1. 先看看今年一月一日所寫的展望，#1161。



以上四個短期目標，全部都係今年年中前完成，非常感恩。雖然甩甩漏漏，但係 FYP 都得到美好結局。Dip Ed 方面雖然唔係 Part-Time，係 Full Time。之不過可能係更加好既安排，畢章 Full Time 理應他條 D 無咁緊迫。該在 07 年完成的書簽最終在 08 年復活節前完成，都算 OK 既，當然設計上還有更多改進既地方。最後，這個 Blog 也能夠於暑假中完成改版，真係十分高興。

睇返月份，今年二月到就趕 FYP 既 Interim；三月至五月就埋牙收拾返 FYP 個爛灘子；六月就開始 Update 網站同籌備旅行既事宜；七月有半個月就去左旅行，另外半個月就繼續 Update 網站；八月 Update 網站之外就係寫遊記。咁樣計的話，呢半年都做左唔少野。除此之外，由 06 年開始追 One Piece，追到先幾日終於追到日本進度，前後睇左 367 集。衝鋒陷陣過後，少不免會有多少失落既。



2. 聽日就返學，少不免當然想放耐 D 假。經過數次測試，由我家返去 IED 既最快標準時間為 100 分鐘。雖然車程同車費都幾唔講得笑，不過就剩係返二、四、五、無天地堂、得一個鐘 Lunch、返得早放得早，都幾岩心水。計埋我，共有十一個學生，八女三男。究竟開學係點，就留返遲下再講。



3. 好耐好耐之前見到既 Discovery Channel 既廣告，我都幾鍾意 ↓




I Love the Whole World.



4. 最後，另加 One Piece 其中一幕既惡搞合體片段，佢地扮緊「斷空我」↓






That's All.

依家就講講先前遊記無提及到既野。講返日本人先，就親眼所見，佢地冷氣又唔涼得、太陽又唔曬得。公眾場所既冷氣普偏都弱冷，電車都特別有個弱冷車廂。而露天地方既行人都著長袖或者擔遮。其次就係大家覺得佢地有禮貌既原因係多謝前多謝後，咁事實上都係既。例如你幫佢 Hold 一 Hold 住電梯門，佢都都鞠晒躬講多謝、唔好意思。又例如係酒店，咁酒店職員會主動唔撘有客人坐緊既電梯，係兩間酒店都試過係咁。佢地文化係會覺得麻煩到人所以就覺得唔好意思。不過呢 ... 呢個情況都係發生係上一輩既日本人，新一輩既其實都無左呢種思想，比較接近西方。之但係 ... 電車、巴士又好少見讓座既情況。日本既電車、巴士都一定有優先座位，咁通常唔係老弱傷殘都唔會坐落去。但係當呢 D 優先座位坐滿之後，而又有老弱傷殘無位坐的話，好似無乜點見過有人讓位。係囉 ... 好似怪怪地咁，文化唔同唔明白。



酒店方面，唔計最後個晚住個間 Hotel Nikko Kansai Airport，我覺得京都個間 Kyoto Garden Hotel 最好，跟住就到大阪既大和屋本店，最後就大阪既富士屋。Hotel Nikko Kansai Airport 唔計啦，本身級數係高，而且住 Premium，房間設備及其他配套的而且確比起之前個幾間酒店好好多。Kyoto Garden Hotel 會排較高既位置既原因係間房比我既感覺係好舒適，乾淨就不在話下啦，而且又非常近地鐵站。我諗最大原因係係京都個幾日的確係好開心，乜都覺得好 D。大和屋本店其實都唔錯，和式房間的確有另一種體驗，不過要扣分既地方係好似唔乾淨咁。又唔係話真係唔乾淨既，其實間房係 OK 乾淨，不過廁所、浴室光線黃黃舊舊咁，感覺上唔舒服。最緊要既係間房無煲水壼 ... 煲唔到水，剩係得壼預先沖好既熱水。最後，富士屋唔係話差既，都 OK 乾淨，不過間房實在係細間，而且佢無乜特別，所以就排最後。話分兩頭，除左 Kyoto Garden Hotel 有免費公眾電腦可以上網之外，其他都無。點解？因為剩係得 Kyoto Garden Hotel 既房無提供 Adaptor 比人上網。



