eiger」既酒店開。點了兩碟再加兩杯飲品，我個款係叫「Wilhelm Tell」，係一款 Rösti（薯仔絲煎餅）配上蘋果醬汁，又甜又咸感覺都幾唔錯。朋友仔就叫左個 Toast，有 D 煙肉、沙律。我地另外分別叫了一杯 Fruit Punch 和一杯 Latte。杯 Latte 有粒 Lindt 朱古力送，咁飲咖啡又有唔同既感覺。[color=red呢餐好滿足，食得好高興[/color] ↓



間餐廳與酒店，D 酒店房個露台都幾大喎！可惜我唔飲酒，唔係既話係露台飲兩杯吹下水都好高興啊 ↓



吃飽飽散下步就回酒店，酒店的外圍，個陣都夜晚九點左右。回到酒店又係洗衫既時間 ↓



總結來說，今天比較平淡 D，但平淡得來好滿足。再揀多次行程，或者唔會到Pfingstegg「行山」，或者會揀 First 展望台附近行下。係 First 個到玩得唔夠耐，唔夠嘆，可以真係坐耐少少（其實都有坐定定望住雪山傾計）。如是者，今天便滿足地完結了。



That’s All.

前言：呢個遊記打左半年都只係打左幾日，實在唔掂當。加上我又唔想剩係放相，想打多少相關資料，唔好話去完都唔知有乜意義，但此舉也較費時。希望襯住呢個 Summer Break 可以打晒前後共二十零日遊記。事不宜遲，入正題！

朝早九點幾起身吃個早餐，其實個一刻個天都未真係光齊，所以大家見到有盞精緻既檯燈開著左，一早就咁有情調，哈哈。同埋室外係 OK 凍，D窗都只係開左少少。這些花邊圖案的餐具來自英國史篤城（Stoke），原來史篤城除左足球隊出名之外，陶瓷都好出名 ↓



這就是餐廳的環境，相中左邊的高身木櫃不知放了些甚麼呢？當時都沒有怎樣留意。這些較為「高檔」的自助早餐提供不同種類的芝士給住客選擺，當中三種最普通的芝士，左起Gruyère、Brie、Emmental，Gruyère 及Emmental是瑞士相當有名的芝士。食幾多切幾多，違憾的是我唔太喜愛凍吃芝士。而右下就係朋友仔既經典早餐組合：牛角包、凍肉、蛋，再加杯果汁。依家諗返，旅行個排應該吃左人生中最多既牛角包 ↓



吃飽飽之後又乘火車出發了 ~ 來個通識題，大家知唔知瑞士首都係邊到呢？蘇黎世？不是！那麼一定係日內瓦啦！都錯。咁樣講大家都估到今日既目的地就是去瑞士首都，Bern （伯恩）。十一點零就去到了，先來就去遊客中心搵下資料。哈，無乜岩用。 ↓



車站對出有個玻璃天幕，都真係 OK 靚。D 人就係度等巴士 ↓



係車站附近，有這間教堂，係 Heiliggeistkirche (Holy Spirit Church) ，外表睇起來無乜特別吧？我地看看內裡裝潢 ↓



記唔記得呢種是甚麼建築風格呢？大家咁有記性一定知佢係「巴洛克式」吧！這間教堂 1720 左右建成，早期有一班修士於此曾開設醫院，此教堂亦名 Hospital Church。到大約 1729 年到由另一間教會接手，巴洛克式裝橫亦由此而起。教堂由 14 支石柱撐起，中間有一管風琴 ↓



在相片中，管風琴前的是講道壇。不過令我最印象深刻的是當天有位司琴現場彈奏幾首樂曲。第一次係教堂聽到管風琴，個感覺真係好平靜好舒服，坐到有少少唔捨得走。我要努力學琴！ ↓



這間教堂可以坐 2000 人，是瑞士數一數二容納人數較多的教堂，係咪睇唔出呢。當地報紙報導 ↓



聽完演奏之後就離開教堂往大街去，Bern 的遊覽路線很簡單，只是一個 U 字，非常方便。以下便是大街景況，看到很多石造拱門，部份是歷史建築，想不到吧？相片中間的鐘樓在古時是一個牢獄塔 ↓



