今天早上上班前，好高興完成了本學期的功課。抽兩下拳、振幾下臂先。又係時候講下今次做功課既歷程。先來一幅做功課既陣，位置雖小，但勝在方便，轉個身就得 ↓



話說完成上一份功課之後都 Hea左好幾日，無錯，係 Hea左幾日。禮拜六交完，之後禮拜日諗住上網 Search下有乜題目好做，結果走左去打機、Hea 左日。好喇，到禮拜一，如常上班。本身都有少少 Idea 做邊個 Topic，諗住放工碌去 City Library借書，但係又衰懶惰未得閒 Search 定書名先，加上當日同人傾計傾耐左，最後都無去到 Library，回到家繼續打機又無左件事。話咁快就禮拜二，今天最有意義的是放工碌左返 City借書，一來一回加上搵書都幾粒鐘，之但係，份 Essay既 Outline 都好 General，都未知點落筆。哈，到禮拜三 ，諗住放假的一天可以做好多野啦。係做好多野啊，但係做左 D同功課無關既野 ... 機緣巧合聽到首歌，都覺得幾有意思，是「相愛很難」，要相愛其實真係好難，要好好珍惜↓






話咁快到禮拜四，今日終於有個詳細少少既 Outline，夜晚終於有百零粒字。話就話呢份 Essay 只需要兩千字，但唔知點解感覺上好似好難寫。動力火車就係無動力個下弊！另外值得一記的是今天再一次被 Fake，浪費了油淋淋的麻糬撻、以及個零鐘的小睡時間，不過個團火係唔會因此熄滅。到禮拜五，危機感開似強，動力火車一如以往於 Deadline 前轟隆轟隆咁啟動。今晚收穫係有五百字到。Well，到禮拜六 ，衰又衰在今晚電視節目都吸吸地引，睇左一陣，真正開工都已經係夜晚十點零。轟隆轟隆咁做到兩點零，有九百幾字。到禮拜日，崇拜完後拎住一大袋袍去洗衣店，係運送途中差錯了一級樓梯，整個人垂直 Slide 落下一級樓梯，真係嚇死。跌斷手腳都要做埋份功課。言歸正傳，本身晏晝約了人，但冥冥中有主宰，最後不用。那麼回到家吃個便飯便進入睡眠狀態。兩點幾睏到五點之後起身繼續做車長，到凌晨兩點終於嘔晒個兩千幾字出來。到今天下晝放工的時候，加埋 Reference List 再 Send 出去就功德完滿。話分兩頭，我都係覺得寫得一般般，好多似是疑非的廢話，不過都算了。

再來看一看車長室，先來是兩張寫晒 D Points 既 A4 紙，跟左我好幾日。點解寫 Essay 都要計數機呢？原因好簡單，計下要寫幾多同寫剩幾多 ↓



背後便是一堆書。其實只係頂頭兩本先關事，其他書都唔關事。關事個堆書係放左係腳底，多到無位放 ↓



這個便是車長室內最重要的電腦 ↓



最重要的是 24” LCD Mon，一邊上網搵資料、另一邊開住個 Word 寫 Essay。真心建議有地方都真係要買個大 Size 既 LCD Mon，係方便好多好多。無錢都要湊錢買！看到機箱有 D白色網，其實係洗衫袋剪出來當隔塵網，效果係好理想。另外機箱上有三舊 Spongebob Lego Magnets，上網買，Very Good！還有胡迪的腳，要做個正義朋友。檯上那張寫得好整齊的 A4 紙便是 Essay的 Outline。少不免的當然是手提電話，要時刻與 G 聯絡。講開又講，依家每月花了一定數量的錢 Send跨網 SMS，都貴貴地，不過如果對方係會睇既都值得既，唔睇就唔值了。

現還有一試要考，希望能夠順利完成。當然掛心的還有其他的事，不過都要慢慢來。



That’s All.

