2010 除夕
全因牧師，連續放了數天假。早上去申請更換回鄉卡，由小朋友幾歲之後都無返過大陸，如果不是因為工作關係，我諗將來都唔會申請。都一早去，真係多人到呢，輪米般似的。網上預約又唔知點解個系統話我個超舊回鄉證 Number 不正確，唯有 Walk-In。等候的時間以 IPhone 消磨，好快就等到同埋好快無電。跟手係銅鑼灣買個外賣當 Lunch。回家睇小雙俠電影，都幾搞笑。本身諗住晏晝可以整下個 Function 既 Poster，但又係今天的事明天做，無左件事，去左打機。

晚上開工去，兩小無猜除夕晚都要開工，唔洗諗節目，不過就算唔洗開工，都係無節目。大家開工前係香港仔「和亭」吃個晚飯，叫了一條甜蛋、蝦天婦羅烏冬、味噌牛肉石頭窩飯、炸豬扒，另加杯青檸梳打和綠茶。甜蛋很好吃、G 說個烏冬個質地唔錯、石頭窩飯 OK 咸、炸豬扒不過不失，青檸特飲都 OK 得意。走前合照，哈哈，遮晒乜都睇唔到 ↓



輾個轉就感恩崇拜，其實我有 D 地方唔係好明，但問題尷尷地尬，由得佢藏係心底。又轉個眼就完，完了後都極速回家。十一點零回到家，吃杯雪糕、飲罐汽水，跟手想話去沖涼。差少少 2010 到 2011 年個一刻又係浴室中度過，我諗上年唔係浴室過就應該係打緊機過，都無乜特別印象。如是者，Send 下 Message、收下 Message 就去睏。

呢排都睏得唔好。一講起就扯火，肥細佬既鼻鼾聲如雷貫耳，本身我又醒睏。有時遲過佢睏著，又或者睏到半夜醒左真係好炆，嘈到嘔。只可以拍打床邊，拍到佢轉身可以暫定一下 D 鼻鼾。離晒譜！



2011 元旦
由於鼻鼾聲太大聲的關係，輾轉睏下醒下到十一點幾先起身。本身又諗住整張 Poster，但再一次今天的事明天做，都係去左打機無左件事。下晝就出左去灣仔買少少野先，跟手再去銅鑼灣逛下。買左少少野，少少但貴既野。花了 $680 買了隻 Logitech G700 Gaming Mouse ↓



上次買個隻 G7 唔知係咪用得耐，一打機個陣佢就自己玩飄移，唔受控制，用左兩年幾三年了，真兒戲。其實再上上隻 Wireless Mouse 又係咁上下情況所以先換。好啦。開出黎就係咁樣，Wireless Mode ↓



其實至盞鬼既地方係佢可以有 Wired Mode ↓



如是者就因為咁買左佢，希望可以用耐 D，有幾年就 Perfect！

自己買完 Mouse，就同 G 匯合。係 Time Square 逛下吹下水咁，跟手就去夾糖。我真係孤陋寡聞，我第一次見人夾糖係逐粒逐粒夾。我真係見識少！如是者千挑萬選就係呢 $18.2 ↓



係 Spaghetti House 點了 Cheese Fondue 吃。係好吃過自己整，哈哈 ↓



吃飽飽之後就上去 JP 睇「借東西的小矮人- 亞莉亞蒂」。故事好平淡，係睇得好舒服既，之但係真係好平淡。



That’s All.

回顧
其實今年都無乜大事發生，平平實實咁過，安穩中見喜樂，好事也。開心既事很多，年中又可以同 G 去旅行；暑期活動玩得很高興、同好多年輕朋友仔熟絡左好多；年尾到又返去大學讀書，辛苦但充實。



反思
無聊野做左好多，有意義既野做左更多。如果唔洗考試同做功課，讀書都真係幾唔錯，可以讓自己心意更新。之前有 D 野唔覺得咁重要，但原來係好重要同好關鍵，就係「對話」。有 D 野越講就會越無野，越唔講就越有野，收收埋埋唔代表問題會解決，只係將問題放埋一邊，終有一日問題都係要解決。之但係，無時無刻都警醒自己，唔好做 D 幫到人但害到自己既事。



展望
‧可以按計劃行事，唔好又無啦啦出「意外」打亂計劃。
‧有人可以解結或剪左個結。
‧年輕的傢伙們努力讀書。



That’s All.

當頭棒喝的一句話
話說某人有 D煩惱，我解答唔到。繼而佢去問佢既同事，呢位同事比佢年輕，不過讀緊 Master。呢位同事說了一句「呢個係你既性格」，呢句雖然簡單，但好到 Point。係囉，呢個真係你既性格黎。我既回應是「當局者迷、局外者清」；某人的回應是「讀 Master 果然係有智慧 D」。

此外，還有句「你心裡個條刺長到拮到我個心」！



Office 的聖誕禮物
今天過完平淡但滿足的一天後，下午六點回到 Office 拆禮物。一回到去就已經有三大件貨 ↓



一開箱就見到好多組件 ↓



話咁快就砌好一張 Moses ↓



話咁快就砌好兩張 Moses ↓



話咁快就砌好三張 Moses ↓



Office 電腦椅合照，幾澎湃 ↓



先前爛掉的電腦椅腳，爛到入骨 ↓



開箱文完。以上為本人的非辦工時間，哈哈。



That’s All.

