咁就講下聖誕前後做過乜啦，主要都係做 Assignment 既。

Dec17： 做完第一份 Assignment，今日交埋。

Dec18-19： 預先慶祝聖誕節，到迪迪尼玩下。

Dec20： 返學校幫手帶隊參觀。

Dec21： 寫低 D Comment 比兩個 Form 5 學生，等佢地可以改善下佢地第六個 Project。

Dec24： 正式開工做關於教育哲學既功課。

Dec25： 聖誕崇拜，另加做功課。

Dec26： 做下功課，晏晝出左去來個小慶祝聖誕，到銅鑼灣風月堂食個 Tea ↓



唔係講笑，都幾貴下喎，又唔係真係特別好食。另外不得不提就係我揀個張聖誕卡，真係好型 ↓



Dec27： 都係做下功課，下晝出左中央搵參考書，夜晚就係 7K 班聚。

Dec28： 整理實習後既報告。

Dec29： 返 IED 交功課，餘下兩份於一月頭交。夜晚打 TF2，唔知點解睏唔著，起身食下野，覆學生 EMail。

Dec30： 朝早補返 D 日記，另加打下 TF2，幾有斬獲！加幾幅 Screen Capture，先來係個 Cart 上 Yo 下先 ↓



呢期其實通常都係同細佬並肩作戰，早排佢就通常高分過我，近幾日就我高分返 ↓



當然我都有獨當一面 ↓



希望今日可以改下畫，聽日就準備做另一份功課。結果呢，畫就改晒，整理埋 D 問卷結果 ↓



1L 真有趣。



That's All.

好啦，今朝都唔算一早起身既。咁早餐食乜野呢？就係食應該尋晚切既蛋糕，唔好講笑，都幾多 ↓



再加埋奶茶，真係 Wonderful！個蛋糕係 Sogo 既龍島買，係千層芒果拿破侖，唔係真係咁好食，係我錯，下次唔買佢。個 D 芒果好酸，應該係唔當造或者無浸糖水，個 D Cream 好 Creamy，食 1/4 已經漏漏地。早餐黎講真係幾多，最後係食剩一啖既。房間外有個小露台，個景係對住酒店門口個邊。咁有兩張櫈仔，夜晚用黎坐係度真係餵蚊 ... ↓



再從房內望出去就係咁 ↓



姿姿整整就走人，係酒店四圍逛下，日頭既大堂就係咁，個水晶燈真係幾浮誇 ↓



從大堂影返上去 ↓



Reception，唔知點解影佢呢 ↓



酒店既花園，再加米老鼠花園迷宮 ↓



咁就係酒店外圍逛左陣，本來都帶左泳衣泳褲游水，不過真係時間唔夠，無左件事。酒店個指示牌，又係唔知點解影佢 ↓



呢間就係酒店有得食 Buffet 既餐廳，晚餐大約要 ~$500 一位，所以都食少次了 ↓



櫃員機都華麗左！↓



臨離開個陣見到白雪公主，呢個版本算順眼，有 D 公主真係好醜樣的 ↓



話分兩頭，呢個米老鼠雪人真係好 Cute ↓



好啦，咁都差唔多十二點先到達迪迪尼，見到呢個牌覺得好大陸 Feel ↓



客戶服務中心、顧客服務中心順眼好多。哈，再來 ↓



今日既目標就係玩上次未玩過或者未睇過未試過既野，不過尋晚都 Feel 到今日會好多人，一來係特惠年票聖誕前最後一有效日、二來大陸旅客多、三來香港 D 學生都放假，好難唔多人既。先來就去坐火車 ↓