逸事數則
是咁的，剛做完一份功課，可以偷個小閒。回想一下，過去一兩日都做左好多野。有小小反思。

1. Sibling
話說呢期有建議過人地兄姊可以和弟妹傾多 D 計，傾下點解決 D 「問題」。看似無乜特別，但原來發覺好多兄姊和弟妹寒喧就多，但係講 D 貼身 D 既事就比較少。唔係剩係單一個案，或許咁巧合識得既兄姊弟妹既都係咁。說實在，自己都係咁。究竟問題出係邊度呢？除左含蓄和尷尬外，家庭習慣都係一個重要因素。試想想，如果父母日哦夜煩、彈三彈四，試問這個環境點培養到「分享」既氣紛呢？講多句咪只會比人彈，咁講黎做乜？

再講，如果有兄弟姊妹，就一定會有比較。萬一有個比較「叻」就濕滯，另一個無咁「叻」通常都會比下去。若果父母又加兩句，無咁「叻」個位想話有自信都難啦。好啦，到找到可以建立自信既機會，到頭來個原來個機會只係一個泡沫，爆破既時候只會傷得更重。

如果父母彈少兩句讚多兩句，也許子女自信由此建立。「分享」既習慣亦得以培養，「問題」都易解決 D。但回歸現實，惟有等人撘橋去加強兄姊、弟妹、父母之間溝通既效率。但願有能力幫人鋪橋撘路，亦希望有人幫我鋪橋撘路。


2. Encouragement
正如先前所講，鼓勵係好重要。透過正面的鼓勵，人既潛能係可以爆發出黎。乜有唔正面的鼓勵嗎？當然有啦，甚麼知恥近乎勇便是。最常見既就會係父母講，明知自己唔掂就去讀多 D 書啦。而唔係，比心機讀多 D 書，你掂既。句子看來相約，但就係一反一正。人就係咁搞笑，適當既自信可以減低壓力，當個個都認真同你講話你掂既時候，或多或少自己都會覺得自己掂。咁又唔係話係又讚唔係又讚，但根據 Hans Eysenck 所提出的 Trait Theory，任何特徵都有正反兩極。例如有創意係正面、不切實際就係負面。那麼有無一 D 負面既東西轉化做正面呢？當然有，例如表現出好遲頓，或許係佢心思熟慮。欣賞一個人便可以從這個角度出發，鼓勵一下的話，缺點都可以成為佢既優點！


3. Surprise
驚喜在乎預期同現實之間的落差有幾大。如果現實比預期好好多的話，咁咪就係有驚喜，相反就係失望。驚喜係可以「製造」出來，首先要比人解有晒心理準備現實將會係好差，預期減到最低、當現實發覺都唔係太差既時候。咁咪就有驚喜。



16樣關於自己的事情
其實都想玩好耐，不過硬係唔知寫乜好。原來早於 2009 年頭已經有人玩。我又要做古代人。心意更新很重要，希望寫過的人依家想一想、寫多次，看看有無大分別。





That’s All.

搬走一舊石還有很多舊石
今個禮拜做左好多野，係度要讚下自己先。有 D 問題解決了、有 D 問題暫時解決了但要跟進、有 D 問題未有時間處理。總括來說，種種事情的發生讓我感受到，有個好伴侶是很重要！可傾訴、可分憂，Perfect。無都咪話唔辛苦，要珍惜眼前人。

今天下晝，終於交了第一份功課。真係 __ __ __ __。三千字真係粒粒皆辛苦，每粒字既背後真係有血有汗。19/11 借書、22/11 號開始真係落筆寫，當晚有百幾字、23 號晚有八百零字、24 號晚有千三字、25 號晚三千字、26 號晚 Hea、27 號晚加埋 Reference List 就 Send 左出去。我真心覺得自己算快手，雖則都無乜質素可言。我既 Topic 係主要講其中一個輔導理論 – Narrative Therapy。長話短說，個理論大約係話問題本身係問題，而唔係人既問題。當中讓當事人說自己既故事出來，從中幫當事人搜尋故事中的被忽略但關鍵的事情。從而幫助當事人以另一個角度去睇件事，探索其他可能性。

近排因為有 D 事情發生，好多時做功課個陣都自自然聯想起相關既事情，係度諗點樣做、點樣解決，或多或少都有多少纏繞著自己情緒。搞到整個人都無乜心機，胃口又無乜、而且成日都好攰。有種欲哭無淚、作嘔作嘔既感覺。隨著功課漸趨完成、再加上有 D 事情暫時解決，都可以抖一日半日。不過下週又有另一份功課，好在今次係二千字。不過都係難做 … 好想唔讀，意志已消沉。個種無力感好強。



唔上網的孩子
我不能說自己有上網依賴症，只是會將上網成為生活的一部份，呢句係咪有少少自相矛盾呢？其實都發覺原來會上網開 MSN 的朋友係會熟絡 D。無他既，一見人上網開 MSN 就會傾下計、講下無聊野。唔開的話，其實都好難溝通，就算幾熟都好，始終少左個渠道溝通。所以 … 真係 Online 多 D，傾多 D 計先得。我相信 Talk Therapy 的。不斷的向人講係會舒緩自己的壓力。開 MSN 啊 ，Invisble 都好啊，得閒聊我吹下水！始終電話、SMS 唔係人人得閒覆，或者係唔鍾意覆 … 無奈也。



That’s All.

