一黎就六日既總結，分別講講唔同班既觀察：

1S：
呢班都正正常常肯做野，不過第一次叫佢地返去做工作紙再帶返黎就只有半班人咁做。重話 S 班自動自覺！？不過佢地上堂都算達到目標，無準備都做得到，咁真係叻仔叻女既。之但係有兩個學生唔係點肯做野，都要搵方法處理佢。


1K：
呢班既情況有 D 特別，可能上次教完覺得幾好，今次多左期望，點知係帶黎失望既。「混亂」情況彷彿比 1S、1H 差，再加上呢班有人黎睇堂，我特別肉緊。亦都可能因為咁，都開左金口訓示幾句。咁小朋友既咀臉當然無之前咁好，之但係為己為人，點都要勒緊 D。不過以 Worksheet 平均分數黎講係三班 Form 1 最好個班。之但係呢班既教學方法係經過其他兩班改進既，又唔同講法。


1H：
本來諗住呢班麻麻地，但發覺呢班竟然話得掂。呢個係班主任既功力！可能比預期中無咁麻麻地，所以心情係好 D 既。點知人算不如天算，本來 Plan 好晒睇堂既野。之但係 Supervisor 突然改時間，結果呢班比人睇兩次堂。心情都幾沉重。雖然佢地 D 野又未必有隔離班咁企理，但係講 Idea 佢地係有的，最多奇怪 Idea 都係呢班先有。


2S：
計比例黎講，呢班係 Form 2 咁多班黎講，算係易處理個班。D 咀臉係和善 D 既，但係唔知點解，第一次正式上堂又開金口訓示幾句。變咀臉就難免，不過最奇怪既地方係，呢班好靜咁聽 Theory，反而一有 Activity 就黐左線。無錯，係黐左線。當中都有好幾位同學學習態度麻麻，但又吹佢唔脹佢又係 S 班喎。呢班如果同佢地玩都好玩既，不過要話教就另一個故事。


4KH：
呢班精選，比到我有一種度假既感覺。每當心力交瘁既時候，上呢五個學生既堂彷彿替教學熱誠打返支特效針。真係好輕鬆，準備好要教既野、上堂帶個腦帶把口就 OK。不過暫時都係理論層面，到做個陣又可能係 Another Story，始終一落手做就自然多火花。不過總括黎講，呢五個學生都算聽話，Very Good。


小小既感受係，首先，今次無第一次咁大期望，所以無咁大先望。加上上次失敗既經驗，做得好左，知道自己應該要點做。之但係班主任既把關真係好緊要，特別係中一、中二。如果班主任把關得好，好多問題已經迎刃而解。下個禮拜一、二連續兩日睇堂。好似痛痛快快咁殺過片甲不留 ... 長痛不如短痛，來吧。



That's All.

見唔見到呢幾日都無「實習日記」呢？無他既，因為開始上堂，真係少左空閒時間，再加上要趕 Assignment，忙上加忙。咁都係禮拜六晚都係趕 Assignment，咁總算做完。今過今日就要一朝早起身碌返去 IED 交功課，如是者，咁就返左去交。交完之後就開始今日既「渠 G 生日」。

我呢 D 都無乜心肝架啦，咁晏晝去左「盛八」食日本燒烤！就係咁 ↓



真係唔係講笑，幾好食喎！不過老老實實，其實好難唔好食既，自己本身都鍾意呢類既燒烤。佢既「秘製」既汁調個味都幾岩我。開頭諗住好似咁少咁，事實上都唔係多，話好飽又唔係，叫做夠啦。哈，呢間已經係比較平少少既日本燒烤了，不過都唔平架，真係得幾塊肉。

輾轉去左邊呢？再次顯出無心肝的一面，兩個人仔去左太古行，呢個吉之島行下、呢個太古城中心行下，四圍笑下咁，平淡但開心。好啦，話咁快又到左食晚飯時間，今晚就去大家好想去好耐既 Outback！咁落單個下好肚餓，本來諗住叫薯條、洋蔥花、Angus Rib Eye、意粉，但係個侍應提議我地不如唔好叫住，因為都幾多。最後係無叫既，大約就係咁 ↓