行程方面，當然可以編排得緊密一 D，係就係可以無咁 Hea，不過就辛苦 D 咁啦。個人覺得係京都個幾日係玩得開心 D，反而大阪就好似硬係爭緊 D 野。如果再 Plan 過，最大變動可能係大阪少一日、神戶多一日啦。其他都差唔多。逐日講講 D 行程：





好啦，最後就講講 Budget 呢個問題。其實如果可以加碼的話，可以試到更多既野。咁依家計住計住，的而且確有 D 美中不足。不過都唔係一定加碼就好既，如果下下都加碼，咁就會洗多好多錢。真係講都唔信，我地為左慳 10 yen 而鬧交。咁又何苦呢？旅行唔係應該要開開心心嗎？

總括今次行程，的確係好開心好滿足既。不過下次真係幾年後啦 ...



That's All.

今日就係日本之旅最後一日，都講不上有甚麼行程，只係一早起身撘飛機。七點鐘到已經 Pack 好晒野準備離開酒店，呢幅就係等 Lift 既大堂 ↓



如是者就 Check-Out 了，大家見唔見到邊個 Check-Out 呢 ↓



Check-Out 完之後又疊水返！由於尋日已經抄低晒要係邊度邊度買 D 乜野，所以都絕對唔擔心 D 錢洗唔晒。先來就吃個早餐先，行過幾間食肆，都係食日式西餐，唔太岩食。最岩食既始終都係麥仔早餐，哈。不過買野個陣，Counter 個位 Staff 放個薯餅放得唔好，行返去位既期間跌左塊落地下囉。Counter 同座位既距離十步都無，唉。如是者，就變左咁 ↓



但係好戲在後頭，唔知點解附近放左個麥仔等 Order 個 D 號碼牌。咁岩個經理見到，走黎用日文講左幾句，結果就比左兩塊薯餅。如是者，咁變相就賺左塊薯餅，雖然好 Cheap 有呃人既成份，但都無辦法了，的而且確係個位 Staff 放塊薯餅放得衰。吃完之後就後機場既商鋪作最後衝次，真係話咁快就買晒 D 野，呢幾盒都係機場買，最好食都係呢幾盒 ↓



D 相就係返到黎香港先影既，上面個兩盒其實都係有朱古力既夾餅，好食到震。下面個盒就係わらび餅，不過尋日係黑門市場買個盒わらび餅真係好食好多倍。

買完之後就到這個離境闡口，12 日旅程真係過得快 ↓



入闡後其實重有 D 時間既，不過就攰攰地，所以都早 D 去到候機室到 Hea 下，就係呢度 ↓



出面就係停機平 ↓



Hea 係度既期間，都有 D 野幾好笑。話說個闡門關左，咁有 D 懷疑遲到空姐無咭拍上唔到機，佢都搞左好耐都唔得，Call 人又好似無得著。最後係點解決我都唔記得左，好似係等其他有咭既空姐開門。

一上到機無耐就派餐，就係呢 Set 漢堡扒餐 ↓



食飽之後 ... 係有睡覺既時間，少不免都睏一睏既。話咁快就到香港既上空，可能係心理作用，係覺得個天係有 D 灰灰地 ↓



話咁快就出埋閘，係用「e-道」出關，真係好 Easy。就眼見，個個 Moment 要排隊既話，都要排一段時間。入境後好快就拎埋行李，就去返 12 日前食「出發 Lunch」既無良精品既「恆香棧」吃 ↓





之前兩個零鐘先食完一餐，點可能咁快食另一餐呢，不過唔食既話就肚餓。如是者 ... 都下晝兩點幾三點，坐個 A10 就回家了。



日本關西 12 日之旅完結了 ... 但係還有一個總結，大家繼續留意。That's All.