這個應該是不知名的鐘樓，醒唔起有乜特別但我影低左佢 ↓



在伯恩有不同噴泉，這些噴泉不只是噴泉咁簡單，還是一個飲水處。↓



噴泉上有不同的雕塑，一樣具有很貴重的歷史價值，當中有些更是被聯合國教科文組職列入世界文化遺產。大部份的噴泉都在 16 世紀由 Hans Gieng 所設計。當然，這些都是仿製品，真品放在博物館裡。這是當中的八個雕塑，逐一介紹下。左起第一行是「參孫噴泉 (Samson-brunnen)」，不用多說這一幕吧，撐開獅子大口，象徵在戰爭中活躍的勇武男子。在右的是「吹風笛者噴泉 (Pfeifer-brunnen)」，穿著破鞋的男子演奏著風笛，帶有讚美貧窮音樂家的意思。接著的是「安娜‧薩萊噴泉 (Anna Seiler brunnen)」，是為了讚揚將全部財產損給醫院的她。第二行左起第一個是「射擊手噴泉 (Schützen Brunnen)」，以熊擔任射擊手，突顯伯恩風格，在鐘塔附近樹立。在旁的是「食童噴泉 (Kindlifresser-brunnen)」，大口吃著小孩的食人魔，還背著一袋細路仔，用來嚇唬不聽話的小孩。最後的是「哲林根噴泉 (Zähringer-brunnen)」，穿著盔甲的熊士兵，這是記念伯恩的創始家族：哲林根家族，而熊士兵手上的旗幟及盾牌便刻有代表哲林根家族的獅子 ↓



這個噴泉不用介紹吧？「正義女神噴泉 (Gerechtigkeits-brunnen)」，剩計瑞士，有十一個 Fountains of Justice。在 Bern 的這個已於 1986年已破壞，博物館都無得睇真品 ↓



這個噴泉也不用介紹吧？「 摩西噴泉 (Moses-brunnen)」，是來自出埃及記 34:29-35 這段。摩西頭頂的不是翼，是光！點解無啦啦面皮發光變左兩束光呢？據說這可能是翻譯的問題，亦有據說創作者有意用兩束光來表達這段經文。這噴泉座落於伯恩大教堂附近 ↓



先前說過這是飲水處，看看這幅相便知真有其事 ↓



與此同時，有小朋友企係噴泉上影相，重要係「食童噴泉」，都幾有趣↓



噴泉與街道景，有意思 ↓



輾轉就行到「貝倫廣場 (Bärenplatz)」，意思是 Bear Plaza。在廣場位於牢獄塔附近，在 16 世紀後期於此挖掘壕溝並飼養熊。部份廣場被列入世界文化遺產，係咪估唔到？早上是鮮花、水果市場，下午便是食肆露天座。相片背後是聯邦議會大樓 ↓



香港既公園好多時都有 D 阿伯捉棋。瑞士都有，不過這款棋就大左少少。另外係德語區，郵政局叫 Die Post。法語叫 La Poste、意語叫 La Posta，英語叫 Swiss Post。這是瑞士第二大顧主，總部在 Bern ↓



說時遲那時快就到聯邦議會大樓，正面寫著的是拉丁語。有東西兩翼，分別是上議院及下議院開會議的地方，中間由一圓頂拱形的建築隔開 ↓



剛巧那天在聯邦議會大樓前的廣場有個 Event，不知道是甚麼活動呢，但有現場直播、又有新聞採訪，唔通係選舉！？另相片上方的是瑞士國家銀行伯恩總部 ↓



這建築物又是不知為何影下來，但都幾特別 ↓



這張相貌似無乜特別，其實這是舊市區的主要街道，從牢獄塔到時鐘塔，叫 Markt-gasse。相片上方是往東望的鐘塔，下方則是往西的牢獄塔，亦即是我們由火車站行過來之方向。大家亦可從相片看到區內鐵路、類似電車輕鐵，無遮無掩。其實好易被車死，卻有一份和諧 ↓



轉過眼就行到去街道的另一邊，亦即是時鐘塔那邊。看看這裡的巴士應該是電動吧，多麼多架空的電纜呢。還有的是這裡的巴士分兩節行駛的！話分兩頭，就係係時鐘塔呢個轉角位就爭 D 比車撞，哈 ↓



再來看看有 800 年歷史的時鐘塔 (Zytglogge) ，於17世紀時 Bern 曾經有三座守衛塔，包括先前睇及的牢獄塔、相片中的時鐘塔及位於 Heiliggeistkirche 附近但已拆毀了的 Christoffelturm，三座塔連成一直線用作防衛用途 ↓