「好心做壞事」可算是最令人婉惜的事情，但無奈的是這個情況時常出現。大家都會覺得有個大少少既人係身邊扶一扶、幫一幫、傾一傾其實係一件好事，某程度上可以避免行 D 冤枉路。或多或少自己都做緊相類的事，自己非常怕「好心做壞事」，扶不到人之餘反而揠苖助長就弊家伙。始終人人唔同，有人鍾意有人幫下；有人鍾意自己摸條路出來唔洗人幫。若果過份熱心，恐怕適得其反。不過，惹人憂心的依然是惹人憂心 ，現在看得到的是一個 Dead End。學好是一世、學壞是一日。如果太細個就接觸社會現實的一面，那麼就不必 PG 家長指引。

看到問題發生，很想主動去處理，無奈的是能力有限。點解要咁呢？為何人總是不斷重複犯同一個錯誤？看到一個又一個真實個案，真令人痛心疾首。神啊，該如何做？


唔好以為唔係你，其實就係你。


That’s All.

話說今日傾完計過後，都有多少反思。根據 G 說，以前的我是這樣的，如果對方因為自己發脾氣，會氹幾下。若果不是因為自己而是亂發脾氣，都會氹一兩下。氹完之後無效的話，都會係由得佢發脾氣，等冷靜晒先再傾。個期係興用「冷靜」呢個名詞，用法係話既然大家都覺得自己無錯，咁大家冷靜幾日，諗通左先再傾返計。最後當然都係無事啦。之但係人會進步既，依家當然唔會係咁啦。回歸正傳，有幾點都想分享下。

1. 普通朋友和男女朋友的相處點都會有分別。如果唔清楚，可以試下以因數分解法寫返你會同普通朋友和男女朋友會做的事情。再仔細睇一睇你對普通朋友和對男女朋友既分別。如果兩者分別唔大，那麼就真的值得靜下來想一想兩者之間有甚麼分別。這也是 G 所說過的。

2. 眾樂樂還是獨樂樂呢？這個問題也和 G 討論過。其實即係咁，各有各開心既。我都的確說過如果有多一對人，其實可以玩同做既野多 D，有另一種開心既。之但係又唔可以無兩個人獨處的時間，學 G 話齋，無共同經歷又唔得喎！所以要繼續兩個人四圍去。不過若果間中可以有其他朋友仔一起都OK 既。

3. 兩個人的相處是需要互相配合。雖然都好有可能係單一方面主導，但係或多或少雙方都應該有改變既。好多時自己期望人地會做既野同現實有出入，會彈三彈四，呢個都係我時常做既衰野。之不過換個角度諗諗，其實自己想要 D 乜野呢。如果想要既野就係對方做既野，咁我地少少地都要欣賞一下。有意見既背後其實只係對方做既野唔岩心水，咁其實都無問題，只要有良好既溝通，做多一兩次咪自然岩自己心水。所以！我都唔應該下下催 G 要快手 D，應該都要慢落黎等下，互相配合。溝通係好重要，就算嬲都要聽電話，有時唔講真係唔知想點。互相體諒都重要，G 想放假既時候見下面，而我放假的時候想係屋企抖下。咁都無問題既，可以傾既。唔需要次次都出來或者次次都唔出，都唔係話計住計住邊個就邊個多，按需要！有時 D 野都係訓練來的，或者叫習慣，例如隻手伸出少少就自自然有隻手拖埋黎咁。久而久之咪就係默契，一講到呢道又要「顏一顏」。

4. 先頭講到要有共同經歷，咁大時大節無節目的確係比較令人泄氣既，特別係如果次次都係咁的話。如果加埋兩手 Fing Fing 咁又再泄多幾啖氣。之但係大時大節正日又真係洗費大，如果可以早 D 或遲 D 先慶祝又真係化算 D 既。話分兩頭，都要快快手寫埋張卡仔比 G，唔係拖下又一年拖下又一年，好快就好多年。張卡我買左，只不過未寫唧，等我。

今天的對話中，有好多事情都值得反思一下，希望大家都有得著。最後，這首歌是第四次係 Blog 中介紹，是 Alicia Keys 的「If I Ain’t Got You」，作為閒談後的總結 ↓







我想一起的背後並不是因為某單一原因，而是一個整體，包括長處短處。
面皮薄所以講少少，我倆繼續好好相愛噢 ~

That’s All.