真係幾岩我口味，服務重好過上次同肥仔食個次。之但係食到咁上下，突然醒起渠 G 唔食洋蔥！？咁就大件事啦，整個都係洋蔥，無計，就算我點食都係食剩最底個陣 ... 個薯條都食唔晒，個份扒因為貴，所以點都食晒佢，不過兩個配菜剩係好格硬逐小逐小先食得晒個薯條 ↓



真係食到爆肚。其實渠 G 肯食多少少其實係岩岩好，今晚餐飯好似我 Solo 咁，食極都重有。係錢就好啊，用極都重有。食完諗住去世貿影貼紙相，但係期間發生左一件事 ... 令到我地多左個永世難忘既 Event。結果係多左件 Giordano 風褸同多左條裙。輾轉去世貿，又差 D 困 Lift，心諗唔係咁多咁「橋」嘛。好彩無事，好開心影完貼紙相之後先發覺原來生日可以「影一送一」！？不過都無再影多次了，已經夜，第二日重要連上六堂 ....


咁就一年既生日了，驚喜就無了，希望長久！


That's All.

今日真係無乜特別，哀心覺得無乜特別。今日剩係上左 Form 4 一堂，都係無乜特別。之後就有 D 唔同，同人講下拍片既野，都講左一朝。如是者就到 Lunch，都特別，約左渠 G 食，去左麥仔。嗯，麥仔裝修完係靚左既，不過 D 裝修費咪就係加價得返黎。如是者，功課輔導都 Good，因為得三個小學生。之但係 Good 還 Good，返到屋企係攰爆。



That's All.

好啦，就係今日返學之前個晚就已經做好 LS 份功課，就係做功課個陣突然諗到樣野，發覺硬係爭 D 野，個樣就係動力！所以如果大見到有動力火車賣，麻煩通知聲。其實呢份功課諗極都唔明點解要做咁耐，其實真係唔難，又加上係中文，應該好快先係。可惜就係無動力火車載我一程，唉。下一份就係黎緊禮拜五要交既 Professional Teacher，呢份係英文，不過諗落應該無 LS 咁煩，都係吹水、作文。之但係，唔知架動力火車重係唔係度唧。

今日上堂都無乜特別，叫做上 2S，不過都係「小班教學」。無乜特別既，如果無人黎睇堂，其實真係無乜所謂。係有人黎睇堂個陣又要有 D 活動、又要有 D 互動。交晒 D 功課之係有一個禮拜抖陣，好快就開始「每週一檢」既睇堂。每個禮拜都有一班有人黎睇堂，三次夾埋就睇晒我要教個三班 Form 1，一切都係未知知數。希望順順利利啦，總覺得 Postgraduate 係要 Hea Hea 地先似。

夜晚都忙忙地，出左銅鑼灣買野，老老實實，真係攰。



That's All.

好啦，話咁快又一個禮拜，今日係無堂上。不過完全無做過功課，成朝混混沌沌咁過。都算有意義既，睇左三集《MythBusters》，真係好搞笑。如是者就差唔多一日了，時間過得幾快。最遲聽日都一定要開工，唔係食蕉都唔掂 ...

話分兩頭，唔多唔少覺得自己諗負面既野多過正面既野，先幾日有個學生同我講話「嗯，你唔開心呀？」。連學生都見得到，都咪話唔明顯。但係又無話好唔開心，但又唔算好開心。有個種表情既原因可能係攰，因為晚晚睏少左好多、又或者係唔想做功課但係又大把功課、又或者想整理 Portfolio 但又無時機、又或者想搵工但係又未有 Mood 搵。

今日都係開唔到工 ... 個 Dr. 講得無錯，一放學返屋企之後係無心機去做。



That's All.