估唔到今日咁精彩既 ... 可以用「有趣」黎形容。今日同同學食 Lunch 既時候，話說同學們討論緊 Micro-Teaching 當中既一 D 問題，無啦啦講到物件有無色彩既問題。有幾位同學講得興高采烈，咁我就嘗試勸大家將個討論焦點集中返。過左無耐之後，有位非常熱血既男同學同我講「... 所以你就唔鍾意諗野」、「你學習態度都幾差喎」。哈哈 ... 無語問蒼天。真係好搞笑喎，原來我有唔諗野既時候 ... 我自己都唔知。學習態度差 ... 或者我目標清晰，就係 Pass 晒所有 Course，無期望話要學乜野。再講，短短十堂可以學乜野，到最後都只係不斷既嘗試而累積既經驗。

當時聽到咁既 Comment 都有多少 Odd，真係無諗過喎。熱血青年比我既感覺係「天真」，見識唔夠廣。咁唔會話有乜大反應既，剩計上堂都係兩個零禮拜，點會咁清摸到我個底，LOL。話分兩頭，有其他同學說我似俾學生洽。哈，又係覺得好「有趣」。即係咁，有幾何見一個少爺仔會比人洽，洽人就會。看來似係我既殼斯斯文文，所以比人咁既錯覺。其實我係惡霸。

再講返平時上堂討論既情形，其實唔太理想。雖然有唔同院校既同學，之但係又未能從不同角度討論問題，反而見到因為思考方式既不同而帶來既分歧。有一位具有 Master 學歷又有代課經驗既女同學時常將佢代課時既情況搬進討論。咁唔係話唔好既，但有時就搞到整個討論變得太過現實，有部份組員就覺得佢既經驗就係事實既全部，但係事實又點止咁少呢。依家上堂討論就係要討論有少少理想既情況。有時一句依家 D 學生係點點點喎，咁就了結某些 Idea。最重要係，佢比我既感覺係一個好傳統既老師。咁都唔係話唔好，之但係如果下下都咁傳統，係咪有多少問題呢。

講返自己，咁自己係討論時既表現有進步空間。有時有 D 野係覺得有問題，但就係講唔出有乜問題。咁我都嘗試提出來，當然有人覺得不是味兒。佢地會覺得說好與唔好沒有甚麼大意義，要講原因同改善地方。不過講完原因之後，覺得無問題既人都覺得有問題。兩個人覺得無問題、兩個人覺得有問題，還有一個既，不過立場唔夠堅定。結論咪就係無結論。有趣既係，通常來自 CU Fine Arts 既同學意見相同、來自 City CM 既同學意見相同，剩下來的就是 Poly Design 既同學。講 Theory 的確唔夠 Fine Arts 既深厚，所以我通常站在學生與 Doctor 的角度來看看設計好的教案，看看有甚麼漏洞。遺憾既係，次次都係我做黑臉。又唔係話好有問題，但係就有多少疑惑唧。可惜 ... 好多時都係得來自 City 既同學支持。

其實還有其他問題，留返經歷多 D 既時候再寫。原來 ... 都有教徒唔知「聖公會」是甚麼東東。還覺得以聖徒名作教會名稱幾得意。Oh My God ...



That's All.

咁又一個禮拜，即係咁，好忙又唔係既。但係就成日唔得閒，都係個句啦，如果個日要返學既話多數都唔得閒。剛剛發覺有件事，話就話星期一、三 Day-Off，但實際其實星期一、三都要返去聽 Talk。來回幾十蚊返一返去都咪話唔麻煩，錢都係問題，但係時間更加係問題。一返去 IED 就無左大半日時間，大半日夠我好好 Hea 了。又唔係話唔想返學既，但都唔係話想返，可能目標明確，返學只係例行公事。



話分兩頭，呢期駁返部 Wii 落電腦，《Mario Kart》係幾過癮既 ↓





再話分兩頭，呢期整呢個八達通套，算係第三個版本，都幾順眼 ↓





That's All.

尋日同人講開約時間「開組」既問題，講左一會兒都要將個開組日期延後兩週。咁講講下就講到某某身上。這位某某係鐵質含量勝於一般鐵人既「超鐵人」，平時已經要返工、夜晚要返學。咁都唔係好鐵唧，典型半工讀例子。但係令佢成為超鐵人既原因係 ... 普通 Part Time 普遍都係 Take 兩個 Course，最多三個 Course。之但係佢好似 Take 左四個 Course，其實都唔肯定，只係知道佢要返足四晚學，基本上係同 Full Time 差唔多。咁 Full Time 返工 Full Time 返學都有多少驚訝，最驚訝既係佢禮拜日係坊間報左其他 Course 去讀，真係堅到 ...

閒時都問過佢點解要令到自己 D 時間咁緊迫，佢就話想快 D 讀完。但係背後令佢想快 D 讀完既原因唔係因為家庭壓力、經濟壓力，只係因為佢過唔到自己個關？聽佢講，覺得好似怕自己成為負累？係囉，好難明白佢既諗法。但係 ... 好似好黑心，其實佢既情況唔抵可憐，係自己一手造成。搞到健康差、精神差都係預料之內。之不過人人唔同，我覺得咁既編排辛苦唧，可能本人覺得係正常、負擔得來。

係呢位朋友既身上，我見到係一個好「苦」既樣。唔係話佢生活好艱苦、好痛苦，只係話係佢臉上較難看上喜悅既神情。後生仔咁快咁「苦」好似唔係太好，唔應該係咁。



其實唔應該論斷別人既，我地為個朋友仔多祈禱吧。



That's All.

開學一個星期，等我講下呢個禮拜既總結。理應每個禮拜返三日既，但係有一日要返去聽 Talk，結果就返左四日。四日都係晨咁早就起身返學，有幾晨？六點起身，平均六點八就一定要出門。基本上係撘隧巴、火車再轉巴士或者穿梭巴士，這個穿梭巴士的確係快，係大學站既巴士站上車，十分鐘就去得到 IED，而且係免費，的確係推介。點都比係大埔撘巴士入去 IED 快最少十分鐘。之不過呢條穿梭巴士線只係試驗性質，到十一月到就無。單程車費約廿鬆，撘穿梭巴士就平 D。每日就撘個幾兩個鐘車返學，都咪話唔攰。

原來 ... 我地有班主任，真係估佢唔到，成件事好中學 Feel。最新名單係共有十二個學生，八女四男，有一半來自 BU Visual Arts。基本上每堂都係不斷討論討論同討論，都無乜其他特別野，係攰唧。基本上如果個日要上堂到下晝的話，個日已經做唔到 D 乜野。同學都無乜野既，都 OK。大約一半 Freshgrad、一半就已經做過野。睇個樣，應該無 CM 個 D 咁令我大開眼界掛。

開學大致上都係咁，還有九個禮拜就可以放一個禮拜假，之後就開始實習。倒數開始！話晒朝朝咁早出發都咪話唔攰。



That's All.

呢排心血來潮聽返 Chage & Aska 係 1991 年唱既《Say Yes》，係日劇《101 次求婚》既主題曲。大家有興趣既睇一睇吧，強力推介 ↓




睇到中間既時候，大家可能唔明佢地做乜停左。其實係咁既，Aska 突然唔記得左歌詞，咁就就講「だめ」，想話再開始過。Chage 就話，監製記住用返呢段片。之後 Aska 就話，點解會係呢個時候出錯呢。




That's All.