杯蓋貴過隻杯
禮拜日行街既時候買左隻杯，諗住拎返 Office 用。豬仔杯，Pinky 得黎都型仔。有埋個豬仔造型杯墊 ↓



希望唔會自己打爛 / 被人打爛。隻杯真係幾抵。幾十蚊就有交易，個杯蓋都係幾十蚊，重要貴過個隻杯成十蚊，搞笑。



虛殼
近一兩日發覺吃完藥之後個三十零分鐘都自自然暈暈地，真係唔知點解，精神集中唔到，係飛左出去。到夜晚睏覺既時候，唔知點解覺得自己既思維同個殼唔係幾同步，明明係想郁下手腳，但係唔知點解好似 Delay 左咁。一個字：「虛」！希望呢個唔同步既情況可以快 D 消失。



That’s All.

話說交完功課、考完試，個人既防禦機制崩潰了。先來喉嚨痛，再來流鼻水加咳兩聲。唔知點解星期五晚又醒左睏唔返，星期六朝買了排止鼻敏感的藥丸。有少少用但效用唔大。跟手禮拜六下晝進行天然療法，好少少，不過都唔太掂。今天崇拜完之後即刻打電話預約，約一點半。結果上到去都要等，兩點先有得睇，入去唔夠一分鐘就出黎。無他既，一個十分普通的傷風感冒。睇完醫生兩點零，肚就當然餓，終於到了八八八拉麵吃 ↓



這是一個 Lunch Set 裡面的一個細碗飯。味道方面唔係真係想像中咁 Good，其實係普普通通咁啦。唔係話唔好食既，但係比唔到係日本吃「山頭火」個種驚喜。最後走之前買了兩個暖手包，其實主要為個袋。諗住買黎放部 IPhone，點知放唔入 … 個袋都幾得意 ↓




最後最後，看到某某帶口罩，我絕對有理由相信我的傷風 / 感冒是從佢而來。


That’s All.

現在是凌晨 3:19，再一次無啦啦醒左之後睏唔返。或者我好有 Desire 去完成今篇日誌所以睏唔著吧。如果要用兩個字形容剛過去一個禮拜，我會用 __ __。__ __ 是甚麼字詞就自己估下。

10/12 - 星期五
今天放工後約了學生打羽毛球，感覺良好，真係幾唔錯。我至鍾意就係打羽毛球，真係唔打都唔知身體好。打完波之後就兩小無猜到電訊公司問有關 IPhone 既事宜，包括中止服務所賠償之費用、上台價錢、轉唔轉台等。原來 G 係下年五月先到期，要額外比 $500 去中止合約。之但係以佢既性格係一定唔會即時 Cut 台過檔，呢 D 無謂既錢佢唔肯比。講了好耐好耐，隻 G 終於有少少動搖話會即刻 Cut 台過檔。吃過晚飯後，終於到了數碼窿訂機。服務員說過幾日就有貨，Good。

其實點解無啦啦想轉 IPhone 呢，本身係依家用緊個部電話有多少暗病，有時 Send 完 SMS 會自動熄機。開頭都不以為然，以為係自己黐線熄左部電話。但試多幾次又真係唔係自己熄喎。問過其他人，原來係 SE 機既暗病。把心一橫，反正換電話，揀無可揀都係唯有揀 IPhone。如是者，就同本身一早想換機但又唔捨得既 G 講，最後就齊齊換機。原本用緊一二三，佢都有 IPhone Plan，雖則唔洗賠罰款，之但係左計右計都發覺唔吸引。反之數碼窿個個係實用 D 吸引 D，如是者就毅然轉台。之前有一段時間都係用數碼窿，其實都幾 OK。一定好過 3！就算 3 幾平都唔會用佢，服務實在太差！



11/12 - 星期六
呢日最無乜特別，至特別係整左個木糠布甸。但係到呢一刻：18/12 4:10am 都仍然放左係 Office 雪櫃，我諗應該變壞了。



12/12 - 星期日
放工後和 G 出左去銅鑼灣購物，見天氣凍凍地，想話買過件褸。之前係 SOGO 見過無買，因為想係 Time Square 買。先係 Time Square 既 Food Court 吃個 Lunch，然後係 City Super 逛下買卡、睇殼、同埋買左兩份用黎交換既禮物。施施然往上行，買了件褸，顏色襯返依家用緊背囊，Good。跟手到 IKEA 睇電腦椅，坐緊既 Moses 減價減到好抵買！平左幾百蚊！行左陣 Hea 左陣去 HMV 買殼，都 OK 仔既。之前聽過人講唔好買硬殼，但結果都係買左硬殼。完成了幾項出銅仔目標後，就去左對面反斗城行下睇下有乜新奇玩具。至新奇既就係有個和音孖潤腸，百幾蚊，Gimmick 野得黎係幾搞笑既。開完眼界之後就落樓下既國際版百佳買明天芝士火鍋用既芝士同白酒，老老實實，芝士都真係幾貴。

