好奇怪 ... 呢日突然諗起小鳳姐既一首歌，就係「順流逆流」↓






呢首歌係 06 年的 [這天] 都曾經提過，今次再睇返，又有另一層感受。係廿歲鬆既年紀明白呢首歌既意景 ... 都唔知係一件好事定壞事。上次睇既時候就將個著眼點放係「從來得失我睇透」，今次就係「故意挑剔今天我不在乎」，做好本份真係無有怕。

同呢首歌仔都有 D 關係既，話說之前有份以 Group 形式的教案 Assignment 既。早幾日由於意見分歧，所以就分開左兩小組。我個邊就有我同另一位 CM 既同學；另一邊就兩位 Fine Arts 加一位 Design 既同學。咁樣做會唔會搞到大家關係好疆呢？咁又唔會既，我覺得本身都係同 FA 既某位口和心不和。依家分開左都係好事，至少我地個組只係花左一個鐘面對面咁傾就完成左教學既流程，好過之前開埋晒 D 無意義、無結論既會。始終「道不同，不相為謀」，分開黎做對大家都有好處。

真係唔係講笑，就連隔離組 BU 既同學都睇得出我地既討論有火藥味。個次討論是咁的，話說本身上堂既時候係分兩大組咁坐，一邊就係 BU 加一位 Poly，另一邊就係剩餘既兩位 City、兩位 CU、一位 Poly，再加一位做 Observation 既外來人。CU 個某位突然挑起討論既 Topic，係關於一件藝術品應唔應該有 Artist Statement。CU 個兩位同學就覺得其實唔需要，挑起 Topic 個位同學大約咁講「可能我係 Fine Arts 出身，我覺得本身件 Work 就已經表達到想表達既野。Artist Statement 會遮蓋左件 Work 本身想表達既意思。」

本來都唔想同佢講，但見佢覺得自己岩晒個隻 Feel 就真係令人氣憤。我就大約話「可能我係 Media 出身，我地好著重 Communication。Work 本身係同其他人溝通。如果個 Artist 想觀眾明白佢件作品講乜野既，Artist Statement 係作為一個補充。唔鍾意睇 Artist Statement 既咪唔好睇，始終要照顧返不同人既需要。」依家再諗返，其實係公眾場所擺展覽，你擺件同人溝通唔到既 Work 出黎，有甚麼意思呢。咁同你將件 Work 放係工作室有乜分別？反正你都唔介意有無人明，剩係想表達自己情感唧。再者，如果你覺得你件 Work 係得既，絕對唔需要其他文字既輔助，無錯既。但難免有人同你件 Work 好有共鳴，想知多 D 你背後既理念而去睇 Artist Statement。就算好似王家衛咁拍埋晒 D 個人風格極強既野，佢都有意無意咁講幾句關於佢想講乜野啦。

可惜 CU 既同學就係唔明白，咁又會話怪佢地定其他既。我好明白不同院校有不同的教學方法、思考模式，所以就出現以上所講既問題。就連 BU 既同學都見得出今次既討論有火藥味，與其係咁，倒不如蕭灑 D 分開。其實每次討論都咁有火藥味，老實講，真係厭倦。所以我都周不時話要拆散 BU 個群，咁樣無咁集中，無咁重火藥味掛。



That's All.

呢十袋八袋就係今日既總結 ↓



今日晏晝出左去銅鑼灣，目標就係買裇衫西褲。首站就係 FCUK 買左兩件裇衫。點解係個度買？因為覺得個 Cutting 同 Size 好 Fit 我，貴少少都 OK。咁之後都有行去 Zara 同 Marks & Spenser 睇過 D 裇衫，不過都唔係心水，主要係想買 D 粗著既衫，唔粗個 D 已經有。之但係有人就係 Zara 買左件衫，係幾 OK既，又唔太貴。

如是者離開 Times Square，經過 Bossini 又打左個圈，又買左件用黎粗著既 Polo。再行去 Giordano Concepts 睇睇，佢 D 裇衫個價都拍得 Zara 喎 ... 真係睇唔出 D 裇衫咁貴。咁就到 Sogo 睇，不過睇之前就去左 Lacoste 睇袋既，聽人講過佢出左隻三用袋。但係搵唔到，可以已經 Out 左。咁無啦啦見到 FX Creations 既檔口，咁就去睇睇，佢地做緊「買一送一」既 Promote。如果平時正價買就幾百蚊一個袋，依家變相兩百零蚊一個。雖然係香港品牌，但係望落去個設計都幾靚仔，如是者就買左個送多個。其實還有另外一 D款都 OK 仔既，小 GG 都有諗過買唔買多個，最後無買到。之後都係個層行下睇下衫，不過都係辦緊要事要緊，咁就去男裝個層睇下，同之前一樣，平個 D 得 D 阿伯款，後生少少既款都唔平。離開 Sogo 既時候突然醒起點解小 GG 想買多個袋了，原來係想情侶裝 ... 佢就話呢個原因係「少少」，但係我覺得係「多多」。點解突然醒起，因為突然記得之前買 USB Memory 都係買同一個款 ...