都幾靚既，繞左圈之後咁岩又有銀樂隊 ↓



之後就開始排隊之旅，都玩到 SpaceMoutain 同巴斯光年，今次門口個機械巴斯整返好 ↓



再來多個索克 ↓



今次分左心去影相，比數係低左 D 既。記得上次去到 Rank 6，都咪話唔勁 ↓



再來都係影多次睡公主城堡，少不免都有合照既 ↓



跟手都兩點零，咁就去皇家定皇室宴會廳食 Lunch。對比起上次既 Junk Food Shop，呢度多好多款野食，而且價值比較起上黎都唔算特別貴，咁就叫左 ↓



有兩 Set 炸蝦天婦羅拉麵，再加一個海鮮炒飯。點解叫咁多？其實係美麗既誤會，本來小雞已經叫左個海鮮炒飯，我就出去叫自己個份，咁叫左份炸蝦天婦羅拉麵。見好似唔係好夠，諗住叫多份天婦羅，但唔知點解最後就變左份炸蝦天婦羅拉麵。咁都無所謂既，今晚預左夜食飯，咁今餐食飽 D 都岩！環境就係咁 ↓



食飽之後就行去睇巡遊，睇下兩旁幾多人，我地都好晏去，不過都搵到個靚位，勁啊 ↓



特別 D 既花車有呢架聖誕米老鼠 ↓



再來多個反斗奇兵花車，巴斯光年真係好 Kai！↓



最後當然就係米老鼠 and Friends ↓



期間見到真人版 Cinderella、小魚仙、白雪公主，唔係講笑，真係好恐怖。唔知點解見到呢 D 卡通人物真人化左之後就覺得好樣衰 ... 反而酒許店見到既白雪公主順眼過依家見到個 D。好啦，之後就去乜乜睡公主許願洞，真係好把鬼。反而另一邊既石化左既白雪公主同七個小矮人更吸引 ↓



去精品店打個轉，見到 ... ↓



鑲滿碎石、小晶，唔係好貴，夠買架車，盛惠 300,000。買左 D 買得起既精品之後，諗住去睇下歌舞表演既，影到既相得呢張 ↓



比個大陸佬遮住晒，本來佢係坐低，但係中途無啦啦企起身影相，Cheap 爆。拎左獅子王歌舞劇既 Fast Pass，見有時間就四圍行。真係唔係講笑，真係多人得好緊要，見到 ... ↓



要等 50 分鐘？！洗玩你？再見到 ... ↓



小飛象都要 60 分鐘？真誇張 ... 見到有棉花糖賣，咁就買左枝兩個人食。期間有個大陸客又係買棉花糖，佢排我後面比錢，但就快過我地去棉花糖個部機。咁佢見到個職員比枝棉花糖我先，佢好愕然，我見到佢咁既反應都好愕然。這裡是香港，這裡要排隊。雖然棉花糖好甜，但係幾滋味。話咁快就夠鐘睇獅子王，個 Fast Pass 無鬼用，諗住會特快入去，點知原來同無 Pass 個 D 人一齊等 ... ↓



今次就坐係上次既座位既對面個台，總括來說，覺得今次無上次咁精彩。一來有個黑人既演員做長老既角色，第一次就係一個肥媽肥個陣既身形既演員，唱起歌上黎好震憾。今次呢個演員就瘦左 D，無咁震憾。其次就係有一 Part 有個演員飾演天鵝，上次就係一名外國演員，身形比較高挑、瘦削，吊 Wire 係空中「跳舞」既動作好優雅。今次就係一名香港演員，唔係話佢做得唔好，但係身材方便輸蝕，真係無上次個位外國演員咁優雅。

除左「Can you Feel the Love Tonight」，另一首係獅子王開頭既歌曲「Circle of Life」都好好聽。係 Elton John 唱既版本 ↓




返去精品店影下相，有雪人版米奇 ↓



女版 ↓



之後就到美國小鎮大街感受下飄雪，其實係泡泡，不過真係幾好 Feel ↓



跟手又比我地見到其他富貴迪迪尼精品，有銀版，$78000 ↓



金版好似十幾萬 ↓



七點鐘左右就返去睡公主城堡前搵位等待九點鐘既煙花表演。本來個位都唔錯，但係前個個人無啦啦坐直左個人，搞到好多相都有佢個死人頭，真係嬲到我震 ... 再者，今次加左個舞台，影起相上黎其實有 D 阻住 ... 呢幅係比較似樣既相 ↓