話分兩頭，G 對我所做既某 D 事有 D 說話。其實都唔係第一次提出，而我都唔係第一次去解說。我幫人時究竟邊個來幫我呢？又唔係話依家雙方出現問題，但似係鞋裡面有粒沙，想整走佢又要動全身咁。

再話分兩頭，原來我都有簽到約，係下年三月到期。今天有職員打比我我先知乜野事。



13/12 - 星期一
今天做既野都精彩。Lunch Time 回到中學同 D 學生吃個便飯、傾下計咁。這個傾完又到那邊傾，「和好如初」是大家希望見到既事情。但看來好似有 D 野咁，比我既感覺的確係同以前唔同左。吃完飯後就返去 Steam Iron D 長袍，做乜 D 袍咁難燙 … 我覺得係質料既問題。燙左一粒鐘，燙左好多件但都未燙完，下週再續。之後返去香港仔繼續購買今晚芝士火鍋既物資，一路都知自己買野都比較隨心，Budget 係做得差，今次都要認真計住計住。去完百佳去大昌，再去山崎買麵包，G 說買麵包都去山崎，唔貴就假。都唔緊要，買完之後回 Office 準備芝士火鍋後要傾既事宜。整得來 D 小朋友就來，幸好導師都來，Perfect。如是者無幾耐有朋友到，傾了一段時間計，個幾鐘，口又乾肚又餓。之後就返去本陣吃火鍋。

我都唔知點解會用白酒去開個鍋，我真心覺得會係香 D，之但係可能重手左，酒味都幾濃，唔係個個都 OK，My Fault！中後期時的情形 ↓



個 Setting 基本上係要 Keep 住走位先沾到芝士，除了芝士鍋，另一邊有鍋滾水淥丸。不過不提有人生吃芋絲。挪用了別人的相 ↓



吃飽後又傾下計，討論下相關事宜。跟手做下認識自我既活動，而我就透過大家來認識自我。得出來的是「潔僻」和「坦率」，前者一定係、後者其實都有多少估唔到，Good Good！輾轉差唔多十一點先散，真係辛苦各位。不過唔知係咪今日講得野多定自己亢奮，又係無啦啦睏醒左睏唔返。



14/12 - 星期二
今天有得拎 IPhone，真快手。要揀 Plan，最後兩個都揀左無限。本身諗住問下用緊既人平均每月用幾多流量，但係無人答到，因為個個都用緊無限 … 本身諗住放工後溫書，但係又心癢癢去 Set 部 IPhone。其實都無乜野要搞，本身部 IPod 都係咁上下，照過 D Files 咁。

Lunch 同 Dinner 都係吃 Pizza Hut，到夜晚既時候覺得喉嚨唔係好掂。不斷灌水希望喉嚨痛唔會惡化。



15/12 - 星期三
今天放假諗住溫書，點知舔了糞，一整日所溫到既書唔多，大約五分一到。究竟呢日做過乜野呢？最有印象就係去左睏晏覺。喉嚨都有少少痛但無咁痛。話分兩頭，今天以高科技搖距 Support。



16/12 - 星期四
今日天氣真係超堅凍，諗住著件褸返工都頂得順。點知返到去關埋窗都覺得凍，D 暖氣係頸口位散晒。Lunch 時挨不住要回家拎頸巾保暖。但係換來另一個問題就係靜電，一日電足好幾次。逢開門比小朋友入黎都電一次，真係電到心煩又氣燥！

時間一分一秒咁過，考試既日子就到。溫書都溫快左，不過真係好多好多，裡面既 Concept 都唔係簡單。睇完再睇再睇，終於到深夜一點時睇左五分之四。之但係用來考試用既貓紙抄都未抄過。都濕滯！喉嚨唔痛，不過係咁流鼻水！推敲返最有機會染病既日子係星期一，個日接觸過好多人，而其中一位的而且確係有多少病病地！再加上天氣咁凍而自己休息又唔夠，唔病都難！



17/12 - 星期五
今天九點零起身，Hea 到十點先開始再溫。我諗一開始既策略錯左，應該直接 Notes 睇下大約個重點係邊，之後睇書裡面既 Review 同 Terms Explanation 就算，到唔明先揭返去前面睇，咁樣有效率好多。可惜我太遲先醒覺！去到兩點零總算睇晒個堆 Theory，本身諗住睏個晏覺先去寫個張貓紙，但心血來潮想話寫埋先去睏。好在無去睏覺咋，唔係死得更徹底！今次考試可以帶一張兩面手寫的 A4 紙作 Reference，但係時間所限，我寫唔到兩面。同埋要寫好一課都起碼半個鐘，總共十課有多，都無乜可能寫晒。最後都係盡寫就算，看一看 ↓