算啦，本來諗住下個禮拜二再出黎買過。心血來潮想去 G2000 睇下。嗯嗯，有 Discount，有一百蚊唔洗既裇衫。諗都唔洗諗，即揀三件用黎粗著。西褲都無乜所謂，都係粗著，又係揀左三條。臨尾再揀多件背心同裇衫。整個過程非常迅速，埋單千四，個 Sales 不知幾好服務。依家時勢艱難，難得有個傻仔重一次過買咁多件衫，重唔落足咀頭咩。離開 G2000 既時候，決定返去 Sogo 再買另一個色但係同款既袋。又見返同一位 Sales，個位 Sales 展露出一種特別既笑容。感覺上好似係「今個月 Meet 到 Quota 啦」又或者係「 呢個傻仔又中計啦」。不過今次真係堅快就買完 ... 直情唔洗點等。

買完晒野，洗晒阿媽 D 錢之後就去金鳳食個 D 用梳打粉「拿」到爛既牛柳、肉眼。太耐無食，想食下，都唔係太多人但係都無乜空檯剩。食完之後又再行下 Toyrus，花左幾十蚊買左。注：呢對唔係我對手 ↓




好 Kai 好無聊，但係過下手癮都唔錯。除此之外就扭左 D 扭蛋咁啦。呢期萬聖節，咁 Toyrus 門口有位 Staff 用變聲器做接客。有位小妹妹比佢個種怪聲嚇親，重喊起上黎。都咪話，我諗個 Staff 都嚇一嚇，分分鐘就咁無左份工。

如是者咁就一天了，今日既總結係「洗晒阿媽 D 錢」。



That's All.

大家覺唔覺得我呢期打日記打得密左呢？無他既，始終呢期多 D 野做，自自然多 D 野記。咁花左一段時間，隻《PES 2009》終於入手。呢集最特別既地方就係可以扮演一個球員，演譯佢既一個職業生涯。大約由 17 歲踢到 35 歲。最後當然做到「Become a Legend」啦！

呢個就係「我」↓



眼口鼻係咪有幾分似呢，因為係由幅相 Scan 上去。其他就一般啦，不過咁樣都幾搞笑，見到有個似自己既球員落場踢波。

呢一刻就係打 Training Match 時入波既興奮動作，衝埋去個網到 ↓



暫時打到第二年，已經轉會到華倫西亞，希望有一番作為啦！

話分兩頭，今日再次重溫 Discussion 時既意見分歧 ... 個分歧係理念上既分歧，所以其實點樣討論都無結果。難道「道不同，不相為謀」是最好嗎？不過下個 Sem 就有轉機啦，Elective 同來自 BU 既同學仔一班。咁就有得洗牌，唔洗下下都係 Non-BU 既一 Group。Good。


That's All.

有件事真係不得不提，話說今日就輪到我去「功課諮詢」定係「功課輔導」當值既。咁由於呢期 D 才仔才女就快 Test，有一群 Form 3 既學生就上左去溫書，平時就小貓三四既唧。我上到去就剩返四個學生，咁見到既就有 S、K、L 三班既學生，K 既正正常常；L既無乜自信；S 既就的確係醒目 D 既。不過呢個係數學上既表現唧，其他科聽聞好似唔係。

個班學生問數，問個 D 多元多次方程式，年代久遠，當然唔記得。不過中學學習生活唔係白過既，都記得到 D 啦，但係個 D 乜野 Cross Method 就真係唔記得晒。呢 D 都係少問題，話晒佢地都有幾個人，我唔識無問題既，最緊要當時有人識唧。透過 Peer Learning，大部份問題都解決到。

但係無啦啦講講下，有位 S 班既學生突然講起話依家上 Visual Arts堂時既問題，大約係咁 ... 佢畫左幅畫，比老師睇。老師覺得幅畫既重點唔清晰，幅畫還有進步既空間。咁同返個位學生講，但係個位學生就覺得老師一開頭既標準講得唔清楚，覺得自己其實可以拎更高既分數。佢話好清楚自己有能力去做到更好，而且重話可以拎滿分，要拎第一。跟住我問個位學生「求學是不是求分數」，佢答係。接下來就問佢點解佢咁肯定自己有能力、藝術既野可以做到完美與否、這個世界有幾多個第一比你拎。個位學生有少少無言，之後唔知點解佢突然講到佢相信老師既專業判斷。我就同佢講，既然你相信老師既專業判斷，點解依家又質疑佢呢，唔係有矛盾嗎？個學生又話無矛盾 ... 之後呢，個學生就執野準備離開。我講左句「唔好走啦，講埋先啦。唔好鬱鬱不得志先得架，我地講道理嘛。」，好似好衰咁咬住佢唔放。最後都無再講落去既 ...

之前個段講到一舊舊，大家明就明，唔明就算啦。因為當中細節我都唔係記得好清楚。個位 S 班學生聽聞好似係 Debating Team 既，的確係有種氣勢既，係典型 S 班比較 Aggressive 既學生。不過我心諗，比你講得贏既我重洗出黎教書？你既大師兄我都未驚過，呢 D 魚毛洗乜怕，講道理嘛。之前都聽老師講過話 S 班上堂係有多 D 火花，但係就難控制 D，就好似事例中既呢位學生咁。面對呢 D 學生，最有效既方法就係直接打擊，表現出自己係比佢優勝既一面。最重要都係講道理！

實習既時候遇上呢 D 學生的話，除左執生之外都係執生。



That's All.

有時就係咁，諗住耐無見想約人出黎食餐飯仔。但係可惜約幾次都約唔到，咁無辦法啦，唯有唔約。咁之後見到就見，見唔到就由得佢。不過點都唔會係我主動約了，次次都好似得我一個得閒，其實都不知幾多野要做。咁真係想見既就自然會約我，唔想見既約黎都無意思。再見了 ...