今日 ... 係日本之旅尾二個日，實質係最後一日。講返少少蝦碌事先，話說酒店房有個雪櫃，個雪櫃門貼住張紙寫住每朝早雪櫃門都會自動 Lock。咁我地係大和屋住左三晚，早兩日朝都試過雪櫃門無 Lock 到、又或者佢已經 Lock 左又 Unlock 返。咁早一晚就買左盒 Coffee Milk 放左入雪櫃，諗住都無問題啦。點知今日朝想打開櫃門既時候，櫃門竟然 Lock 左！？叫酒店職員開返個雪櫃門又樣衰，咁都無計啦，當黑仔啦。如是者，準備拉行李離開酒店既時候，突然聽到「撻」一聲。當然走去試下開開個雪櫃門啦，YO，竟然開得到！哈，重唔拿拿聲飲埋盒奶先走咩。飲完之後，就 Check-Out 了。留低 D 行李，出發到這個「松屋町」買手信，大家認唔認得出呢隻係乜黎呢 ↓



除左綠色，還有紅色同黃色 ↓



係咪有 D 印象係邊度見過，但係又講唔出邊度呢？睇埋呢個應該都知道吧 ↓



早上十點，我地就去到 UHA 館既總部下既糖果店試食，買左 D 糖。平唔平我唔知，但係 D 糖都幾好味，所以二話不說都買 D 返去。係糖果部既隔離，其實有個小 Cafe，不過由於時間尚早，未開。之後，就係松屋町附近既鋪頭買手信，主要都係買零食，例如批發的「森本商店」，呢間絕對要一去，裡面有一大包既綠茶朱古力賣，超好味！還有其他日式燒餅，又係一大包，都好好食。除左食品，松屋町還有好多賣懷舊玩具和人形店。我地就去左這間開業已過百年既「タニカトーイ」買左少少野 ↓



唔好睇佢殘殘地，就當日閒日既早上，呢間鋪頭都塞滿晒人，懷疑係幼稚園職員聯群結隊拎住清單黎買野。咁就係兩旁既商店行下睇下，少不免有 D 懷舊玩具既，不過呢 D 野，睇過已經夠，唔洗買。如是者，行左 100 分鐘就離開松屋町了。其實松屋町有 D 翻新既舊建築而成既主題商店，不過真係無時間行去。

每次經過日本橋站都見到這個 ↓



這就是日本既捐血站，每次見到「獻血」都笑一笑，少少衡動想獻一獻。其後就有機會逛下菜欄，到了「黑門市場」↓



有魚檔、肉檔、菜檔，呢 D 好難無既。有藥房，特登入去睇下有無「無比膏」同「雙飛人藥水」賣，嗯，搵唔到！行左一陣，就去閃咭書推介既「あそこ」既手拉烏太店吃，內裡既裝潢就係咁 ↓



老闆兼師傅煮野既爐頭就係咁 ↓



呢間鋪都開業好多年，老闆由後生做到老，店裡都貼左佢後生時既相片。呢度最出名既係咖哩烏冬，我第一次食咁濃稠，即係「杰」既咖哩湯，濃稠程度係同食白汁煙肉意粉既白汁差唔多。睇住阿老闆落生粉？麵粉？煮個咖哩湯底。雖然好濃稠，但係都好特別既，不過講真都幾辣。老闆重主動幫我地影相，真係唔錯。

可能時間唔早唔晝，街上同市場都無乜人，都逛得幾他條。之不過，有人「食碗面反碗底」，係某間菓子店裡倒轉左人地 Pack 得好靚既菓子，係上下倒轉個隻。原意係想睇下幾時過期，咁就好順手就反轉盒底咁睇下，遺憾既係 D 菓子都一齊反轉埋。見到咁既情形，除左買之外都係買。有人重要唔 Gur，都唔知唔 Gur D 乜野，擺到明係笨既行為。就算係香港，都唔會無啦啦上下反轉睇下 D 魚生壽司拼盤幾時到期啦，人地 Pack 得咁靚。這些菓子究竟好唔好食，遲少少再講。