如是者睇完之後就坐 Shuttle 返酒店拎返 D 行李，順手買埋 D 精品。咁就走人，都咪講笑，都好多人。咁晚飯個餐就係銅鑼灣買鯛魚燒，再係麥仔買 D 野食就算。如是者，咁就完左我地既迪迪尼之旅了。



That's All.

估唔到咁快又去迪迪尼，上次突然回想到既歌曲就係「Can You Feel the Love Tonight」，今次就「A Whole New World」。兩首歌都好鍾意！真係好 Charming。




話說今次就 Book 左住 DisneyLand Hotel，比上次 Disney's Hollywood 貴，包括食野。再加上想感受下間酒店耐 D 又想慳少少，所以計過條數，諗住就自己帶野入去食就算。約左晏晝係銅鑼灣等，咁就係 Sogo 買定 D 野入去，就有以下既物品 ↓



唔好睇小呢到，咁就買左幾百銀。有飲品、乾糧、甜品，都算幾多款啦。買蛋糕個陣問位 Staff 有無冰雪一雪個蛋糕，佢竟然話唔洗！？之但係當然雪下穩陣 D，酒店既雪櫃當然細到震啦，結果就要咁擺 ↓



係咪擺得幾型呢？個位又岩岩好。咁裡面 D 汽水就唯有放出黎 ↓



咁係搗亂間房之前，當然要影返幾幅示範相。間房就係咁樣，維多利亞式風格 ↓



另一個角度睇 ↓



檯頭就係咁，遲下就變左一個戰場，哈 ↓



電視機櫃夠大，用黎放野一流！又當眼，唔會唔記得拎，放野係度影相又夠靚 ↓



Pantry 就係咁，冰桶 D 冰要用錢買，個兩隻杯係個杯櫃拎出黎 ↓



免費既飲品有 ↓



衣櫃有燙衫板 + 燙斗，前者就好多地方都可能有，但係連燙斗都有就好似少見 D。上次個間都唔覺有燙斗 ↓



再來就係個浴室，比預期中大好多，我諗應該大過我間房 ... ↓



係分兩左兩邊，一邊浴室一邊廁所 ↓



洗手盤都幾靚仔 ↓



雪姑七個七個小矮人 ↓



影完相之後都大約下晝四點幾，由於太肚餓，又趕住食 Lunch 既關係。所以無影低係 Sogo 買個 D 野食 ... 食完就離開酒店，去迪迪尼行下睇煙花。酒店大堂都好華麗，如下 ↓



如是者就坐 Shuttle 去迪迪尼睇煙花，先來當然影下睡公主城堡。不過今次係本平既大空地加左個舞台，咁當然阻住晒影相呢 ↓



咁電視宣傳咪話有個立體盲公鏡用黎睇燈飾同煙花有特別效果既，大約就係咁 ↓



睇 D 燈飾或者煙花既時候，就會有「小天使」既影係度，大約係咁 ↓



之但係 ... 本來諗住企返上次影煙花既靚位既，不過無理由兩次都企同一個位架，咁就向右移過少少。Set 好晒腳架之後，諗住都無走雞啦，點知無啦啦前面多左個阿嬋企係度阻住晒。唉 ... 個腳架又 Set 唔得高，結果變左「手拍王」，左手就托係個腳架上，右手輔助，都算影到下既，不過辛苦囉。唉 ... 失晒預算 ... 呢張算 OK 既 ↓