看似無乜特別，再來另一張相比較下↓



我都覺得自己好堅！可惜我唔夠時間繼續製作落去，善用唔到兩面紙。話分兩頭，寫壞了兩支 0.3 既筆芯！激死我！今次去過另一間鋪頭買先得。

輾個轉趕頭趕命出門口，塞車就預左，但都驚驚地險！吃件小蛋糕、睏左一小陣就考試。由於過了時間唔進食我會頭痛，所以臨考前都打定底吃兩粒止痛藥先。如是者做啊做，考三個鐘，去到兩個鐘既時候都有少少頭赤，神智都唔係太清醒。除左不斷流鼻水之外，有少少脫水既徵狀。一考完就急急腳去 Food Court 搵食，本身諗住吃飯，點知個 Food Court 驚異的多人。萬分無奈去了麥仔買了個 Double 魚柳包餐，轉飲雀檸。之前有前科飲麥仔汽水搞到腸胃炎。以下便是細個拳頭的 Double 魚柳包 ↓



吃完之後便乘車回家去了，不過有件事想做但係做唔到，唯有再等下次。



最後最後，陪伴我幾個寒暑的電話和第一代 IPod Touch 終於要退下來了，來幅紀念照 ↓



又唔會話即刻唔用既，其實都諗緊可能之後買張 3 既電話儲值卡用。雖然通話分鐘大把，多到用唔晒，之但係跨台 SMS 真係好貴好唔抵。月費都係一舊水，但係要額外比多成四十蚊去跨台 SMS，真係唔係路。點解咁多人用 3 呢？用一二三、數碼窿咪幾好。



好長好長，現在是 4:50am。睏一陣又返工。That’s All.

羽毛球
今天放假，活動真精彩，攰到嘔泡。本身週五約左 D學生打羽球，咁諗住襯打之前自己可以打一兩下先，如是者就特登 Lunch Time 同 G 去打球。原來拍拖咁耐，無試過同 G 一齊打羽毛球。呢個真係佢唔講唔知 ... 知唔知我係度等乜野？等緊對手！看我多麼的自大 ↓



打一次球都要帶幾多野去 ↓



又要想當年，當年同開泰哥呢 D 咁有 Power 既人打，但之後都唔係太約到時間所以無打。轉而同 Co 爺打，本身佢都真係麻麻地，叫做揮到下拍咁。但經過一個暑假日打夜打之後，Co 爺變得好打左喎！本身都係一個好波友，但係佢依家懶係勤力讀書成日話唔得閒打波，其實係去左拍拖。咁無辦法，唯有再找過波友。依家我看到一絲希望，希望有新波友既出現！


青春
昨天下晝有位比我細十年的朋友仔說：「以為你 20 歲咋。你真係唔似咁大喎。」聽完都開心既，唔似咁大。有市場打入比我後生十年的中學生內。是好事還是壞事呢？但係佢話唔記得左我係教書、更唔記得我係教 Arts，哈？


溝通問題 Again
話說同開某某傾計，對話內容如下：



究竟係邊個問題呢？唔上網既人真係難溝通 D。我覺得 MSN Invisible 其實同偷虧一樣，性質好類似。要修正一下，Facebook 個隻唔係 Invisible，係叫做「唔 Login」。我覺得咁樣幾好，一係就 Login，直情無得 Invisible 偷偷摸摸。係囉，究竟點樣先搵到人呢？



That’s All.

遲來的 Card
清完功課後，即刻容光煥發，由叔叔變返哥哥。社交生活慢慢回復正常，昨天晚上即刻約 G 出來交收。遲了個多月的 Card，四週年了 ↓



哈哈哈，一張卡便推倒了很多牆！勁仔！絕對係 Gifted！係咪好感動呢？我真係知我做緊乜野的！放心！


我的最愛卡通
細個好鍾意睇卡通片，其實依家都一樣會花好多時間去睇，都真係毒毒地。咁要選一套最愛的卡通片真係好難好難，太多至愛。細細個既時候，ATV 係有好多好好睇既卡通片，個陣時幾鍾意睇美國卡通片「地球隊長」、「變型金剛」都係心頭好。特攝片就有「幪面超人 RX」同「電腦警察」，美國版既「恐龍戰隊」都唔錯！到大少少，高小既時候，好鍾意睇「忍者亂太郎」、「魔神英雄傳」、「魔動王」、「長腿叔叔」、「Cyber Formula」、「唐老鴨俱樂部」、「娛樂金魚眼」、「機動警察」。好啦，又再大少少，初中既時候，好奇怪，無乜印象有睇卡通片，至有印象係「機動武鬥傳」、「超級小黑咪」、「抵死泰山」、「幽遊白書」、「小熊維尼歷驗記」同「丁滿與彭彭」，真係會追黎睇！高中既時候，超鍾意「Love Hina」，鍾意到係有齊一套動、漫畫。G 提一提我，我都好鍾意「小魔女 Doremi」！另外都鍾意「最遊記」、「Toro 貓」、「勇者王」。到再大 D 大學到依家，心愛既動畫就多了，「One Piece」、「龍珠」、「攻殼機動隊」、「他和她的事情」、「電童」、「創聖 Aquarion」、「Gundam 00」、「Gundam 0083」、「08th MS Team」、「Fate Stay Night」、「Macross Frontier」、「甲賀忍法帖」、「Samurai 7」、「日式麵包王」。其實還有好多，不能盡錄！



That’s All.