近看時鐘塔，鐘上的機械鐘除時間外，可顯示星期、日子、星座等等。於十二時及四時會有表演，及可付費入內參觀機械時鐘運作。只不過兩樣都無睇到 ↓



看到街到上拱石下有些闡門？估不估到是甚麼來呢 ↓



近睇是這樣的，都幾古式的樣子 ↓



其實這是地窖商鋪，多數都賣較有特色的貨品、又或是私人劇場 ↓



無乜特別，純粹是覺得幾有氣紛的一張相片 ↓



又來一建築物，看似平凡，但這三層高的建築原來是用來儲存穀物，最頂個層則用來放酒。現在已沒有這個用途，改為用作文化表演及展覽場地。當中有間食肆，其中一間叫 Kornhauskeller，是有名的地中海菜。在這種地方的食肆，價錢當然便宜不了，要 HK$ 700-800 一位。與此同時可以看看 Kornhausplatz 前的單車數量是何其多，另外之前提及的「食童噴泉」在這廣場內 ↓



轉個眼便來到伯恩大教堂 (Münster of Bern)，看到這一身瘦削起骨的建築風格便知道是哥德式的建築吧。違憾的是教堂頂部鐘樓位置正在裝修 ↓



介紹大教堂之前，看看附近的教堂廣場 (Münsterplatz) 。放置了些展板，我有理由相信當時應該有選舉進行中。不知道相片中的人兄是看商品廣告還是競選廣告呢 ↓



早前提及過的「摩西噴泉」是面向著教堂正門。同時有一群學生疑似在參觀 ↓



由於大教堂太高（100米高！）而部相機唔夠 Wide，所以影唔到全貌。原址有間天主教教堂，但因 Bern 獨立為州及人口越來越多後原教堂並不足以應付所需而需要建造一座更大間的教堂。這座教堂1421年開始建造，期間經歷了戰爭及宗教改革，改革後教堂改由新教使用，到了 1893 年才完工 ↓





教堂大門有一關於最後審判的雕塑，中間看到的是天使長米迦勒舉劍砍惡龍。在此大型雕塑下有十個童女的比喻中的童女，由 Justice 及兩位天使隔開，這三位腳下的便是 1421 年教堂奠基石。拱門上最內圈的是五位手持樂器演奏受難曲的天使、中間是八位舊約先知、最外圍是耶穌與十一位門徒、施洗約翰、馬利亞及保羅。真的很精彩！此圖來自維基 ↓



近睇，顏色那麼鮮豔，當然是複製品。其實只有 47 具體積較大的雕塑才是複製品，另外 170 件較小的雕塑是真品 ↓



教堂內部一樣精彩，教堂內天花有網織狀的哥德式結構、聖壇後有彩繪玻璃裝飾。這教堂具有濃厚的中世紀建築特色 ↓



教堂的側翼詩班位附近，剛剛這個時份太陽由這邊照入來 ↓



教堂近入口的管風琴，超巨大。看到這麼華麗便知是「巴洛克風格」吧 ↓



除此之外，還有兩座風琴 ↓



天花板 Close-Up，不過睇唔清中間個個係乜野 ↓



講完風琴就講彩繪玻璃，這幅是瑞士各州的州徽，找到 Bern 的州徽嗎？ ↓



轉個頭就來睇下另一組彩繪玻璃，左邊的找不到是關於甚麼主題，右邊的是「死亡舞曲」，大家還記得的話應該知道在 Lucern 的 Blog 中介紹過吧 ↓



聖壇。背後的彩繪玻璃為關於聖經的故事、包括耶穌出世及受難等↓



由聖壇望向門口方向，個人覺得很有氣紛的一張相片 ↓



另一張很有氣紛的相片，但我搞不清這婦女是誰 ↓



教堂都有紀念品賣，此處賣熊公仔 ↓



離開大教會搵吃，就去了這間吃，普普通通的一間餐廳 ↓



其實本身這間食肆不是首選，反之在貝倫廣場附近有一兩間都好似幾岩食，不過費事再行返去咁解。環境算不錯，之但係看見食物就知一般般吧。我叫左碟全菜意粉，無乜特別味道，應該話無味道。反而個 Pizza 賣相醜得來算叫做有 D味有 D肉 ↓