睇下車站附近幾多單車 ↓



如是者就行返去道頓堀既 Glica 專門店買手信，不過呢間店既人比我既感覺同其他店鋪唔同，我去完呢間買野我無左個種開心。點解會咁，就因為個收錢個位職員無係我地比完錢買野之後講「多謝」，好似好不屑做我地生意咁，亦都無自動自覺比多幾個袋我地，要問佢先有。咁係旅遊區既店鋪，都係做遊客生意，咁遊客大多都係買手信，自動自覺比多幾個袋人地分都好正常唧。可惜呢度既職員就無咁做 ... 之後係其他地方鋪頭都好自動自覺。如是者，呢間 Glica 專門店是首間被評為 Bad 既店鋪，主要係唔鍾意個位職員。講返呢間 Glica 專門店，裡面賣既除左係 Glica 出品既野比較特別之外，其他賣既野都係同出面店鋪賣既同一個價錢同一種產品。咁入去睇下都 OK 既，但係真係買就可能不用在這間鋪頭了。

買完野之後就拎住一大袋二大袋返去大和屋，咁稍稍將之前個 D 野重新整理，再放入行李或者背囊、紙袋等。咁就離開睏左三晚既大和屋，離開之前，補貼返張相，就係大和屋既夜景照，就係咁 ↓



記住係「補貼」，離開當時係正午時分。如是者就撘鐵路去關西國際機場，話咁快我地就黎到關西國際機場，大家搵唔搵到「香港」既燈籠呢？是寫中文的。搵到比個叻你 ↓



如是者，我地就去日本之旅最後一晚住宿既酒店 - 「Hotel Nikko Kansai Airport」，位置就正正係機場隔離 ↓



點解會 Book 呢間酒店呢？原因好簡單，因為第二朝要撘早機，咁唔想咁辛苦早太多起身，所以就計劃最後一晚住係呢間係機場隔離既酒店。我地重要住Premiuim 房，臨走前都豪一豪！咁呢間係我地唯一一間無用 Credit Card 預先找數既 Booking，咁諗住比 Cash 既。其實呢個旅程既開頭話驚唔夠錢洗既原因就因為要留返 D Cash 比酒店住宿，21000 yen 一間房。如果唔比 Cash 既話就會多左千幾蚊港紙，所以之前都計到剛剛好。咁都估到會收 Deposit，但係又估唔到收咁多，收 9000 yen做 Deposit，即係 Check-In 個 Moment 無左 30000 yen。以一房人做單位，我地其實都係得 32000 yen 係身，比左 30000 yen之後，剩返大約 2000 yen 唔夠係身。開頭諗住可以去「りんくうタウン」，係機場附近既 Outlet Mall 買下 Agnes B、Gucci，但係依家得返 2000 yen。剩係車錢每單位都無左 1000 yen，剩低 1000 yen 夜晚食杯麵都岩岩好咋。但係唔知點解，我既反射動作就係比左 Cash 而唔係比 Credit Card。

不得不提既就係，個 Reception 個位女職員係呢次日本之旅遇到既第二位能操流利英語既人，第一位就係神戶異人館個位。Check-In 完之後，咁諗住拖個行李上房。就係呢個時候，有位比我矮小且纖瘦既女職員就推住架車仔將我地 D 行李車上房。個位 Staff 的確係細細粒，我地 D 行李其實都幾重下，剩係我個件都有 20KG，睇見佢抬 D 行李入房個陣都見到佢辛苦。曾經都諗住自己搞掂既，但係個位 Staff 又話唔洗。嗯，依家先醒起可以比 Tips 喎！不過呢，好似人地既文化係唔會收，再者得 2000 yen 係身，比左之後就要吃風了。