走個陣影到門口既米老鼠噴泉，米老鼠會升上升落的 ↓



睇完之後就返酒店，個陣都幾肚餓下。走廊燈飾，靚 ↓



係電視睇返迪迪尼廣告，唔係話唔靚既，不過真係好多人 ↓



晚飯就係豪吃杯麵，哈哈，慳返唔少啊！有四款揀，重有支 カルピス，係日本飲過其他味，今次就係巨峰提子 ↓



呢兩款杯麵就係平時較少食得到既烏冬，一個係炸蝦天婦羅味、另一味係雞肉 ↓



一個又點夠飽，再食多個和歌山特濃豬骨湯拉麵，唔係講笑，真係好濃，絕對唔差得過街所謂拉麵店 ↓



少不了既就係甜品啦，呢兩件係美心買的 ↓



食完都差唔多十一點，睇埋《宜室宜居有辦法》都睏了。準備聽日再去迪迪尼！



That's All.

今日返左去 IED Debriefing，其實都無乜特別既，返去同同學吹下水、填下問卷咁唧。但過埋今日，第一次實習基本上叫做完成，剩下的只是一些 Essay、Report。講講同學仔既經歷，就咁聽，VA 既同學整體上既經歷其實幾 OK，可能係教Visual Arts 既關係吧。不過聽到其他 Major 既同學既分享，當然有 D 野都令人側目啦 ... 可以用兩句來總結：「一家唔知一家事」、「家家有本難唸的經」。

咁講返自己，雖然四個星期既時間唔長，但係都經歷左好多野。關於教學上既有兩大方面，第一是課堂管理 → 「輕鬆上堂不代表沒有秩序」、第二是評核標準→ 「拉 Curve？標準參照？」、「Hea 做都要鼓勵？！」。自己方面既有三大方面，第一是與學生之間的關係 → 「如何建立互信關係」、第二是實習老師的定位 → 「實習老師只是來實習？」、第三是情緒管理技巧 → 「上堂如何上得開心些」。咁就逐一講下。



1. 「輕鬆上堂不代表沒有秩序」，這個真係好有趣。我發覺有 D 學生將兩者有點混淆。我明白 VA 堂係輕鬆先可以盡情創作，但係又未致於無時無刻都走來走去，大聲傾計。當我係大班面前講緊野既時候，我接受有少少細細聲既討論。我都接受創作時學生行去望下其他同學做成點。但大前題係學生知道課堂目標係做乜野，唔係成堂乜都唔做重走來走去。依家先知原來自己接受唔到學生齋坐係度「思考」，認為要有 D Mind Map、Reference Book 先可以激發到創作。

我樂於 Stop 佢地，但係一 Stop 佢地又話你發老脾。學生就係唔明適當既規則係保障佢地既自由。我諗我地個陣同依家學生既分別係我地勉強都知道幾時要停，但係依家 D 學生好似一放不復反咁 ... 一鬆就出事。至搞笑既係 ... 好多學生好鍾意帶其他科既野黎 VA 堂，佢地諗住有得做，但結果當然比人斷正無得做啦。自己都明白學生係其他堂都好 Tense，上 VA 堂可以令佢地覺得輕鬆下。但係學生又唔明白 VA 老師都有佢既難處，硬係要上 VA 堂先放肆，咁又點得呢。



2. 評核方面，開頭我覺得公平性好重要，無理由 Hea 畫都有 7 分既。合格就係 5 分，好既高分 D，但又無可能有好多 10 分。試過用九品中正制去分，其實都準既。不過諗深一層，會唔會用標準參照既方式去評分更有利學生呢？如是者又試過，個標準都分得幾仔細，點樣教就點比分。呢個方法唔係唔好，不過又好似無鼓勵到學生進步。所以呢，都有諗過用個人標準參照既方式，咁學生有進步的話，都值得加許一下。但係又會牽涉信度問題，都係要 D 時間探索下。

遇上 Hea 做的話，我試過同學生講、希望學生改善下。但係學生都唔肯改既時候，咁唯有比低 D 分甚至唔合格。如果用標準參照既方式透明度會大 D 同埋詳細 D，等學生都知道邊方面做得唔好。不過諗深一層 ... 係咪 Hea 做都應該體諒呢？始終呢科真係講天份 ... 下次實習時又再諗下。