正所謂好又一餐唔好又一餐，吃完之後再踏上旅途。相片中有個尖頂的地方是一間 Nydeggkirche，這座教堂也是 Swiss Reformed Church 所使用。宗教改革期間曾用作貨倉之用。沿途風景令我感到很舒服 ↓



街道上的七隻小豬 ↓



沿街道經過 Nydeggbrücke 到 Aare River 既另一邊，簡單來說，即是由舊城區往新城區。從另一角度看 Nydeggkirche，係咪好有歐洲小鎮既情懷呢 ↓



上左橋，由橋上望去舊城區。記唔記得先前講過遊覽路線是 U 字嗎？現在已行到轉彎位了 ↓



在橋上往北看，會看到另一條橋，叫 Untertorbrücke（下門橋）。呢條橋係 Bern 最古舊既橋，13世紀初以木建造，到後期 15 世紀尾以石重造。加上吊橋、城門，此橋在中世紀有極大的軍事價值。為迎合現代交通需要，到 19 世紀此橋改建成為現在的樣子 ↓



從 River Aar 的另一邊看舊城區，看到正在修建的大教堂嗎。當然又看到那些歐洲小屋。呢個顏色配撘真係好經典 ↓



轉過眼就來到 BärenPark（熊公園） ，同之前日本登別見過個隻熊公園唔同，呢到規模細 D。係咪搵唔到熊仔呢？↓



搵唔到唔緊要，睇住熊公仔相 ↓



搵多幾搵先搵到熊，總共有三隻。不過呢張相應該只係影到當中兩隻，其實熊唔應該用得意黎形容，會吃人的 ↓



圍牆真的很高，高到這樣 ↓



來到這裡，都係時候講下點解 Bern 同 Bear 有咁大關係。傳說在 12 世紀初約 1191年的時候，有一位統治這城的人叫 Berthold V, Duke of Zähringen。當時佢外出打獵第一次捕獲的獵物是一頭熊，如是者，這位統治者便將這座城改為 Bern，意思是「熊之城」。其後在 1513 年，Bernese 於 Battle of Novara 打勝了仗，活捉了一頭熊作為慶祝之用。此熊便「放置」於牢獄塔前，如是者第一個 Bear Pit 便誕生了。這個 Bear Pit 又稱為先前已提及過的貝倫廣場 (Bärenplatz) ，因交通問題於 1764 年搬到另一位置，及後於 1857 年搬到現時的位置。相片中是 2009 年新 BearPark 開幕之前的 Bear Pit，很簡單的設計，幾舊水泥磚、有沙石、有水 ↓



睇完熊便沿小徑離開，回頭望向 Nydeggbrücke ↓



從河的另一邊看回舊城區 ↓



向山坡望，係咪好似係邊到睇過呢？係咪係卡通片見過？好歐洲小鎮的感覺嗎？但是 Bern 是瑞士第三大城市來的↓



繼續睇風景 ↓







河水的顏色很靚，呈藍色。天空這樣藍！ ↓



在河的另一邊，見到一隻熊的雕塑，都幾特別，好似在捕獲魚類 ↓



呢間 Café 都咪話唔識做做生意，起係呢個位，再加活動帳蓬。岩晒鍾意曬太陽吃飲兩杯的瑞士人。幅相可能細少少睇唔清楚，但係中間位置放左 D 椅係度比人攤係度享受陽光 ↓



繼續行繼續睇風景 ↓



呢個位置其實已經行左上去橋，由呢個角度望落去另有一番風味，好靚！↓


行到這裡，到達「伯恩歷史博物館 (Historisches Museum Bern)」↓



除左歷史之外，還有「愛因斯坦博物館 (Einstein Museum)」↓



哈哈，見到愛恩斯坦既爆炸頭 Icon ↓



呢間博物館超多野睇，有舊到石器時代、古圾及、美國印弟安文化、亞洲太洋洲既藝術，不過對我最吸引既當然係關於中世紀 Bern 既事物啦。先來便是早前提及過的噴泉上的雕塑真品，記唔記得佢地係甚麼名稱呢？還有 Bern 熊徽 ↓



這些便是 Münster of Bern 大門前的真品 ↓



米高與惡龍真品 ↓



耶穌、馬利亞與施洗約翰，還有其他門徒。老老實實，呢區展館既 Setting 有少少得人驚，可能太多古舊的真品再加上電影既渲染，真係淆底。話晒呢批雕塑都成五百幾年前 ↓