雖然出了點意外，但係睇見間房之後又精神晒，睇房 ↓













睇完房之後，都要重新計劃一下餘下既時間。決定放棄去りんくうタウン，因為去完真係要食杯麵。唯就改變計劃，去隔離機場逛下睇下有乜野買同食。首先去左酒店個個商場，行完之後心都寒一寒，因為剩係得吉野家個類頹野食。但係當行到去隔離機場既時候就有一番既體會。首先睇睇機場先，係香港最惡既就一定係 Cathy Pacific，係日本就有 JAL 同 ANA。呢個就係 JAL 其中一組既櫃檯 ↓



由於手頭上只剩下 2000 yen 及明早 Check-Out 完會多返 9000 yen，所以都會影低呢類既牌，牌上寫左每間店既開門時間。咁我地係呢段時間就行晒所有既店鋪，再寫返低邊 D 野想買、係邊間買，到第二朝就可以好流暢咁買齊野洗晒 D 錢 ↓



食野方面都唔洗擔心，有 D 較大眾化既食肆，唔似得香港機場買個麥仔都貴幾蚊。其中一個大型 D 既 FoodCourt 就係叫「町家小路」↓



搵到地方洗錢又搵到野食之後就可以好開心咁過埋呢晚，睇下個動作就知開心 ↓



返一返酒店，執下行李、分下戰利品、同埋 ... 大家睇下呢張相多左 D 乜野 ↓



就係多左盒黑門市場既「三都屋」買既「わらび餅」，即係頭先比人反轉個盒 ↓





如果大家係夏天既時候去日本，就一定要試一試わらび餅，真係好好食的。話分兩頭，房外既景色就係咁，雖然多雲，但係好靚 ↓



呢 D 就係 Room 8017 既戰利品 ↓



檢閱完戰利品之後，就返去機場食晚飯。今餐就食奄列 ↓



好奇怪！作為一間機場裡面既食肆，但係裡面既職員竟然唔識英文！由於價錢相宜，我地都夠錢叫多杯野飲。其實話無錢都唔係真係無錢既，有幾千銀港紙、又有 Credit Card，點會真係無錢。不過有人話唔想 Over-Budget 所以先唔換多 D Yen，我自己就無乜所謂既，去旅行最緊要開心。係囉，其實如果酒店住宿一早決定比 Credit Card，夠我地食神戶牛添。算啦，唯有期望唔知幾多年後再去多次。

來個 Close-Up 我自己既戰利品 ↓





如是者，Day 11 也完結了 ... That's All.

已經進入日本之旅既尾聲，作為壓軸既節目當然有返多少份量啦。今日就去大阪既「Universal Studios」！原本諗住十點鐘開門既時候就到既，結果呢，十點九先去得到 ... 點解遲左呢？無他既，有人鍾意「囡囡」，囡耐左就變成咁。如果可以早多少起身就 Perfect 啦。我地撘鐵路去，都話咁快就去到 Universal City，一入呢個大門口，就展開今日既「淆底之旅」↓



仔細 D 睇，門口有 Snoopy 同 Chalie Brown 既公仔 ↓





行多幾步就見到電影成日出既地球 Logo，實物都幾大下 ↓



入場卷 + 地圖↓



入場後就會見到一個以美國 Style 既大街，就係咁 ↓



先來就去玩這個「Terminator 2 3D」↓



呢個其實算算地係 4D 既，咁一入去既時候，會睇返一 D Terminator 2 既片段，大約係講返係未來既戰事。咁期間有個職員係到搞下氣紛咁啦，不過全程講日文，點識聽呢。OKOK，好快就入去類似劇院既地方。每人戴返副 3D 眼鏡，如是者螢幕同舞台輪流有表演，會見到真人版既未來戰士同敵人，但係又會睇住大隻佬行入 Screen。真人演員會係觀眾附近行來行去，都幾有現場感。真真假假，假假真真就編織出呢個表演。點解我會話算算地 4D 呢？因為臨完結個下，張櫈會跌一跌，個一下真係嚇個凸。同場有小朋友因為咁而喊，哈哈。