3. 「如何建立互信關係」，這是一個很難的課題。平時都有特登 Recess、Lunch、After School 既時間去搵 D 學生傾下計。特別係 Form 1，雖然唔係日日上堂，但係日日都見到。老老實實，雖然同有 D 學生既關係比較差，但整體來說都算係咁上下。建立互信關係並非四星期就能辦到的事情。都係睇一 D D 班啦，有 D 唔係自己教既班反而關係好少少，可能大家未見對方真面目，無面反。

不過就正正同學生比較 Friend，D 學生係我面前表露真性情，郁手郁腳、講粗口都有。咁佢地都只係玩既，不過始終我係老師，係我面前做 D 咁既野都唔係太好。話說上堂個陣，有位男同學對腳伸前去對面位既女同學，咁女同學就向男同學輕輕踢左幾腳，咁岩比我見到。我都知道佢地只係玩下，但係唔理佢地又好似唔係好岩咁。結果我就問佢，如果你係老師，見到咁既情況應該點做好呢？佢地都答唔到，都係一笑置之。課堂外都有呢 D 事發生，有一個 Form 1 既學生生得好細粒，佢就好鍾意同高大過佢既學生玩，又抱頭又攬腳，手舞足蹈，總之乜都玩一餐。咁我好言相勸叫個位細細粒既學生唔好咁樣玩，佢又唔聽，結果有一次就因為咁玩就撞親個頭。除左恥笑之外都係恥笑，好在佢剩係撞親下，萬一撞爆頭就大件事。雖然大家都知道係學生問題，但係老師在場都玩到頭破血流，始終都會覺得老師有問題啦。呢 D 難處學生係唔明 ...

其實我覺得係建立關係呢方面做得比其他實習老師 / 同學多，一來係母校既關係，二來跟老師上堂上得多，所以同學生比較熟絡。係好事黎既，熟左始終好多事都易做 D。



4. 「實習老師只是來實習？」，正確來說今次實習是「School Experience」，體驗一下學校生活，應該專注係自己身上。呢個看法幾岩我，本來我都覺得教好學生或者將影響力減到最低係大前題，但係聽完牧師一 D 分享之後就覺得專注自己身上比較適合。始終今次係第一次實習，而且只係得四星期，要教好學生未免太不切實際。今次實習，真係見到好多、聽到好多、感受都好多。學既野唔係甚麼大道理，反而係一 D 需要留意既小事，例如同學生說話既用詞、如何有效給學生指示等等。有別於係 IED 上堂，實習既全部都係真實既情況，並非白紙黑字的理論。



5. 「上堂如何上得開心些」。學生對你黑面，咪自己 Fil 走佢既樣。學生用言語挑戰你，咪當聽唔到。學生做 D 低 B 野，咪一笑置之。邊個學生專心 D，咪比多 D 個別指導佢。就係咁簡單！有種想法更好，就係呢 D 學生只係十幾歲，好多野都唔知 / 唔顧慮，我大人地成十年，點介意得咁多。



又講返上次睇堂既事，話說睇完堂之後個日，對住個班學生真係笑唔出，好嬲咩又唔係。剩係唔想理佢地。但之後有學生同我講話點解唔一早提佢地有人黎睇堂，有人睇堂既話佢地會靜 D 乖 D。聽完之後都唔知好嬲定好笑，理論上佢地見到有個外人係度，就知道應該有 D 野啦。但佢地又唔知，反而比平時更活躍。所以都唔怪佢地，係自己衰唔通知聲佢地。除此之外，我係要係個堂做個難 D既 Topic，係自己抵死。要學生用廣告彩，更加係自己搬舊石頭擲自己腳。所有事都可以避免，但自己係要踩鋼線，的確係自招，絕對唔怪得人。