這些是中世紀時代的武器與醫學用器材。個堆冷兵器高過成個人 ↓



這就是中世紀 Bern 的模型，整個城就在這特有的 U 形 Aare River 畔發展。只有 Untertorbrücke，其他橋還未建造好 ↓



Münster of Bern 模型，看到鐘塔頂部嗎 ↓



由於時間緊迫，未睇夠喉都要趕快去 Einstein Museum ↓



上圖為七十歲生日的愛恩斯坦於普林斯頓大學與一眾學者，文字描術是愛因斯坦在晚年已不多作打扮。下圖則是愛因斯坦於各雜誌的封面 ↓



鏡子迷宮，這是入口 ↓



呢個都幾嚇人，愛因斯坦頭部雕像 ↓



其實大家有無諗過點解無啦啦 Bern 有個愛因斯坦博物館呢？答案在這 ↓



真係唔講唔知原來愛因斯坦有瑞士公民權！而佢亦係 Zurich 讀書。除此之外，愛因斯坦有一故居在 Bern！之但係佢只係住左 2 年到，不過係 1905 年佢就在這裡發表了「狹義相對論」！晚期的愛因斯坦住在普林斯頓，相中是他的秘書，記住佢 ↓



又一唔講唔知，原來愛因斯坦曾經有一個總統 Offer ↓



最後一年 ↓



先前點解話要記住個位秘書呢？其實好簡單，因為愛因斯坦寫了遺囑將一部份唔細既遺產比左呢位秘書 ↓



如是者，去埋個靚靚廁所就走了，無他，博物館關門。其實有好多野睇，兩個零鐘係睇唔晒的。如是者就在舊城區行下，買下紀念品咁。呢個位會無啦啦噴水，旅遊書說這是住在這裡的藝術家設計出來 ↓



如是者就撘返個零鐘頭火車返去 Interlaken，夜晚時入住的酒店樣子。請不要忘記，這間酒店有兩座，我們住左相片較左位置的那座，比較樸實。其實本身訂房個陣見到有個 Special Offer 可以住係靚 D 個座，不過見佢唔係木地板所以無揀佢 ↓



夜晚由東行到西都找不到岩心水的食肆，不是太貴、就是唔岩吃，又或者裡面乜人都無唔敢入去。最後到了一間意大利餐廳叫「Pizpaz」吃晚飯，我叫了辣肉腸 Pizza，朋友仔就叫左個卡邦尼意粉，還有一杯柯華田、一杯好立克。係咪同晏晝大家食既野對調了呢？印象中呢餐都唔算貴，但都講緊至少港幣幾百蚊↓



由於晏晝吃唔飽，夜晚太肚餓的關係，我一個人吃晒 10 吋大的 Pizza，對面就吃剩了。唔知呢，個一刻覺得呢餐飯幾好味 ↓



可能食飽飽太滿足的關係，無影到餐廳門口，呢幅相係 Google Map 找回來 ↓



行返去酒店，經過 Interlaken 唯一的大型賭場，叫「Casino Kursaal」，唔賭錢的我們只在門口路過 ↓



另一亮點是這間商店，很好的一句 Slogan，哈哈 ↓



回到酒店，我們入住的那座大樓電梯個面板都幾有趣，之前未見過，不過好睇唔好用，好難按 ↓



之前既 Entry 無提及過，是這間酒店提供的沐浴用品，全部都是檸檬草味 ↓



最後 ... Laufen 洗手盤 ↓




作為是日總結，Bern 真係一個好有特色的地方，去瑞士旅行可能會走馬看花的路過此市，但真心覺得可以係到花足一整日來遊覽。回想返剛踏足此城市，剛進入 Heiliggeistkirche 聽到司琴以管風琴彈奏的樂曲，真令人賞心悅目。今天真的很棒！



That’s All.