擰個頭就去「玩」另一樣，今次就係同外星生物接觸既「ET Adventure」↓



咁呢個都要排少少隊，已經唔算多人。少左 D 人既原因係附近有歌舞表演，但係我地無興趣，所以就去左呢到。呢個 Attraction 比較唔 Attract，個人來說覺得呢個野 Hea Hea 地，係坐係一組五架單車造型既 Ride 上，穿越 ET 既家鄉。基本上無任何刺激，齋坐同睇 ET 佈景。開頭以為臨尾都會跌一跌有 D 刺激，可惜無，失望。

好啦，失望過去就有萬分期待，接下來我地就去玩「The Amazing Adventures of Spider-Man™-The Ride」↓



大家覺唔覺，通常男仔都鍾意 Spiderman，唔知點解呢。真係特別興奮！入去既時候，開頭以為無乜人排隊，點知原來係室內打蛇餅。不過都唔算係「乾排」既，係內裡排隊既四周都有一 D 同 Spiderman 相關既佈置，例如 Peter 打工個間報館，都算係有 D D 野睇啦。最緊要，歎住冷氣排隊，條氣都順好多。言歸正傳，呢個 Attraction 就刺激好多啦。要戴 3D 眼鏡再坐一架佈置成裝甲車既 Ride，咁就係穿梭 Spiderman 同壞人戰鬥既場面，由於係 3D 再加上係 Ride 既關係，彷彿係動畫中既一部份。受電擊、被掟落街、撞車等等都好真實。呢個 Attraction 係十粒星推介！非玩不得！Spiderman 本身係記者，少不免會同大家影返幅相既，可以係出口買返。咁我地當然無買到啦，反而就係 Gift Shop 裡面既貼紙機影左相，D 相影出黎都影得好靚！Mark 低晒邊 D 必買既精品之後就離開了。

之後就去坐呢架車，大家認唔認得係乜野車呢 ↓



唔認得？！咪就係「Back to the Future」架車 ↓



呢個就係室外排隊既，不過好在唔洗排好耐。一開始就去某間房裡聽 Briefing，環境係類似緊急出動著晒紅燈個 D房，博士就透過電視機講故仔。故事好簡單，話說某個壞蛋搶左博士架穿越時空車，作為主角既我地就坐另一部車追佢。咁就係坐係一架佈置成穿越時空車既坐駕，咁穿越時空既時期架車會有煙噴出黎、再加埋 D 閃燈同震動，真係好似穿越時空咁。之後眼前既係一個超巨大天幕式既螢幕，類似太空館個 D。如是者就係不同既場所穿插，例如熔岩洞穴、太空等等。同之前 Spiderman 個 Attraction 有 D 唔同既就係個 Ride 本身唔會有路軌，咁由頭到尾只係架車係咁震、係咁 Fing。如果之前 Spiderman 係十星，呢個都有七星啦。點解？因為呢個有穿崩位，如果將個頭向車外兩邊望，你會見到其餘幾架車一齊陪你 Fing。最重要既係，玩左 Spiderman 先，一比起上黎就覺得爭好遠。

接下來就去去吃 Lunch，去了這間叫做「KWBB」既快餐店 ↓



呢間店唔係特別好食或者特別平，只係個陣時間唔早，大約下午一點半。只係諗住是但搵個地方快快手食完再開始下半場。如果唔係咁，可能會去 Jurassic Park 個邊既 Discovery Restaurant 或者 Snoopy Studios 既 Snoopy's™ Backlot Café，因為佢地都係閃咭書既推介。我解就叫左一 Set 肉醬煙肉漢堡餐，就係咁既樣 ↓