講返 D 今次實習後發覺既缺點先，第一就係當左學生係同自己咁上下年齡既人。有時說話既語氣、用詞、表情好似同朋友傾計咁，有 D 學生就覺得我串。你問我覺唔覺自己串，我自己都覺既。但其實串得黎係友善既，好似好矛盾咁？其實一 D 都無衝突，只係講野直截了當，但真心為人好。或者背後既原因係悶悶地，想搵 D 野講下咁。識我耐 D 就知我係一個甚麼既人。D 學生見得我幾次，點知道我係乜野人。同埋唔知係咪表情唔夠豐富，好多時都係擺出一個嚴肅 / Cool 的表情。咁既表情用黎講笑，D 人咪意為我真心串佢，其實我剩係想搞下笑唧。好多時 D 人就係分唔到我認真定講笑。

其次就係對學生要求高了些，未能做到深入淺出。意為學生能力能做到，結果同預期差好遠。下次嘗試 Set 兩至三種程度，等唔同能力學生都可以各自達到目標。能力稍遜既學生又唔會覺得太難做唔到，能力較強既學生又唔會覺得太易做而唔做。最後呢，我諗我都係要求上堂有多少秩序既人，咁睇下用甚麼方法可以令課堂氣紛正面 D。用多 D 微笑教學可能有幫助。



咁實習都有 D 野值得高興既。雖然有 D 學生係衰 D，但宏觀黎睇都 OK 既。對比起其他較差既學校，我班所謂衰既學生都唔算衰。值得高興既係呢四個禮拜裡面經歷左好多野，的確係寶貴，都好感謝老師所作出既安排同意見。見到學生學到野，覺得自己既心機無白費，再加上佢地有 D 都感受到老師既努力，都好安慰。

當中有挫折，除左得到老師們、牧師、朋友們既開解和建議外，我亦得到好多來自學生既支持。Calvin、Selina、嘉蔚、子聰都聽左我講左好多次「苦處」，真係辛苦晒打搞晒。School Picnic 作為 Last Day，真係幾特別既，呢 D 真係咁岩。最後呢，見到 Form 5 有兩位學生肯聽取我的意見。有一個學生係用電腦做既產品設計，佢既完成品真係幾完成。雖然唔係點關自己事，但真係好開心同興奮。不過佢個 Project有地方可以再改善下，未知佢會唔會再改呢。



最後最後，再諗深一下，就好易發覺身邊既朋友仔個個都係高 EQ，特別係小雞！最低 EQ 個個就係我。如果你係我朋友又覺得自己係低 EQ，請話聲我知，不過我諗應該無，哈哈。



感謝主



暫完。

That's All.

今日係「放假」既第一日，難得放假，少不免睏翻十個八個鐘。十點幾起身之後就搵下野 Download、同人吹下水、睇埋集 Gundam 00 咁就到晏晝。原本係諗住朝早就做份 Essay 既，不過做完朝早 D 野都開始睇下禮拜三要交個份 Essay 既題目，咁都決定左做邊題，抄低左要借邊部書，見到有幾本書係香港仔都有得借。咁岩抵錫雞係香港仔，當然打比佢叫佢幫個手借書。如是者之後就見到呢段片 ↓




Good Duck, Mr.President. 不過真係對布殊有一番新睇法，身手都幾好喎。之前 D 人講笑話佢同普京隻揪實輸，但今日見佢都幾閃得，話唔定都有得打下。

下晝就出左香港仔同抵錫雞食 Tea，佢之前都搵左我幾次話唔洗我出黎，唔知點解呢。一出到去佢都係「黐實」，重話唔洗我出黎，哼。如是者又夠鐘「功課輔導」，開頭諗住都係 Hea Hea 地，事實係好旺場，都做過無停手。

這就是一天「正常」的日子。希望 ... 真係希望能快快手做完禮拜三份 Essay 可以小休一下。



That's All.