終於可以親親好耐無見的「假期」，晨咁早起身練下琴，練下 Scale 再彈下要重練個首小步舞曲，新個首歌仔掂左少少。跟手玩左一陣「Orochi 2」就落銅鑼灣飲茶。有款熊貓點心都幾得意，大家估下是甚麼 ↓



原來係一個奶黃包。究竟奶黃包同熊貓有乜關係呢？百思不得其解！咬下咬下，一個死剩把口、另一個死剩個籮友 ↓



趕得切優惠時段前結帳，平少少咁。行下街吹下水咁，本身想買新出既 Thousand Sunny 既模型船，佢剛剛出個陣見過，點知隔幾日後再搵就唔見 ... 天意。買唔到船就去買 Toner。講起就頹，話說部 Color Laser Printer 大半年無用，想話用黎印少少野，點知印出黎既色水褪色，打電話去 Hotline 又解決唔到。最主要原因係過左保養。我自己就懷疑係連住 Toner 既「鼓」有固障，所以唔出色。之前換左支黑色，今日再買支黃色試下。一支成五舊水，換晒的話仲貴過一部新 AIO Inkjet ... 真係越窮越見鬼。

如是者就返去香港仔打下羽球，整個場得我地兩個打 ↓



可惜 ... 強度不夠。無他 ... 朋友仔係呢方面一般般。寄望泳池重開個陣去游水，等佢威下。打完波買左少少茶點比自修中既學生吃，吹下水咁，跟手回家 Hea 左陣繼續打機。終於打到經典一幕 ↓




如是者 ... 一天就過去了。難得健康的休假。



That’s All/

好耐好耐好耐無打日記，唔係話生活唔精彩，都唔係話忙到打幾隻字都唔得，只不過比個 D 旅行日記「擲」住。本身好想打好晒 D 遊記先再加「普通」日記，只不過搞左咁耐都只係打左三日咁大把，要打晒前後二十幾日真係「希望工程」。

話說今日真係好精彩，真係好精彩。本身諗住朝早七點零起身練下琴仔，但實在太眼睏加上又潮潮地濕，都無乜意欲起身練，本著「賴皮」既心態去上堂。九點上堂，九點二先去到。一去到講起話我好少遲就再講起睡眠不足，之後再講起學生睡眠不足，講下講下同琴老師講到話有能力的話不如比個女試下讀國際學校，講下講下講到九點半先彈第一粒音，Hea 彈 Scale，再彈五月微風七月林峰，順利碌過。跟住又唔知點解又停落黎繼續講子女教育，無啦啦講到喜羊羊教壞細路，又講左一陣之後再彈一首小步舞曲。老師就彈到好小步，我就彈到沉重腳步，難。彈左兩次之後又吹多陣水就夠鐘。如是者阿同學仔就緊接上堂，我落堂佢上堂前我地問老師我地三個投唔投契，繼而講了 Michelle 和舞蹈老師投契而不用學費的故事。琴老師大驚，最後當然唔會有免費堂上，哈。聽返同學仔講，佢上堂個陣琴老師繼續同同學仔傾佢個女既事宜，其實我地呢堂應該唔收學費先係，琴老師先係受助者。

如是者返工，到午飯時間，Kari 來了學校 Lunch 順道之後作講座分享嘉賓。佢的加入，令到原先已經很熱鬧的 Lunch & Talk 更加熱鬧。真係幾高興！熱鬧過後無耐，好耐好耐好耐無見的 MT 入來 Talk & Talk。其實就唔係真係好耐無見既，上上個禮拜一先見完，但好似幾年前識去到依家未同佢面對面傾過計，佢把聲係點都無印象。一次過傾左幾年既計，希望之後還有機會再傾。如是者兩位就到「隔離」分享，佢地分享完之後就把握機會同才子才女影相，遲下曬返張相去拎個簽名！哈哈，我係呃相影。 ↓



如是者就到團契時間，飲飲食食傾下計畫下野唱下歌祈個禱，看看以下呢張相估唔估到今次主題是甚麼 ↓



係「試前祈禱會」 ... 當中參與者的狀態有「健忘」、「垂死」、「混亂」、「彌留」、「疲乏」、「失神」及「無奈」。

遲左走遲左撘車，之但係又無乜點塞車，只不過差 D 睏過龍唔記得落車。一睜開眼已經見到其他乘客落緊車，好彩。去到九龍塘還有多少時間，辦理少少事宜就上堂去。上堂無乜特別，但遲左落堂。剛巧愛人又遲左收工，如是者便相約在香港仔 Late Dinner，邊吃邊傾，咁就一 Day。之但係 ... 我做左一件事對唔住愛人，就係 ↓



我買了新 Game，哈哈哈哈哈哈哈哈哈哈哈哈哈！



That’s All.