雖然外表樣衰 D，不過唔關間食肆事。因為 D 配料、醬汁係自己加，所以樣衰都係自己搞成。唔好睇佢咁既樣，一個餐都要七十幾蚊港紙，絕對唔平。味道都叫 OK 既，呢類快餐，都好難唔好食既，中規中距啦。食飽之後就去附近行下，大街就係咁既樣 ↓



附近有個廸欣 ... 唔係，係「環礁湖」↓



係湖邊死撐開對眼影左 D 相之後，就有 Parade 睇，係 Snoopy X Hello Kitty。大家可能會問，點解 Universal Studios 有 Hello Kitty 呢，乜唔係唔同公司嗎？的確係唔同公司，不過日本人鍾意 Hello Kitty 既程度是十分瘋狂，所以都不得不加 Hello Kitty 吧。留意下呢隻 Snoopy 既身形有點怪怪地吧 ↓



之後就到左附近既「Animation Celebration Studios」↓



呢到無乜特別，係有 D 唔知玩乜既電子遊戲機比小朋友玩，有 D 公仔比人影下相咁，不過真係無隻識，就例如呢隻 ↓



轉個頭就去到另一個 Attraction，「Shrek's 4-D Adventure™」↓



係呢度排左一陣間就可以入去。情況同 Terminator 個個差唔多，一入去都係睇下 Video 暸解個故事背景先。話說 Shrek 第一集 Ending 咪有個壞既國王比舊石像擲死左，咁佢就變成鬼魂返黎向史力加報復。如是者就發生一連串緊張刺激既旅程。一開始都係要戴上 3D 眼鏡、坐係 4D 既座倚上，這張 4D 既櫈可以噴水、吹熱風、震動等等。咁一路睇就一路感受個種溫和又喜悅既刺激，呢個 Attraction 都值十粒星。如果大家有去過 Disney 都可能會玩過類似既 4D Cinema，其實個硬件係一樣，只係播放既片就米老鼠變成史力加。話分兩頭，除左 Shrek 之外，隔離重有 Sesame Street，不過對佢無乜興趣，所以就離開了。

之後就行去「玩」「Backdraft」，中文名叫「浴火赤子情」。係咪完全無頭緒玩 D 乜呢？大家睇睇官方所寫既介紹 ↓



其實都唔算叫做玩既，只係好似睇人地拍戲咁。裡面有 D 真既特技 Show 比你睇，有火、有爆破、有倒塌，成個真既工廠火災咁。親身先可以感受到個種震憾，係會感受到個鼓熱力、聞得到電油味、倒塌個種嘈音。最尾尾所有特技完晒既時候，遊客企緊個條路會跌一跌，都真係嚇一嚇。講到好似好精彩，其實只係無講到其他悶既部份。整個 Attraction 分開幾個 Section，每個 Section 都講下點樣拍個場戲，呢個時候真係悶到震，個日本職員講既野明 D 唔明 D，真係好難投入。係最尾個 Section 先有 D 值得睇既野咋！

如是者就離開 New York、Hollywood、San Francisco，準備進入 ... ↓



Yo，I'm Coming. 「Jurassic Park -The Ride ®」↓



呢個就比較刺激啦，咁之前係加拿大都玩過一模一樣既野，咁就要坐係個艇上，就會穿越侏羅紀公園內既一 D 場景，當中會見到假到震既機械恐龍，佢地會噴下水整濕下你咁。接近尾聲既時候，個艇就會進入實驗室既部份，由於四周都係黑漆漆，兩旁既假恐龍再加上閃燈，真係好似有恐龍跳過咁，都幾好 Feel！最後 ... 少不免就由上衝落去啦。我地坐係最尾個行，差不多係無濕過。反而最前個幾排既人就濕透。呢個就係 Attraction 個 Setting ↓