三年之後的古古力火鍋
話說 07 年吃過 Haagen-Daz 古古力火鍋，詳情可以睇返 #1153 ，事隔三年都想重溫一下那種感覺。睇返當年既裝束就知天氣唔太凍，不過今年就真係堅凍。基本上個 Setting 係無任何分別 ↓



由 G 的角度看，睇真 D 個朱古力上係有 D 花紋，Regular Size 有兩盤雪糕的↓



特別少少既就係有幾塊薑餅人既曲奇餅，都幾搞笑同幾好食 ↓



如是者吃住古古力鍋、傾下計咁。這樣子就兩個幾鐘了 ... 有 D 野係可以順其自然就由得佢順其自然。此外，都有多少反思，係咪應該大家都有各自各的朋友而不是讓對方認識自己的朋友呢？自己與朋友的相聚是一種緣份，與其讓對方認識自己的朋友而成朋友也許未必是一件好事。可能講到一舊舊，唔緊要，我明佢明就得。

再此外，其實現實閒日見面時間都算多，有時都想話大時大節呢 D被人製造出來要消費的日子係家中抖抖。但無奈既係對方覺得大時大節唔係更應該出來聚一聚、見下面嗎？為此嘈兩句，對方亦輕描淡寫的說「今日放假, 在家休養生息」以示抗議。我明白對方的心情，但誰人又明白我呢？最後，在三日公眾假期最後一日也為她出去小聚一下。



Reinstall Steam
呢期玩 Team Fortress 2 既時候會 Freeze 幾秒至十零秒，背後原因懷疑係 Harddisk 突然 Load 得唔順 / 唔到。所以都諗住 Reinstall Steam，裝返落去 SSD Harddisk 到。但係 ... 重新 Download 過 D Game 真係有排等 ↓



其實有個方法有智慧 D，就係用 Backup and Restore 既功能。不過唔知點解，我又想有個 Fresh Install，唯有等一段時間。



講唔聽就算
或許近排都遇到不少「講唔聽」既問題，當中原因有幾，一係問題真係好複雜、一係自己表達能力差、一係對方太頑固又或者對方拒絕踏出第一步，嚴重 D 既直情會斷絕溝通既渠道。可知自己耐性有限，真係不得不「講唔聽就算」。始終好多事都要經歷過先明白，都無得話可唔可惜、係咪行冤枉路，也許由得順其自然便可以。浪子唔出去闖過見過世面也不知道在家千日好。或許我不是 Right Person、又或者不是由我來「收割」呢？之但係現在所做的不是白做，是撒下了「種子」。

第一步難踏出，正如動力火車要啟動也不是易事。第一步後還有第二三四五六七八九十步，漫漫長路。也許踏出第一步得不到預期的果效，會因此而放棄，但都無辦法，都係繼續嘗試，只要你認為問題需要解決的話。



That’s All.

聖誕節
今年聖誕節同過往幾年好唔同，睇返過往既日記。05 年未拍拖無乜特別、06 年有拖拍去左尖沙咀睇燈同埋係麻布茶房吃 Dinner、07 年先吃 Haagen-Daz 火鍋再來 Italian Tomato Dinner、08 年聖誕前後係交功課既日子，都好忙，只係其中一日既下午茶聚左陣、09 年我自己無寫日記，係 G 既日記睇返原來到了灣仔吃、之後睇 Avatar，係收到 G 既精心小禮物。

今年 2010 年，暫時無任何活動、張聖誕卡到依家都未動筆。無他，呢排病左，體力都真係麻麻地。不過物質主義既我，今年有份幾合心意既禮物，我買了 IPhone 比 G、G 又買了 IPhone 比我。部 IPhone 襯埋個 Pink 到爆既 Case，真係姣到震，I Like It！之但係今年最特別既係 G 可以返到聖誕崇拜。其實係 12 月咁多個禮拜都返到崇拜，真係好難得好難得每週日都唔洗返工。第五個年頭，今年第一次，真係值得記一記。希望來年 G 都有更多機會參與崇拜，對教會可以認識多 D，識多 D 朋友仔。

說實在，每次 G 來都緊張架。一來怕佢遲到無位坐、二來又唔知自己會唔會接待得唔好，令到佢有不良感覺、三來有時自己有崗位唔得閒陪佢既時候，要搵定 D 朋友幫幫手帶一帶佢，但最大問題係 ... 人選係好多，但好多都一樣有不同的崗位，次次都唔易搵人！最後係當 G 見到 ... 既時候，係會 ... ，所以都唔知點，我都想緊點處理。不過依家 G 都開始適應，希望來年更好，有賴各位兄姊幫手！



出夜街
最近有少少啟發，任何年青人都一定會試過話幾點前會返到屋企，但最後要阿媽阿爸打電話追先返屋企。我諗都無乜邊個未試過。甩底唔緊要，最緊要從錯誤中學習，早少少話比屋企聽幾點返，之後真係幾點前返到，建立返家長對自己既信心。咁就自自然下次有交易啦！但如果次次都甩底，試問家長又點放心比仔女出去呢？

感謝主，我體力差，唔挨得眼睏，出夜街都唔係好掂。這就是「鳥倦知飛還」！



That’s All.