再來幾幅連橫圖，大家感唔感受到個種衝擊 ↓



還有其他 Setting，例如架觀光車 ↓



如是者就從這個門口離開 Jurassic Park ↓



輾轉就黎到呢到，大家認唔認得出係邊套戲呢 ↓



認唔出？再睇下，無理由唔知掛 ↓



來到「Amity Village」，少不免要同條大白鯊打交道啦。咁就上左一架觀光艇，艇上就有個職員充當搞氣紛既人。咁架船就會係個「海」航行，期間就有條大白鯊衝出黎衝下船、衝爆下油桶咁。個位職員駕輕就熟咁拎住支 Shotgun 扮射條大白鯊，哈，一定百發百中。最重要既係，個位職員都交足戲。心諗，一日做咁多場都可以 Keep 住咁既態度算唔話得啦。期間有幕噴水好有趣，身後個位大叔比水噴完都照 Keep 返個 Post，超好笑。之後就去左呢間 Gift Shop 買左 D 手信 ↓



唔係講笑，裡面賣既大白鯊 Memo Pad 同 Folder 都好 Stylish，可惜返到香港既時候，我個 Folder 比我既不小心處理整到有一條小摺痕 ...

之後就前往「Snoopy's Playland」，玩這個「Peppermint Patty's Stunt Slide」↓



我諗大家係海洋公園都會玩過，就係坐住一隻象皮艇沿住水管 Sir 落黎。全程唔夠一分鐘，但係排左大半個鐘。如果無乜人排隊既話，呢個都 OK 既。可能呢個 Attraction 既對多比較合家歡，所以刺激度相較低 D，但係都幾好玩。

玩完個 Slide 都差不多關門，咁就快快手去埋隔離既「Snoopy's Sound Stage Adventure™」，當中既兒童版過山車 ↓



唔洗排隊，短短地既過山車都唔錯既。呢個 Attraction 既 Target 肯定係小朋友，我覺得 D 位有 D 窄窄地。個 Studio 真係幾靚，大家可以睇下 D 相 ↓













如是者就離開 Snoopy's Studio，係呢個漫畫世界的確係幾開心既，所有問題都唔係問題。再來看看 Studio 附近既地方，呢個就係閃咭書推介既「Snoopy's™ Backlot Café」↓



這個就係 Snoopy Playland 既另一個 Shot，見唔見到史路比噴水池 ↓



係 Snoopy's Studio 隔離，就係「Land of Oz」↓



呢個係以魔法為主題既區域，少不免會見到綠野仙踪既角色 ↓



大家都見到相裡面都無乜人，因為 D 人都準備離開。離開既路途上就見到好想玩既「Hollywood Dream the Ride」↓



呢個係比較新既過山車，絕對係這個主題樂園既主打，看看簡介 ↓



可惜有人淆底所以就無玩到 ... 再來睇下影城裡其他既地方，例如這個 Hello Kitty 專賣店 ↓



之前既 4D Cinema ↓



如是者就離開 Universal Studios 了，真係依依不捨 ↓



如是者，就開始搵野食。附近既大街都幾靚，就係咁樣 ↓



由於附近有酒店，所以食肆種類都非常多，而且都開到好夜。咁係個商場打左個圈之後，今晚就食這個日式西餐，間餐廳既環景就係咁 ↓



就吃了這個 Set 和這個 Set，總算鋸過扒，雖則唔係神戶牛 ↓





最後再來一個 Dessert Set ↓



呢餐無預期中咁貴，可能今日領教過七十幾蚊既漢堡包餐掛。這些就係今日戰利品 ↓



總括返全日，都算幾順利啦。一來天氣晴朗，唔太熱又唔落雨；二來又唔洗成日排好耐隊。不過呢，其實我地 Skip 晒 D Parade、Drama，睇得到既話當然就最好啦。不過邊有得咁貪心，話晒都玩左大部份既野啦。離開既時候的確有多少依依不捨，因為完左今日之後，日本之旅只剩下一天多少少既時間。



Day 10 完結。That's All.